Вы читаете ustavschik

Служба праведному Лазарю Четверодневному

« previous entry | next entry »
ноя. 5, 2009 | 10:55 pm

Предлагаемая вниманию читателей «Уставных заметок» бденная служба святому праведному Лазарю, другу Божию и епископу Китийскому (для празднования на перенесение его святых мощей 17 октября), была переведена с греческого языка в Греко-латинском кабинете МДА под руководством доцента игумена Дионисия (Шлёнова). К сожалению, в имеющемся у меня экземпляре перевода нет Богородичнов с 3-й по 9-ю песен канона — только их инципиты. Если кто-то из читателей «Заметок» может заполнить сию лакуну — сообщите, пожалуйста.

Служба святому Лазарю, епископу Китийскому
На велицей вечерни
На Г
осподи, воззвах: стихиры, глас 2.
Подобен: К
иими похвальными:
Киими похвальными песньми воспоем богоноснаго / от востока возсиявшаго и тварь всю просветившаго, / вo множестве чудес и знамений / друга Владыки божественнаго Лазаря, / Марфы и Марии сродника, / Вифании отпрыска, Кипра славу, Византии крепость, / нашего помощника, и предстателя, // и божественнаго защитника?
Киими благовоньми Христова умастим друга, на небесех пребывающаго, / и на сущих на земли призирающаго, / память его совершающих, / таинника Истины и Учителя, / яко сего и умершаго оживотвори, / живота и смерти Господь сый, Иисус Бог наш, // всем даруяй божественную благодать и велию милость.
Слово не возможет смертное воспети величия твоя, / имиже от Христа обогатился еси, / яко благодарный друг и истинный, / Лазаре самовидче Спасителя: / в тебе бо общаго воскресения проповедь познася, / от века проповедуемая, / еже сотворит во скончании века Творец, Христос Бог наш // имеяй велию милость.
Иныя стихиры, глас 4.
Подобен: Я
ко добля в мученицех:
Святе священствовал еси и преподобно упасл еси, / отче священнейший, / твое стадо, якоже бо пастырь богоданный, / Апостол другий, яко священноначальник мудрый, / Богу угодил еси, / ныне же и прежде, / сего ради и чудесы велиими и многими прославился еси, // богоблаженне Лазаре. Дважды.
С
лавы Господь тя умершаго воскреси, / апостоли же Его тя поставиша Кипра пастыря и председателя, / Чистая же и Непорочная омофором священным твое украшает достоинство, / и градов царствующий град твоим обладает многоценным телом, // якоже и Стефана блаженнаго.
Бога божественною благодатию / всечестныя твоя мощи из гроба / днесь пренесе с благоговением и почтением / в град царский царь благочестивый, / священнейший Лазаре, / и положи во храме святем, егоже тебе воздвиже, // в честь твоея преславныя памяти, юже днесь совершаем.
Слава, глас 6:
Днесь созывает нас равноапостольный и близкий друг Христов / на трапезу духовную и веселие. / Приидите убо, празднолюбцы, / таковаго пира приобщившеся, / и памяти сего истиннии явльшеся соучастницы, / почтим ю псалмы и пении и песньми духовными, / вопиюще к нему и глаголюще: / священноначальниче Христов всеславный Лазаре, / иже чрез своя божественныя мощи / днесь на праздничный день нас возводяй, / и удостой ны яже с тобою радости на небесех, / к Богу дерзновением твоим, // отче священнейший.
И ныне, Богородичен, глас той же:
К
то Тебе не ублажит, Пресвятая Дево:
Вход. Свете тихий: Прокимен дне. Чтения.
Притчей чтение: П
амять праведнаго с похвалами:
Притчей чтение: Уста праведнаго:
Премудрости Соломоновы чтение: Праведник аще постигнет:
На литии стихиры, глас 1:
От востока яко звезду светлую возсиявшаго / и тварь светом всю освятившаго, / друга Христова божественнаго Лазаря, песнопеньми прославим / сей есть, егоже Господь друга Своего нарече / сей есть, емуже Богородица Мариам облачение церковное содела, / иже всем вожделен и во всех чудесен, / иже служит за ны Своему Владыце и Богу // еже спастися душам нашим.
Глас 2:
Прежде честнаго страдания Твоего, Господи, / и прежде славнаго Воскресения Твоего, / Лазаря праведнаго и непорочнаго друга проповедал еси учеником Твоим / и болезнь и смерть того уяснил еси, / имже всем утвердил еси общее человек воскресение; / сей Тя прослави на земли / страж став божественных заповедей Твоих, / ныне же прославлен бысть от Тебе изрядно, / яко Сам о нем благоволил еси, // егоже молитвами, Владыко, помилуй нас.
Глас 3:
Како не дивлюся равноангельному житию твоему, / божественне Лазаре; / или како не прославлю твой день сей светлый, / воньже яко от чертога возсияло есть тело твое божественное из гроба, / и в град царствующий отыде, по благому совету Вышняго; / славнейший бо во царех Лев, почтивый песньми пробуждение твое, / и само божественне устрой пренесение божественных мощей твоих, // имиже всем познася велие к Богу дерзновение твое.
Глас 4:
Священноначальников божественное сокровище, / Лазаре богомудре преподобне, / ты в равноангельном житии явился еси, / отонюдуже Церкви предстателем став, / словесное упасл еси стадо Христово, / в преподобии и правде всяческих, / в удел бо Кипр получив, апостольски люди его упасл еси, / и из него к Другу, Егоже желал, удалился еси, / Емуже и предстоя на небесех, // моли и за ны, отче, тя чтущих.
Слава, глас 5:
Церкве светило и фарисейския льсти отъятель явлься, / преподобне Лазаре, / Христа показался еси друг неложный; / ты бо яко пастырь истинный, / дне зной подъял еси, и хлад претерпел еси нощи; / и ныне на небесех динарий целый во всем приял еси; / предстоя престолу величия, со Апостолы яко равноапостольный, / и со священноначальники яко священнейший, / и надзирая благословляеши ны, // память твою прославляющих в пениях.
