Уставщик (ustavschik) wrote,
Уставщик
ustavschik

Category:

Служба преподобному Филарету Глинскому

Служба преподобному Филарету составлена протоиереем Илией Тетерько, клириком г. Одессы.

СЛУЖБА
преподобному отцу Филарету, игумену Глинския пустыни
НА ВЕЛИЦЕЙ ВЕЧЕРНИ
Б
лажен муж: 1-й антифон.
На Г
осподи, воззвах: стихиры на 8, глас 4:
Приидите, стецемся, вернии, / приспе день светлаго торжества, / монашествующих, соберитеся, собори: / днесь увенчаем песньми похвальными / блаженнаго игумена Глинскаго Филарета, / постников и пустынников красоту, / и послушания твердое основание.
Наста, богоносе отче наш Филарете, / светоностный твой праздник, / и озаряет монашествующих лики, / и безсмертием облагоухает; / темже днесь, вернии, сошедшеся, / воспеваем и ублажаем любовию подвиги твоя, / и молитвенника тя ко Христу предлагаем / о душах наших.
Крест Господень взем, преподобне Филарете, / ревностно последовал еси Христу, / нас ради волею распеншемуся, / и Его ради любве вся оставил еси, / и Того единаго возлюбил еси, / Егоже моли спастися нам.
Приидите днесь, лицы монашестии, / притецем ко гробу преподобнаго отца нашего Филарета, / молящеся Христу Богу нашему, / просяще грехов прощение, / Церкви и миру устроения, / и душам нашим велия милости.
Слава, глас 6:
Светлый возсия нам и всепразднственный день, / якоже второе солнце, / просвещая, и наставляя, и отгоняя тьму помрачения нашего, / верных созывает любовию / к честней раце мощей припадати и облобызати ю. / Моли, молимся, отче наш Филарете, / дати миру мир / и душам нашим велию милость.
И ныне, глас тойже: Кто Тебе не ублажит:
Вход. Прокимен дне, и чтения 3.
Премудрости Соломоновы чтение (глава 3):
Праведных души в руце Божией, и не прикoснется их мука. Непщевани быша во очесех безумных умрети, и вменися озлобление исход их. И еже от нас шествие сокрушение, они же суть в мире. Ибо пред лицем человеческим аще и муку примут, упование их безсмертия исполнено. И вмале наказании бывше, великими благодетельствовани будут, яко Бог искуси я и обрете их достойны Себе. Яко злато в горниле, искуси их и, яко всеплодие жертвенное, прият я. И во время посещения их возсияют и, яко искры по стеблию потекут. Судят языком и обладают людьми, и воцарится Господь в них во веки. Надеющиися Нань разумеют истину и вернии в любви пребудут Ему, яко благодать и милость в преподобных Его и посещение во избранных Его.
Премудрости Соломоновы чтение (глава 4):
Праведник, аще постигнет скончатися, в покои будет. Старость бо честна не многолетна, ниже в числе лет исчитается. Седина же есть мудрость человеком, и возраст старости, житие нескверное. Благоугоден Богови быв, возлюблен бысть, и живый посреде грешник, преставлен бысть. Восхищен бысть, да не злоба изменит разума его, или лесть прельстит душу его. Рачение злобы помрачает добрая, и парение похоти пременяет ум незлобив. Скончався вмале, исполни лета долга. Угодна бо бе Господеви душа его. Сего ради потщася от среды лукавствия. Людие же видевше и не разумевше, ниже положше в помышлении таковое: яко благодать и милость в преподобных Его, и посещение во избранных Его.
Премудрости Соломоновы чтение (глава 5 и 6):
