Вы читаете ustavschik

Надоела реклама? Купите платный аккаунт и больше вы не увидите рекламы!

Служба преподобным отцем и старцем Глинским

« previous entry | next entry »
окт. 20, 2010 | 09:04 pm

Служба Глинским преподобным составлена протоиереем Илией Тетерько, клириком г. Одессы; публикуется по авторской машинописи.

СЛУЖБА
преподобным и богоносным отцам нашим, во обители Глинстей преславно просиявшим.
На велицей вечерни
Б
лажен муж: 1-й антифон.
На Г
осподи, воззвах: стихиры на 10: праздника 3 и святых 7.
Стихиры праздника, глас 1.
Подобен: Н
ебесных чинов:
Иоаким и Анна торжествуют, / начаток рождше нашего спасения,/ едину Богородицу, / с нимиже и мы празднуем днесь, / от корене онаго Иессеева / блажаще Деву Чистую.
Боговместимая Отроковица / и Богородица Чистая, / пророков слава, Давидова Дщи / днесь раждается от Иоакима и Анны целомудренныя, / и Адамова клятва, яже на нас, / потребляется рождеством Ея.
Яже прежде неплодная страна / землю плодоносну раждает / и, от неплодныя утробы плод свят давши, млеком питает. / Чудо страшно! Питательница Жизни нашея, / Яже Небесный Хлеб во чреве приемши, / млеком от сосцу питается.
Ины стихиры святых, глас 8:
Днесь приспе пресветлая память / блаженных отцев наших Глинских, / приидите ныне, вернии, / псалмы и песньми, и пеньми духовными / честное их прославление ублажим, / любовию тех почитающе.
Грядите, верных собори, / преподобных отцев наших Глинских почтим, / иже ныне, яко новая светила, / на тверди российстей утверждаются, / лучами благодати сияюще, / и во гласе радования воспоим им, глаголюще: / преподобнии отцы наши всеблаженнии, / просите у Христа Бога милость улучити, / любовию память вашу совершающим.
Преподобнии старцы Глинстии, / не забудите нас убогих, / но молите Всещедраго Господа, / Емуже благочестно во время жития вашего служисте, / да обитель вашу не оставит Своею милостию, / и всех, яже в ней подвизаются / и верою и любовию к вам притекают / наследники жизни вечныя сотворит.
Ины стихиры, глас 4:
Веселися, обитель Глинская, / и торжествуй во благознаменитый день праздника, / се прославляем верных сынов твоих: / Филарета Богомудраго, / Серафима Богоноснаго, / Илиодора - скита устроителя, / Иоанникия смиреннейшаго / и Досифея благоговейнаго,/ и прочих с ними, яже в тебе добре подвизалися / и ныне подают благодать изобильно / всем благочестно собор их почитающим.
Красная мира и яже в нем возненавидели есте, / Христа же возлюбисте, / отцы наши Иннокентие, Василие и Макарие, / Андрониче, Серафиме / и святителю земли Иверския Зиновие, / Сиона мысленнаго жителие показалися есте, / Божественным Духом себе вооружисте / и льстиваго победили есте / силою от Девы Возсиявшаго.
От юности, отцы преподобнии, / плотская мудрования духови покорили есте, / в живоносную мертвость одеявшеся, / Луко, Архиппе и Евфимие славнии, / мир оставили есте лукавый / и пустыни Глинския светильницы богосияннии явилися есте. / Ныне же Владыце вашему священнолепно предстоите, / со ангелы ликовствующе и о нас молящеся.
Образи смирения и самоотвержения, / отцы наши Феодоте и Мартирие, явистеся, / в нищету Христову облекшееся, / мирскаго пристрастия возгнушалися есте, / чистым умом и немятежным сердцем Богу добре послужили есте, / Иже днесь вас прослави, / Емуже молитеся о душах наших.
Слава, глас 8:
Кто изглаголет силы Господни, / или кий язык земнородный изречет / чудное житие ваше, отцы Богоноснии? / Киими песньми подвиги ваша прославим? / Бдением бо и постом, и слезами плоть свою измождающе, / молитвою и смирением сокрушили есте гордыню вражию, / в мертвенных телесех, аки ангели просиявше, / в Небесныя кровы преселилися есте, всечестнии. / Отнюдуже нас посетите в днешний день, / хвалами воспевающих честное ваше о Бозе собрание, / и испросите от Христа Бога улучити нам велию милость.
