?

Log in

No account? Create an account

Служба святителю Иннокентию Херсонскому

« previous entry | next entry »
июн. 26, 2012 | 12:15 am

Выкладываю в «Уставные заметки» текст бденной службы святителю Иннокентию (Борисову). Текст воспроизводится по изданию: Службы Одесским святым / Под общей редакцией митр. Одесского и Измаильского Агафангела; сост.: архим. Тихон (Василиу), прот. Илия Тетерько, прот. Андрей Николаиди. — Одесса: Издание Одесской духовной семинарии, Астропринт, 2009. Служба на стр. 20 – 37. За помощь в оцифровке текста огромная благодарность достопочтенному ierokirik.

Мая в 25-й день
Святителя Иннокентия, архиепископа Херсонскаго
На велицей вечерни
Б
лажен муж: 1-й антифон.
На Г
осподи, воззвах: стихиры праздника 3 и святаго 5.
Аще кроме праздника, стихиры святаго на 8.
Глас 1:
О дивное чудо / зрим на тебе, о Иннокентие, / всем житием Божию Матерь прославльшаго, / Небесе и земли Царица днесь славою венчает, / и ангельстии лицы песни приносят / песнотворцу изрядному, / и православных собори величие возвещают проповедника чуднаго, / и вселенная вся веселится, / память твою совершающе, святителю богомудре.
Глас 2:
Киими похвальными словесы / пети возможем днесь Иннокентия, / святителя и чудотворца преславнаго, / Златоуста новаго и проповедника изряднаго, / града и страны нашея крепкое заступление, / людем православным скораго в скорбех помощника, / архипастыря досточуднаго / и молитвенника о душах наших.
Киими духовными песньми / славу днесь возвестим дивнаго святителя, / страсти молитвою усердною поправшаго / и доброделания образ всем явившаго / и в память его притекше днесь, радостно зовем: / не забуди, отче, немощныя чада твоя, / но молитвами твоими укрепи / вся тя любовию призывающия / и выну прославляющия дивнаго молитвенника о душах наших.
Киими песненными добротами / похвалити возможем по достоянию / дивнаго во иерарсех Иннокентия, / богословия златокованную трубу / и всесвятый орган Божественнаго Духа. / Благодатию бо Божиею выну озаряем, / Православия наставник преславный явился еси / и проповедник показался неленостный / и молитвенник усердный о душах наших.
Киими дивными похвалы / дерзнем память воспети святителя Иннокентия, / но любовию побеждаеми, усердно вси зовем: / о преславне отче и богомудре, / образе пастырства духовнаго и иерархов воистину похвало, / земли Орловския плод достославный / и града Одессы священное сокровище, / людем православным скорый помощниче, / моли спастися душам нашим.
Слава, глас 6:
Апостольских престолов сонаследниче / и ангельских ликов сомолитвенниче, / пастырю всеславный стада словеснаго и Слова Божия / проповедниче неленостный, / Иннокентие богомудре отче наш, / вознеси многомощную молитву твою / и испроси нам у Христа Господа / оставление грехов и велию милость.
И ныне, праздника или Богородичен, глас 6: Кто Тебе не ублажит:
Вход. Прокимен дне.
Притчей чтение:
Память праведнаго с похвалами, и благословение Господне на главе его. Блажен человек, иже обрете премудрость: и смертен, иже уведе разум. Лучше бо сию куповати, нежели злата и сребра сокровища. Честнейшая же есть камений многоценных: все же честное недостойно ея есть. Долгота бо дней, и лета живота в деснице ея: в шуйце же ея богатство и слава. От уст ея исходит правда, закон же и милость на языце носит. Послушайте убо мене, о чада, честная бо реку: и блажен человек, иже пути моя сохранит: исходи бо мои, исходи живота, и уготовляется хотение от Господа. Сего ради молю вас, и предлагаю мой глас сыновом человеческим: яко аз премудрость устроих, совет и разум и смысл Аз призвах. Мой совет и утверждение, Мой разум, Моя же крепость. Аз Мене любящыя люблю, ищущии же Мене обрящут благодать. Разумейте убо незлобивии коварство, ненаказании же прилагайте сердца. Послушайте Мене и паки, честная бо реку: и отверзу от устен правая, яко истине поучится гортань Мой, мерзски же предо Мною устны лживыя. С правдою вси глаголы уст Моих: ничтоже в них стропотно, ниже развращенно. Вся права суть разумевающим, и проста обретающым разум. Научаю бо вас истине, да будет о Господе надежда ваша, и исполнитеся Духа.
