?

Log in

No account? Create an account

Канон молебный святым Царственным страстотерпцам

« previous entry | next entry »
июл. 18, 2010 | 02:08 pm

Молебный канон святым Царственным страстотерпцам составлен протоиереем Илией Тетерько, клириком г. Одессы. Воспроизводится по изданию: Канон молебный святым царственным страстотерпцем: императору Николаю, императрице Александре, царевичу Алексию, великим княжнам Ольге, Татиане, Марии, Анастасии. Одесса: Свято-Сретенский храм пос. Черноморка, 2006.

Канон молебный
святым царственным страстотерпцем:
императору Николаю, императрице Александре, царевичу Алексию,
великим княжнам Ольге, Татиане, Марии, Анастасии.
Благословившу священнику, начинаем по обычаю, таже поем на оба лика псалом избранный. Предстоятель же в сие время раздает свещи возженныя сослужащим и братии.
1 лик: Б
ог нам прибежище и сила, 2 лик: Помощник в скорбех, обретших ны зело. 1. Сего ради не убоимся, внегда смущается земля. 2. Боже, кто уподобится Тебе? / Да не премолчиши, ниже укротиши, Боже. 1. Яко се врази Твои возшумеша, / и ненавидящии Тя воздвигоша главу. 2. На люди Твоя лукавноваша волею / и совещаша на святыя Твоя. 1. Положиша трупия рабов Твоих брашно птицам небесным, 2. Плоти преподобных Твоих зверем земным. 1. Пролияша кровь их, яко воду. 2. Яко Тебе ради умерщвляеми есмы весь день, 1. Вменихомся яко овцы заколения. 2. Положил еси нас притчу во языцех. 1. И бых язвен весь день. 2. Разжегл ны еси, якоже разжизается сребро. 1. Проидохом сквозе огнь и воду, и извел еси нас в покой. 2. Веселитеся о Господе и радуйтеся, праведнии. 1. Яко Господь в роде праведных. 2. И наследие их в век будет. 1. Воззваша праведнии, и Господь услыша их. 2. Свет возсия праведнику, и правым сердцем веселие. 1. В память вечную будет праведник. 2. Святым, иже суть на земли Его, / удиви Господь вся хотения Своя в них. 1. Дивен Бог во святых Своих. 2. Праведник, яко финикс, процветет: / яко кедр, иже в Ливане, умножится. 1. Возвеселится праведник о Господе и уповает на Него: 2. И похвалятся вси правии сердцем. 1. Слава Отцу и Сыну и Святому Духу / и ныне, и присно, и во веки веков. Аминь. 2. Аллилуия, аллилуия, аллилуия, / слава Тебе, Боже. 1. Аллилуия: 2. Аллилуия:
Посем Бог Господь: во глас 4 со стихи.
Таже тропарь, глас 4:
Днесь благовернии людие, светло почтим / седмерицу честную царственных страстотерпец. / Христову едину домашнюю церковь: / Николая и Александру, / Алексия, Ольгу, Татиану, Марию и Анастасию. / Тии бо, уз и страданий многоразличных не убоявшеся,/ от богоборных смерть и поругание телес прияша / и дерзновение ко Господу в молитве улучиша. / Сего ради к ним с любовию возопим: / о святии страстотерпцы, / гласу покаяния и стенанию народа нашего вонмите, / землю Российскую в любве к Православию утвердите, / от междоусобныя брани сохраните, / мир мирови у Бога испросите / и душам нашим велию милость.
2 лик поет тойже тропарь.
1 лик: С
лава, и ныне: Богородичен, глас тойже:
К Заступнице страны нашея, / Приснодеве Богородице притецем / и к первописанней иконе Ея ныне припадем, / с верою зовуще из глубины души: / о Мати Божия, спаси землю Русскую, / исцели сокрушение ея / и верныя люди утеши.
Псалом 50 и канон страстотерпцем, глас 8. Поем же его без ирмосов на 4.
Песнь 1. Ирмос: В
оду прошед:
Любовию повергаеми, к вам, святии мученицы, припадаем, просяще от бед лютых избавления.
Печали многия обуревают души наша, избавите от сих нахождения, святии, молитвами теплыми вашими.