И ныне, глас 5. Ефрема Кария:
О блаженная двоица, / вы всех родителей превзыдосте, / яко твари всея Преимущую прозябли есте! / Истинно блажен еси, Иоакиме, / таковы Отроковицы быв родитель. / Блаженна ложесна твоя, Анно, / яко Матерь Жизни нашея прозябла еси; / Блажени сосцы, имиже воздоила еси млеком Питавшую / Питающаго всякое дыхание, / Егоже молите, вам, всеблаженнии, молимся, / помиловатися душам нашим.
Вход. Прокимен дне, и чтения 3.
Премудрости Соломоновы чтение (глава 3):
Праведных души в руце Божией, и не прикoснется их мука. Непщевани быша во очесех безумных умрети, и вменися озлобление исход их. И еже от нас шествие сокрушение, они же суть в мире. Ибо пред лицем человеческим аще и муку примут, упование их безсмертия исполнено. И вмале наказании бывше, великими благодетельствовани будут, яко Бог искуси я и обрете их достойны Себе. Яко злато в горниле, искуси их и, яко всеплодие жертвенное, прият я. И во время посещения их возсияют и, яко искры по стеблию потекут. Судят языком и обладают людьми, и воцарится Господь в них во веки. Надеющиися Нань разумеют истину и вернии в любви пребудут Ему, яко благодать и милость в преподобных Его и посещение во избранных Его.
Премудрости Соломоновы чтение (глава 5 и 6):
Праведницы во веки живут, и в Господе мзда их, и попечение их у Вышняго. Сего ради примут Царствие благолепия и венец доброты от руки Господни, зане десницею покрыет я и мышцею защитит их. Примет всеоружие рвение свое и вооружит тварь в месть врагом. Облечется в броня правды и возложит шлем суд нелицемерен. Примет щит непобедимый преподобие, поострит же напрасный гнев во оружие, споборет же с ним мир на безумныя. Пойдут праволучныя стрелы молниины и, яко от благокругла лука облаков, на намерение полетят. И от каменометныя ярости исполнь падут грады, вознегодует на них вода морская, реки же потопят я нагло. Сопротив станет им дух силы и, яко вихор, развеет их, и опустошит всю землю беззаконие, и злодейство превратит престолы сильных. Слышите убо, царие, и разумейте, навыкните, судии концев земли, внушите, держащие множества и гордящиися о народех язык, яко дана есть от Господа держава вам и сила от Вышняго.
Премудрости Соломоновы чтение (глава 4):
Праведник, аще постигнет скончатися, в покои будет. Старость бо честна не многолетна, ниже в числе лет исчитается. Седина же есть мудрость человеком, и возраст старости, житие нескверное. Благоугоден Богови быв, возлюблен бысть, и живый посреде грешник, преставлен бысть. Восхищен бысть, да не злоба изменит разума его, или лесть прельстит душу его. Рачение злобы помрачает добрая, и парение похоти пременяет ум незлобив. Скончався вмале, исполни лета долга. Угодна бо бе Господеви душа его. Сего ради потщася от среды лукавствия. Людие же видевше, и не разумевше, ниже положше в помышлении таковое: яко благодать и милость в преподобных Его, и посещение во избранных Его.
На литии стихира храма и святых, глас 6:
Преподобнии отцы наши Глинстии, / сошедшеся любовию в преславное празднество ваше, / светло торжествующе, Давидски глаголем: / Честна пред Господем смерть преподобных Его. / Вы бо, всечестнии, в путех Владычних ходивше / и животы своя честне скончавше, / с преподобными и всеми святыми водворилися есте, / с нимиже молитеся Господеви, / помиловатися душам нашим.
Православныя веры блюстителие, / монашествующих известнии учителие, / наставницы благочесивых / и потребителие лести бысте, отцы небомудреннии, / световодителие душ наших, / Ангелов сообщницы, Троицы поборницы.
Слава, глас 2:
Человецы Небеснии и земнии Ангели, / преподобнии отцы обители Глинския, / добре подвиг совершившии / и веру соблюдшии,/ живот смертный на безсмертный пременисте, / молитеся непрестанно прославльшему вас Господу, / да помилует и спасет души наша.
И ныне, глас тойже. Анатолия Патриарха:
Что шум празднующих бывает? / Иоаким и Анна торжествуют тайно: / радуйтеся с нами, глаголюще, Адаме и Ево, днесь, / яко имже древле преступлением затвориша рай, / плод благославен нам дадеся,/ Богоотроковица Мария, / отверзающи его всем вход.
На стиховне стихиры, глас 5.
Подобен: Р
адуйся:
Радуйтеся, преподобнии старцы наши Глинстии, / се бо всемилостивый Господь дивно прослави вас, / и похвала ваша во вся концы земли пройде; / мы же к цельбоносным телесем вашим припадающе, / во умилении глаголем: / испросите нам у Христа Бога вилия милости.
