?

Log in

No account? Create an account

Служба преподобному Афанасию Высоцкому Младшему

« previous entry | next entry »
ноя. 2, 2015 | 04:20 pm

Служба преподобному Афанасию Младшему, игумену Высоцкому, Серпуховскому чудотворцу воспроизводится по изданию Владычнего мужского монастыря в Серпухове. Брошюра без года выпуска, примерно середины 1990-х годов. Служба была составлена в 1697 году иеромонахом Чудова монастыря Карионом (Истоминым; 1640-е – 1722), смотрителем Московского Печатного двора.

Служба преподобному и богоносному отцу нашему
Афанасию Высоцкому Младшему,
Серпуховскому чудотворцу
На малой вечерни
На Г
осподи, воззвах: стихиры, глас 1.
Подобен: Н
ебесных чинов:
В Бога верою благочестивою возмог, / богомудре отче Афанасие, / победил еси козни врага демона, / смущающаго тя различными страстьми и мирскими похотьми. / Богу бо потщался еси угождати в трудех и подвизех непрестанно, // Егоже моли богоугодно спастися нам.
Богозданною душеполезнаго пощения браздою, / худоборительную плоть обуздав, / и победоносным апостолския веры оружием, / досточудне Афанасие отче наш, / зверообразныя душевредныя врагов полки прогнал еси от обители твоея, // Юже сохраняй всегда, молимся.
Всеблаженне отче Афанасие, / яко блаженный, духом нищий, / воплощенному Богу, нас ради обнищавшему, / правою душеспасительных заповедей Божиих стезею последовав, / и духовнаго дарования богатство стяжав, // наследовал еси обетованное блаженным Небесное Царство.
Слава, глас 2:
Егда в России в Москве богозарная возсияша светила, богомудрии великия чудотворцы, отцы святии, Алексий митрополит и преподобный Сергий, их же чудотворивыя святыя мощи и днесь нетленны, тогда в тыя дни ты, отче Афанасие, поревновав мужем преподобным, из юности подражая житию их боголюбне, и в монашеском чиноносне многая искушения от велиара душегубца, и от напрасников претерпел еси. И живяй во обители у игумена Афанасиа во обучении постническом целомудренно небозрителная очеса твоя воздвизал еси к Живущему неботворцу Богу. Ныне водворився во двор небесный с веселием, богозрительную души твоея зеницу обращай на призирание твоих величателей, на земли живущих.
И ныне, Богородичен:
Пречистая Богородительнице, неисчерпаемая милосердия пучино, источившая нам животочный Источник небесныя благодати Божия водами, жаждущия напояющь, Христа Спаса, воплощенна Бога. Темже молим Тя, да напоит ны Сын Твой и Бог наш в скорбех и печалех источником благодатным вечнаго радования.
На стиховне стихиры, глас 2.
Подобен: Д
оме Евфрафов:
Всесотворшему Богу, / Единому в Троице, / дом всесвят, отче Афанасие, был еси, / евангельски зде послужив Ему, // ныне со Ангелы и святыми на небесех ликуеши.
Стих: Честна пред Господем / смерть преподобных Его.
Крест Христов взем, / невозбранно, блаженне, шествовал еси во святую обитель монахов, / в нейже богоугодно игуменствуя, / в Бозе успнув, // положился еси телом.
Стих: Блажен муж бояйся Господа, / в заповедех Его восхощет зело.
Воистину чадо света / был еси, преподобне Афанасие, / истиннаго бо Света Христа ученик быв, / монашествующих лики собрав, // просвети еси добродетельми.
Слава:
Приидите, боголюбивии лицы / и все монашеское сословие, / богоноснаго отца Афанасия восхвалим, / яко да в богоугождении своем // молится о нас Человеколюбцу Богу.
И ныне, Богородичен:
К Тебе, златозарная невечерняго Света заре, / Богородительнице Дево, / прибегаем, вопиюще: / сиянием защищения Твоего // разреши темнозрачен облак печалей наших.
Тропарь, глас 8:
Образ Божий в Богосотворенней душе твоей, / ум, слово и дух соблюдая, / вперился еси, отче преподобне Афанасие, / любовию ко Всетворцу Богу, / и сего ради / молитвы, труды и подвиги добродетельныя восприим, / прешел еси в вечныя небесныя кровы. / Отнюдуже назирай нас, / моля Святую Троицу, // еже наследити нам Горнее всерадостное блаженство.
