?

Log in

No account? Create an account

Акафист Патриарху Московскому и всея Руси Никону

« previous entry | next entry »
окт. 25, 2010 | 02:47 pm

Акафист Святейшему Патриарху Никону составлен в 2005 году Мариной Васильевной Осипенко. Воспроизводится по публикации: Шмидт В. В. Никоноведение: библиография, историография и историософия // Государство, религия, Церковь в России и за рубежом. № 3-4 (44-45), 2008. — М.: Изд-во РАГС, 2008. Акафист на стр. 217 – 226. Поскольку святитель еще не прославлен Церковью в лике святых, публикуемые богослужебные тексты предназначены только для келейного употребления.

Акафист святителю Никону,
Патриарху Московскому и всея Руси
Кондак 1
Богоизбранный пастырю словеснаго стада Христова, Церкве Российския невестокрасителю изряднейший, яко рясны златыми святынями украсив ю, блаженне, доброте духа ея поревновал еси благосердно, да во славе предстанет Небесному Жениху Христу. Ты же, слыша глас Грядущаго с Небесе, иже над всеми есть, радуешися, яко друг Жениха Предтеча славный. Тако и мы, вшедше в радость сию, зовем ти: Радуйся, Святейший Патриарше Никоне, дивный соработниче Зиждителя Града Небеснаго.
Икос 1
Ангельскому чину подражая, вестниче небесный, явился еси, святителю отче Никоне, горе к тайнам Царства Небеснаго, возводя оземленевшия души наша. Ты бо путем многоскорбным до конца Христу последовал еси, и, подвиг земный добре совершив, в Небесном Граде присно священнодействовати удостоен был еси. Мы же, о земных умолкше, духовная и благоподражательная твоя исправления воспомянем досточестно, со умилением взывающе:
Радуйся, любовию Божественною движимый, Христу нераздельно соединивыйся;
радуйся, безмолвием и псалмопением Господу угождая, в пустыню Анзерскую вселивыйся.
Радуйся, яко высоким служением облеченный, внутренния пустыни не покинул еси;
радуйся, сокровище сердца твоего собравый на Небеси.
Радуйся, великочестный гражданине Святаго Града Иерусалима Новаго;
радуйся, сердце утвердивый на краеугольнем камени Града сего, Слове Живаго Бога.
Радуйся, топазе твердый, поставленный со иными угодники во ограде Сиона Небеснаго;
радуйся, яко взыскуя Христа, многоценнаго бисера, не уклонился еси от пути теснаго.
Радуйся, неразоримыми всенощных бдений забралами Град Святый утверждающий;
радуйся, богоприятнаго поста оружием врагов полчища от него прогоняющий.
Радуйся, на еже верою взирал еси, ныне в свете невечернем созерцающий;
радуйся: «Воспойте Господеви песнь нову», — Бога Всеблагаго величая, восклицающий.
Радуйся, Святейший Патриарше Никоне, дивный соработниче Зиждителя Града Небеснаго.
Кондак 2
Видя сиротство свое и, от юности не дольняго, но горняго отечества взыскуя, дванадесяти лет преселился еси отрок Никита в Макариев монастырь премудрости словесней внимати, Иисусу отроку последующе, Иже рече: «В дому Отца моего достоит быти Ми». В возраст же совершен пришед, помазася священства Божественною мастию, и иерей благолепен бе, самому присноизобильному источнику Благодати предстоя. Обаче, душею в любовь Божию распалаяся, иноческое житие возлюби зело, яко к Богу приближающее. Сего Единаго возжелав, устремился еси ко отоку Соловецкому и тамо ангельскаго образа сподобился еси от преподобнаго Елеазара; и тако выну Господа пред очима своима имея, воспеваше Ему: Аллилуия.
Икос 2
Разум и достоинство дарова тебе Бог, преблаженне Никоне, яко истинну пастырю и верному делателю Божию, иже печашеся устроити и питати словесное свое стадо чистою, и нелестною, и твердою пищею, и во всем содержати всякое священное деяние по чину Великия Церкве. Мы же, овцы учений твоих, зовем ти:
Радуйся, духовных добродетелей доме, богоразумием украшенный;
радуйся, твердый уме, благодатию и истиною освященный.
Радуйся, великий в мудрости и больший в благоговении;
радуйся, высокий в ведении и высочайший в смирении.
Радуйся, милостивый заступниче сирых пред царем земным;
радуйся, дерзновенный ходатаю к Царю Небесному.
Радуйся, наставниче добрый возлюбивших Истину;
радуйся, непоколебимая твердыне веры Православныя.
Радуйся, яко освяти тя Господь во истину Свою;
радуйся, яко узре тя пастыря Себе в предстательство.
Радуйся, горo, юже благоволи Бог жити в ней;
радуйся, ибо Господь вселится до конца.
Радуйся, Святейший Патриарше Никоне, дивный соработниче Зиждителя Града Небеснаго.
Кондак 3
Силою, данною ти свыше, возшел еси, Никоне, на престол великия и святыя Церкве, царскому и всего священнаго Собора прошению повинуяся, ибо избра тя Господь мужа по сердцу Своему, яко Божия строителя церковнаго, сильнаго наставити в здравем учении, и противящияся обличати, и Церковь Христову во единстве пасти и соблюдати. Ты же, Патриарше Никоне, яко Илия боговидец, ревнуя по Бозе, неприкровенно рекл еси: «Ничто ино богоугоднее есть, яко присно во святых и божественных заповедех поучатися, и на тех крепко утверждатися». И сам, боголюбнейше сие исполнив, глаголы Спасовы в сердце нося, смерти не узриши, но, свыше световодительствуем к первому Свету Богу, воспеваеши присно: Аллилуия.
Икос 3
Имущие два великая дара, священство и царство, богоизбранную двоицу: благочестиваго царя и христолюбиваго патриарха, возрадовася страна Российская: яко священство божественным служит, царство же человеческим владеет и о сем печется. Вкупе же уставы и правила Святых отец, яко от Святаго Духа вдохновенны, облобызающе приемлют и держат, всяку новину потребляюще. От единаго начала обоя происходят, человеческое украшающе житие; ничто же бо тако бывает поспешнее царству, яко святительская честь: егда бо вера евангельская сияет, тогда и архиерейство почитается. Ты же, Патриарше Никоне, предстоя ныне престолу Царя Небесного, не забуди тебе поющих:
Радуйся, от чрева матере своея во освящение Богу избранный;
радуйся, не от человек, но свыше пронареченый Патриарх, и Духом помазанный.
Радуйся, добротою священноначальническаго сана благочестно удобренный;
радуйся, светильниче богоносный, на свещнице церковнем поставленный.
Радуйся, чина боголепнаго церковнаго утвердителю;
радуйся, догматов Божественных верный хранителю.
Радуйся, книг богомудрый исправителю;
радуйся, духовнаго любомудрия учителю.
Радуйся, богословие Слова на Руси утвердивый;
радуйся, наукам начаток в стране нашей положивый.
Радуйся, по дару благодати возмогший три монастырия устроити;
радуйся, луче трисолнечнаго озарения Святыя Троицы.
Радуйся, Святейший Патриарше Никоне, дивный соработниче Зиждителя Града Небеснаго.
Кондак 4
Бурю внутрь имея помышлений сумнительных, кий грешник не возопиит, яко Петр: «Господи, спаси мя, утопаю!» Но ты, Патриарше Никоне, силою Крестною от потопления спасенный и во славу честнаго и животворящаго Креста обитель посреди моря воздвигнувый, умоли Спасителя нашего Господа милостивно окормити кораблец наш ко острову спасения, да ветрилом Креста окриляеми, достигнем тихаго пристанища, иде же угодившии Богу присно воспевают: Аллилуия.
Икос 4