Стих: Восхвалятся преподобнии во славе / и возрадуются на ложах своих.
Радуйтеся, отцы наши Богомудрии, / подвиги своими обитель Пречитыя онебесившии / и многим путь верный ко спасению показавшии, / путеводите и нас ко Христу Богу, / да теплыми молитвами вашими / причастницы жизни вечныя будем.
Стих: Воспойте Господеви песнь нову, / хвалите Его в церкви преподобных.
Радуйся, соборе честный преподобных, / Царицы Небесныя полче, / добродетелей хранилища, / смиреномудрия сокровища,/ кротости красная собрания, / рассуждения столпи, источницы умиления, / любы сугубыя явление, / Христа молите / душам нашим дати велию милость.
Слава, глас 8:
Монашествующих собори и мирстии, / соберитеся и светлое торжество составите: / се бо всех нас призваша к радости духовней, / иже во обители Глинстей постничествоваша, вси преподобнии, / своя борения предложивше, / и страдания, и подвиги, / яже паче естества подъяша.
И ныне, глас тойже:
Иже из неплодных ложесн / жезл, Святую Богородицу, израстивше, / из Неяже Спасение миру возсия, Христос Бог, / сопруг свят и сожительство свято, Иоаким и Анна, / тии, преставльшеся к Небесным селением, / с своею Дщерию, Пречистою Девою, / со Ангелы ликуют, о мире молитвы творяще./ С нимиже и мы, сошедшеся благочестно, воспевающе, глаголем: / иже Богоотроковицею и Пречистою Мариею / прародителе Христовы нарекшеся, / молитеся о душах наших.
На благословении хлебов тропарь преподобных, дважды и празднику: Рождество Твое, Богородице Дево: единожды.
Тропарь преподобным, глас 4:
Обители Глинския дивное прозябение / и земли нашея преславнии заступницы, / преподобнии и богоноснии отцы наша,/ наставничества духовнаго усерднии возродители / и иноческаго жития равноангельнаго ревнители, / молитеся присно ко Господу, / да помилует люди Своя, яко Благ и Человеколюбец.
На утрени
На Б
ог Господь: тропарь праздника дважды. Слава, преподобным. И ныне, праздника.
По 1-м стихословии седален, глас 3:
Иноческаго лика преславная украшения / ныне мирови являются,/ и души всех верных светло возвеселяются, / днесь бо преславное торжество: / память отцев наших Глинских совершается, / иже древле во обители своей дивно прославишася / и ныне души наша / любовию ко Господу воспламеняют.
Слава, и ныне, праздника, глас тойже:
Дева днесь и Богородица Мария, / чертог неразоримый Небеснаго Жениха, раждается / от неплодныя Анны Божиею волею, / носило Божия Слова уготовльшися: / в сие бо предповелеся бытии Отроковица / и Мати сущия Жизни.
По 2-м стихословии седален, глас 4:
Совершенную к Богу любовь стяжавшии, / отцы преподобнии, / земная презресте и к Небесным взыдосте, радуяся,/ венценосцы преблаженнии, / молите прославльшаго вас Господа, / да спасет от тли души наша.
Слава, и ныне, праздника, глас тойже:
Давиде, яже клятся тебе древле Помазавый тя, / плод от чресла твоего на престоле твоем исполни, дав Марию. / Зриши бо Юже от Анны Иудовы и радуешися, / из Неяже Христос воплотися, Спас всяческих, / безмерною благостию спасая род наш.
По полиелее седален, глас 8:
Ликуй днесь светло, обитель Глинская, / тожествуй, верных собрание, / се пречудно Господь прослави / лик всечестных и преподобных отцев, / Небесных заступников наших / и о всем мире теплейших молитвенников. / Мы же, радующеся, к ним возопиим: / молите о нас, отцы треблаженнии, / совершающих всепразднственную память вашу / и испросите нам очищение и прощение грехов, / да с вами улучим Небесное наследие.
Слава, и ныне, праздника, глас тойже:
Да радуется Небо, и земля да веселится: / Божие бо небо на земли родися, / Богоневестная Сия, от обетования. / Неплоды Младенца доит Марию, / и радуется о рождестве Иоаким: / жезл, глаголя, родися мне, / из негоже Цвет Христос прозябе, / из корене Давидова. / Воистину чудо преславно!
Таже степенна, 1-й антифон, глас 4. Прокимен, глас 4: Честна пред Господем / смерть преподобных Его. Стих: Что воздам Господеви о всех, / яже воздаде ми? Всякое дыхание: Евангелие от Матфея, зачало 43.
