?

Log in

No account? Create an account

17 (30) мая — память…

« previous entry | next entry »
июн. 10, 2010 | 01:34 am

…прав. Ионы (Атаманского) протоиерея, Одесского (†1924)
Богослужебные тексты:
В прошлом году я выкладывал ссылку на тропарь, кондак и акафист праведному Ионе. Сегодня — обновление: бденная служба святому. Ее текст воспроизводится по сборнику «Службы Одесским святым» (служба на стр. 143 – 157). За помощь в оцифровке огромная благодарность достопочтенному vit_gil.

Служба
праведному Ионе пресвитеру, Одесскому
На велицей вечерни
На Г
осподи, воззвах: стихиры, глас 8:
Приидите, христославных собори, / принесем сладкоуханный фимиам песнопений / доброму возследователю Христову, / богоблаженному и пречудному Ионе: / сей бо есть краснозрелый грозд лозы церковныя, / града Одессы похвала и утверждение, // присно ходатайствующий за отечество и люди своя.
Приидите, христоименитии воинствословия, / воспоим гимны победными / предратника земнаго воинства Небеснаго Царя, / пращею вещаний своих / хульнословесных полки посрамившаго, / богославнаго и добропобеднаго Иону, // Церкве Православныя добраго исповедника и молитвенника о душах наших.
Притецем, вернии людие, / с премирными лики ублажим теплаго за ны предстателя, / колесницею огненною молитвы своея / нужды и скорби земных к Небесем возносившаго / и низложившаго многи полки чуждаго, / премилостиваго чудотворца Иону, / неприступнаго бесов посрамителя // и молитвенника о душах наших.
Приидите, восхвалим пастыря прелюбезнаго, / угобзившаго ниву Божию, / жатвы Христовы делателя люботруднаго, / темнозрачнаго плевелосеятеля посрамителя, / светозарнаго Иону, / пастыря благаго и вселюбимаго // и молитвенника о душах наших.
Приидите, вернии, / память праведнаго с похвалами составим, / песньми вознесем душ мятущихся благодатное отишие, / чертога Небеснаго земнороднаго зиждителя, / щедрот Господних сокровищника прелюбезнаго, / Иону милостодавца премирнаго, / преславнаго бесов запинателя // и молитвенника о душах наших.
Слава, глас 6:
Стецемся днесь любопразднственных собори, / песнь хвалебную вознесем Христу Богу, / возсоздавшему первотварный Свой образ / и соделавшему нас наследницы Царствия Своего. / Ныне же единаго от благоверных мздоприемников, / Иону пастыря богоноснаго возвеличим, // да умолит низпослати нам велию милость.
И ныне, праздника или Богородичен, глас тойже:
К
то Тебе не ублажит, Пресвятая Дево:
Вход. Свете тихий. Прокимен дне. Чтения три.
Премудрости Соломоновы чтение (глава 3):
Праведных души в руце Божией:
Премудрости Соломоновы чтение (главы 5 и 6):
Праведницы во веки живут:
Премудрости Соломоновы чтение (глава 4):
Праведник аще постигнет скончатися:
На литии стихиры, глас 4:
Днесь воспоем пастыря премудраго, / Церкве столпа непоколебима, / фиал благоуханный аромата добродетели, / алавастр исцелений неисчерпаемый, / и теплаго о всех молитвенника. / К нему же возопиим усердно: / преблаженне отче Ионо, / моли Христа Бога // о творящих святую память твою.
Слава, глас тойже:
Возсия днесь пресветлая память твоя, / пастырю милостивый, отче Ионо, / ангельстии чини ликуют на Небеси / и собори святых сродников наших веселятся. / Церковь бо Русская украсися славным именем твоим. / Сего ради и мы согласно вопием ти: / моли о нас Христа Бога, // да подаст нам полезная ко спасению.
И ныне, праздника или Богородичен, глас тойже:
Совета Божественнаго премысленная Таиннице, / Пречистая Матерь Всетворца Господа, / благословенна Ты еси в родех родов, / Премилостивая земных Предстательнице, / Небесных чинов величание; // радуйся вопием Ти, с Тобою Господь.
На стиховне стихиры, глас 5.