И ныне, Богородичен, глас той же:
Ублажаем Тя, Богородице Дево / и славим Тя, вернии, по долгу, / град неколеблемый / стену нерушимую, несокрушимое предстательство / и прибежище душ наших.
На стиховне стихиры, глас 5.
Подобен: Р
адуйся, подвижнических истинно:
Радуйся, во Апостолех Христа, яко равноапостольный, / и друже близкий, Самаго Бога всех, / и священноначальниче почитаемый, / Лазаре богомудре, многочудесне; / ты бо лета многая священнодействовал еси превосходне, / и ангельски пожив достигл еси небесная праведных селения, / идеже обитают святых дуси, и Ангелов чинове, / с нимиже не престай, молим ти ся, выну молитися, // за празднущих божественную память твою.
Стих: Честна пред Господем / смерть преподобных Его.
Радуется благочестивых множество, / памяти славней твоей, Лазаре, / о ней бо весь Кипр и Вифания ликует / и Константина великий град, / в немже многоценное сокровиществуется тело твое, / в немже храм твой построен великий, / в немже чудеса яко вода источаются / сия тебе сотвори / по совету свыше, благочестивейший царь, / мудрый Лев, блаженне, / сего ради почитающим тя // подаждь молитвами твоими велию милость.
Стих: Священницы Твои облекутся в правду, / и преподобнии Твои возрадуются.
Видено бысть световидное и приятное / настоящее твоего тела явление, треблаженне, / и вчинися достойно памяти почитаемыя / от богоносцев и запечатано, / темже, празднолюбцы суще, твой торжествуем праздник, / и в храм твой входяще славим прославльшаго тя преславно Богочеловека / идеже и лобызающе божественный образ твой, / чтим и по рачению вместо божественнаго твоего гроба / и вопием верно: // не престай молитися за рабов твоих.
Слава, глас 8:
Приидите, вси вернии, / во псалмех и песнех хвалу Богу возниспослем, / Иже прежде Воскресения всемирнаго / сие общее Воскресение утверди, / и прежде четырех умершаго дней Лазаря праведнаго воскреси и друга нарече / моления ради Марфы и Марии, / сродников его и верных ко Господу, / сего сие прославляюще, / самаго святаго мощей днесь пренесение празднующе, / из глубины сердца возопиим, глаголюще: / Господи, твоего служителя воскресивый из гроба, / и нас воскреси, умерщвленных грехом // и спаси души наша.
И ныне, Богородичен, глас той же: Владычице, приими:
Тропарь, глас 1:
Общее воскресение миру хотя уверити, / из мертвых тя воздвиг, Лазаре, Христос Бог, / темже и мы ныне, якоже иногда отроцы Тому, / благочестивыя приносяще песни, / тебе, возлюбленному Спасителя, вопием: / молитвами твоими, богоносче, // всяческих избави зол нас, тя чтущих.
Ин обретения, глас той же.
Подобен: К
амени запечатану:
Мощей твоих божественных пренесение, Лазаре, / в царственный град, / еже божественным смотрением соверши самодержец верный, / почитающе, празднуем честно, / и вопием ти тако от Бога великопрославленному: / слава тя прославльшему Христу, / слава тя чудесы удостоившему, // слава тобою общее пробуждение явльшему.
Богородичен: Гавриилу вещавшу:
На утрени
По 1 стихословии седален, глас 1.
Подобен: Г
роб Твой, Спасе:
Ихже позна Бог, сих призывает к хвале Его, в сыновство божественное; Оный и тя, Лазаря, познав, призва в сыновство, в священство божественное, и умерша тя животворит четверодневнаго, о чудо странное.
Слава, иный, подобен:
Таинницы Христа, самовидцы Слова пастыря словесных тя овец Кипра поставиша, ты же остался еси до конца непреклонен, сего ради показал еси чудодейственное твое тело, идущее во царствующий град, божественнейший Лазаре.
И ныне, Богородичен, подобен: Мария, чистое Владыки вместилище:
По 2 стихословии седален, глас 3.
Подобен: Б
ожественныя веры:
Божественный услышал еси глас Господень, зовый тя из ада несолнечных недр, богомудре, сего ради овии яко убийцы вознегодоваша, овии же яко Христовы ученицы совозрадовашася, божественне Лазаре, божественное чудо зряще, и начаша прославляти Бога и тя воспевати.
Слава, иный.
Подобен: К
расоте:
Близость к Создателю твоему делом явил еси, пожив превосходне, егда на Кипре люди пасл еси лета многая, иный третийнадесять Господень апостол явился еси, божественне Лазаре, божественныя славы исполняемый; темже в дерзновении обретыйся, моли о славящих тя.
И ныне, Богородичен, подобен: Красоте девства:
По полиелеи седален, глас 4.
Подобен: У
дивися Иосиф:
Удивляет всяк ум еже о тебе предъисполнившееся, из Самаго Искупителя, Лазаре истинно светле, яко словом упраздни все владычество ада горькаго един Господь, и естества законы разруши; идеже бо хощет Бог, побеждается естества чин, якоже есть писано; темже и тварь вся сорадуется, созерцающи чудо.
Слава, иный, подобен:
Священствовав добре, яко от Бога чудесы прославленный, и почил еси свято, весь в надежде блазе, многая лета на земли твое божественное тело остававшееся в тайне явным сотвори Лев мудрый, мановением уншим; и в храме положи нарочитом, в Царице градов, и прославися Иже во святых прославляемый Господь.
И ныне, Богородичен, подобен: Удивися Иосиф:
Евангелие от Иоанна, зачало 39 от полу: Во время оно прииде Иисус в Вифанию:
И абие псалом 50.
Слава: М
олитвами друга Твоего Лазаря:
И ныне: Молитвами Богородицы:
Самогласен, глас 6:
Преподобне отче, / священноначальниче Христов и друже близкий, / самовидче равноангельный, и равноапостольный Лазаре, / избави ны, почитающих воскрешение твое / и последующее премещение / и божественнаго тела твоего явление, / от различных напастей и зол, и одесную Спасителя удостой призвания // к Нему божественными молении твоими.
Канон Богородице со ирмосы на 6 и святаго два канона на 8.
Канон святаго по алфавиту, без Богородичных,
о первом житии, глас 4.
Песнь 1. Ирмос: О
тверзу уста моя:
Отверзу уста моя воспети твое, Лазаре, божественное житие, ныне прошу тя, тебе подобающее не престай подавати мне, божественным молением твоим, блаженне, о рабе твоем.
Шествовав в подражание праотцев твоих, Лазаре, божественных, яко божествен, Авраама и прочих, предуведел еси Бога воплотившагося, и Сего удостоился видети Богочеловека.
Земнаго не приобрел еси мудрования, якоже проклятии иудеи, блаженне, противу Создателя твоего, но познал еси Его и поклонился еси, и друга приобрел еси, о высото твоя.
Богородичен: Радость Тебе принесе Гавриил противоположную клятве праматере, с небесе целование, Ты бо родила еси нам благословение и всем источила еси радость вечную.
Другий канон святаго по противоположному алфавиту,
о втором житии святаго и пренесении его мощей, глас 8.
Ирмос: К
олесницегонителя фараоня:
Яко священноначальник, яко боговидец, Лазаре, яко равноапостольный, имаши молитися за чтущих тя, сего ради желающему ти ныне почтити божественных мощей твоих явление, слово мое управи, молюся.
Души праведных Богу предстоят и о них свидетельствуют мощи, на земле стоящия, творящия всекрасная чудеса, яко божественнаго Лазаря богославное тело днесь, егоже божественною памятию да усладимся.
Радостию сорадуется Кипр днесь, и царский град, богоносче, един гроба твоего, другий мощей твоих божественною славою обогатившиеся, и сию поминающе, радуются Творцу, веселящеся.
Богородичен: Неудержимыми противу нас смерть движеньми бе пользовалася, но к твоему Рождению приблизившийся погибе, и нападающи упразднися, Богородице Дево, Живот бо истинно вечный, воплотивыйся, родила еси.
Катавасия: Отверзу уста моя:
Песнь 3. Ирмос: Твоя песнословцы:
Сосуд став божественныя благодати, Лазаре, почитаемый, явился еси и благоугоден Богу вочеловечшемуся нас ради и спасшему яже Ему покоришася.
Предстал еси Богу воплотившемуся, мудре, верою правою, отстал еси, гнушаяся, от евреев соборищ, сего ради друг стал еси со сродницами Творцу твоему.
Жизнь привременную оставив, и в гробе страшнем заключився, единому зову поспешил еси, в воскресение Христово, возвратившись, Лазаре, невозбранно чудом.
Богородичен: Радуйся, врата единая, яже Слово:
Ин. Ирмос: Утверждей в начале:
Света светильник став, Лазарь житием Непорочнаго священноначальник стал из самих Христа соапостолов превосходне, и люди просвещает делы и словесы и чудесы.
Руками предуготовленный Апостолов, триблаженне священноначальниче, сих приобрел еси божественные добродетели, священноначальником бо стал еси пример и образ, божественными даровании твоими.
Светлыя твоя добродетели Всечистая возлюбив, облачения ради священного о тебе помнит, на Кипре якоже подобает тебе обитающу, Лазаре, и Бога воспевающу, яко священноначальник, Богом взятый.
Катавасия: Твоя песнословцы:
Седален, глас 4.
Подобен: В
ознесыйся на Крест:
Яко Христова тя ближайшаго друга, яко от мертвых Им возставленнаго, и священноначальника подобно святейшаго, верные просители твои, благоглаголем тя блаженне, Лазаре божественне, и верно вопием: молитвами твоими яже к Богу спаси насот различных напастей и скорбей.
Слава, иный, подобен.
Возвращся к животу яко ото сна, и преселенцем став из отечества, священствовав превосходне, почил еси, исполнь святости, отеческаго заблуждения став поругание и враг велий зело, верным же почтенен показавыйся, Богочеловека Христа явился еси ближний.
И ныне, Богородичен, подобен.
Н
е умолчим никогда, Богородице:
Песнь 4. Ирмос: Неизследный Божий совет:
Услышал еси зовущаго тя Творца из тайных ада и поспешил еси возвратитися к житию, якоже подобает, и отличитися, Лазаре, противу хитраго мстителя.
Желая воскресение Создатель общее миру уведети, тя умершаго и погребеннаго воскрешает, повелительным возглашением, гряди вон, Лазаре, возгласив ти.
Милостива соделай о нас Того же Владыку и Господа, яко дерзновением к Нему обогатився, благочестиво воспевающих твою святую память в песнех.
Богородичен: Радуйся, осененная горо:
Ин. Ирмос: Ты моя крепость:
Ты Христову Церковь упасл еси, ты срама евреев бежал еси и фарисеев волею, Лазаре богомудре, ты еси верных людей сладость, ты Кипра божественная крепость, ты Вифании покровитель, ты божественнаго храма твоего благолепие.
Витий хитрости никакоже возмогут по достоинству твое воспети житие ангельское, Иже бо из мира Апостолов Богочеловек избравый, Сей, блаженне, тя избра на сие, третьего надесять инаго апостола.
Обогащает самодержец днесь царствующий град мощами твоими, мановением Божиим, и храмом твоим, мы же и сию память твою, якоже и первую, совершаем, темже яко священноначальник, яко равноапостольный и друг Владыки Христа, ны ущедри.
Богородичен: Цветущий безсмертия рай:
Катавасия: Неизследный Божий совет:
Песнь 5. Ирмос: Ужасошася всяческая:
Украшается гробом твоим Вифания вся, идеже четверодневна смердяща Жизнодавец властию Своею лежаща воскреси мертва, тя друга, Лазаре, и к животу направи.
Лазаря памятию и Кипр радуется весь, и град Константина о теле, принесенном вонь, и о храме чудеснем, егоже созда мудрый среди царей.