Праведницы во веки живут, и в Господе мзда их, и попечение их у Вышняго. Сего ради примут Царствие благолепия и венец доброты от руки Господни, зане десницею покрыет я и мышцею защитит их. Примет всеоружие рвение свое и вооружит тварь в месть врагом. Облечется в броня правды и возложит шлем суд нелицемерен. Примет щит непобедимый преподобие, поострит же напрасный гнев во оружие, споборет же с ним мир на безумныя. Пойдут праволучныя стрелы молниины и, яко от благокругла лука облаков, на намерение полетят. И от каменометныя ярости исполнь падут грады, вознегодует на них вода морская, реки же потопят я нагло. Сопротив станет им дух силы и, яко вихор, развеет их, и опустошит всю землю беззаконие, и злодейство превратит престолы сильных. Слышите убо, царие, и разумейте, навыкните, судии концев земли, внушите, держащие множества и гордящиися о народех язык, яко дана есть от Господа держава вам и сила от Вышняго.
На литии стихира святаго, глас 4:
Светлая память успения твоего, / преподобне отче наш Филарете, / сердца наша веселит духовно: / зрим бо честную раку мощей твоих, / исцеляющую недужныя, с верою к ней притекающия, / и славим Господа, тя прославльшаго, / труды и подвиги твоя увенчавшаго / толикою чудес благодатию.
На стиховне стихиры, глас 2:
Подобен: Д
оме Евфрафов:
Дом Духа Святаго / явился еси, преподобне, / благодатию Господней, / просвещая и наставляя всех / верою притекающих к тебе.
Стих: Чесна пред Господем смерть преподобных Его.
Блажен воистину / и кроток явился еси, / преподобне отче наш Филарете, / монашествующих наставниче / и Троицы верный служителю.
Стих: Блажен муж, бояйся Господа, в заповедех Его восхощет зело.
Учителю благочестия, / Православия поборниче, / монашескаго жития истовое правило, / Филарете отче наш, / любовию днесь тя ублажаем.
Слава, глас и подобен тойже:
Обители Глинския сокровище, / ходатаю за люди твоя неусыпный, / преподобне отче Филарете, / помяни нас любовию чтущих тя / у Престола Вседержителя.
И ныне, Богородичен, глас и подобен тойже:
Приидите возвеличим, / Пречистую Богородицу / и обители Ея служителя, / монахов начальника, / преподобнаго игумена Филарета.
Тропарь святаго, глас 1:
Пустыни Глинския строитель / и боголюбивый игумен явился еси, / Богоносе отче наш Филарете: / постом, бдением и молитвою Небесная дарования прием, / исцеляеши недужныя и души верою притекающих ти. / Слава Давшему тебе крепость, / слава Венчавшему тя, / слава Действующему тобою всем исцеления.
НА УТРЕНИ
По 1-м стихословии седален, глас 5:
О земных и тленных наслаждениих нерадив, / Христу последовал еси, блаженне, / и пустынное жительство возлюбил еси, / сего ради и постническому лику преподобных сочетатися сподобился еси, / с нимиже молися Господеви, Фитарете, / грехов оставление даровати / празднующим святую память твою.
Слава, и ныне, Богородичен, глас тойже:
Утвердися пети сердце мое, Всенепорочная Дево, / Пречистое Рождество Твое, / имже избавила еси нас прародительныя клятвы / и вознесла еси падшее человеческое естество к высоте, / темже Тя по долгу поем и величаем.
По 2-м стихословии седален, глас 3:
Память твою всесветлую возвеличим днесь, / всечестне отче наш Филарете: / ты бо Небесныя дары приемлеши, / имиже подаеши недугов исцеления приходящим к тебе с верою, / и молишися к Богу, / да подаст мирови велию милость.
Слава, и ныне, глас тойже:
Чертог, присносущною славою укрaшен, видяще выну, / желание имамы совнити в онь, / но, одежды не имуще, стыдимся, / да не связани от Ангел и извержени будем. / Ты, сущи одежда нагих дерзновения, Дево Марие, украси ны / и введи внутрь Небеснаго Чертога.
По полиелеи седален, глас 8:
Днесь ликует твоя обитель, / созывая верныя к торжеству памяти твоей, / преподобне отче Филарете, / иноков отец чадолюбивый, / благолепия церковнаго рачителю, / Православия проборниче, / царей богомудрый собеседниче / и присный молитвениче о душах наших.
Слава, и ныне, Богородичен:
Богородице Дево, / Вседержавная наша Царице, / омофором молитв Твоих покрывающая весь мир, / приими от благодарных сердец наших / похвальныя песни сия / и испроси нам у Сына Твоего Богоначальнаго / грехов прощение и велию милость.
Таже степенна, 1-й антифон, глас 4.
Прокимен, глас 4: Честна пред Господем смерть преподобных Его. Стих: Что воздам Господеви о всех, яже воздаде ми?
Всякое дыхание: Евангелие от Матфея, зачало 43.
По 50-м псалме стихира самогласна, глас 6:
Преподобне отче наш Филарете, / по имени твоему бысть и житие твое, / измлада бо возлюбил еси во след заповедей Господних ходити / и всяку добродетель исполнил еси, / сего ради дом Духу Святому / свят и честен явился еси, / боголюбезными деяньми / и чудес дарованьми обогатився.
Канон святому, егоже краегранесие:
И
гумена славнаго Филарета восхвалим. Глас 2.
Песнь 1.
Ирмос: Грядите, людие, / поим песнь Христу Богу, / раздельшему море, / и наставльшему люди, яже изведе из работы египетския, / яко прославися.
Игумена славнаго обители Глинския, воспоим днесь, вернии, Филатера богомудраго, да его молитвами спасение улучим.
Господа от юности твоей возлюбил еси, отче, и ничтоже предпочел еси паче любве Его, и ныне сияеши, яко солнце в чертозех Триипостаснаго Божества, Филарете всечудне.
Умом выну Господу предстоя, отче преблаженне Филарете, попечение непрестанное о твоей обители имел еси, сего ради поют тебе чада твоя песни благодарственныя.
Богородичен: Мати Преблагословенная, радуйся, Владычице Дево, всем людем похвала, непрестанно молися Христу Богу сохранити место сие и люди молитвами всеблаженнаго Филарета.
Песнь 3.
Ирмос: На камени мя веры утвердив, / разширил еси уста моя на враги моя. / Возвесели бо ся дух мой, внегда пети: / несть свят, якоже Бог наш, / и несть праведен паче Тебе, Господи.
Единому Богу возложив душу и помышление, тесный путь шествовал еси, тем получил еси Небеснаго Царствия наслаждение.
Назираеши с Превыспренних за обителию и стадом, еже собрал еси, блаженне отче, и николиже любы твоя преста от нас. Сие добре ведуще, радуемся и прославляем дивнаго во святых Своих Господа.
Апостольстей любве подражателю, богоприятне отче наш Филарете, непрестанно стадо твое вопиет ти: молитвами своими ко Господу спаси нас, молим тя.
Богородичен: Спасение родила еси человеком и обновление принесла еси нам, обетшавшим грехми, Дево, Мати Божия.
Седален, глас 4:
Твердостию разума украшаяся и плотския тяготы отверг, многокозненнаго стрелы притупил еси, преподобне Филарете, Богопросвещен соделался еси, тем же и нас помяни, святче Божий, чтущих любовию святую память твою.
Слава, и ныне, Богородичен:
Покров Твой, Дево Богородице, простри над смиренными воспеватели Твоими и сохрани нас от бед и скорбей, матернюю любовь к нам недостойным являюще.
Песнь 4.
Ирмос: П
ришел еси от Девы, / не ходатай, ни Ангел, / но Сам, Господи, воплощся, / и спасл еси всего мя человека. / Тем зову Ти: / слава силе Твоей, Господи.
Любовь твою и попечение не отыми от нас, отче любоблагоутробне, но посещай нас милостию и щедротами, по долгу тя славящих.
Аще и преставился еси, отче, к Небесней славе, но чудес источник оставил еси во обители твоей - цельбоносныя мощи твоя, ихже любовию лобызающе, благословение твое приемлем.
Велиим благоразумием, отче наш Филарете, покорил еси духови гордость ума житейскаго, все упование возложив на Бога, со смирением поя: слава силе Твоей, Господи.
Богородичен: Нас, вопиющих к Тебе, Дево, от страстей свободи и Владыце, Сыну Твоему, яко церковь освященну, принеси.
Песнь 5.
Ирмос: Света подателю и веков Творче, Господи, / во свете Твоих повелений настави нас; / разве бо Тебе иного бога не знаем.