Подобен: Р
адуйся, Живоносный Кресте:
Радуйся, проручествованный цвете, / священства Христова доблественнейшее правило, / кандило церковное, благодатию Духа возженное / и елеем дара Утешителя преизобильно насыщенное, / священночестне отче Ионо, // утверди во правоверии души наша.
Стих: Свет возсия праведнику / и правым сердцем веселие.
Радуйся, мудрословесный источниче, / напаяющий живою влагою души притекающих к тебе, / радуйся, проповедниче законов Божиих: / словом, житием, любовию образ добронравия явил еси пастве твоей. / Отче богомудре Ионо, // утверди во благочестии живот наш.
Стих: Готово сердце его / уповати на Господа.
Радуйся, благий домоправителю Церкве, / всеусерднейший делателю вертограда Божия, / духоосененный кормчий страждущих душ, / приведый вся врученныя тебе к желанней пристани - Христу. / Егоже моли пастырю наш, премудре Ионо, // во смирении и послушании воспитати души наша.
Слава, глас и подобен тойже:
Радуйся, богоблаженне Ионо, / доброприлежный священнодействителю Господень, / веселися, ратниче Христов рачительный, / мечем вещаний твоих сердца от пут греховных свобождающий, / ликуй, дерзновенный бесов прогонителю / и единства церковнаго страже неусыпный, // подающий нам от Господа присно велию милость.
И ныне, праздника, или Богородичен, глас и подобен тойже:
Радуйся, Всепречистая Дево, / Всенепорочная Матерь воплощеннаго Бога Слова, / Боголюбивая Дщерь Отца Небеснаго, / человекомилующая Заступница наша и прибежище, / Твоими бо молитвами / от всякия пагубы душетленныя избавляемся, // величающе Тя, Благословенная.
Тропарь, глас 8:
Православия ревнителю, раскола и ереси искоренителю, / Одесский целебниче и к Богу теплый молитвенниче, / житием и чудесы твоими уподобился еси Кронштадтскому чудотворцу, / Ионо праведный, моли Христа Бога спастися душам нашим.
На утрени
По 1-м стихословии седален, глас 2:
Любоблагочестиваго Иону ликующе восхвалим, той бо предстоит горнему Престолу Присносущнаго Владыки и, яко люботрудный домочадец присно ходатайствует о всех с верою притекающих к нему.
Слава, и ныне, праздника или Богородичен, глас тойже:
Простираем молебне руце наша к Тебе, Боговозлюбленная Мати, и во смирении сердечнем вопием: всегда избави чтущих Тя от всех бед, Пречистая.
По 2-м стихословии седален, глас 5:
П
охвалами ублажим Иону приснопамятнаго, чудотворца и молитвенника изряднаго, маслину любоблагоутробную, источающую велия милости и щедроты, всем с верою притекающим к нему.
Слава, и ныне, праздника или Богородичен, глас тойже:
Дивныя и чудныя прообразы иногда миру рождество Твое предвозвестиша, и ангельския лицы удивишася, зряще Тя Деву Богородицу, и земнородных собори милости Твоя воспевают присно, Владычице наша Многомилостивая.
По полиелеи седален, глас 8.
Многопетаго Ионы радостно возвеличим, / превыспренняго ходатая за ны ликующе, прославим. / Той бо славословие Живоначальной Троице приносяще, / присно молится за град и люди своя / и подает всем с верою притекающим к нему / мир и велию милость.
Слава, и ныне, праздника или Богородичен, глас тойже:
Стена необоримая христианом еси, / Богородице Дево, к Тебе бо прибегающе невредимо пребываем, / и, паки согрешающе, имамы Тя Молитвенницу, Всепетая. / Тем благодаряще вопием Ти: // радуйся Благодатная, Господь с Тобою.
Степенна, 1-й антифон 4-го гласа.
Прокимен, глас 4-й: Возвеселится праведник о Господе / и уповает на Него.
Стих: Услыши Боже глас мой, / внегда молитимися к Тебе.
Всякое дыхание: Евангелие от Матфея, зачало 16.
По 50-м псалме, глас 6:
Восхвалим, вернии людие, / умнаго небозрителя славы Божия, / безкровнаго страстотерпца Христова, / добронравнаго апостолом подобника, / Евангелия деятельнаго проповедника, / богоноснаго чудотворца Иону, / честное приятелище Духа, / Троицы преукрашенное жилище ублажим, // согрешений разрешение молитвами его приемлюще.