Блажен блаженных стал еси, Лазаре, Егоже не видеша пророцы, во плоти пришедша, Сего увидел еси, и совозлегл еси с Ним, и Оный тя воздвиже умершаго из гроба.
Богородичен: Радуйся, прозябшая:
Ин. Ирмос: Вcкую мя отринул еси:
Храм твой зде, и во других, божественне Лазаре, изливает чудеса, с небесе благодать получая, и обогащает в нем к тебе приходящих, и совершающих память твою, преподобне.
Странное чудо узреся, егда мощей твоих Лев премудрый гробницу из Кипра в царственный град пренесе, тогда болезни и демонов приражения из человек многих изгна.
Победитель победоносен противу мстителя, Лазаре, стал еси, сего ради, блаженне, и тело твое источает чудеса, ныне и храм твой, и образ твой на иконе, и имя твое единственное, всеславне.
Богородичен: Верных предстательнице:
Катавасия: Ужасошася всяческая:
Песнь 6. Ирмос: Божественное сие:
Победити хотя смерть и показати смертным таинство, сие творит Жизнодавец и Господь, твоею смертию и пробуждением.
Поражает ум всяк смертный еже о Лазаре чудо, мертв бо лежай, и смердяй четверодневен, воскресе словом единым Владычествующаго.
Прежде безвестный Лазарь, ныне известный зрится и показывается, и иже николиже на ум человеком не восхождаше, во всех концех земли уже прославляется.
Богородичен: Радуйся, божественнаго угля:
Ин. Ирмос: Очисти мя, Спасе.
Безумствуяй еврейский народ на Лазаря устремися, сей же яже от тех же предуведев, на Кипр отправися, в немже назначается из Апостолов священноначальник божественнейший.
Светило великое показався Церкве, успе, мудрый же царь в божественнем видении его всечестное приносит тело во граде градов.
Правило явился еси живота иерархом и всем, темже и яже о тебе, всеславне Лазаре, суть необычайна, и чудес исполнена, яко богоугодно житие твое.
Богородичен: Спаса и Избавителя Бога всех и Господа:
Катавасия: Божественное сие:
Кондак, глас 8.
Подобен: В
збранной:
Владыки подражателя и друга близкаго, четверодневна от Него возставляема, воспеваем тя раби твои по долгу, Вифании бо возсиял яко солнце, и Кипр, яко апостол, просветил еси, сего ради вопием: радуйся, славне Лазаре.
Икос.
Ангел яко иный, Лазаре, явился еси, на земли яко на небеси пожив, сего ради со ангелы представ, и со апостолы купно со священноначальники веселяся, слышиши от нас, поющих, сицевая:
Радуйся, славо Востока; радуйся, цвете Вифании.
Радуйся, иудеев злобных обличение; радуйся, фарисеев всех поношение.
Радуйся, яко друг явился еси Владыки и Бога; радуйся, яко благодать получил еси за вся люди.
Радуйся, безсмертие души проповедавый; радуйся, цену ея показавый.
Радуйся, сыне Христова пробуждения; радуйся, блистание божественнаго просвещения.
Радуйся, воне святаго твоего тела; радуйся, сладосте святаго храма твоего.
Радуйся, преславне Лазаре.
Синаксарь
В сей месяц, в день седмыйнадесять
праздновати нам вверено обретение честных мощей
святаго и праведнаго Лазаря четверодневнаго и друга Христа Бога нашего.
Стихи.
Подъяв Христову другу град врата,
Лазаре изыди, христоподражательно глаголет.
Блаженный и славный и в царех мудрейший и вернейший Лев, в году осемьсот девятидесятом, подвигнувшись божественною ревностию, сице же и божественным вдохновением, первее основа едину церковь, величественнейшую и прекраснейшую, во имя святаго и праведнаго сего Лазаря, и монастырь целый состави. По сих же посла и пренесе от Кипра святыя его мощи, яже обретошася низу в земли, внутрь некоего ковчега мраморнаго, во граде Китийстем, по прошествии мало не осмисот тридесяти лет по его там погребении; быша же запечатлены на мраморе ковчега буквы сия на инем наречии: «Лазарь четверодневен и друг Христов». Егда же достигоша Константиня града святыя сия мощи, положи их царь во иную гробницу сребряную, и тако сокровиществова их любочестно, внутрь во им созданнем храме.
В сей день пренесение в храм иже в Константинополе
честных мощей сего святаго и праведнаго Лазаря.
Стихи.
Пряча мертвое тело Лазаря Рим новый,
Иная пред нами является Вифания.
Тоежде обретение находим и в четвертый день маиа, обаче зрим, яко по построении императором храма и пренесении вонь святых мощей, паки посла сей и принесе святыя мощи сестры его Марии, в тойже маиа день, и сокровиществова и их тамо.
Песнь 7. Ирмос: Не послужиша:
Явися слава твоя неразумным, славне Лазаре, сего ради устремляешися в бегство якоже ти заповедано бысть, по замыслу благому Спасителя твоего, Иже отцев Господь и Бог сый единый.
Витийствуяй не в силах язык, преподобне, воспети твое во плоти житие, ты бо угодил еси воплощшемуся Богу, воздвигшему тя от гроба, Лазаре, четверодневна смердяща.
Сорадуются лицы и совеселятся Ангелов днесь, священноначальников истинне, преподобных и праведных и апостолов Христовых, божественный ныне прославляется Лазарь, нами и всеми.
Богородичен: Радуйся, мосте:
Ин. Ирмос: Отроцы еврейстии:
Да славы твоея приобщится градов всех честнейший, храмом твоим обогащается и честными мощами, яко и первомученика ранее обогатися Стефана.
Божественныя славы удостаивается, молящу ти ся Богу, твоему Другу, богоносче, всяк обретый тя покровителя и молитвенника ко Господу, Егоже поем во веки.
Подвижнически, Лазаре, пожил еси в молчании и чистоте и плаче, и во всех вкупе божественных воздаяниех, многая лета втораго жительства твоего.
Катавасия: Не послужиша:
Песнь 8. Ирмос: Отроки благочестивыя:
Ранен бе народ иудейский, завистию объятый злокозненный, сей бо, не понес твоея славы, юже преобрел еси от Христа, замышляет новая и тщетная противу Жизнодавца сотворити, Лазаре богомудре, и противу тя воскресша.
Гимны и песньми твою увенчивает память Вифания и весь град царский, Кипр и вся благочестивых, богомудре, собрания, Лазаре, сего ради твое радостное все пробуждение поем во вся веки.
Света узрил еси посреде, богомудре, иудеев и фарисеев, Егоже бо предвозвестиша пророцы вси, Бога плотию явльшагогося, Сего не познаша, яко тщетнии евреев отроцы, яко ты Сего познал еси Бога воплощенна.
Богородичен: Радуйся, небес высочайшая:
Ин. Ирмос: Царя Небеснаго:
Горяй духом яко Павел, показался еси достоин паствы словесных овец, Лазаре божественный, Христа священноначальниче.
О божественнем тела твоего положении правитель радуется с народом Господним, и плещет руками на твоих торжествах и поет божественная песнопения.
Славословится и сама твоя память, божественне Лазаре, в нейже твое явился тело исполнь освящения и славы.
Богородичен: Искушений ты находы изгоняеши:
Катавасия: Отроцы благочестивыя:
Песнь 9. Ирмос: Всяк земнородный:
Радуется и ликует, Лазаре, вселенная, твое празднующи чудотворение, еже Сам Господь ти содела в Вифании, преподобне, в отечестве твоем, те же, иже ему паче сего радуются, твоего наслаждающиеся гроба воспитанницы.
Поет и плещет руками праздничная днесь, мудре, паства твоя об исхождении твоем, и сего память совершающи, Лазаре, перваго не престает совершати поминовения, и прославляет Иже славы, и жизни и смерти Господа.
О дарований, яже паче постижения, ихже удостоился еси, Лазаре божественне, Бога бо друга зде стяжал еси, и Егоже тварь вся вместити не может, Сего возымел еси, яко гостя, в собственном, мудре, твоем жилище.
Богородичен: Радуйся, златая свещнице и трапезо:
Ин. Ирмос: Ужасеся о сем:
Вкусив смерти тлетворныя, не истлел еси всецело, Лазаре, но воскреснув от всех Творца, поставлен весь благопременителен паствы Кипра божественный пастырь от апостолов, на немже Богородица о твоем достоинстве воспомяну.
Царственный град, твоею гробницею обогатився, изрядно радуется, яко иногда возрадовася оный о первомученице, имже Многомилостивый Своя милости с небес ниспосла независтно, яко своим таинником и служителем.
Да прочтеши песнь, нашими усты ти приносимую, и приими ю, и Христу, Лазаре, не прекращай яко Другу твоему моляся даровати всем мир и умирение быти, и подаст всем спасение, яко благ и всесилен.
Богородичен: Видена бысть, о Дево Мати Божия:
Катавасия: Всяк земнородный:
Екзапостиларий.
Подобен: С
о ученики взыдем:
Учеником сорадовался еси, зря Владыку, с сими возлежаща в храмине отеческой, с нимиже и ты по смерти пируяй зрим был еси, всем уверяяй, яко истинно востал еси от мертвых, по четырех днех во иже мертвецев гробе, богомудре Лазаре, верных сладосте.
Слава, ин, подобен:
Яко друг Владыки твоего, и священноначальник божественный, яко исполнь святости со дерзновением стоиши со апостолы Его на небесех, божественне отче, с нимиже моли, преподобне, Владыку непрестанно за ны, верно чтущих твою ныне память, и приходящих к твоим святым мощем.
И ныне, Богородичен, подобен:
Троицы, Дщи, родила еси неизреченно Единаго, сугуба естеством:
На хвалитех поставим стихов 4 и поем стихиры, глас 4:
Прежде общаго воскресения / Творец тожде уверити хотя воскресение, / верующим в божественное апостолов проповедание, / отче богомудре Лазаре / сие утверди делом Господь твоим воскресением, / отонюдуже явился еси сын первороден проповедания / и ереси противостоя, желающим поставити беззаконная // правым же покровитель сердцем и защитник.
Священствуя великий о Господе Лазарь / обогатися божественною благодатию / и добродетели вся ороси / сухи пребывающия человеческия души от жара безбожия и тщеты / и сам бо яко достойный Бога сосуд, богосвидетельствован соделася весь, / сего ради яко друг подобне близкий Его и таинник став, // и Матере Девы, за всех ходатайствует.
Священствовав божественный богоугодно Лазарь во многих летех, / успе и в гробнице погребается, / многия совершившу времене круги вне гроба, / тогда божественным чудом преносится мудрым самодержцем / божетвенный гроб из Кипра во царственный град, / и положен бысть в храме собственном яко богатство многоценное // в песнех и пениях, во псалмех и восклицаниях.
Чрез божественный образ и храм твой / и к Богу божественное моление твое / тя почитающе величаемся, / предстателя приобретше и божественное пристанище, и столп неколеблемый / отонюдуже яко равноангельный, яко равноапостольный, / и Владыки яко близкий, и Богородицы, Лазаре божественне, / многое улучил еси дерзновение, / сего ради проси душам нашим божественное утешение // и мир и всякое падений наших божественное оставление.
Слава, глас 5:
Надлежаще и Царице градов / и божественных твоих мощей насладитися святости, / Лазаре боговидче и Богом свидетельствованный преподобне; / Вифания бо яко отеческая гордится гробом твоим, и Кипр с нею, / град же царственный никакоже мний есть обоих, / теми же мощами твоими обогатився, / чрез них и всми людие во всяцем граде и стране твою чтут память, священноначальниче, / яко равноангельнаго и равноапостольнаго, и друга близкаго Христова, / и яко четверодневна воставша из гроба от Самаго Спасителя, // спасающаго тобою души наша.
И ныне, Богородичен, глас тойже: Ублажаем Тя, Богородице Дево: (зри на литии)
Славословие великое, и отпуст.