Ангельски пожив на земли, возвысился еси, отче, к лицезрению красоты Небесныя, еяже ныне наслаждаяся, мoлишися о спасении нашем.
Глинскую обитель вельми украсил еси, блаженне отче, таже устав монашескаго жития утвердил еси, наставляя, и уча, и приводя собор иноков к Божественней воли.
О славе твоей ликуют собрания монашествующих, молебный совершающе праздник в честней памяти твоей, от души вопиюще: поминай нас, приснопоминающих тя.
Богородичен: Филарета предстательством, служителя Твоего, Пречистая, исцели, изъязвленную страстьми душу мою, матернею Твоею молитвою Божественное врачевание прилагающе.
Песнь 6.
Ирмос: В бездне греховней валяяся, / неизследную милосердия Твоего / призываю бездну: / от тли, Боже, мя возведи.
Избави обитель твою, преподобне, от всякаго навета вражия и исполни ю любве и благодати, еже не помышляти о житейских, но душеспасительныя достигнути доброты молитвами твоими.
Ликует и веселится днесь твое словесное стадо, Филарете достопамятне, посреде имуще честныя мощи твоя, источающия струи благодати, верою притекающим к тебе.
Ангелов совозславниче Премудрости Вседержителевы, блаженне отче Филарете, помози нам о Горнем мудрствовати и на Промыслителя Господа нашего все упование возлагати.
Богородичен: Радование человеком, ангелов прославление, Богородице Всечистая, спаси всех к Тебе прибегающих и Заступницу Тя в житии своем полагающих.
Кондак, глас 4:
Празднует днесь обитель Глинская / праздник пресветлый светоносныя твоея памяти, / созывая православных собори, / радуется бо, яко стяжав сокровище велие — / честныя мощи твоя, преподобне Филарете, / юже сохраняй всегда молитвами твоими от всех зол, да зовем ти: / радуйся, отче богомудре.
Икос:
Игумена достославнаго ублажим любовию, вернии, / Филарета - отца монахов множества, / строителя обители Глинския люботруднаго, / православия и благочестия отеческаго поборника, / иноческаго жития истовое правило. / Темже радостию притекающе к раце мощей его / и любовь поминающе, прилежно вопием: / радуйся, отче богомудре.
Песнь 7.
Ирмос: Телу златому премудрыя дети не послужиша, / и в пламень сами поидоша, / и боги их обругаша, / среди пламене возопиша, и ороси я Ангел: / услышася уже уст ваших молитва.
Евангелия деятельный проповедниче, и монашескаго жития ревнителю, испроси, отче Филарете, мир Церкве Христовей, людем здравие и Отечеству в вере Православней твердое стояние.
Тленная оставль, треблаженне, нетленная восприял еси, насыщаяся светом Божественныя светлости во дворех Господа своего, Филарете премудре.
Авва чадолюбивый и наставник братии твоей любомудрый явился еси, отче Филарете, и отец отцов множества, возсиявших во обители Пречистыя Богоматери.
Богородичен: Владычице Милостивая, не возгнушайся язвами нашими греховными, Врача рождшая душ и телес наших, утоли болезни и исцели неможения, и спаси души наша.
Песнь 8.
Ирмос: В пещь огненную ко отроком еврейским снизшедшаго, / и пламень в росу преложшаго Бога, / пойте дела яко Господа, / и превозносите во вся веки.
От страстей тимения чиста тя обрет, Всесвятый Дух вселися в тя, отче наш Филарете, Того стяжати и нам помолися, да единодушно хвалим Утешителя и превозносим во вся веки.
Светлостию подвигов Богоприятных просиял еси, отче, и восприял еси благодать и дерзновение молитися о нас, вспомоществуя верным в подвизех спасения.
Христу молися о нас, преподобне отче Филарете, да благочестно поживше и Богови благоугодивше, причастницы явимся жизни вечныя.
Богородичен: Всечистая Богоотроковице, Мати Спасителя нашего Господа, умилосердися над воспеватели Твоими и ослабу страстей нам подаждь.