По 50-м псалме стихира самогласна, глас 6:
П
реподобнии отцы, / мира красоты и пищу временную возненавидевше, / иноческое житие возлюбивше, / Ангелов собеседницы явистеся / и светильницы многосветлии чудесы своими показастеся, / о всех нас ныне Христу молитеся, / любовию совершающих всечестную память вашу.
Канон Рождества Богородицы со ирмосом на 6 и святым два канона на 8.
Канон первый, глас 8.
Песнь 1
Ирмос: Воду прошед яко сушу, / и египетскаго зла избежав, / израильтянин вопияше: / Избавителю и Богу нашему поим.
Пощением просиявших, бдением и молитвою прославленных, отцев наших Глинских память почтити приидите, вси вернии, да предстательством их вечныя избегнем муки и Царствия Небеснаго сподобимся.
Обдержими есмы любовию восхвалити ваш собор, богоблаженнии отцы, вы бо хвалими есте от Бога и человек, яко в жизни сей славу мира сего презресте, да исполните повеления Христова.
Дух Святый настави вас на житие постническое, отцы наша преподобнии, темже во обитель Глинскую вселилися есте, идеже благочестно пожисте, Богови добре угодили есте.
Богородичен: Всеосвященный Девства храм, во чреве Бога Слова чревоносившая, притекающия к Тебе и призывающия, Чистая, спаси молитвами Твоими, бед разрушающи нахождение, Всенепорочная.
Ин канон, глас тойже.
Песнь 1.
Преподобне отче Филарете, моли Бога о нас.
Лавру Печерскую от юности твоея местом подвигов избрал еси, отче наш Филарете, идеже духовно водимый иеромонахом Трифилием, от силы в силу восходил еси, Избавителю и Богу поя непрестанно.
Преподобне отче Филарете, моли Бога о нас.
Г
линскую обитель вельми украсил еси, блаженне отче, таже устав монашескаго жития утвердил еси, наставляя, и уча, и приводя собор иноков к Божественней воли.
Преподобне отче Филарете, моли Бога о нас.
Умом выну Господу предстоя, отче преблаженне Филарете, попечение непрестанное о твоей обители имел еси, сего ради поют тебе чада твоя песни благодарственныя.
Богородичен: Мати Преблагословенная, радуйся, Владычице Дево, всем людем похвала, непрестанно молися Христу Богу сохранити место сие и люди молитвами всеблаженнаго Филарета.
Катавасия: Крест начертав:
Песнь 3
Ирмос: Небеснаго круга Верхотворче Господи, / и Церкве Зиждителю, / Ты мене утверди в любви Твоей, / желаний краю, верных утверждение, / едине Человеколюбче.
Источницы сладкотекущии из уст ваших, преподобнии, истекают, услаждающия присно поминающия вас и ученьми вашими последующия.
Житию вашему равноангельному кто не удивится, и подвигом вашим достославным кто не поревнует, отцы всечестнии? Вы же, яко имущии дерзновение у Господа, молите Его, да спасет души наша.
Небесе и земли Создатель место сие - обитель Глинскую - устави, и вас в ней всели, отцы наша треблажении. Причтите и нас в сожитие ваше достославное, да вкупе с вами прославим Творца всех Бога.
Богородичен: Иже вся создавый Господь, по нам Сам зиждется, вселився, Всечистая, во утробу Твою всесвятую, во образ человечь одеяся и Свой образ спасе.
Ин канон.
Преподобне отче Илиодоре, моли Бога о нас.
Истинныя славы взыскующе, тленную и земную презревше, отче Илиодоре всечудне, во обители Глинстей процвел еси славным житием своим. Темже и нам помози о временных не терзатися, но о Горнем мудрствовати, да услышим глас Христов, в Славу Его призывающий.
Преподобне отче Илиодоре, моли Бога о нас.
Тесным путем ко спасению шествовати восхотев, начальник скитскаго жития явился еси, отче Илиодоре богомудре, дарами Духа себе обогативше, молитвенник являешися о всех любовию тя чтущих.
Преподобне отче Иоанникие, моли Бога о нас.
Единому истинному Богу от юности работати возжелел еси, отче наш Иоанникие, во обители Глинстей процвел еси, яко цвет благоухающий добродетельми и чудесы.
Богородичен: Мати Божия Пречистая, вонми молениям чада Твоего, отца нашего Иоанникия, Тебе ради неустанно трудившагося и храмами обитель Твою украсившаго, да принесеши их к Престолу Сына Твоего и Бога нашего.