Ссылка | Оставить комментарий | В избранное | Поделиться

Comments {5}

russportal

Богородичны 2-го канона

from: russportal
date: ноя. 21, 2013 07:08 pm (UTC)
Ссылка

Первый-шестой богородичны 2-го канона (гл. 8) св. Лазаря взяты со службы преп. Саввы Освященнаго; 7-й — со службы прор. Захаріи Серповидца (8 февр., пѣснь 7-я); 8-й — малаго молебн. канона Богородицы (пѣснь 8-я); 9-й — со службы ап. Іоанна Богослова (8 мая, пѣснь 9-я второго канона) или воскр. канона Октоиха 8-го гласа (пѣснь 9-я).

Пѣснь 1-я:
Θεοτοκίον. Ἀκατασχέτοις καθ’ ἡμῶν ὁ θάνατος...
Богоро́диченъ: Неуде́ржными на на́съ сме́рть стремле́ньми я́тся, но, Твоему́ Рождеству́ прибли́жившися, поги́бе и, прирази́вшися, упраздни́ся, Богоро́дице Дѣ́во, Жи́знь бо вои́стинну присносу́щную воплоти́вшуюся родила́ еси́.

Пѣснь 3-я:
Θεοτοκίον. Σωτηριώδους δι’ ἡμᾶς, τοῦ Λόγου οἰκονομίας...
Богоро́диченъ: Спаси́тельнаго на́съ ра́ди Сло́ва строе́нія свѣ́тлая Ты́, Ма́ти Дѣ́во, две́рь позна́лася еси́ вои́стинну: Ты́ бо на́мъ ввела́ еси́ у́мную лучу́ Пребоже́ственнаго Божества́.

Пѣснь 4-я:
Θεοτοκίον. Νεοθαλής, ἀθανασίας Παράδεισος, καὶ ὡραῖος...
Богоро́диченъ: Новоцвѣ́тный безсме́ртія ра́й и красе́нъ вои́стинну показа́лася еси́, дре́во жи́зни, въ Тебѣ́ насажде́нное, богонача́льнѣйше чревонося́щи и ражда́ющи, всѣ́мъ иска́пающее спаси́тельныя наде́жды, вѣ́рно Богоро́дицу му́дрствующимъ Тя́.

Пѣснь 5-я:
Θεοτοκίον. Τῶν πιστῶν ἡ προστάτις, τεῖχος ἀκατάλυτον...
Богоро́диченъ: Вѣ́рныхъ Предста́тельница, стѣна́ неразруши́ма благохва́лящихъ Тя́, я́ко всему́ ро́ду человѣ́ческому я́вльшееся спасе́ніе, Бо́га ро́ждши тѣле́снѣ я́вльшася, ду́шу мою́ спаси́, Пречи́стая.

