Уставщик (ustavschik) wrote,
Уставщик
ustavschik

Category:

Служба преподобному авве Дорофею

Шестиричная служба преподобному Дорофею Газскому составлена одним из насельников Оптиной пустыни; текст имеет статус рукописного, какими-либо цензурными инстанциями не рассматривался, публикуется по авторской машинописи.

Служба преподобному и богоносному отцу нашему Дорофею Газскому
Вечер
На Г
осподи воззвах: стихиры, глас 8.
Подобен: Что вы наречем:
Что тя наречем, авво Дорофее? / реку мысленную, пустыню Газскую орошающую, / богоразумия струи точащую / и сердечныя бразды напояющую / крины монашескаго любомудрия возращающую / и плоды спасения износящую / темже глубину твоего боговидения похваляюще / просим спасения душам нашим.
Что тя возъименуем, славне? / Преподобнаго постника и священна учителя, / православных утверждение и церковное око / киновии прекрасное наздание / единомысленная крепость подвизающихся / послушания образ и молитвы пресветлое всетило / трудолюбия правило и безмолвных похвала / моли спастися душам нашим.
Что тя прознаменую, авво Дорофее? / Скрижаль Духа богописанная / божественная учения нося в разуме / или трость, начертовающая законы Евангельския / иже на сердцах наших написал еси / и неразумием бедствующия просветил еси / многия твоя именования и большая дарования / моли спастися всем нам.
Слава, глас 1:
Яко елейный, отче, сучец, / иже прознаменова спасение от потопа всегубительнаго, / сице твоя книга явися, / иже от потопления греховнаго спасает чтущих ю / и от бури страстей извлачает / в пристанище божественнаго смиренномудрия, / темже твою память светло празднующих / от всяких треволнений спасай твоими молитвами, / Дорофее, отче наш, / наставниче всех подвизающихся.
И ныне, Богородичен.
На стиховне Октоиха.
Слава, преподобному, глас 8:
Монахов множества / наставника тя почитаем, отче наш Дорофее / твоею бо стезею воистину право ходити познахом: / блажен еси Христу работав / и вражию обличил еси силу / ангелов собеседниче и преподобных сопричастниче и праведных / с нимиже молися Господеви / помиловатия душам нашим.
И ныне, Богородичен.
Тропарь, глас 1:
Пустынный житель и в телеси Ангел / и чудотворец явился еси Богоносе отче наш Дорофее / постом, бдением, молитвою Небесная дарования приим / исцеляеши недужныя и души верою приходящих ти / слава Давшему тебе крепость / слава Венчавшему тя / слава Действующему тобою всем исцеления.
Канон, глас 7, егоже краегранесие:
П
есенный плетеся Дорофею авве венец.
Песнь 1
Ирмос: Поспешествовавшему Богу во Египте Моисеови / извести Израиля, / Тому Единому поим, / яко прославися.
Поспешествуй, отче, твоими к Богу молитвами, песенное исправление красно тебе принести, да избавлься от тьмы страстей, победное воспою пение.
Евангельский бисер взыскати изшел еси, мира отреклся еси и желаний и воли греховныя, и послушанием сокровища обрел еси, Духа.
Сочетав изрядно деяние и разум, богомудре Дорофее, якоже две жены Иаков трудолюбнейший, и породил еси добродетель многоплодную.
Богородичен: Елеем молитв Твоих, Богорадованная, уязвленное мое и изнемогшее сердце умягчи и утучни покаянием.
Песнь 3
Ирмос: Утверждение мне буди / словом утвердивый небеса / и укрепивый землю на водах / и избави яко Бог, от всякаго обстояния.
Николиже старцев своих преслушався, и хотения ближнего своему желанию не предпочтил есть, но усвоив себе волю Вседержителя, и в безстрастии Христу поработал еси.
Начало смиренномудрия законоположил еси в стезях подвижнических, еже от всех избавляет сетей, и небесныя отверзает входы.
Искус многолетный прошед, и многообразныя претерпел еси искушения, темже и многолетныя и неисцельныя страсти уврачевал еси, приходящим к тебе, Дорофее авво.