Притчей чтение:
Уста праведнаго каплют премудрость, устне же мужей мудрых ведят благодать. Уста мудрых поучатся премудрости, правда же избавляет их от смерти. Скончавшуся мужу праведну, не погибнет надежда. Сын бо праведен раждается в живот и во благих своих плод правды обымет. Свет праведным всегда, и от Господа обрящут благодать и славу. Язык мудрых добрая свесть, и в сердце их почиет мудрость. Любит Господь преподобная сердца, приятии же Ему вси, непорочнии в пути. Мудрость Господня просвещает лице разумнаго. Постигает бо желающия ю, прежде даже, разумети ю, и удобь узрится от любящих ю. Утреневавый к ней не утрудится, и бдяй ея ради вскоре без печали будет. Яко достойных ея сама обходит, ищущи, и во стезях ея является им благоприемне. Мудрости никогдаже одолеет злоба. Сих ради и рачитель бых доброты ея, и возлюбих ю, и поисках от юности моея. И взысках невесту привести себе, яко всех Владыка возлюби ю. Таинница бо есть Божия хитрости и обретательница дел Его. Труды ея суть добродетели, целомудрию же и разуму та учит, правде и мужеству, ихже потребнее ничтоже есть в житии человеком. Аще же и многоискусства желает кто, весть древняя, и быти хотящая разсмотрит. Свесть извития словес и разрешения гаданий, знамения и чудеса проразумеет и сбытия времен и лет, и всем советник есть благ, яко безсмертие есть в ней и благославие во общении словес ея. Сего ради беседовах ко Господу, и помолихся Ему, и рех от всего сердца моего: Боже отцев и Господи милости, сотворивый вся словом Твоим и мудростию Твоею устроивый человека, да владеет бывшими от Тебе тварьми и да управляет мир в преподобии и правде. Даждь ми Твоих престолов приседящую премудрость и не отлучи мене от отрок Твоих, яко аз раб Твой и сын рабыни Твоея. Посли ю с Небес, от святаго жилища Твоего и от Престола славы Твоея, да, сущи со мною, научит мя, что благоугодно есть пред Тобою. И наставит мя в разум, и сохранит мя в славе своей. Помышления бо смертных вся боязлива и погрешительна умышления их.
Премудрости Соломоновы чтение:
Праведник аще постигнет скончатися, в покои будет. Осудит же праведник, умираяй, живущия нечестивыя. Узрят бо кончину праведнаго и не разумеют, что совещаша о нем, яко повержет Господь нечестивыя безгласны ниц и поколеблет их от оснований, и до последняго исчезнут в болезни, и память их погибнет. Приидут бо в помышление согрешений своих ужасни, и обличит их сопротив беззакония их. Тогда станет в дерзновении мнозе праведник пред лицем оскорбивших его и отметающих труды его. Видевше же его, смятутся страхом многим и ужаснутся о преславном спасении его. Рекут бо в себе, кающеся, и в тесноте духа воздохнут, и рекут: сей бе, егоже имехом некогда в посмех и в притчу поношения, безумнии. Житие его вменихом неистово и кончину его безчестну. Како вменися в сынех Божиих и во святых жребий его есть? Убо заблудихом от пути истиннаго, и правды свет не облиста нам, и солнце не возсия нам. Беззаконных исполнихомся стезь и погибели и ходихом стези непроходны, пути же Господня не разумехом.