Слышаще и ведуще от писаний Божественных, яко вси подвизавшиися во благочестии распинаху плоть свою со страстьми и похотьми, ты, Патриарше Никоне, тепле Богу всеблагому моляся, постом душу свою христолюбивую смирял еси и пост добродетельми освящал, исполняя божественным Павлом реченное: «Во всем составляюще себе, яко Божия слуги в терпении мнозе, в скорбех, в нуждах, в ранах, в темницах, в нестроениих, во трудех, во бдениих, в постех». Тем же, плотию и духом постивыйся, святче Божий, тако вооружился еси, яко не токмо плоть, на дух похотствующу, доблественне духу покорил еси, но и самыя львы рыкающия, словесныя духи лукавыя, победил храбрьственне. Сего ради зовем ти:
Радуйся, воздержанием пищу Божественную познавый;
радуйся, подвиги своими Богу работати верных научавый.
Радуйся, устава скита Анзерскаго присный исполнителю;
радуйся, неусыпный о чистоте сердца попечителю.
Радуйся, избранный от пелен в воинство Христово;
радуйся, вписанный от юности в книгу живота вечнаго.
Радуйся, совлекший древнюю зол ветхость;
радуйся, ходящий во обновлении жизни.
Радуйся, духом обновивый ум свой богомудрый;
радуйся, тихое безстрастия безмолвие пристяжавый.
Радуйся, яко кичливую мира лестнаго гордыню, попрал еси;
радуйся, яко в Небесный Церкве град, яко победоносец введен был еси.
Радуйся, Святейший Патриарше Никоне, дивный соработниче Зиждителя Града Небеснаго.
Кондак 5
Яко боготечная звезда возсияла еси икона Богородицы, юже святейшему патриарху Никону принесоша грецы от Святыя Афонския горы в Богом снабдимый град Москву. И, яко втораго Сиона жилище, освятила еси себе Пречистая на Святом езере Иверский монастырь. Никон же блаженнейший, монастырь устрояя с радостию, слово похвальное рече к Пресвятей: «Да усмотрим же в Ней дверь небесную райскую, Юже паче всех селений Иаковлих всех Содетель возлюби, и любовию напишем на сердцах наших Тоя боголепный зрак, яко дверь Сия есть и хранительница дверем: скверным и нечистым возбраняет вход». Мы же, милостиваго Ея заступления просяще, благодарственно воспеваем: Аллилуия.
Икос 5
Виде Пресвятая Троица твое мудрование о небесных, Святейший Патриарше, положи тебе на сердце, устроити три монастырия, яко три образы спасения, да вземше крест свой, последуем от земных ко Иерусалиму Новому, и предстательством твоим умолим благую Вратарницу двери райския нам, со блудницею и разбойником плачущим, отверзти: уповаем бо на заступление твое, наследниче вечных благих, ихже око не виде и ухо не слыша, мы, восписующии ти похвальная:
Радуйся, рая мысленнаго познавый сладость;
радуйся, возлюбивый Крест, иже страдания обращает в радость.
Радуйся, Крест Гоподень водрузивый среди моря, яко знамение спасения;
радуйся, сей скипетр Христов мощами святых украсивый паче драгих каменей.
Радуйся, у Вратарницы испросивый стране Российстей небесное заступление;
радуйся, икону Ея Иверскую, яко сосуд благодати горы Афонския, приемый.
Радуйся, спасительных Страстей Христовых усердный почитателю;
радуйся, храма Гроба Господня во славу Воскресшаго в земли Русской созидателю.
Радуйся, во образ Иерусалима Новаго обитель устроивый;
радуйся, подражания Христу себе самаго образ нам явивый.
Радуйся, яко за сие в Царствии Небеснем велий наречен был еси;
радуйся, не оставляяй нас, на земли меньших, любящих тя.
Радуйся, Святейший Патриарше Никоне, дивный соработниче Зиждителя Града Небеснаго.
Кондак 6
Проповедник богоносен явился еси, патриарше Никоне, поучая стадо свое, яко милостынею щедрот всяк, кто хотяй подражает Богу. И Сам Господь Иисус рече: «Будите милосерди, якоже Отец ваш небесный милосерд есть». Не постом же или нестяжанием, рече, подобитися, но милосердием: свойственно бо добродетели сей в подражающих Богу воображати Его. Всем же, по силе своей милостыню дающим, Бог всемогущий Вседержитель воздаст, по святому Евангелию, зде сторицею, и в будущем веце живот вечный, идеже выну да поют: Аллилуия.
Икос 6