Слава: Сердца и души наша утвердите в любви Божией, страстотерпцы царственнии, да царствует в нас ум Христов.
И ныне: Воззри на Землю Русскую, Богородице Владычице, и от бед всеразличных избави чада Твоя.
Песнь 3. Ирмос: Небеснаго круга:
Дивнии исповедницы имене Христова, подвигом жизни вашея направите нас ко пристанищу спасения.
Бурю смущений велиих и соблазнов в Отечестве нашем укротите молитвами вашими, приснии заступницы наша.
Слава: Веру Православную непреобориму соблюдите и благочестие в Державе вашей насадите, царственнии покровителие наша.
И ныне: Покровом Твоея благости, Пречистая, покрый землю нашу страждущую, исцели язвы богоборческия и верныя люди утеши.
Посем священницы и оба лика вкупе поют катавасию:
Молите Бога о нас, / святи царственнии страстотерпцы, / яко мы усердно к вам прибегаем, / скорым помощником и молитвенником о душах наших.
Призри благосердием, Всепетая Богородице, / на мое лютое телесе озлобление / и исцели души моея болезнь.
Ектения: Помилуй нас, Боже: и седален, глас 2:
Моление теплое принесите Владыце Господу, / чудотворцы славнии и прехвальнии страдальцы, / да ходатайством вашим / вера Православная во Отечестве нашем утверждается / и Церковь Божия именами святых красуется / во спасение наше и обновление.
Песнь 4. Ирмос: Услышах, Господи:
Незлобием и кротостию своею богоборцем противостояще, царю преславне Николае, за враги молился еси и нас молитвами твоими в братолюбии и смирении утверди.
Дерзновение велие стяжавшии у Спаса Христа, призывающим вас на помощь скорые услышателие и помощницы явитеся, прелюбезнии.
Слава: Житейских скорбей и болезней телесных врачеве показалися есте, молитвенницы наша всеусерднии, тако и нас избавите от сих нахождения.
И ныне: Исцели, Пречистая, душевныя наша немощи и страсти телесныя, поспеши, о Госпоже, здравие подати, Врача всем рождшая, Христа.
Песнь 5. Ирмос: Просвети нас:
Веры Православныя поборницы и благочестия отеческаго блюстителие, супружества христианскаго правило, домашния церкве образе: прославляем вас, святии.
Добродетельнаго корене благокрасныя леторасли явилися есте царственныя дети, светом доброт ваших озарите души наша.
Слава: Землю Русскую любовию своею покрывающии и теплыми молитвами люди ваша соблюдающии, не престайте нас миловати, страстотерпцы славнии.
И ныне: Обрати, Мати Божия, сердца людей к Сыну Твоему и Богу нашему, да сердцем очищенным познают, яко Той есть Любовь Присносущная.
Песнь 6. Ирмос: Молитву пролию:
От бездны страстей и рабства грехолюбиваго свободите нас, мученицы венценоснии, да купно с вами славословим Господа.
Ходатаи к Богу о нас усерднии, воззрите на Отечество ваше земное: утишите раздоры братския, расточенныя люди соберите, да едиными усты и сердцем славословим Троицу Живоначальную.
Слава: В скорбех и печалех утешителей вас обретаем, святии, скорую ослабу и от бед избавление, таже исцелений источник неоскудевающий.
И ныне: Унынием спящих и грехом покровенных к покаянию нас, Пречистая, призови, яко Мати Слова.
Священницы и оба лика вкупе поют катавасию, якоже выше указася по 3-й песни: Молите Бога о нас: Призри благосердием: Таже ектения малая.
Кондак, глас 6:
П
редстателие Отечества нашего всеусерднии, / молитвенницы о людех теплейшии, / славнии и добропобеднии страстотерпцы царственнии, / не презрите воздыханий наших сердечных, / но прострите молебне руцы ваша, / оградите нас от всякаго зла, / исцелите недуги душевныя и телесныя, / ходатаи о всех любовию почитающих вас.