Канон праздника или Богородицы со ирмосом на 6 и святаго на 8.
Канон святаго, глас 6.
Песнь 1
Ирмос: Колесницы фараоновы и силу его вверже в море Крепкий во бранех, воспоем песнь новую, яко прославися.
Пеcнь победную воспевающе, приидите, составим лицы, и радостию восхвалим Иону праведнаго, преславнаго чудотворца и молитвенника о душах наших.
Всесвященный сосуд благодати Божия днесь радостию вси воспоим, во умилении сердец наших взывающе: радуйся, Ионо блаженне, молитвенниче о душах наших.
Троицы Божественныя всечудное жилище, града Одессы сокровище многоценное, радуйся, Ионо праведный, исцелений источниче и молитвенниче о душах наших.
Богородичен: Поим Господеви, воплощение от Девы приявшему, и от работы всегорькия избавившему род человеческий, славно бо прославися.
Песнь 3
Ирмос: Лук сильных изнеможе, и немощствующии препоясашася силою: сего ради утвердися в Господе сердце мое.
От юности сердце твое во Господе утвердил еси, отче Ионо праведне, сего ради вопием ти: в любви Господней утверди чада твоя.
Господь сохраняше тя во всех путех твоих, егда родители твоя в селения вечная отыдоша, темже и ныне молитвою теплою утверди чада твоя.
Горечь сиротства и скорби тяжкия от юности вкусивый, отче наш Ионо праведне, не остави ныне сиры нас, чада твоя.
Богородичен: Утверждение сердец наших, Заступнице Милостивая, Богородице Дево, матернею Твоею любовию от всякаго зла огради чада твоя.
Кондак и икос праздника.
Седален, глас 4:
Пастырю наш добрый, Ионо праведне, покаяния учителю и образе целомудрия, исповедниче преславный и чудотворче предивный, моли спастися всем верою тя воспевающим.
Слава, и ныне, праздника или Богородичен, глас тойже:
Мати наша Преблагословенная человеком утешение, смиренномудрия образе, Тя бо имамы, грешнии, Заступницу милостивую и о Тебе славим Спасителя нашего Господа.
Песнь 4
Ирмос: Услышах слух Твой, Господи, яко явился еси на земли, и прославих Твою силу.
Божественная благодать, немощи человеческия врачующая, избра тя на подвиг священнолепный, и крест многотрудный служения пастырскаго на рамена твоя Христос Бог возложи, сего ради людие православнии взывают: радуйся, пастырю наш добрый, Ионо праведный.
Архиерея Великаго, Спаса душ наших, раб добрый и верный был еси, не о земных ревнуя, но о небесном рачение присно имевый, темже вси ти днесь взываем: радуйся, пастырю наш добрый, Ионо праведный.
От волка душехищнаго, человекоубийцы древняго, молитвами твоими сохранил еси стадо твое, богомудре, и жезлом проповеданий твоих упасл еси взывающих: радуйся, пастырю наш добрый, Ионо праведный.
Богородичен: Господи, услышаша слух схождения Твоего вселенная, и убояшася: како Бог непреложный человек явитися хощеши и от Девы воплощение прияти, Ейже вси взываем: радуйся, Обрадованная, Господь с Тобою.
Песнь 5
Ирмос: Возсиявый свет и просветивый утро, и показавый день, слава Тебе, слава Тебе, Иисусе, Сыне Божий.
Свет повелений Господних облиста сердце твое, Ионо, отче наш, и словеса Божия чиста утробу твою разжегоша, сего ради явился еси проповедник неленостный и ко спасению чадом твоим путевождю всехвальный.
Тьма зловерия и мрак безбожия отгна1ни быша светом проповеди твоея, отче наш Ионо, и благочестие христианское в сердцах многих насадишася, пастырю добрый и наставниче наш всехвальный.
Правде Божией научал еси земнородных, Истины Воплощенныя неленостный служителю, словесы и деяньми своими образ явился еси людем христоименитым, сего ради величаем тя, Ионо милостиве, пастырю наш всехвальный.