Седален, глас 4:
Волнящееся житейское море воздержанием преплысте / и ко пристанищу мысленному достигосте, блаженнии отцы Глинстии, / Владыку всех молите, / мир вселенней даровати / и душам нашим велию милость.
Слава, и ныне, праздника, глас тойже:
Дева Мария и Богородица истинно, / яко облак света, днесь возсия нам / и от праведных предгрядет в славу нашу. / Не ктому Адам осуждается, / и Ева от уз свободися, / и сего ради зовем, вопиюще со дерзновением единей Чистей: / радость возвещает рождество Твое всей вселенней.
Или Богородичен, глас тойже:
Озарися древле пустынь Глинская / явлением преславнаго образа Рождества Твоего, Пренепорочная, / темже и души наша любовию Сына Твоего озари, Владычице, / да умиленною душею вопием: / радуйся, Обрадованная, с Тобою Господь, подаяй мирови велию милость.
Песнь 4
Ирмос: Услышах, Господи, / смотрения Твоего таинство, / разумех дела Твоя / и прославих Твое Божество.
К вам прибегаем, заступницы наша скории: вам бо дадеся благодать молитися за ны, темже не оставите ны убогия, но умолите прославльшаго вас Господа, да спасет и просветит души наша.
Ангельски на земли пожисте, отцы наша богомудрии, и ныне со Христом в вечней славе пребывающе, не забудите и нас, чад ваших, к честным телесем вашим припадающих и умиленной душею вопиющих: радуйтеся, вернии заступницы наша, во обители Глинстей преславно Богови послужившии.
Днесь Глинская обитель пресветло торжествует и прославляет собор вернейших чад своих, Господеви усердно поработавших, и лукаваго посрамивших, таже многих ко Христу житием и словесы своими приведших.
Богородичен: Богородице Владычице, по Бозе первое наше предстательство и упование, не забуди обитель Глинскую, идеже древле явила преславный образ честнаго Рождества Твоего, множество чудес от него источивше.
Ин канон.
Преподобне отче Иоанникие, моли Бога о нас.
Клеветником древним гонимый, отче наш Иоанникие, обитель Глинскую оставил еси: кротчайшими стопы своими по водам шествовал еси, Заступнику и Промыслителю же Богу хвалу возсылающе, посрамил еси завистца дерзость.
Преподобне отче Серафиме, моли Бога о нас.
Лики святых живописуя, преподобне отче Серафиме, Образ Христов в сердце своем достойно запечатлел еси, имже все приходящих к тебе озарял еси, ко спасению путеводствуя.
Преподобне отче Серафиме, моли Бога о нас.
Иисусовы молитвы дар стяжавше, безмолвие возлюбил еси, отче Серафиме Богоносе: каждодневно послушания монастырския обхождал еси незримо, дивный во смирении игумен братии обители Глинстей явился еси.
Богородичен: Добраго кормчаго обители Твоея, Мати Преблагословенная, и молитвенника к Тебе дерзновеннаго, отца нашего Серафима, воздыхания приими, Всесвятая, и покрый нас и место сие от всякаго зла благодатным Твоим Покровом.
Песнь 5
Ирмос: Просвети нас повелении Твоими, Господи, / и мышцею Твоею высокою / Твой мир подаждь нам, Человеколюбче.
Любовь вашу ко Господу кто исповесть, отцы наша предивнии? Тою бо укрепляеми, всю бурю житейскаго моря преславно проидосте и пристанища небурнаго достигосте. Ныне же тамо со Христом радующеся, и нам помозите тогожде вкусити.
Отвергше узы земнаго пристрастия постничеством, красоту Божию зрети сподобистеся, вечное веселие вместо трудов и болезней, блажении отцы, приясте.
Свет богосиянный, иже древле на Фаворе апостоли видяху, вы, отцы наша богоблаженнии, в тесных келиях своих узрети сподобилися есте. Темже не оставите нас во тьме неведения и нерадения погибнути, но осияйте нам путь ко спасению.
Богородичен: Рождеством Твоим, Дево, удивляемии купно со отцы нашими Глинстими, яже днесь незримо икону Твоего Рождества обстоящее, взывают с нами: радуйся, Обрадованная! Радуйся, Препрославленная! С Тобою Господь, подаяй мирови велию милость.
Ин канон.
Преподобне отче Иннокентие, моли Бога о нас.
Почепающе воду живу от кладезя премудрости святых отец, приходящих к тебе обильно тою напоял еси, отче наш Иннокентие, темже и ныне орошаеши нас влагою душепищною, классы добродетелей плодоносити нам пособствуя.