Воссиявый во Египте просвещение истины Христос и нас, во тьме неведения седящих, да просветит молитвами угодника своего блаженнаго Никона: душа убо его, равноангельнаго жития добротою удобренная, по скончании многоскорбныя временныя жизни, ангелы Божиими досточестне ведома, в нерукотворенный вечныя жизни двор Небесный радостне вселися, и яко богоизбранная невеста Христова, на вечный брак Небесный пришедши, Небесному Жениху Христу Богу уневестися; тело же честное, труды страдальческими утружденное, бденьми всенощными обезстрастенное, в постех добре подвиг скончавшее, и струями слезными от тимения сквернаго омовенное, положися в церкви велицей Воскресения Христова под Голгофою с пением похвальным:
Радуйся, по успении телом нетленным во обитель свою пришедый;
радуйся, душею во Иерусалим Небесный вшедый.
Радуйся, в житии земнем чудеса и исцеления творивый;
радуйся, и во упокоении дивна дела явивый.
Радуйся, яко разумевая доброту Божию зело чудился еси;
радуйся, тоя доброты служителю Мелхиседеку подобный.
Радуйся, дерзновенный подражателю совершенства Отца Небеснаго;
радуйся, яко не уклонился еси от пути крестнаго.
Радуйся, душе небошественная;
радуйся, радости небесныя вестниче.
Радуйся, милости Божия раздаятелю;
радуйся, в невидимой брани нам пособниче.
Радуйся, Святейший Патриарше Никоне, дивный соработниче Зиждителя Града Небеснаго.
Кондак 7
Хотя, богомудре Никоне, слово Спасово животворящее: «Яко же глаголят по сему вас и познают, яко мои ученицы есте, аще в любви пребудете, аще заповеди моя соблюдете», открыти другом твоим, тако написал еси: «Любовь не весть достояния лиц рассуждати, ибо воистинну любовь подобна есть солнечному просвещению, во вся концы земли достизающу: любви начало бытие и конец Христово пришествие»; ныне же в любви сей пребывая неразлучно, вопиеши с веселием: Аллилуия.
Икос 7
Нова вся явишася тебе, Святейший Патриарше Никоне, егда разлучился еси повелением Господним от временнаго жития сего: небо ново, земля нова и град Иерусалим нов, предуготован от Бога, яко невеста украшенная мужу своему, в него же с неизреченным веселием восприял еси в сожитие вечное Ангелом и всем святым, и в сослужение присное Иисусу Христу, Иже есть Иерей во век по чину Мелхиседекову. Мы же, просяще предстательства твоего, поем ти:
Радуйся, радуго, земных Небеси совокупляющая;
радуйся, звездо, путь ко Граду Небесному указующая.
Радуйся, облаче благодати, от лести нас покрываяй;
радуйся, источниче, жаждущих Небеснаго утешения напояяй.
Радуйся, светлая высото смирения;
радуйся, умная глубино духовнаго дерзновения.
Радуйся, всенощным псалмопением плоть свою духу покоривый;
радуйся, постнических подвигов ярем с веселием носивый.
Радуйся, на земли одинокий странниче;
радуйся, на небеси ближний друже Христов.
Радуйся, в радость Господа своего вшедый;
радуйся, яко исполнил Господь желание сердца твоего.
Радуйся, Святейший Патриарше Никоне, дивный соработниче Зиждителя Града Небеснаго.
Кондак 8
Странное снисхождение Бога вочеловечшася разумея, на камени здания своего утвердил еси святейший Никон сие спасительное ведение нас ради, да разум имуще, от знамения и образа к началом образных истин восходити возможем: познаем наше достоинство, почтим начало образное, знаем тайны силу и за кого Христос умре; будем бози Его ради, зане и Он нас ради человек бысть и изволи прияти горшее, да даст лучшее: обнища, да мы Онаго нищетою обогатимся; рабий зрак прият, да мы свободу восприимем; сниде, да мы возвысимся; искусися, да победим; бесчествовася, да нас прославит; умре, да нас привлечет к Себе, грешных, но обаче спасения чающих и вопиющих Ему: Аллилуия.