Песнь 9.
Ирмос: Безначальна Родителя Сын, Бог и Господь, / воплощься от Девы нам явися, / омраченная просветити, / собрати расточенная: / тем всепетую Богородицу величаем.
Агнца Божественнаго вечнаго брака причастниче, от славы твоея Небесныя призри на нас, любовию тя похваляющих, отче всесвященне, и потщися избавити нас от напастей и скорбей.
Лобзание словесное приими от нас, любоблагоутробне отче, и не престай простирати о нас моление, яко отец чадолюбивый, и помогай нам, прибегающим к тебе и чтущим тя, яко сосуд благодати Божия избранный.
Истинно славна и всехвальна память твоя, отче Филарете, славою бо, еже от Отца, Сына и Святаго Духа, прославлен еси.
Богородичен: Мати Всечистая Христа Спаса нашего, немощствующих нас и разслабленных воздвигни от тли греховныя к пению Сына и Бога Твоего.
Светилен, глас 2:
Светозарна светильника веры, во стране нашей возсиявша и солнца светлейше благодатию нас просвещша, Филарета предивнаго песньми восхвалим.
Слава, и ныне, Богородичен:
Славословие Тебе приносим, Мати Дево, явившей миру Свет Присносияющий, тьму неверия и греха расточающий, и присною радостию души наша исполняющий.
На хвалитех стихиры святаго, глас 4:
Приидите, благоверных людей множества, / светло празднуим память святаго постика, / премудраго наставника, / преподобнаго старца Филарета, / игумена обители Глинския, / с любовию вопиюще к нему: / твоими молитвами ко Христу Богу / от всякия скорби и беды избави нас.
В Глинскую пустыню вселився, отче богомудре, / чада послушания в ней духовно породил еси / и Богови сия привел еси / учением твоим святым, / еже всем бысть на пользу душевную, / Филарете приснопамятне.
Преподобне отче Филарете, / ты Евангелия Христова свет стезям твоим имел еси / и был еси пастырь добрый и игумен премудрый / тебе врученнаго иноческаго стада, / руководя духовная чада твоя путями правыми / в Царство Небесное.
Преподобне отче Филарете, / возлюбив всем сердцем обитель Пречистыя Богородицы, / по Бозе все упование твое на Ту возложил еси, / и храм в пустыни твоей во славу Иверскаго Ея образа воздвигл еси, / и многия души человеческия привел еси, угодниче Божий, / в Царство Небесное.
Слава, глас 8:
Явился еси светильник благодатный, / преподобне отче Филарете, / кротким светом любве и смирения сияя / и нас милостию твоею озаряя. / Темже и мы, благодарне чтуще память твою, / вопием тебе усердно: / молися о нас ко Господу, пастырю наш добрый, / да спасет души наша.
И ныне, глас тойже:
Владычице, приими молитвы раб Твоих / и избави нас от всякия нужды и печали, / Ты еси, Богородице, оружие наше и стена, / Ты еси Заступница, и к Тебе прибегаем, / Тя и ныне на молитву призываем, / да избавиши нас от врагов наших. / Возвеличим Тя вси, / Всенепорочную Матерь Христа Бога, / Юже осени Дух Пресвятый.
Славословие великое и отпуст.
И бывает помазание братии от лампады святаго.
НА ЛИТУРГИИ
Блаженны от канона песнь 3-я и 6-я. Прокимен, глас 7: Честна пред Господем / смерть преподобных Его. Стих: Что воздам Господеви о всех, яже воздаде ми? Апостол к Галатом, зачало 213. Аллилуиа, глас 4: Праведник, яко финикс, процветет, / яко кедр, иже в Ливане, умножится. Стих: Насажденнии в дому Господни во дворех Бога нашего процветут. Евангелие от Луки, зачало 24. Причастен: В память вечную будет праведник:
Tags: Минея Дополнительная, богослужебные тексты
Subscribe

  • Post a new comment

    Error

    Anonymous comments are disabled in this journal

    default userpic

    Your IP address will be recorded 

  • 0 comments