На велицей вечерни
На Г
осподи, воззвах: стихиры, глас 8.
Подобен: О
преславнаго чудесе:
Препрославленный Господи, / Творче Небесе и земли, / Твоим благоутробием / любящия Тя спасаеши / и в Небесная вводиши блаженства, / якоже и ныне спасл еси Твоего любителя, / преподобнаго отца Афанасия. / Егоже память празднующе, // славим Тя, Человеколюбче.
Егда евангельский глас верный раб Твой, Владыко, / Амос бывый услыша: / приидите ко Мне вси и научитеся от Мене, / и обрящете душам вашим покой, / абие тече в монастырь / и облечеся в ризы монашеския, / преименован бысть Афанасий // и, благоугодив Тебе, молится о нас Тебе, Человеколюбче.
Из юнаго возраста, / преподобне отче Афанасие, / взял еси ярем Христов, / труды добродетелей, / молитву, пост и целомудрие нося во всей твоей жизни, / душевную и телесную чистоту соблюд, / в горния обители ко Христу Богу прешел еси, / Емуже молися о нас, // во еже спастися нам.
Ины стихиры, глас 4.
Подобен: Я
ко добля:
Вся убо дела премудра и чудна / Всещедрый Бог сотворяет, / спасает бо земнородныи человеки / и в Небесное Царство оныя вселяет. / Ибо измлада избрав Себе богомудраго служителя, / блаженнаго Афанасия, / зде удобрив его, / на Небесех со святыми // жити сподобил еси.
Богатство, славу / и честь мира сего презрев, / Небесное Царство и неиждиваемое богатство / в некончаемый век возлюбив, наследовал еси, / всеблаженне Афанасие. / Темже непрестанно ко Христу воплощенному и к Деве Богородице Марии / предстательствуй о всех, // в помощь призывающих тя.
В монашеском обучении / от наставника твоего, / святейшаго и блаженнейшаго Афанасия, умудрен, / подвигом добрым подвизався, всечестне, / и во обители святей / Девы Богородицы всем братиям / и приходящим в ню / на успех подражания Христова был еси. // В подвизе добрем утверди ны.
Слава, глас 5:
Приидите, боголюбивии вси, / в память святаго и богоноснаго отца Афанасия, / иже богомудренно ума владыку / в мирской сей жизни на страсти губительныя оставль, / сподобися вечному блаженству, / сошедшеся, восхвалим радостне: / блажен еси, отче, Христу работав, / адскаго душетлительнаго врага козни и льщения погубил еси / и, просвещением Духа Божия озарився, / и богоугодным жительством евангельски совершився, / прешел еси в вечный покой ко Господу, / идеже зриши в Триех Ипостасех Бога несредственно, / Егоже моли прилежно / даровати всему миру мир // и чествующим тя велию милость.
И ныне, Богородичен.
Вход. Прокимен дне. Чтения три.
Премудрости Соломони чтение:
Праведных души в руце Божией, / и не прикоснится их мука. / Непщевани быша во очесех безумных умрети, / и вменися озлобление исход их, / и еже от нас шествие — сокрушение; / они же суть в мире. / Ибо, пред лицем человеческим аще и муку примут, / упование их безсмертия исполнено. / И вмале наказани бывше, / великими благодетельствовани будут, / яко Бог искуси я и обрете их достойны Себе. / Яко злато в горниле искуси их / и яко всеплодие жертвенное прият я. / И во время посещения их возсияют / и яко искры по стеблию потекут. / Судят языком и обладают людьми, / и воцарится Господь в них во веки. / Надеющиися Нань разумеют истину, / и верни в любви пребудут Ему, / яко благодать и милость в преподобных Его // и посещение во избранных Его.