На литии стихиры, глас 8:
Днесь торжествуют люди православнии / память совершающе святителя Иннокентия, / и вселенная вся проповедует величие предивнаго Архипастыря, / земля Орловская ныне радуется, / и холми Киевския песни приносят духовныя новому чудотворцу, / страна Вологодская веселия исполняется, / и Харьков прославляет преславнаго проповедника, / степи херсонския ликуют, / и богоспасаемый град Одесса светло празднует, / воспевающе Иннокентия богомудраго.
Иннокентие отче наш, / богословия златословесная уста и благочестия изрядное утверждение, / кто подвиги твоя дерзнет похвалити / или кто возможет величие твое воспети по достоянию, / но днесь ти, припадая, умильно вопием: / моли о граде и стране нашей Всемилостиваго Спаса, / святителю богомудре.
Слава, глас 4:
Житие твое непорочно бысть / и память твоя с похвалами, / отче преславне Иннокентие, / сего ради тя днесь прилежно молим: / во благочестии недвижимо сердца наша утверди молитвами твоими / и от прилогов вражиих / неврежденно сохрани души наша, / святителю богомудре.
И ныне, праздника или Богородичен, глас тойже:
Град почитающий Тя, и по долгу славящий, / покрываеши, Пречистая, Твоим омофором честным, / от нахождения противных, / от глада же и труса, и междоусобныя брани, / Дева Неискусобрачная Богоневеста, / человеков Покров и Заступление.
На стиховне стихиры, глас 1:
Притецем, вернии людие, / со гласом хвалебным прославим Троицы зерцало пресветлое, / сладкодышущую цевницу Духа, / громогласнаго проповедателя церковных догматов, / Иннокентия иерархов великих равностоятеля / и теплаго молитвенника о душах наших.
Стих: Уста моя возглаголют премудрость, / и поучение сердца моего разум.
Приидите сладкозвучными песньми, / восхвалим богоглаголиваго Иннокентия, / единомудренную отцем древним маслину, / точащую благоуханный елей Божественных учений, / умащающаго умы и сердца наша / благодатию Божиею.
Стих: Уста праведнаго поучатся премудрости, / и язык его возглаголет суд.
Отче Иннокентие, / духодвижная уста твоя мрак безверия облисташа / и заблуждшия души уловиша: / в годину испытаний не обинуяся извествовал еси Божественныя глаголы, / таже ныне утверждаеши сердца наша в правоверии / и присно молишися о душах наших.
Слава, глас 6:
Трисиянным светом Господоначалия облистаемь, / извитийствовал еси вечныя глаголы Слова / и любомудре упасл еси христоименитое стадо Небеснаго Царя: / показал бо ся еси воистину доблественное Церкве и Отечества забрало, / добропобедный воине Христов ныне являешися / и вечнюеши с лики святых во обителех Отчих.
И ныне, праздника, или Богородичен, глас тойже:
Твои раби, Владычице, / в церкви Твоей верою предстояще, / Твоея ожидаем милости: / посети наше смирение, / и Твоим святым Покровом / огради люди православныя от всякаго зла.
Тропарь, глас 4:
От юных лет прилежа учению благочестия и страху Божию, / во благодати Христовой преуспевая, стяжал еси словесная дарования / и явился еси неутомимый проповедниче спасения, / души верных озаряя спасительными смыслы / и приводя всех ко исправлению. / Святителю отче Иннокентие, / моли Христа Бога / дати нам оставление грехов и велию милость.
На утрени
На Б
ог Господь: тропарь праздника, дважды. Слава, святаго. И ныне, праздника. Аще кроме праздника, тропарь святаго, дважды. Слава, и ныне, Богородичен.
По 1-м стихословии седален, глас 1:
Плодами Духа украшенный, образ был пастве твоей, отче досточудне: любовию, долготерпением, верою, кротостию и воздержанием облистаемь, благий и верный управитель словеснаго наследия Божия являешися и присно молишися, во еже спастися душам нашим.
Слава, и ныне, праздника или Богородичен:
Взбранной Воеводе похвалы принесл еси, отче Иннокентие, и от Нея прославления сподобился, святителю преславне, Сию же непрестанно моли о немощных чадех твоих, любовию пение Приснодеве приносящих.