Богородичен: Идеже свет Твой возсиявает ту отбегает печаль, молитвенница наша Богоневестная Дево, темже, души моея унылую тьму потреби, священными ходатайствы Твоими.
Седален, глас 8:
Любосоветный путь избрав, шествовав стезей послушания, яко на крылах легких верхи достигл еси добродетелей, и вогнездился еси в покоище Божественнем. Темже память твою радостно совершающе, молим тя Дорофее отче наш, от всех искушений твое стадо свободи, любовию тя хвалящее.
Слава, и ныне:
Стена непобедимая нам христианом еси Богородице Дево, к Тебе бо прибегающе, невредимы пребываем, и паки согрешающе, имамы Тя Молитвенницу. Тем благодаряще вопием Ти: радуйся Благодатная, Господь с Тобою.
Песнь 4
Ирмос: Отча недра не оставль / и сошед на землю, Христе Боже / тайну услышах смотрения Твоего / и прославих Тя, Едине Человеколюбче.
Постом вооружився на всякую страсть, смирением же на всякое демонское приражение, и пращею молитв твоих сокрушил еси полки чуждих, яко Давид воспевая, кротко, Человеколюбца.
Ловлений любосластнаго мира избегл еси, и объятий отеческих сподобился еси, Дорофее, неразсудным послушанием в покой Божественный вшел еси, Единаго воспевая Человеколюбца.
Евангельскою отче мудростию, и простым языком, тайны сердечныя изглаголал еси, и путь Богоразумия в книзе твоей начертав, и спасительныя положив в ней поучения.
Богородичен: Твердь умная явилася еси Дево Чистая, во утробе Своей носяща Солнце мысленное Христа, просвещающа неразумие душ наших.
Песнь 5
Ирмос: Разгнавый нощь страстную / возсияй ми Свет умный / началородную тьму отгнав бездны / и первозданный Свет возсиявый миру, Содетелю всех.
Елеем целебным болящия намащал еси, яко мира алавастр, Дорофее, сострадающе имея сердце, темже и словеса спасительныя источил еси яко миро, язвы душевныя врачующия.
Трезвенным твоим и очищенным умом, ко стезям правым заблудшия наставил еси, и падших возставив и изнемогшия укрепил еси, и поручник быв отчаянным грешником.
Солнцем разумным возсиял еси в пустыне газстей, изсушая корения греховных страстей, просвещая же слепотствующия души, цельбоносными лучами твоих речей.
Богородичен: Яко семисвещный светильник возсияла еси Отроковице Марие, Богодарными щедротами Твоими просветивши мир, и разгнавши нощь страстную, День Невечерний показала еси.
Песнь 6
Ирмос: От множества прегрешений моих / яко Иону от кита, избави мя / Едине Человеколюбче.
Девство благоцветущее, отче Дорофее принесл еси, и нищету духовную яко дары богатыя, Единому Человеколюбцу.
От сокровищницы твоих добродетелей, стаду своему обнищавшему, ниспосли утешение, яко да явимся Христу, в брачныя ризы одеянныя.
Раздоры и соблазны утоли, и нестроение всякое и междоусобие искорени братнее, яко премудрый архитектон, огради стадо твое миром и единомыслием.
Богородичен: Отступив земных небесных превзошла еси, высши явльшися всякаго умнаго чиноначалия, темже яко Богородицу Тя, и Матерь Света поем, Едина Богоблагодатная.
Кондак, глас 4.
Подобен: Я
вился еси:
Явился еси непоколебимое монашествующим утверждение / авво Дорофее богомудре / и свет поучений твоих знаменася на нас / любовию тебе зовущих: / возшел еси к Богу, еже молитися за ны.
Икос:
Возлюбив, преподобне, Христовы божественныя заповеди, и возненавидев мира сего наслаждение, пришел еси усердно к Тому и был еси светильник просвещая концы блистанием духовным: тем припадая молю тя: просвети мои очи душевнии, воспети твоя подвиги, пощение и бдение, и слезы и болезни и измождение тела, блаженныя ради будущия жизни, еяже ныне наслаждаешися. Моли непрестанно о всех нас.
Песнь 7
Ирмос: В пещь огненную ввержени, преподобнии отроцы / огнь в росу преложиша / воспеванием сице вопиюще: / благословен еси, Господи Боже отец наших.
Философ богомудр явився, истинствуя о Божественных вещех, яко страстей искоренительный начертав закон, и добродетелей стези проповедал еси краткия входы.