Преподобне отче Иннокентие, моли Бога о нас.
Молитвою своею многих ограждал еси, отче Иннокентие славне, от козней диавольских и болезней телесных. И нас, блаженне старче, приими под кров предстательства твоего, да заступлением твоим спасемся.
Преподобне отче Василие, моли Бога о нас.
Иноческое житие возлюбивше, во отрочестем возрасте ангельскаго образа сподобился еси, преподобне отче наш Василие, безмолвия совершеннейшего взыскуя, в пустыни Глинстей водворился еси, идеже даром прозрения от Господа прославился еси.
Богородичен: Успи страстей плоти моея волны неусыпною Твоею, Дево, молитвою, и не даждь греховным уснути мне сном тяжчайшим, ходатайством всечестных отцев пустыни Глинския.
Песнь 6
Ирмос: Молитву пролию ко Господу, / и Тому возвещу печали моя, / яко зол душа моя исполнися, / и живот мой аду приближися, / и молюся яко Иона: / от тли, Боже, возведи мя.
Просвещая Светодавец Господь ваше пощение, угодницы Христовы, отцы всеблаженнии, светозарно содела и явственно прославление ваше, паче зари солнечныя сияющее.
Источник чудес и благодати явися обитель Глинская, обогатившаяся честными мощми вашими, преподобнии, ихже лобызающе с любовию, исцеления приемлем.
Похвалы нашея не возгнушайтеся, отцы богомудрии, но яко кадило благовонное приимите и всех певцев ваших славы Небесныя сподобите.
Богородичен: Верных Твоих соблюди, Дево Пречистая, Рождество Твое преславное празднующих и в памяти отцев Глинских веселящихся.
Ин канон.
Преподобне отче Василие, моли Бога о нас.
Василие досточудне, отче Глинский, не престай молитися о нас, чадех твоих, да ходатайствы твоими избегнем гордости и добродетель смирения и послушания стяжим, да тако прославляющее прославльшаго тя Господа, Царствия Небеснаго достигнути сподобимся.
Преподобне отче Макарие, моли Бога о нас.
Любовию ко Господу издетстка возгоревся, иноческое житие избрал еси, Макарие преподобне, в пречудный виноградник Глинский пришел еси, жития постническаго взыскуя, идеже от рук Богомудраго Аввы Филарета постриг приял еси.
Преподобне отче Макарие, моли Бога о нас.
Непрестанными болезньми тело свое духови поработил еси, отче Макарие блаженне, умною молитвою и келейным затворением душу и сердце просветил еси; повеление от Ангела приемше, во еже назидати люди, явился еси многим наставник благочестия и чистоты учитель.
Богородичен: Кий дар Тебе принесу благодарения, за яже насладихся Твоих дарований и Твоея безмерныя благостыни? Темже убо славлю, песнословлю и величаю Твою неизреченную ко мне милость.
Кондак, глас 3:
Днесь собор Глинских старцев / незримо предстоит в церкви / и купно с ангельскими лики / за нас молится Богу, / обитель древняя торжествует / и веселятся людие православнии, / память совершающе дивных предстателей наших.
Икос:
Возсия, Господи, Отечеству нашему, яко светозарное солнце, священная память Богоносных отцев, всю вселенную озаряющих чудесы и просвещающих светом подвигов своих; тако молитвами Пречистыя Богородицы и старцев преподобных, от бед всех люди православныя избави, обители Глинстей утверждение в добродетелех низпосли, нам же спасение даруй, Владыко, память совершающим дивных предстателей наших.
Песнь 7
Ирмос: От Иудеи дошедше отроцы, / в Вавилоне иногда, / верою Троическою пламень пещный попраша, поюще: / отцев Боже, благословен еси.
Нищету самовольную Христа ради стяжали есте, отцы наша смиренномудрии, добродетельми же обогатилися есте и многих к ревности воздвигли есте, научая Пети Христу: Благословен Бог отец наших.
Суету помыслов смирили есте и языка воздержание исправили есте, отцы преподобнии, от многоглаголания убежавше, уста на молитву простирали есте, и еже точию нуждная глаголати к пользе слышащих и пети Христу: благословен Бог отец наших.
Сокрушите, отцы преславнии, мышцы врагов мысленных, востающих на нас, и луки их сломите, и стрелы притупите молитвами вашими, яко дерзновение велие имея ко Христу, да возможем пети: благословен Бог отец наших.
Богородичен: Послуживших Тебе, Дево Чистая, отцев наших Глинских молитвы приими, Благословенная, и искушений и страстей избави, прерадостно Рождество Твое чествующих.
Ин канон.