Икос 8
Весь быв в нижних, не отступился еси Вышняго Иерусалима, глас моления возвышая ко Господу, глаголющему: «Се, восходим во Иерусалим, и Сын Человеческий предан будет, и поругаются Ему, и уязвят Его, и оплюют Его, и убиют Его». Се ступени, душу к Небеси возвышающия, ими же ты, блаженне Никоне, в трудех и терпении восходил еси, соскорбящаго и утешающаго не обретая кроме Утешителя Единаго. Молитвами же твоими да подаст и нам силу Христос очищенными смыслы Ему сшествовати, и умертвитися Его ради житейским сластем, и с Ним ожити к жизни будущаго века. Буди убо, отче Никоне, жезл крепости нашея в скорбех, да зовем, почитающе труды твоя:
Радуйся, любовию вослед Господа простираяйся, задняя же забываяй;
радуйся, скорби, яко Иов, со благодарением претерпевавый.
Радуйся, заступления земных родителей лишенный;
радуйся, Отцу Небесному в сыновство причтенный.
Радуйся, страданием учения своя запечатлевый;
радуйся, даже до смерти послушание воле Божией явивый.
Радуйся, святителей Московских собравый;
радуйся, крестом и мантиею твоими Патриарха Тихона на подвиг благословивый.
Радуйся, сан Патриарший, яко образ Христов живый и одушевленный явивый; |
радуйся, царству Российскому верный пособниче и молитвенниче.
Радуйся, Царствия Христова усердный проповедниче;
радуйся, путевождю во Иерусалим Небесный путешествующих.
Радуйся, Святейший Патриарше Никоне, дивный соработниче Зиждителя Града Небеснаго.
Кондак 9
Всяко слово твое, отче Никоне, святил еси ко благодарению и прославлению Промыслителя Бога, ко спасению уязвляющаго сердца наша любовию Своею. Ныне же душа твоя с двемадесятьма четырьми старцы присно поет на Небеси седящему на Престоле: Аллилуия.
Икос 9
Ветии многовещаннии, суд Божий на ся восхитивше, судити святейшаго патриарха, яко рыбы безгласныя не возмогоша вины твоея глаголати. Ты же, поминая, како Христос рече: «И будете ненавидими всеми, имене Моего ради, и тогда соблазнятся мнози, и друг друга предадят, и возненавидят друг друга и за умножение беззакония иссякнет любы многих», — безчестие кротко терпел еси, веруя, яко претерпевый до конца спасется. И постыдишася гордии, иже неправедно беззаконноваша на тя, имя же твое на небесех писано бысть, да вси припадающе похваляют тя:
Радуйся, примером подвигов твоих на стези правды наставляяй;
радуйся, наставниче, светом благодати слово растворяяй.
Радуйся, плоть свою николиже ублажавый;
радуйся, постом и воздержанием крепость душевную стяжавый.
Радуйся, любве ради Христовы оставивый сродство и дружество;
радуйся, тою любовию стяжавый с небесными содружество.
Радуйся, врачу святый, маловерных души благодатию исцеляяй;
радуйся, пастырю, овцы словесныя от мысленнаго волка ограждаяй.
Радуйся, почести мира сего ни во что же вменивый;
радуйся, славу от единаго Бога приемый.
Радуйся, обидимым скорое утешение;
радуйся, изнемогающим от трудов укрепление.
Радуйся, Святейший Патриарше Никоне, дивный соработниче Зиждителя Града Небеснаго.
Кондак 10
Спасти хотя душу, суд неправый, ссылку, скорби и клеветы с радостию терпел еси, блаженне Никоне, помышляя, яко венец без победы, а победа же без брани не бывает. И ныне, предстоя пред престолом Бога, Иже есть в скорбех ближайший утешитель взывающих к нему, вопиеши благодарно: Аллилуия.
Икос 10
Стена непоколебимая и град воистинну непленяемый показался еси, святителю Никоне, добрый победниче Христов, силою Духа Святаго полчища духов злобы прогоняя, молитвою и пощением Богу приближаяся и со Давидом вопия: «Предзрех Господа пред собою выну, яко одесную мене есть, да не подвижуся». Буди же защитник крепок от врагов видимых и невидимых и нам, верою зовущим:
Радуйся, воине Христов, во броня правды облеченный;
радуйся, щитом апостольския веры защищенный.
Радуйся, богозданным надежды шлемом преподобне вошлемленый;
радуйся, ратниче, помощи Божия оружием небесным вооруженный.
Радуйся, орле, молитв твоих крилами нас в день брани осеняяй;
радуйся, гнев Божий, праведно на ны движимый, ходатайством твоим утоляяй.
Радуйся, врагов гордыню и дерзновение в студ им и безчестие обращаяй;
радуйся, нас, чад своих, неискусобранных и безоружных в радость и веселие одеваяй.
Радуйся, яко злато в горниле искушенный;
радуйся, судом царским неправедным осужденный.
Радуйся, яко всеплодие жертвенное Богом приятый;
радуйся, на пути ко Иерусалиму новому земному во Иерусалим Небесный взятый.
Радуйся, Святейший Патриарше Никоне, дивный соработниче Зиждителя Града Небеснаго.
Кондак 11
Пение пасхальное приносим тебе, отче Никоне, яко церкве великия Воскресения Христова здателю благому и учителю: ты бо соумерщвлялся еси усердно Христу, с Ним же и совоскрешен был еси и возновотворен духом, и в новаго облечен человека, светильник же умный и всемирный явился еси, заимствуя вся, елика хощеши, от Триипостасного Света. О, Любве Христовы истинный причастниче, да молитвами твоими да просветит Владыка темныя глубины сердец наших, устрояя их во храмы Духа Святаго, приснопоющаго: Аллилуия.
Икос 11
Светоприемная свеща души твоея истаявает огнем любве Божественныя, егда, молчанием моляся, припадаеши стопам Владыки всяческих и, тепле лобызая пречистеи нозе Его и оставления прегрешений просяще, внимаеши прилежно сердца и утробы Испытующему, Иже рече:
Радуйся, яко Аз воздам коемуждо по делом его;
радуйся, яко ты для имене Моего ради трудился и не изнемогл еси.
Радуйся, яко вем дела твои и любовь и служение и веру;
радуйся, яко последняя твоя дела больша первых.
Радуйся, яко ты сохранил еси слово терпения Моего;
радуйся, яко ты не погубил еси венца твоего в годину искушений.
Радуйся, яко ты не возлюбил еси души твоея даже до смерти;
радуйся, яко оклеветающии и оскорбляющии тебя поклонятся под ногама твоима.
Радуйся, светильниче, предо Мною любовию горящий;
радуйся, яко Аз отворих тебе дверь, ею же вшедый спасается.
Радуйся, узревыший Церковь облеченною в солнце женою;
радуйся, яко Аз возлюбих тя и ныне ты вечеряеши со Мною.
Радуйся, Святейший Патриарше Никоне, дивный соработниче Зиждителя Града Небеснаго.
Кондак 12
Благодатию божественною на всяку молитву внутрь храма Господня сбираеми, ополчимся на невидимыя враги, облекшеся во вся оружия Божия, да возможем стати противу козней диавольских, яко несть наша брань к плоти и к крови, но к началом и ко властем, и к миродержителем тьмы века сего, к духовом злобы поднебесным. Елицы же победиша, о таковых сбысться Писание: святии вси победиша царствия, содеяша правду, получиша обетование и радующеся воспевают Богу: Аллилуия.
Икос 12
Поюще прославльшаго тя Господа, хвалу приносим ти, святителю отче наш Никоне, яко по имени житие свое показавшему: Божественным оружием Креста вооружився, попрал еси бесовская ополчения; истины и правды ради престол Патриарший оставив, вериги на рамо приял еси, пост, молитвы и труды усугубив; клевету и заточение смиренным терпением превозмогая, победитель явился еси, чудесы исцелений еще при жизни сияя. Ныне же во обетованный Град вселився, слышиши како рече глаголет Господь:
Радуйся, яко вся земля и тварь, грехом болящи, Истину призывает;
радуйся, яко Небо благодатию Духа Оную благословляет.
Радуйся, яко вся дела трясутся и трепещут Ея;
радуйся, яко побеждает Истина и несть с Нею обиды ни единыя.