По 2-м стихословии седален, глас 3:
Иннокентие отче наш, светильниче всесветлый веры православныя, приими пение недостойных чад твоих, в похвалу ти днесь приносимыя и вся заступи, пречудне, молитвою твоею.
Слава, и ныне, праздника или Богородичен:
Пение дерзаем принести Ти днесь и похвалу, Дево Пренепорочная, чинов Небесных радование и земнородным воистину покрове и заступление, Ты же, Богоблагодатная Владычице, Сама благодать нам от Господа испроси, да возможем по достоянию славу Твою присно воспевати.
По полиелеи седален, глас 8:
Наста днесь светоносная память златоглаголиваго Иннокентия: / да принесем ему благоуханный елей славословий, / любоблагоутробно бо источает от нетленных мощей своих / неоскудныя милости и исцеления, / приемля сладкозвучный фимиам возношений / и моляся непрестанно о душах наших.
Слава, и ныне, праздника или Богородичен:
Освящается небо и земля, / Церковь же светится, и людие вси веселятся: / се бо Мати Божия со Иннокентием достохвальным / за христианы молится Сыну и Богу Своему, / помиловати град и люди, / Богородицу непрестанно призывающия.
Степенна, 1-й антифон 4-го гласа.
Прокимен, глас 4: Честна пред Господем / смерть преподобных Его. Стих: Что воздам Господеви о всех, / яже воздаде ми.
Всякое дыхание: Евангелие от Иоанна, зачало 35, от полу.
По 50-м псалме стихира, глас 6:
Богоносне отче Иннокентие, / ублажаем тя Отечества нашего необоримаго заступника / и всеусерднаго молитвенника, / богоглаголиваго таин Божиих провидца / и боговещаннаго песнословца, / преподобническаго жития нерушимаго поборника, / святителем христоподражательное правило, / темже тя просим ныне, треблаженне, / даровати молитвами твоими нам велию милость.
Канон праздника или Богородицы на 6 и святаго на 8.
Канон святителя, глас 7, егоже краегранесие:
И
ннокентию похвалу приношу.
Песнь 1
Ирмос: Сокрушившему брани мышцею своею, и всадники тристаты погрузившему, поим Ему, яко избавителю нашему Богу: яко прославися.
Иннокентие отче наш, от обителей славы горния призри на чада твоя, во святем храме днесь собравшаяся и молитвами твоими, Святителю богомудре, заступи вся, радостию тя величающия.
Недостойных устен немощное пение приими, отче богомудре, и ходатайством твоим от искушений и бед свободи вся, радостию и любовию тя величающия.
Ныне ангели на Небесех и человецы на земли светло торжествуют, и всякая тварь веселия исполняется, прославляя тя, новаго и преславного чудотворца, ты же, отче Иннокентие, не остави ны, тя днесь радостию величающих.
Богородичен: Приклонивый Небеса в Тя, Дево, вселися, и ныне на молитву Твою зрит, Богородице Чистая, Твое, Царице, исполняя прошение: Ему же за ны усердно помолися, на Тя бо надеемся, Благословенная.
Песнь 3
Ирмос: В начале небеса всесильным словом Твоим утверждей Господи Спасе, и вседетельным и Божиим Духом, всю силу их, на недвижимем мя камени исповедания Твоего утверди.
От юности твоея явился еси сад дивный добродетелей, от корене благочестиваго процветший, Иннокентие отче наш, темже молитвами твоими и нас настави на путь доброделания.
Кто по достоянию возможет тя похвалити, богоизбранне Иннокентие и прехвальне, от юности бо Христа Единаго возлюбил еси и Того всем житием прославил еси и образ верный чадом твоим явился еси, отче, истиннаго доброделания.
Елеем молитвы исполненный и огнем любве возженный светильник явился еси, отче Иннокентие, во тме греховней сущим путь освещающий доброделания.
Богородичен: Паче солнечных луч, Твоим блистающим омофором, освещаеши Церковь и люди, и тьму грехов наших отгоняеши посещением Твоим, Богородице, к Сыну Твоему и Богу за ны молящися.
Кондак и икос праздника.