Богородичен: От нощи утренююще вопием Ти, Владычице, богопознания светом души наша просвети и мир благословенный подаждь людем Твоим, Всепетая.
Песнь 6
Ирмос: Внегда скорбети ми, возопих ко Господу, и услыша мя Бог спасения моего.
Благодатию Божиею укрепляемь, недугов целебник преславный и врач всескорый явился еси, темже молим тя, Ионо праведне, души наша, язвою греховною пораженныя, исцели, чудотворче дивный и всеславный.
Исцелений источниче неоскудевающий и чудес реко приснотекущая, власть приемый от Господа недуги врачевати, сего ради взываем ти: радуйся, чудотворче дивный и всеславный.
Росою молитвы твоея огнь недугов угашается и пламенным дерзновением твоим дуси темныя низлагаются и имене твоего трепещут, чудотворче дивный и всеславный.
Богородичен: Вопием в скорбех наших, молитвы Ти приносяще, Дево Чистая, от зверя душетленнаго и чрева адова люди Твоя свободи и ко спасению окорми, Владычице Милостивая и Всепетая.
Кондак, глас 8:
Многоразличныя подвиги жития твоего кто исповесть? / Многообразныя милости Божия тобою явленныя кто исчислит? / Дерзновение же твое у Всещедраго Бога и Пречистыя Богородицы добре ведуще, / во умилении сердечнем зовем ти: / не лиши и нас твоея помощи и заступления, // пастырю Христов и чудотворче Ионо.
Икос:
Многоплодное древо благодати Утешителя, верою Авраамлею Триипостасному Божеству угодити сподобился еси, и Моисею равно люди заповедям Господним научал еси, ревностию пламенною и чудесы преславными Илии небошествователю уподобился еси, Ионе древнему в проповедании покаяния совозвестник явился еси, яко Давид песнословец сладкозвучный показался еси, новый апостол любве и милосердия ныне восхваляешися, за велие сострадание и правоверия крепкое исповедание со славным Ликийских Мир святителем прославляешися, яко Саровский старец священнотаинник и прозорливец стезей Божиих ублажаешися, пастырю Христов и чудотворче Ионо.
Песнь 7
Ирмос: Спасый во огни авраамския Твоя отроки, и халдеи убив, яже правда праведнаго уловляше: препетый Господи, Боже отец наших благословен еси.
Пещь огненную гонений новых на Церковь Христову мира сего князь разже, и полчища адския брань на верныя воздвигнути тщашася, ты же, отче Ионо, посреде искушений столп непоколебимый явился еси веры православныя.
Не возмогоша, тя отче, любве Божия разлучити немощныя дерзости слуг адовых, адамант бо явился еси твердый и доблий исповедник веры православныя.
Пагубныя плевелие обновленческия серпом обличения твоего исторгл еси от нивы Божией, и людем христоименитым явился еси правоверия образ и исповедник веры православныя.
Богородичен: Благословенная в родех родов, Дево Пречистая, Богородице, Покровом благости Твоея сохрани удел Твой земной - Русь Святую и до скончания века утверди в вере православней.
Песнь 8
Ирмос: Во образе ангела явльшагося в пещи огненней песнословцем, Христа Бога пойте, отроцы, священницы, благословите, людие, превозносите во вся веки.
Всемилостиваго Спаса добрый учениче, огнем любве к ближним разжегл еси сердце твое и явился еси милости источник неоскудеваемый и отец чадолюбивый всем требующим твоея помощи.
Гладных питатель, скорбных утешитель, нагих одеяние и сирых заступник явился еси, отче премилостивый, Ионо праведный, и помощник скорый всем требующим твоея помощи.
Вся бе всем, отче Ионо праведный, сего ради люди православнии, яко пастыря своего добраго прославляют и песнословят тя, молитвенника усерднаго о всех требующих твоея помощи.
Богородичен: Благословите вся дела Господня Господа и радостно воспойте Пречистую Матерь Его, Сия бо есть скорая Помощница и присная Заступница всем требующим Ея помощи.
Песнь 9
Ирмос: Камень нерукосечный от несекомыя горы Тебе, Дево, краеугольный отсечеся, Христос, совокупивый растоящаяся естества. Тем веселящеся, Тя, Богородице, величаем.