Радуйся, яко побеждающаго сотворю столпом в церкви Бога Моего;
радуйся, яко побеждающему дам ясти от древа животнаго, еже посреде рая Божия.
Радуйся, яко побеждаяй не потерпит вреда от вторыя смерти;
радуйся, яко побеждаяй приимет звезду утреннюю и жезл железный, да упасет языки.
Радуйся, яко Сын Божий, победив, восседе на престоле Отчем;
радуйся, яко побеждаяй силою Его наследит той же престол.
Радуйся, яко побеждаяй облечется в светлую одежду Царствия;
радуйся, яко побеждаяй приимет имя града Иерусалима Новаго, сходящаго с небес.
Радуйся, Святейший Патриарше Никоне, дивный соработниче Зиждителя Града Небеснаго.
Кондак 13
О, добропобедный воеводо Царя Небеснаго, паче Моисея пастырю добрый Святейший Патриарше Никоне! Не к горе осязаемой и пылающей огнем приступил еси, но ко Граду Бога Живаго, к Небесному Иерусалиму. Поминай убо нас пред престолом Господним, заступниче теплый и ходатаю о всех сирых и обремененных, да молитвами твоими не отступит от нас вседетельная благодать Господа нашего Иисуса Христа и не оскудеет в сердцах наших Его любовь, всякое желание и всякий страх побеждающая, да тою направляеми и окриляеми сподобимся и мы с тобою присно пребывати в невечернем дни Царствия Божия, благодарственно поюще: Аллилуия.
Молитва Святейшему Патриарху Никону:
О, священная главо, Святейший Патриарше Никоне, богомудрый и безмездный врачу духовный! Теплая, богоугодная и богоприятная молитва твоя у всесильнаго вседетеля Бога много может. Сего ради ныне о нас, блаженную память твою любовно почитающих, молися небесному врачу Христу Воплощенну Богу, да исцелит вся душевныя и телесныя недуги наша Своея благодати врачевством. О, преудобренный крине мысленный, в Небесном вертограде насажденный, и боготочною росою вечныя радости напоенный, молися животворящему древу человеколюбиву Спасу, да пресладкими духовныя радости плоды напитает скорбящия души наша. О мысленный орле высокопарный, богорасленными деяний твоих крилы в Небесный рай возлетевый, от палящаго бед и напастей зноя осеняй нас распростертыми твоего заступления крилами. О доблий воине Христов, полчища врагов душевных победивый, и славы венцем боговенчанный, молися подвигоположнику Христу Богу, да благопоспешною Его помощию добре подвиг скончавше, сподобимся с тобою, в Небесных селениях всельшеся, немолчными песньми величати Преблагаго в Животворящей Троице Единаго Бога, Ему же подобает всякая слава честь и поклонение, ныне и присно и во веки веков. Аминь.
Иная молитва:
О, священная главо, святителю отче Никоне! Се аз недостойный, воспоминая грехи своя, со смирением и надеждою на ходатайство твое, припадая ко гробу твоему, в нем же почивает многотрудное тело твое, с верою и любовию от сердца вопию ти: святче Божий! Ты яко солнце пресветлое сияеши во вся концы отечества нашего. Покрый землю нашу православную, раздираемую иноплеменники, утиши и умири ю. Защити Церковь Русскую, в ней же первоиерархом был еси, от ересей, расколов и наветов вражиих. Пастырем ея дай ревность по Бозе и попечение о душах, пасомым послушание, иноком буди зерцалом целомудрия. Отшедших от жития сего чад церковных в селения вечная всели. Егда же найдет на нас, отче, година лютая, и врази Божии возстанут на ны и изженут из домов наших, буди нам, якоже Израильскому народу, светоносный столп и облак, покров и забрало. Якоже странен был еси на земли, скорби тяжкия и гонения претерпевая, достигл еси Отечествия Небеснаго, сице и нас приведи во объятия Отча. Да тамо, в Небесных обителех, возвеселимся со всеми святыми, и купно с ними восхвалим препетое и поклоняемое имя Божие во веки веков. Аминь.