Евангельским смиренномудрием блистаяся, просиял еси светлейше посреди собора богоносных отцев, песнь божественную поя: благословен еси Господи Боже отец наших.
Юношески диавола низложил еси, якоже древле Давид прегордаго Голиафа, пращею твоего, отче Дорофее, смирения и послушания.
Богородичен: Адамов зрак приим воплощийся Сын Божий от кровей Твоих Чистая, и всего мя обожи красотою Божества, темже поклоняюся Твоему Рождеству Всенепорочная, и славлю Тя.
Песнь 8
Ирмос: Ангельми немолчно в Вышних славословимаго Бога / Небеса небес, земля, и горы и холми и глубина / и весь человеческий род / песньми Того яко Создателя и Избавителя, благословите.
В пустыне газстей возрастил еси крины благочестия, мысленный и богосажденный тем показал еси сад, и деянием просиял еси Дорофее, и боговедением светлейше, Троицу непрестанно поя.
Вооружил еси словесы твоими монашествующих соборы, и церковь Христову утвердил еси, темже всякое превозношение вражие низлагает паства Христова, смиренномудренно поя Бога.
Егоже возлюбил еси превосходящею любовию, Егоже ради в пустыню вселился еси, Емуже стадо твое привел еси, яко добропасущий пастырь. Сего моли, о поющих память твою.
Богородичен: Воистину превзошла еси чистотою естество безплотных, яко Творца естества зачала еси, Иже светлейше на Фаворе просияв плотски, Светодавец явился, Дево, Сын Твой и Бог.
Песнь 9
Ирмос: Радуйся Невесто светлая / Мати Светодавца / радуйся Вместившая Невместимаго во утробе Твоей / радуйся самех Херувимов Честнейшая / Рождшая Спаса душ наших.
Единому Богу усвоился еси в пустынях обитая, Егоже яко крайняго желания Единаго взыскал еси, Дорофее авво, к Немуже и преставился еси со славою, тем тя вси величаем.
Небо тя прият богомудре отче, пустыннаго гражданина, преблаженне, идеже со Ангелы и всем в постничестве твоими просиявшими отцы, помяни тя величающия.
Еламския мысленная врата тебе отверз Христос Человеколюбец, и яко пастыря тя добраго со апостолы увязе, соблюдшаго овцы невредимы, но не забуди стадо твое, тя любовию величающее.
Богородичен: Царев Престол, херувим превысшая и серафим пресветлейшая, Ты Дево Мати явилася еси на земли, Едина Непорочная, яко несказанно Бога Слова роди, тем Тя вси величаем.
Светилен:
Светозарная память твоя возсия нам, озаряюща верныя лучами твоих дарований, юже славящия общники ны покажи отче Дорофее, в тебе Божественныя светлости.
Слава, и ныне, Богородичен:
Светлое пророческое сбытие, апостольская похвало, преподобных непрестающее радование и всего мира вожделенная Помощнице, просвети нас, рабы Твоя, небесным сиянием.
На стиховне Октоиха.
Слава, преподобному, глас 7:
Круг начертав, отче, разумом, / в немже Бога яко цель положи, / путие же суть добродетели, / рекл еси, богомудре Дорофее, / аще любим братий своих, / к Богу востязуемся, / аще же не любим, / удаляемся от Него, / темже далече растоящияся раздорами / молитвами твоими нас собери / и единомысленный мир даруй церквам.
И ныне, Богородичен.
Tags: Минея Дополнительная, богослужебные тексты
Subscribe

  • Молитва преподобному Максиму Греку

    Текст молитвы преподобному Максиму Греку утверждён к общецерковному богослужебному употреблению решением Священного Синода от 17 июня 2021 года…

  • 22 мая (4 июня) — память…

    …прав. Мелхиседека первосвященника, Царя Салимского († ок. 2000 до Р. Х.), святых 150-ти Отцев II Вселенского Собора (381), преп. Калии девы, свщисп.…

  • 18 (31) мая — память…

    …мучч. Ираклия, Дионисия и Христины девы, Афинских, Петра Лампсакийского, Андрея и Павла Месопотамских, Венедима и Павлина Вифинских († ок. 249 –…

  • Post a new comment

    Error

    Anonymous comments are disabled in this journal

    default userpic

    Your IP address will be recorded 

  • 3 comments