Преподобне отче Луко, моли Бога о нас.
И
муще любовь пламенную ко Господу, во обители Глинстей добре подвизался еси, отче наш Луко, братии образ сострадания и послушания являя, иже купно с тобою взываша: отец наших Боже, благословен еси.
Преподобне отче Луко, моли Бога о нас.
Язвами телесными в старости обременяемь, преподобне отче наш Луко, никогда же возроптал еси, обаче нетленным богатством утешаемь, будущия блага прозревал еси, радостно взывая: отец наших Боже, благословен еси.
Преподобне отче Архиппе, моли Бога о нас.
Пекарня братская бысть местом подвигов твоих, преподобне отче Архиппе, идеже непрестанно в трудех и молитвах пребывающе, вопиял из глубины сердечныя Спасителю своему: отец наших Боже, благословен еси.
Богородичен: Разрешая Евину клятву, во Всенепорочную вселился еси Деву, благословения источники источая вопиющим: отец наших Боже, благословен еси.
Песнь 8
Ирмос: Царя Небеснаго, / Егоже поют вои ангельстии, / хвалите и превозносите во вся веки.
Сохрани нас, Господи, от колебаний греховных, молитвами отцев наших Глинских, да верни заповедем Твоим пребывшее, воспоем с ними вкупе: благословите, вся дела Господня, Господа.
Святыя рацы мощей ваших преславныя имут в себе дары благодатныя, честныя телеса ваша, источающия токи чудес, отцы Богоблаженнии, воздвизают взывати: благословите, вся дела Господня, Господа.
Помощницы в скорбех и напастех являетеся нам, отцы достославии, утешителие и молитвенницы тепли за нас ко Спасу Христу, верно с вами Ему вопиющим: благословите, вся дела Господня, Господа.
Богородичен: Страшат мя и смущают прегрешений моих волны, но Ты, Благая Пречистая, за молитвы отцев наших Глинских, прощение испроси в час испытания, спасение подающи.
Ин канон.
Преподобне отче Евфимие, моли Бога о нас.
Слова Спасителя, рекшаго: иже аще хощет в вас вящий быти, да будет вам слуга, в сердце своем запечатлел еси, отче смиренномудре Евфимие, священства уклонился еси, послушание во олтари Господнем имея, чисте вопиял еси: благословите, вся дела Господня, Господа.
Преподобне отче Феодоте, моли Бога о нас.
Имуще кроткий нрав, и добродетель совершеннаго терпения стяжав, николиже от братии виден был еси скорбящим или гневающимся, отче Феодоте блаженне. Ты бо, святе, с младенческим незлобием течение живота своего во обители совершал еси, вопиюще Христу: благословите, вся дела Господня, Господа.
Преподобне отче Мартирие, моли Бога о нас.
Воздержание крайнее соделал еси богатством души твоея, молитву непрестанную пищею для духа совершил еси, отче Мартирие богоблаженне, и достигл еси безстрастия сый на земли, с Гориними Силами воспевая: благословите, вся дела Господня, Господа.
Богородичен: Ты утешение и прибежище, Чистая, рабом Твоим еси: неоскудно твори еже к Богу умиленное моление о иже верою и любовию молящих Тя.
Песнь 9
Ирмос: Воистину Богородицу Тя исповедуем, / спасеннии Тобою, Дево Чистая, / с безплотными лики Тя величающе.
Добре подвиг свой совершивше и веру непоколебиму соблюдше, отцы наша богомудрии, не забудите обитель вашу и всех в ней благочестно жити хотящих, да вас верою и любовию величаем.
Истины Христовы дерзновеннии свидетелие вас разумеем и теплыя о нас к Богу молитвенники обретаем, досточуднии отцы, не престайте помощствовати верным чадам вашим, чтущим вас и прерадостно величающим.
В Небесных селех ныне водворяющеся, телесами же святыми землю нашу освящаете и теми цельбы многоразличныя подаете, отцы достославнии, всем любовия память вашу велехвально величающим.
Ин канон.
Преподобне отче Досифее, моли Бога о нас.
Целомудрия, кротости и послушания зрим тя наставника, отче наш Досифее. Ты бо благочестно и праведно во обители Глинстей живяше, дар прозрения и исцеления стяжал еси, темже тя днесь величаем.
Преподобне отче Андрониче, моли Бога о нас.
Старче благостный, исповедниче Христов и безкровный мучениче, отче достоблаженне Андрониче, житие свое чисто имел еси, служитель Божия Матери изрядный, с Нею же предстоя престолу Вседержителя, молися о память твою величающих.