Премудрости Соломони чтение:
Праведницы во веки живут; / и в Господе мзда их, и попечение их у Вышняго. / Сего ради приимут Царствие благолепия / и венец доброты от руки Господни, / зане десницею покрыет я и мышцею защитит их. / Приимет всеоружие — рвение Свое, / и вооружит тварь в месть врагом; / облечется в броня правды, / и возложит шлем — суд нелицемерен; / приимет щит непобедимый — преподобие; / поострит же напрасный гнев во оружие, / споборит же с Ним мир на безумныя. / Пойдут праволучныя стрелы молнинны / и, яко от благокругла лука облаков, на намерение полетят. / И, от каменометныя ярости исполнь, падут грады; / вознегодует на них вода морская, / реки же потопят я нагло; / сопротив станет им дух силы / и, яко вихор, развеет их. / И опустошит всю землю беззаконие, / и злодейство превратит престолы сильных. / Слышите убо, царие, и разумейте, / навыкните, судии концев земли! / Внушите, держащии множества и гордящиися о народех язык! / Яко дана есть от Господа держава вам, // и сила — от Вышняго.
Премудрости Соломони чтение:
Праведник, аще постигнет скончатися, в покои будет, / старость бо честна не многолетна, / ниже в числе лет исчитается; / седина же есть мудрость человеком, / и возраст старости — житие нескверное. / Благоугоден Богови быв, возлюблен бысть, / и, живый посреде грешник, преставлен бысть, / восхищен бысть, да не злоба изменит разума его, / или лесть прельстит душу его. / Рачение бо злобы помрачает добрая, / и парение похоти преиеняет ум незлобив. / Скончався вмале, исполни лета долга; / угодна бо бе Господеви душа его, / сего ради потщася от среды лукавствия. / Людие же видевше и не разумевше, / ниже положше в помышлении таковое, / яко благодать и милость в преподобных Его // и посещение во избранных Его.
На литии стихиры, глас 1:
Наста ныне духовное пиршество всему народу Российскому / и монашескому сословию, / еже представи богомудрый отец наш святый Афанасий, / любовию бо Иисус Христу воспалився, / земная вся страстная желания отверг, / во обитель монахов, в дом Богородицы Марии вселився, / в молитве, посте и во всяком воздержании быв, / и в ней сконча течение, / во Господе успе мирно / и получи благая Иерусалимова в Небесех. / Отнюдуже посещай, отче, любители твоя.
Глас 2:
Яко доброрасленая лоза принеслся еси, отче богомудре, из отечества града твоего Ярославля, во град сей Серпухов, и в сию обитель, в ней же богомудренно и монашеско постническия плоды всем любящим спасение Божие израстил еси. И оборону граду сему от наступления поганых татар, и от иных вражиих полчищ сотворив, во обитель твою не попустил еси ни единому внити, прогнав тыя страхом. Темже о сохранении и спасении нашем, отче, молим тя.
Глас 3:
Всеблаженне отче Афанасие, ты Христовою любовию многия души к богоугождению, в словеснстве разума монастырскаго, богомудраго послушания, вождьствовал еси, яко игумен Христов истинный. Ибо мнози благовождением твоим монашествующии лицы спасошася, и получиша в небесех райское селение. Не точию при тебе живши, но и слышавши тя народи, богомудраго жителя, многих благ исполнишася. Ихже приятии у Христа Бога всех нас сподоби.
Слава, глас 4:
Всепремудраго Бога Творца действом, / времен и лет в людех дивна в познание Его дела сотворяет, / когда, кого и где человека / в бытность рождением в мир сей вводит, / тогда благость Свою на того изливает, / да знает своего Содетеля, и да служит Ему, / и прославляет святое Его имя. / Ибо сей святый Афанасий, / Его волею святою, / в прешедшая уже многа лета, / пожив чувственне во плоти, / собра обитель монахов, духовне жити; / и Троицу славити Святую, / и чествовати Деву Богородицу научил есть. / В сей бо обители телом блаженный почивает, / душею же из Небес на ню и на живущия, / на молящияся ему милостиво призирает, // моля Христа Бога спасти души наши.
И ныне, Богородичен.
На стиховне стихиры, глас 1.
Подобен: Н
ебесных чинов:
Блаженне отче Афанасие, / ты из млада плотскую тяготу утончил еси целомудренно, / душевную же бодрость вперил еси ко Христу, / отряс вредящия человеки мирския похоти, / совокупился еси с вышними лики безплотными, //поеши Господа непрестанно.