Днесь град твой, отче приснопамятне Ионо, песни восписует ти похвальная и молитвою твоею от бед и скорбей сохраняется.
Днесь Русь Святая, отче достохвальне Ионо, величие твое проповедует и ходатайством твоим в православной вере утверждается.
Днесь вселенная вся, отче многочудне Ионо, велелепно величает тя и предстательством твоим в мире и благочестии утверждается.
Богородичен: Днесь людие православнии к Престолу Твоему, о Всепетая, прибегают и вся концы вселенныя Тя присно ублажают, яко Матерь Божию и христиан всех Покров и утверждение.
Светилен:
Светом Трисолнечным озаренный Божества Триипостаснаго, отче наш Ионо праведный, молитвою твоею души наша просвети и на путь доброделания стопы наша направи.
Слава, и ныне, праздника, или Богородичен:
Теплое заступление в бедах и Помощницу нашу, и к Богу примирение, Ею же от тли избавихомся, Богородицу, вернии, ублажаем.
На хвалитех стихиры, глас 1.
Подобен: Н
ебесных чинов:
Небесным чином сомолитвенника / и теплаго предстателя за люди своя / зрим тя, отче достоблаженне Ионо, / воспоминая же чудная дела твоя, / пение Триипостасному Божеству приносим // дивному и славному во святых Своих.
Горнему миру сопричастника / и ангельских ликов равностоятеля / разумеем тя, отче треблаженне Ионо, / еще в телеси суща, умною молитвою своею выну Богу предстоял, / днесь ны помяни у Престола // хвальнаго и чуднаго во святых Своих.
Винограда Христова добраго делателя / и Таин Божиих усерднаго строителя / песнословим тя, отче богомудре Ионо, / Троицы обиталище пресветлое, / и молим днесь мы чада твоя духовная: / купно с тобою в Царстве Божией славы / сотвори ны быти воспеватели // превозносимаго и славимаго во святых Своих.
Велений Вседержителя провозвестника / и судов Божиих возвестителя, / тихословестнаго миролюбия проповедателя / и пламеннейшаго расколов и ересей изобличителя, / почитаем тя, духоносне отче Ионо, / доблественнейшаго правоверия исповедника, / и славословим дароподателя Господа, // благословеннаго и препрославленнаго во святых Своих.
Слава, глас 6.
Подобен: Т
ридневен:
Ликуй ныне, богоспасаемый граде Одессо, / яко лучами солнечными просвещаемый чудотворным образом Касперовским; / се бо богомудрый Иннокентий / со твердыми во мучениих Анатолием и Григорием, / пречудный Гавриил-храмостроитель / и дивный в чудотворениих Иона / со преподобным отцем Кукшею, / яко звезды небесныя сияющи, / присно молятся спастися граду нашему // и всем верою живущим в нем.
И ныне, праздника или Богородичен, глас тойже:
Богородице, Ты еси Лоза истинная, / возрастившая нам Плод живота, / Тебе молимся: молися, Владычице, со святыми апостолы // помиловатися душам нашим.
НА ЛИТУРГИИ
Прокимен, глас 7: Возвеселится праведник о Господе / и уповает на Него.
Стих: Услыши, Боже, глас мой, внегда молитимися к Тебе.
Апостол ко Евреем, зачало 311.
Евангелие от Матфея, зачало 11.
Причастен: В
память вечную будет праведник, от слуха зла не убоится.
Молитва
О предивный и преславный отче наш Ионо, пастырю истинный и чудотворче всечудный! К тебе, яко к великому молитвеннику вси прибегаем и усердно просим: не остави нас смиренных и грешных, яви нам твое отеческое заступление, испроси нам у Господа, Его же верный служитель был еси, да дарует нам веры Православныя твердое и неизменное сохранение, Церкви и святителям нашим послушание, жития исправление, в нуждах, скорбех и немощех утешение, да низпошлет граду и отечеству нашему мир и благоустроение, земли плодоносие, воздухов благорастворение, вся благопотребная ко спасению преподавая, да, во благочестии и заповедех его возрастающе, купно с тобою и всеми святыми сподобимся воспевати Бога в Троице славимаго, Отца и Сына и Святаго Духа во веки веков. Аминь.

Ссылка | Оставить комментарий |

Comments {0}