Ссылка | Оставить комментарий |

Comments {8}

andrushchenko

(без темы)

from: andrushchenko
date: ноя. 30, 2010 09:10 pm (UTC)
Ссылка

Марией Васильевной Осипенко
Полагаю, что Мариной, а не Марией.

Ответить | Ветвь дискуссии

Уставщик

(без темы)

from: ustavschik
date: ноя. 30, 2010 10:30 pm (UTC)
Ссылка

Да, это я проглядел.
Спасибо, исправил.

Ответить | Уровень выше | Ветвь дискуссии

(без темы)

from: stefan-iljic.ya.ru
date: мар. 31, 2011 06:24 pm (UTC)
Ссылка

Отче, а ведь патриарх Никон почитается как местночтимый святой. Влияет ли сие на возможность богослужебного использования акафиста?

Ответить | Ветвь дискуссии

Уставщик

(без темы)

from: ustavschik
date: апр. 2, 2011 06:56 am (UTC)
Ссылка

Официально его почитание как местночтимого святого не устанавливалось.
То, что почитание есть, я не отрицаю (иначе не было бы ни иконы, ни канона, ни акафиста), но акта церковной власти о провозглашении его святости до сих пор не было. Так что пока -- только келейно.

Ответить | Уровень выше | Ветвь дискуссии

Андрей Дементьев

(без темы)

from: kraegranesie
date: май. 14, 2012 06:00 am (UTC)
Ссылка

"Поскольку святитель еще не прославлен Церковью в лике святых, публикуемые богослужебные тексты предназначены только для келейного употребления."

А что, считаете возможным такое прославление?

Ответить | Ветвь дискуссии

Уставщик

(без темы)

from: ustavschik
date: май. 14, 2012 10:50 am (UTC)
Ссылка

Оно возможно. Но вот будет ли это прославление к пользе Церкви -- еще большой вопрос.

Ответить | Уровень выше | Ветвь дискуссии

Малъ Зануда

(без темы)

from: 3ahyga
date: авг. 15, 2015 02:14 pm (UTC)
Ссылка

Видимо, если вместе в пп.Аввакумом, может и будет такая польза...

Ответить | Уровень выше | Ветвь дискуссии

Уставщик

(без темы)

from: ustavschik
date: авг. 15, 2015 08:54 pm (UTC)
Ссылка

Вот тогда пользы точно не будет. Протопоп покойный огнепален был не только оттого, что сожгли ево самого, но и оттого, что выказывал полнейшую готовность палить своих идеологических оппонентов. Не полезно, IMHO, вчинять такового во святых. Хотя его почитание среди части наших единоверцев, безусловно, существует.
Хотя я видел много лет назад (и дико жалею, что не скопировал хоть как-нибудь) икону, где Аввакум и Никон в нимбах предстоят Спасителю. Спас в облаке, простирает над ними благословляющие длани. К Аввакуму -- с двуперстием, к Никону -- с именословием. Ляпота!

Ответить | Уровень выше | Ветвь дискуссии