Стих: Блажен муж бояйся Господа, / в заповедех Его восхощет зело.
Благий ярем Христов взем, / понесл еси, преподобне, своего креста тяготу, / во дни бо и в нощи молитвы сотворяя, / делам монастырским в послушании прилежа, / воздержався от всякаго зла: // темже Духа Святаго был еси жилище.
Стих: Честна пред Господем / смерть преподобных Его.
Образ зрим твоим учеником / был еси, отче всечестне, / душевную бо и телесную чистоту возлюбив, / сущия на земли уды своя умертвив, / и целомудрием совершенным подвигл еси многия // в чистоте служити Богу Живу и Истинну.
Слава, глас 8:
Велия красота постничествующих / и прописание дел Всецаря Христа Бога нашего / в тебе, отче Афанасие, явишася миру всему, / како в бренней плоти, яко ангел, / иерей и игумен сый, / служил еси Господу, / вознося безкровныя Жертвы в Евхаристии / и приобщал еси благоговейныя люди теми, / и в соединение Сладчайшему Спасителю Иисусу, / да идеже Он, тамо и служители, ядущии Тело и пиющии Кровь Его будут. / Сего ради молим тя, / проси Христа причащатися всем нам Святых Таин Его, // быти с Ним вечно в Царствии Небеснем.
И ныне, Богородичен.
Таже тропарь, глас 8, иже писан на малей вечерни.
На утрени
По 1-й стихологии седален, глас 1.
Подобен: Г
роб Твой, Спасе:
Небесныя благодати Божия семя приим, и мысленную сердца твоего землю слезными струями увлажив, многообильныя возрастил еси добродетелей плоды, с нимиже в небесное гумно вшед, досточудне Афанасие, нетленною наслаждаешися в Небе манною веселия вечнаго. (Дважды)
Слава, и ныне, Богородичен:
Радуйся, Дево преблагая, Богомати предрагая, ума нашего просвещение, и сердец в горкости скорбей услаждение, и возгорение к Тройческому Божественному Свету подающая, верно к Тебе вопиющим: о Владычице, спаси ны, спаси от тлетворивых обстояний, нескончаемую радость подающи.
По 2-й стихологии седален, глас 4.
Подобен: У
дивися Иосиф:
Благоволение бысть Всетворящаго Бога, разлучитися боголюбивой душе от плоти святаго Афанасия, абие благонадежно и обрадованне предав душу свою в руки Христу Господу. И в погребении святаго и чистаго его тела сотвори чудо преславно, монаха от демонскаго мучения свободи, и ринувшася того в яму на гроб, сохрани невредна, и кончину его ему прорек, иже по нем в третий день скончася. Ныне же, отче Афанасие, из Небеснаго Двора призри на град и на обитель твою во всякое спасение. (Дважды)
Слава, и ныне, Богородичен:
В Богозданном апостольския Церкве Небе, Неботворца славословяще, к Тебе, всесветлому мысленнаго правды Солнца небу, Всепетая Дево Богородице, прибегаем, и Тя, Помощнице наша, молим, вопиюще Тебе: Ты, Владычице, чудес бездна, приснотекущее наше богатство, Иисусова нешвенная одежда, драгостройная катапетасма, морешественный вождь, утеха граждан небесных, всея мудрости дом, христианом всем спасение. Помози вселитися нам в небесныя кровы.
По полиелеи седален, глас 8.
Подобен: П
ремудрости:
По многолетном святом твоем, отче, успении, прославляя тя, Всемощный Владыка Бог, угодника Своего, сподобив присносущнаго века с лики святых в Горнем Сионе, зде на земли во обители многократне являющася тя видяху, ходяща по монастырю и кадяща фимиамом народы и гробы, и раздавающа свещи, и слышаху пение стихов церковных на твоем гробе и в церкви. Темже и мы достодолжно тя, преподобне Афанасие, чествующе, просим: испроси у Христа нам милость. (Дважды)
Слава, и ныне, Богородичен:
Что Тебе принесем, и что возглаголем, и кия песни воспоем, Богоблаженная Мати Христа Бога, Пренепорочная Дево Марие: свободила бо еси православныя народы первородныя клятвы, юже изрече Бог праотцу Адаму. Ты же во плоти преестественно Богочеловека Иисуса родила еси, Иже ону клятву разреши от всего человечества, даде благословение верным Своим людем; темже вси Тебе вопием усердно: радуйся, Благодатная, с Тобою Господь, и чрез Тебе с нами. Аминь.