Пѣснь 6-я:
Θεοτοκίον. Σωτῆρα καὶ λυτρωτήν, Θεὸν τῶν ὅλων καὶ Κύριον...
Богоро́диченъ: Спа́са и Изба́вителя, Бо́га всѣ́хъ и Го́спода ро́ждши, на́мъ пло́тію пріобщи́вшася, спаса́й, Пречи́стая, призыва́ющія Тя́ отъ бѣ́дъ, Влады́чице.

Пѣснь 7-я:
Θεοτοκίον. Ὕμνοις γεραίρω σε Παρθένε, τὴν τιμήσασαν...
Богоро́диченъ: Пѣ́сньми почита́ю Тя́, Дѣ́во, поче́тшую ро́дъ человѣ́ческій, безче́стіемъ лю́тымъ пе́рвѣе осужде́нный: благослове́нъ, Всечи́стая, Пло́дъ Твоего́ чре́ва.

Пѣснь 8-я:
Θεοτοκίον. Τῶν πειρασμῶν σὺ τὰς προσβολὰς ἐκδιώκεις...
Напа́стей Ты прило́ги отгоня́еши, и страсте́й нахо́ды, Дѣ́во: тѣ́мже Тя пое́мъ во вся вѣ́ки.

Пѣснь 9-я:
Θεοτοκίον. Ὡράθης ὦ Παρθένε Μήτηρ Θεοῦ, ὑπὲρ φύσιν τεκοῦσα ἐν σώματι...
Богоро́диченъ: Яви́лася еси́, о Дѣ́во Ма́ти Бо́жія, па́че естества́ ро́ждши пло́тію Бо́га Сло́ва, Его́же Оте́цъ отры́гну отъ се́рдца Своего́ пре́жде всѣхъ вѣкъ, я́ко Благъ, Его́же ны́нѣ и тѣле́съ превы́шша разумѣ́емъ, а́ще и въ тѣ́ло облече́ся.


Edited at 2013-11-21 19:16 (UTC)

Ответить | Ветвь дискуссии

Уставщик

Re: Богородичны 2-го канона

from: ustavschik
date: ноя. 21, 2013 08:09 pm (UTC)
Ссылка

Благодарю!

Ответить | Уровень выше | Ветвь дискуссии

russportal

Богородичны 1-го канона (греч.)

from: russportal
date: ноя. 22, 2013 10:33 am (UTC)
Ссылка


ᾨδὴ α'.
Θεοτοκίον. Χαράν σοι ἐκόμισεν, ὁ Γαβριὴλ τὸ ἀντίθετον, ἀρᾶς τῆς προμήτορος, έξ οὐρανοῦ ἀσπασμόν, σὺ γὰρ ἔτεκες, ἡμῖν τὴν εὐλογίαν, καὶ πᾶσιν έπήγασας, χαρὰν αἰώνιον.

ᾨδὴ γ'.
Θεοτοκίον. Χαῖρε πύλη μόνη, ἣν ὁ Λόγος, διώδευσε μόνος, ἡ μοχλούς, καὶ πύλας ᾅδου Δέσποινα, τῷ τόκῳ σου συντρίψασα· χαῖρε ἡ θεία εἴσοδος, τῶν σῳζομένων Πανύμνητε.
Ра́дуйся, две́ре еди́на, Еюже Сло́во про́йде еди́но, вереи́ и врата́ а́дова, Влады́чице, Рождество́мъ Твои́мъ сокруши́вшая; ра́дуйся, Боже́ственный вхо́де спаса́емыхъ, Богоневѣ́сто.
(Канонъ Акаѳиста, пѣснь 3-я)

ᾨδὴ δ'.
Θεοτοκίον. Χαῖρε τὸ κατάσκιον ὄρος Θεοῦ, ὅπερ Ἀββακοὺμ ἐθεάσατο, χαῖρε ἡ θεία, Κιβωτὸς καὶ λογική, ἣν Νῶε προετύπωσε, χαῖρε Θεοτόκε Πανύμνητε.

ᾨδὴ ε'.
Θεοτοκίον. Χαίροις ἡ βλαστήσασα, τὸν φυτουργὸν τῆς κτίσεως, χαῖρε ἡ τεκοῦσα τὸν τροφέα παντὸς τοῦ κόσμου καὶ γαλουχήσασα, χαῖρε ἱερέων ἥ στολή, καὶ πιστῶν διάδημα, βασιλέων καὶ καύχημα.

ᾨδὴ ς'.
Θεοτοκίον. Χαῖρε λαβὶς θείου ἄνθρακος, χαῖρε θυμιατήριον πάγχρυσον, χαῖρε ὀσφράδιον, χαῖρε θυμίαμα εὔοσμον, χαῖρε τοῦ οὐρανίου μύρου ἀλάβαστρον.

ᾨδὴ ζ'.
Θεοτοκίον. Χαῖρε γέφυρα, πιστοὺς πάντας μετάγουσα, πρὸς ἀτελεύτητον, καὶ μἁκαρίαν ζωήν, χαῖρε στύλε πύρινε, καθοδηγῶν πρὸς Θεόν, τοὺς κραυγάζοντας· εὐλογημένος Πάναγνε, ὁ καρπὸς τῆς σῆς κοιλίας.