Седален, глас 6:
Иноком наставниче и ангелом сомолитвенниче, / земли нашея похвало и людем православным крепкое заступление, / Иннокентие преславне досточудне, / молитвою твоею от искушений и бед чада твоя сохрани.
Слава, и ныне, праздника или Богородичен, глас 6:
Теплая Предстательнице и непобедимая, / упование известное и непостыдное, / стено и покрове, и пристанище прибегающим к Тебе, / Приснодево Чистая, / Сына Твоего и Бога моли, / умирение дати миру, и спасение, и велию милость.
Песнь 4
Ирмос: Покрыла есть небеса Христе Боже, смотрением Твоим, добродетель неизреченныя мудрости Твоея, Человеколюбче.
Непречастен соблазнам мира сего был еси, невинности соимените, темже молитвами твоими исцели от страстей греховных сердца наша и сотвори ны наследники Царствия Божия.
Тщетны быша о тебе, отче, демонския немощныя дерзости, путем бо тесным жития монашескаго за Христом шел еси, прехвальне Иннокентие, и ныне во славе сияеши Царствия Божия.
Иноческое равноангельное житие паче богатства и славы мирския возлюбил еси, отче богомудре, и вся красная мира сего во уметы вменивши, воистину сын света показался еси и причастник явился еси Царствия Божия.
Богородичен: Тебе припадаем, Госпоже, верою, и поклоняющеся благодарно, вопием Ти: радуйся, Богоблагодатная Дево, покрове, и ограждение наше, и Помощнице в беде сущим, спаси нас, к Тебе прибегающих, на Тя бо надеемся.
Песнь 5
Ирмос: Нощь несветла неверным Христе, верным же просвещение в сладости словес Твоих: сего ради к Тебе утренюю, и воспеваю Твое Божество.
Юноши и старцы яко наставника своего прославляют тя, отче Иннокентие, премудрии и некнижнии ти хвалу приносят и вси тя величают, богоизбранне Святителю и земли нашея новый Златоусте.
Проповедниче Бога Слова изрядный явился еси, отче, сердца верных просвещающи спасительными смыслы, темже и нас к познанию истины настави и сердца наша светом веры просвети, Иннокентие преславне, земли нашея новый Златоусте.
Огнем словес твоих, любовию Божиею разженных, хлад греховный отгоняется и души верных согреяются, темже вси хвалу и славу ти приносят, проповедниче богомудре и земли нашея новый Златоусте.
Богородичен: Тебе вся земля дары приносит, яко Царице Божией Матери, и людие вси веселятся, покрываеми от всякаго зла Твоими, Богородице, молитвами.
Песнь 6
Ирмос: Во глубину греховную впадся Блаже, яко Иона от кита вопию Ти: возведи от тли живот мой, и спаси мя Человеколюбче.
Христова святительства иго благое на рамена своя подъял еси, отче наш Иннокентие, и воистину Пастырь добрый показался еси и отец чадолюбивый христианом православным, темже не остави ныне чада твоя духовныя.
Воистину добрый кормчий корабля церковнаго, был еси, отче досточудне, ко спасению наставляюще паству твою, темже тя ныне молим, Иннокентие преславне, не остави бурею греховною потопляемыя чада твоя духовныя.
Апостолом сопрестольниче и ангелом сомолитвенниче, столпе веры недвижимый и благочестия церковнаго рачителю, отче наш Иннокентие, утиши молитвою твоею волнение многомятежных сердец наших и заступи ны, чада твоя духовныя.
Богородичен: Ангельский глас взываем Ти, Пречистая: радуйся престоле Божий, на немже Иезекииль виде Господа, Херувимы носима. С ними же за ны, Богородице, молися, да спасет души наша.
Кондак, глас 3:
Земли нашея цвете, Церкве российския украшение, / Православия наставниче преславный, / защитниче и молитвенниче Отечества усердный, / новый русский Златоусте, / богомудре святителю Иннокентие, / моли Христа Бога / спастися душам нашим.