Степенна, 1 антифон 4-го гласа.
Прокимен, глас 4: Честна пред Господом смерть преподобных Его.
Стих: Что воздам Господеви о всех, яже воздаде ми?
Всякое дыхание / да хвалит Господа.
Стих: Хвалите Бога во святых Его, хвалите Его во утвержении силы Его.
Евангелие от Матфея, зачало 43.
По 50-м псалме стихира, глас 6:
Слава всетворящему Богу в Троице, / правительствуя бо всею тварию, / яви своего Богомудраго служителя в мире сем яко светило, / просвещающее человеческия души, / блаженнаго отца Афанасия, / иже поживе в душеполезных добродетелех, яко ангел Божий, / богописанный воздержания образ, / богозданный храм Бога Живаго, / боговидное чистоты зерцало быв, / апостолоподражательне гонив кротость, веру, любовь и терпение, / тем постиже евенгельское блаженство в небесех, // егоже молитвами сподоби, Господи, нас получити.
Канон преподобному отцу нашему Афанасию Высоцкому Младшему,
глас 4, егоже начальная писмена без ирмосов:
Б
ога Царя поем Афанасием, рече се Карион.
Песнь 1.
Ирмос: Несть Тебе подобен, препрославленный Господи, / рукою бо крепкою избавил еси люди, // яже стяжал еси Человеколюбче.
Припев: Преподобне отче наш Афанасие, моли Бога о нас.
Благодать и милость Твою, Боже Господи, прославляем, еюже спасл еси угодника Твоего и блаженнаго Афанасия.
Огнь вперил еси любве Твоея, Владыко Человеколюбче, святому Афанасию, в чистолюбивом бо сердце своем скрыв, Небо наследова.
Глас Божественный: "гряди во след Мене", отче блаженнее, услышав, невозбранно во обитель святую потекл, в монашестве Христу угодил еси.
Богородичен: Агнице Непорочная, Дево Марие, Предвечное Бога Отца Слово во чреве Твоем заченши безмужно от Духа Свята, родила еси миру всему во спасение.
Песнь 3.
Ирмос: Утверждаяй гром, и созидаяй дух, / утверди мене Господи, / да Тя пою истинно, / и творю волю Твою, // яко несть свят, яко Ты Боже наш.
Царствовати над страстми, бденными молитвами, и воздержанием плотским похотей утвердився, сподобился еси, преподобне, утвердитися в Бозе и нас сподоби.
Аще волнуемое мира сего море твою святую душу сладострастиами монашество приятии смущаше, но не возможе поколебати тя, поюща: утверди мене, Господи.
Ревность дома Твоего снеде мя, вопиял еси ко Господу, отче Афанасие: темже во обитель к наставнику твоему Афанасию вдався, любовию в монашестве утверждатися.
Богородичен: Язык всяк не возможет изрещи Твоих таин, Богородице; яко Христа Иисуса рождши, в вере православней утверждаеши души наша.
Седален, глас 8.
Благий человек от благаго сокровища сердца своего, евангельско, блаженный игумен Афанасий, изнесе плоды благославны и духовныя, по учительству апостолску: любовь к Богу и человеком, с прочими числ добродетельми, присно бо он тыя в себе содержаше, и славяше Бога нощию и днем непрестанно. Учаше же не токмо ученики своя во обители, но и вся к нему приходящия, да благоугождают Всетворцу Господу. Темже преставлься, Горний Иерусалим наследова. Егоже молитвами Господь да спасет души наша. (Дважды)
Слава, и ныне, Богородичен:
Веселится всякая тварь о Тебе, Богородице Дево, яко Бог сотвори Тебе величие. Сотворив, созда Тя, и избра Себе в жилище вечное, и плотию из Тебе родися, дарова всему миру спасение вечное. Темже человеческий род, вси верни, вопием Тебе, Владычице: радуйся, Богомати, Престоле огнезрачный Божий; радуйся, Отроковице, седалице Царское, одре преиспещренноустланный, златопорфирный чертоже, хламидо червленосветлая, украшенный храм, молниеносное оружие, светильник многосветлый, монашествующих обучение. Радуйся, всем христианом в вере святей утверждение.