Прокимен, глас 4: Пролияша кровь их, / яко воду. Стих: Вменихомся, яко овцы заколения. Всякое дыхание: Евангелие от Матфея, зачало 36.
Слава: М
олитвами святых царственных страстотерпцев, / Милостиве, очисти / множество согрешений наших.
И ныне: Молитвами Богородицы, / Милостиве, очисти / множество согрешений наших.
Помилуй мя, Боже, по велицей милости Твоей / и по множеству щедрот Твоих / очисти беззаконие мое.
Стихира, глас 6:
Союзом любве Христовы связуеми, / седмочисленнии царственнии страстотерпцы, / поношения и убиения не убоявшеся, / первии, яко новомученицы, / за Русь Святую от безбожных пострадасте / и образ исповедничества и ревности по Бозе / верным людем показасте. / Темже, земли русския / покровителие неусыпаемии явльшеся, / Триединаго Бога непрестанно молите / о спасении Отечества нашего / и всех с любовию вас почитающих.
Посем глаголет диакон молитву: Спаси, Боже, люди Твоя: Лик: Господи, помилуй, 12 раз. Возглас: Милостию и Щедротами:
Песнь 7. Ирмос: От Иудеи дошедше:
Покаяния народа нашего будете ходатаи, да отвратившеся от путей нечестия, с вами возопиим Христу Спасу: отец наших Боже, благословен еси.
Терпением своим, всехвальнии мученицы, злобу вражию победили есте и, кровию своею порфиру царственную очервленивше, возшли в Небесныя селения, идеже поете: отец наших Боже, благословен еси.
Слава: Мир Христов испросите душам нашим, незлобивии агнцы, чашу исповедничества и страданий за Христа вкупе с народом вашим испившии. Мы же, взирающе на подвиги ваша, зовем: отец наших Боже, благословен еси.
И ныне: Богородице Дево, Мати Преблагословенная Спасителя нашего, умири жизнь нашу, да во след заповедей Господних грядуще, умильно зовем: отец наших Боже, благословен еси.
Песнь 8. Ирмос: Царя Небеснаго:
Царя Небеснаго служителие достославнии явилися есте и помощницы скорые превозносящих Христа во веки.
Изнемогающим нам от соблазнов многих утверждение в вере и благочестии испросите, всеблаженнии, поющим вас и превозносящих Христа во веки.
Слава: Благодати и покровительства вашего просящих не отвержите, богоноснии мученицы, славословящих с вами Христа во веки.
И ныне: Страстей и болезней находы отгоняеши от нас, Дево Богородице, славословящих Сына Твоего и Спаса нашего во веки.
Лик: Хвалим, благословим, покланяемся Господеви, поюще и превозносяще Его во веки.
Ирмос: Ц
аря Небеснаго, / Егоже поют вои ангельстии, / хвалите и превозносите во вся веки.
Песнь 9.
Ирмос: Воистину Богородицу Тя исповедуем, / спасеннии Тобою, Дево Чистая, / с безплотными лики Тя величающе.
Молитвы наша приимите, мученицы всехвальнии, и в добродетельном жительстве утвердите нас, избавляюще от зол и напастей.
Увенчаннии небесною славою, боголюбезнии исповедницы, нам испросите причастие вашея присносущныя радости.
Слава: Трисиянне Владыко Господи, просвети нас блистанием подвигов добровольных страдальцев царственных, сынами Света Своего содевая.
И ныне: Не отступи от нас, Дево Благословенная, денно и нощно воспевающих Тя, но предвари и избави от всякия скорби и печали.
Таже за Достойно: лик поет стих сей, глас 8:
Владычице, приими молитвы раб Твоих / и избави нас от всякия нужды и печали. / Ты еси, Богородице, оружие наше и стена, / Ты еси Заступница, и к Тебе прибегаем, / Тя и ныне на молитву призываем, / да избавиши нас от врагов наших. / Возвеличим Тя вси, / Всенепорочную Матерь Христа Бога, / Юже осени Дух Пресвятый.
Таже стихиры, глас 8.
Боговенчанне царю Николае, / клеветы, злобу, мучение и смерть претерпевый, / непоколеблем явился еси богоборными ополченьми, / венец Небесный от Христа Бога приял еси / и ныне ходатайствуеши о любовию почитающих тя.