Икос:
Днесь похваляему праведнику, людие веселятся, имуще таковаго богоблагодатнаго пастыря: молниегласным жезлом вещаний своих словесное стадо добротворне упасшего, таже по отшествии своем неразлучно нам пребывающа - рака бо мощей твоих, отче святый, выну пред очима нашима видима есть. Вемы, яко угодна бо Господеви душа твоя и много может молитва твоя, сего ради молим тя, многовещанне и богозриме Иннокентие, моли Христа Бога спастися душам нашим.
Песнь 7
Ирмос: В пещь огненную ввержени преподобнии отроцы, огнь в росу преложиша, воспеванием сице вопиюще: благословен еси Господи Боже отец наших.
Людем православным воистину утешителя и о граде Одессе молитвенника усерднаго во время лютыя брани яви тя Господь, Егоже моли от нашествия иноплеменных и всякаго обстояния нас сохранити, и мирови всему мир даровати.
Усердною молитвою твоею, яже ко Пресвятей Богородице, отче, спасл еси град наш, темже и ныне и до скончания века, огради нас от всякаго злаго обстояния и умоли Владычицу мира мир безмятежен земли даровати.
Пастырь истинный овцам стада Христова явился еси в час лютыя брани и скорби, Иннокентие отче, и молитвенник усердный о Отечестве нашем, темже ныне молися Господеви мирови всему мир и благоденствие даровати.
Богородичен: Творче Спасе наш, Христе Боже, приими молитву Твоея Матере, юже Тебе за ны грешныя, приносит, да Тебе, радующееся, поем: препетый отец наших Боже, благословен еси.
Песнь 8
Ирмос: Страшнаго херувимом, и чуднаго серафимом, и миру Творца, священницы и раби, и дуси праведных, пойте, благословите и превозносите его во веки.
Рака святых твоих мощей воистину источник исцелений всем, с верою приходящим, является, отче Иннокентие, от горния бо славы твоея призираеши на смиренныя мольбы наша и скоро помощь подаеши людем, ти усердно молящимся.
Иннокентие отче достославне и чудотворче изрядный, кто возможет исчести множество чудес твоих, воистину бо помощник скорый являешися всем, тя с любовию призывающим и ти усердно молящимся.
Новаго чудотворца и скораго в бедах заступника, целителя дивнаго и молитвенника преславнаго днесь радостно прославим, Иннокентия богомудраго, помощь бо и защищение есть всем, с верою и упованием усердно молящимся.
Богородичен: Усты приносяще Тебе пение, и душею верно поклоняемся, ибо внутрь сердца наша горят. Мати Божия Пречистая, помилуй нас, верою превозносящих Тя во вся веки.
Песнь 9
Ирмос: Паче естества Матерь, и по естеству Деву, едину в женах благословенную, песньми вернии Богородицу величаем.
Отче преславне и досточудне, приими ныне пение наше и похвалы сия, от грешных устен твоей святыни приносимыя, и испроси у Господа всем, тя славящим отпущение грехов и велию милость.
Шуия части избави, отче, любовию прославляющия тя и деснаго стояния со всеми избранными сподоби, ходатайством твоим язвы страстей исцеляющи и подающи всем велию милость.
Услыши, отче Иннокентие, пение и молитвы чад твоих и не остави ны сиры, но святыми твоими, яже к Богу мольбами от всех искушений и бед сохрани вся и испроси нам от Господа великия и богатыя милости.
Богородичен: Помяни, нас во Твоих молитвах, Госпоже Дево Богородице, да не погибнем за умножение грехов наших. Покрый нас от всякаго зла и лютых напастей: на Тя бо уповаем, Владычице Всепетая.
Светилен:
Святителю отче Иннокентие, светильниче преславный веры православныя, молитвами, святе, твоими отжени от нас мглу греховную и светом богопознания души наша просвети.
Слава, и ныне, праздника или Богородичен:
Игумение Всечестная земли нашея, Всесвятая Госпоже Богородице, не остави ны, Твоея помощи требующия, но спаси от бед души наша.
На хвалитех стихиры праздника 3 и святаго 3.
Аще кроме праздника, стихиры святаго на 4.