ᾨδὴ η'.
Θεοτοκίον. Χαίροις οὐρανῶν ὑψηλοτέρα, καὶ πάντων τιμιωτέρα θείων τάξεων, χαῖρε βάθος ἄπειρον, ὕψος ἀκατάληπτον, χαῖρε ἡλίου ὄχημα, καὶ ἐνδιαίτημα, τὸ κλέος καὶ κειμήλιον χαῖρε, τῶν ὑμνολογούντων, σὲ Κόρη εἰς αἰῶνας.

ᾨδὴ θ'.
Θεοτοκίον. Χαῖρε ἡ χρυσή, λυχνία καὶ τράπεζα, πιστοὺς ἐκτρέφουσα, χαῖρε ἀγεώργητε, γῆ ζωηφόρον στάχυν βλαστήσασα, χαῖρε βροτῶν διάσωσμα, καὶ θεῖον καύχημα, τῶν βοώντων, χαίροις παμμακάριστε, Θεοτόκε Ἀγνή ἀειπάρθενε.

Ответить | Уровень выше | Ветвь дискуссии

russportal

Другие богородичны

from: russportal
date: ноя. 22, 2013 11:35 am (UTC)
Ссылка

Богородиченъ на Литіи:
Блажи́мъ Тя́ Богоро́дице Дѣ́во, и сла́вимъ Тя́ вѣ́рніи по до́лгу, гра́дъ непоколеби́мый, стѣ́ну необори́мую, тве́рдую предста́тельницу, и прибѣ́жище ду́шъ на́шихъ.

По 1-мъ стихословіи:
Марíе, честно́е Влады́ки прія́телище, воскреси́ ны па́дшія въ про́пасть лю́таго отча́янія, и прегрѣше́ній и скорбе́й, Ты́ бо еси́ грѣ́шнымъ спасе́ніе и по́мощь, и крѣ́пкое предста́тельство, и спаса́еши рабы́ Твоя́.

По 2-мъ стихословіи:
Красотѣ́ дѣ́вства Твоего́, и пресвѣ́тлой чистотѣ́ Твое́й, Гавріи́лъ удиви́вся, вопія́ше Ти́, Богоро́дице: ку́ю Ти́ похвалу́ принесу́ досто́йную? Что́ же возымену́ю Тя́? Недоумѣва́ю и ужаса́юся. Тѣ́мже, я́ко повелѣ́нъ бы́хъ, вопію́ Ти́: ра́дуйся, Благода́тная.

По поліелеи:
Удиви́ся Іо́сифъ, е́же па́че естества́ зря́ и внима́ше мы́слію, и́же на руно́ до́ждь, въ безсѣ́менномъ зача́тіи Твое́мъ, Богоро́дице, купину́, огне́мъ неопали́мую, же́злъ Ааро́новъ прозя́бшій, и, свидѣ́тельствуя, обру́чникъ Тво́й и храни́тель свяще́нникомъ взыва́ше: Дѣ́ва ражда́етъ и по Рождествѣ́ па́ки Дѣ́ва пребыва́етъ.

По 3-й пѣсни:
Не умолчи́мъ никогда́, Богоро́дице, си́лы Твоя́ глаго́лати, недосто́йніи. Аще бо Ты́ не бы́ предстоя́ла, моля́щи, кто́ бы на́съ изба́вилъ отъ толи́кихъ бѣ́дъ? Кто́ же бы сохрани́лъ до ны́нѣ свобо́дны? Не отсту́пимъ, Влады́чице, отъ Тебе́, Твоя́ бо рабы́ спаса́еши при́сно отъ вся́кихъ лю́тыхъ.

По ексапостиларіи:
Отъ Тро́ицы родила́ еси́, Отрокови́це, Еди́наго неизрече́нно, во двою́ естеству́ су́ща, и сугу́ба дѣ́йствомъ и еди́наго ѵпоста́сію. Того́ у́бо моли́ при́сно о и́же вѣ́рою покланя́ющихся, отъ вся́каго навѣ́та вра́жія изба́витися, я́ко вси къ Тебѣ́ ны́нѣ прибѣга́емъ, Влады́чице Богоро́дице.
(Богородиченъ по 8-мъ воскресномъ ексапостиларіи)

Ответить | Уровень выше | Ветвь дискуссии

russportal

Прокимны Утрени и Литургии

from: russportal
date: ноя. 22, 2013 11:54 am (UTC)
Ссылка

Прокименъ на Утрени, гла́съ 4:
Свяще́нницы Твои́, Го́споди, облеку́тся въ пра́вду, и преподо́бніи Твои́ возра́дуются.
Стихъ: Уста́ моя́ возглаго́лютъ прему́дрость, и поуче́ніе се́рдца моего́ ра́зумъ.

На Литургіи:
Блаже́нна, отъ кано́на святи́теля пѣ́снь 3-я и 6-я. Проки́менъ, гла́съ 3: Госпо́дь просвѣще́ніе мое́ и Спаси́тель мо́й, кого́ убою́ся? Сти́хъ: Госпо́дь Защи́титель живота́ моего́, отъ кого́ устрашу́ся? Апо́столъ ко Евре́емъ, зача́ло 333 отъ полу́. [Аллилу́ія, гла́съ 2: Уста́ пра́веднаго поуча́тся прему́дрости, и язы́къ eго́ возглаго́летъ су́дъ. Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́.] Ева́нгеліе Іоа́нна, зача́ло 36. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.

Ответить | Уровень выше | Ветвь дискуссии