От лютеровы веры / пришла еси во ограду Церкве Православныя/ и новое Отечество твое и люди / от Бога тебе врученныя сердечне возлюбила еси, / святая царице Александро, / от рук Христовых с венцем царским / крест исповедничества прияла еси./ Сего ради чтим тя, молитвеннице наша теплейшая.
Возвеличим песньми хвалебными / четверицу дев святых: / Ольгу, Татиану, Марию, Анастасию / вкупе со отроком мужеумным Алексием, / воином Христовым неодоленным, / царствующих со Спасом Господом во веки.
Посем Трисвятое: Отче наш: Тропарь святым, глас 4:
Ко святым исповедником веры Православныя, / страстотерпцем царственным усердно припадем, / благочестно зовуще из глубины души: / славословие наше, святии, приимите, / вонмите воздыханием нашим сердечным, / потщитеся избавитися нам от належащих скорбей, / притекающим ко крову вашему, славнии.
Слава, и ныне, Богородичен, глас тойже:
С Вышних призирая, убогия приемля, / посети нас, грехов ради наших скорби терпящих, / Владыко Всемилостиве, / молитвами Богородицы и всех святых русских / даруй земли нашей велию милость.
Ектения сугубая, юже глаголет диакон с кадилом. Возглас: Услыши ны, Боже: Посем возглашает диакон: Ко святым царственным страстотерпцем помолимся. Лик: Святи царственнии страстотерпцы, молите Бога о нас.
И чтет предстоятель молитву сию:
О святый страстотерпче царю мучениче Николае! Господь тя избра помазанника Своего, во еже милостивно и право судити людем твоим и хранителем Церкве православныя быти. Сего ради со страхом Божиим царское служение и о душах попечение совершал еси. Господь же, испытуя тя, яко Иова Многострадальнаго, попусти ти поношения, скорби горькия, измену, предательство, ближних отчуждение и в душевных муках земнаго царства оставление. Вся сия ради блага России, яко верный сын ея, претерпев, и, яко истинный раб Христов, мученическую кончину приемь, Небеснаго Царства достигл еси, идеже наслаждаешися Вышния славы у Престола всех Царя, купно со святою супружницею твоею царицею Александрою и царственными чады Алексием, Ольгою, Татианою, Мариею и Анастасиею.
Ныне, имея дерзновение велие у Христа Царя, моли, да простит Господь грех отступления народа нашего и подаст грехов прощение и на всякую добродетель наставит нас, да стяжим смирение, кротость и любовь и сподобимся Небеснаго Царствия, идеже купно с тобою и всеми святыми новомученики и исповедники Российскими прославим Отца и Сына и Святаго Духа, ныне и присно и во веки веков. Аминь.
И прочая по обычаю. И отпуст. Таже поем стихиру на целование образа, глас 8.
Подобен: О, преславнаго чудесе:
О, преславнаго чудесе! / Святии царственнии страстотерпцы седмочисленнии, / в годину страданий за Христа / сохраниша любовь и верность Ему, / друг друга тяготы носяще / и тако исполняюще закон Его, / сего ради ныне на Небеси царствуют / и дерзновенно молятся / о спасении душ наших.

Ссылка | Оставить комментарий |

Comments {1}

(без темы)

from: h1809r
date: июл. 18, 2010 01:23 pm (UTC)
Ссылка

пара случайных примеров:
"Незлобием и кротостию своею богоборцем ПРОТИВОСТОЯЩЕ, царю преславне Николае, за враги молился еси" -- это обращение к святому Царю на "Вы", или что-то иное?
"Дерзновение велие стяжавшии у Спаса Христа, призывающим вас на помощь скорЫЕ услышателие и помощницы явитеся, прелюбезнии..." -- неужели трудно не допускать таких ляпов? к сожалению, сейчас так почти везде...
...а у среднем -- норма:)

Ответить | Ветвь дискуссии