Стихиры святаго, глас 1:
Подобен: Н
ебесных чинов:
Небесныя чинове радовахуся, / егда душа твоя возпари в Небесныя чертоги, / ты же, отче Иннокентие, / купно с лики небожителей / воспел еси Горнему Домовладыке: / Свят, Свят, Свят еси, Господи Боже наш!
Почти Господь тя духоноснаго поборника Своего: / в день Живоначальныя Троицы / душу твою во обители райския пресели. / Ты же, отче Иннокентие, / земную и небесную Церковь / во единем славословии соединил еси, / взывая, преходя в горняя: / Свят, Свят, Свят еси, Господи Боже наш!
Огнезрачный серафим ревностию по Славе Божией пламенея, / от избытка сердца твоего / боголепно воспел еси Тричисленней Единице: / Свят, Свят, Свят еси, Господи Боже наш!
Радуйся, святителю богомудрый, / яко восшел еси в радость Господа твоего, / ныне молим тя: / призри на чада твоя с превыспренныя твоея кафедры, / и не забуди нас, днесь в похвалу твою собравшихся, / назирая стадо твое, / присно песнословящих купно с тобою: / Свят, Свят, Свят еси, Господи Боже наш!
Слава, глас 6.
Подобен: Т
ридневен:
Ликуй ныне, богоспасаемый граде Одессо, / яко лучами солнечными просвещаемый чудотворным Образом Касперовским; / се бо богомудрый Иннокентий / со твердыми во мучениих Анатолием и Григорием, / пречудный Гавриил храмостроитель / и дивный в чудотворениих Иона / со преподобным отцем Кукшею, / яко звезды небесныя сияющи, / присно молятся спастися граду нашему / и всем верою живущим в нем.
И ныне, праздника или Богородичен, глас тойже:
Ангельский глас вопием Ти, Дево Богоизбранная: / радуйся, Адама в рай введшая, / радуйся, христиан Надеждо и Прибежище, / радуйся, Хранительнице града нашего.
На Литургии
Прокимен, глас 7: Восхвалятся преподобнии во славе / и возрадуются на ложах своих. Стих: Воспойте Господеви песнь нову, яко дивна сотвори Господь. Апостол ко Евреем, зачало 335. Евангелие от Луки, зачало 24. Причастен: В память вечную будет праведник, от слуха зла не убоится.
Молитва
О всезлатая уста слова, всехвальный и всечестный архиерею, святителю Христов Иннокентие! Ты многая и различная дарования от Господа приял еси, и яко раб благий и верный вся таланты, тебе данные, приумножил еси, имиже Церкви Христовей и Отечеству нашему славне послужил еси. Ныне же велие имея ко Святей Троице дерзновение, призри милостивно от горния твоея обители на нас немощных, грехами многими обремененных и умоли Господа Вседержителя, да отвратит от нас гнев Свой, праведно на ны движимый, и путь покаяния нас обратит. Прельщение языческое, зловредное нечестие, расколы и ереси, от Церкви Святыя отчуждающия, да истребит, и от соблазнов мира и козней диавольских нас оградит. Ей, крепкий столпе церковный, сосуде благодати предъизбранный, испроси от Отца светов, да соблюдет нас от нечестивых учений и душепагубных, неверия и суеверия избавит, в вере Православной нас утвердит и по образу Святыя и Нераздельныя Троицы мало стадо Свое в любви и едиомудрии сохранит. Неверныя к познанию истины да обратит. Пастырем Церкве праведность и ревность о спасении да подаст, монашествующим в подвизе укрепит, мир умит и землю нашу от крамолы и нестроений свободит. О, ходатаю теплый и чудотворче предивный, святителю отче наш Иннокентие, испроси нам у Господа Бога время на покаяние исправление; и во всех нуждах, скорбех и искушениях утешение и скорое поможение. И тако да благодатию и человеколюбием в Троице покланяемого Бога сподобимся наследницы быти Царствия Небеснаго, да прославляем вкупе с тобою всех благих Подателя, Триединаго Бога, Отца и Сына и Святаго Духа, ныне и присно и во веки веков. Аминь.

Ссылка | Оставить комментарий |

Comments {0}