Преподобне отче Серафиме, моли Бога о нас.
Многим был еси наставник спасения богомудрый и ищущих спасения путевождю, отче Серафиме преподобне. Чистоту сердечную твою венча Христос велиими дарованьми духовными, темже не остави нас сирых, чад твоих, днесь в песнех тя славящих.
Святителю отче Серафиме, моли Бога о нас.
Семена благочестия от старец Глинстих всеянныя в душу твою плод красный принесоша, преподобне отче Серафиме, премудрый бо святитель, пастырь святый и благий и светильник Церкви явился еси, священночестне, Богу служа и люди отечества и земли Иверския просвещая светом своего Богоразумия.
Богородичен: Благословенную Марию Деву и Божию Матерь, приидите, вси вернии, любовию непрестанно восхвалим, Еяже ради обретохом вечное радование.
Светилен:
Яко лампады пресветлыя Света умнаго в нощи неведения явишася ныне, заступницы наша отцы преподобнии, лучами благодати своея дивно сияющия и греховный мрак конечне упраздняющия, темже молим вас, достоблаженнии, просветите души и сердца наша светом исправлений своих.
Слава, и ныне, праздника:
Адаме, обновися, и Ева, возвеличися, / пророцы, со апостолы ликуйте и праведными, / общая бо радость возсия Ангелов же и человеков / от праведных днесь Иоакима и Анны, Богородица Мария.
На хвалитех стихиры праздника, глас 6:
Подобен: Т
ридневен:
Ныне играй, пророче Давиде, / се бо от чресл твоих Дева, / Богоотроковица Мария, / родися преславно, / Еяже ради земнии божественно / обретоша воззвание падения.
Умерщвления совлачится тины, благодатию, / Адам со Евою, / и оживляются всеродная, / от неплодныя бо рождшися / истинно, Богородица / мирское разреши неплодство.
Всечестное Твое рождество / светло торжествуем со Ангелы, / Мати Дево Чистая. / Но, о Богородительнице, / не престай защищати христиан, / воспевающих Тя.
Инны стихиры святых, глас 2:
Подобен: Д
оме Евфрафов:
Доме Пречистыя, / обитель Глинская славная, / украсися ныне светло, / торжествующе память отцев преподобных / в тебе изрядно прославльшихся.
Стих: Восхвалятся преподобнии во славе / и возрадуются на ложах своих.
Возвеличим ныне, вернии, / похвалу земную презревших / и Небесным венцем венчавшихся / отцев достоблаженных, / обитель Глинскую прославивших.
Стих: Воспойте Господеви песнь нову, / хвалите Его в церкви преподобных.
Соборе преподобных, / личе всеславный, / молитеся ко Господу / о земном отечестве вашем / и о почитающих вас любовию.
Слава, глас и подобен тойже:
Пустыня Глинская, / огласися песньми хвалебными / и приими собори верных, / воспевающих отцев досточудных, / в тебе дивно просиявших.
И ныне, праздника, глас и подобен тойже:
Днесь Всенепорочная Чистая / произыде от неплодове, / днесь всяческая радуются в Той рождестве. / Небесная вся веселятся, / и мир человеком даруется.
Славословие великое и отпуст.
На Литургии
Блаженны праздника, песнь 3-я, на 4, и святым, песнь 6-я перваго канона, на 4. Прокимен, глас 7: Честна пред Господем / смерть преподобных Его. Стих: Что воздам Господеви о всех, яже воздаде ми? Апостол к Галатом, зачало 213. Аллилуиа, глас 4: Праведник, яко финикс, процветет, / яко кедр, иже в Ливане, умножится. Стих: Насажденнии в дому Господни во дворех Бога нашего процветут. Евангелие от Луки, зачало 24. Причастен: В память вечную будет праведник:
Молитва
О, преподобнии и богоноснии отцы наши, досточуднии старцы Глинстии, в земли нашей преславно просиявшии и путь ко спасению многим указавшии.
К вам всеусердно притекаем и умильно просим, да предстательством вашим, богоблаженнии, сохранит Господь всех, память вашу светло чтущих, да помилует многострадальное Отечество наше, да соблюдет Церковь Свою Святую ересьми и расколы непреобориму, да направит стопы наша на путь покаяния и спасения, яко да молитвами вашими укрепляеми и от соблазнов и наветов лукаваго храними, достигнем невечерняго Царствия Небеснаго, идеже купно с вами и со всеми святыми песнь всерадотную воспоим Единому в Троице Творцу и Избавителю, Отцу и Сыну и Святому Духу. Аминь.

Ссылка | Оставить комментарий | Поделиться

Comments {0}