Песнь 4.
Ирмос: Услышах славное смотрение Твое, Христе Боже, / яко родился еси от Девы, / да от лести избавиши зовущия: // слава силе Твоей Господи.
Предвиде Бог усердие твое, отче всечестне, яко сосуд избран во обучение монашествующих бытии имаши, подвиг крепок даде тебе, поющу: слава силе Твоей, Господи.
Обручение Духа Божия восприим в добродетельное преспеяние, Афанасие, вся суеты поправ, послушающия тя научил еси пети: слава силе Твоей, Господи.
Единения ко Господу вожделев, преподобне, воистину потщася хуждшее тело покорити лучшему, в боготворней душе духу. Темже поеши: слава силе Твоей, Господи.
Богородичен: Марие Богоневесто Владычице, услыши моления наша и принеси к Сыну Твоему и Богу, молитвами Афанасия святаго, да возглаголем славу Господню.
Песнь 5.
Ирмос: Возсиявый свет, / и просветивый утро, / и показавый день, / слава Тебе, слава Тебе, // Иисусе, Сыне Божий.
Адама первозданнаго в райском селении суща, неврежден ум имуща, богомудрым смыслом просветився, блаженне, и славити Иисуса сподобился еси.
Фавор гора прославися светосиянством на ней Христа Иисуса, твоим же благоугождением, отче, во святей обители световодством мнози просветишася.
Алчныя нищия, и пришельцы странныя во монастырь твой, любезно прияв, питал еси, милосердие им сотвори, просвети ны богомудре светом невечерним.
На пажити евангельскаго учения, от отца твоего игумена Афанасия упаслся еси, богомудренне всечестне, утром благочестия озарив, настави нас славити Господа.
Богородичен: Адово чрево испразднила еси, Богомати Дево, Рождеством Твоим, Иисус Христом; моли Его, да изведет нас из тмы греховныя и сподобит нас вечныя Его славы.
Песнь 6.
Ирмос: Возопи, прообразуя погребение тридневное, / пророк Иона, в ките моляся: // от тли избави мя, Иисусе, Царю сил.
Силу Креста Христова и знамение Его на человеческих удесех уведев блаженне, вся козни демонския, моляся Царю Иисусу, победил еси.
Иону пророка подражав, вопил еси ко Христу Богу во дни и нощи, Афанасие: из тли мирския пучины возведи мя в горнее блаженство, Иисусе Царю Сил.
Егда юношеское плоти мудрование покорил еси духу, отче преподобне, тогда душетлительнаго кита умертвив, возшел еси в небо ко Господу.
Богородичен: Мене ради обнищав, Бог богат сый в милости, из Тебе, Дево Богородице, родися преестественно, и от пучины грехов избавляет молбами Твоими все человечество.
Кондак, глас 8.
Подобен: Я
ко начатки естества:
Явился еси в мире сем, преподобне отче Афанасие, / яко добродетельный столп, монашествующих во утверждение, / Бог бо тя избра наставника многих душ во спасение; / Емуже в Вышних молися, / да спасет нас и подаст нам Царство Небесное.
Икос:
Благокрасотное радование совершися всему православному народу, зане благоугодный и блаженный отец Афанасий, яко добрый воин Иисус Христов, в подвизе мнозе быв, на ратующия присно враги демоны, в различныя мира сего страсти, на победу на оныя сотворь, преселися душею в вечный покой к желаемому Христу Богу, у Него же да испросит, молимся, даровати нам Царство Небесное.
Песнь 7.
Ирмос: В начале Безначальное Слово, / со Отцем и Духом, / Сын Единородный, благословен еси / и превозносимый, Боже отец наших.
Ревносто угождати Всетворцу Богу разжегся, всеусердно притекл еси в монашествующих обитель, отче, в ней трудолюбно подвизався, воспел еси: благословен еси, Боже отец наших.
Егда доброподвижный отец игумен Афанасий прозре тя, блаженне, быти послушна и покорна в братии, прием во обитель, воспе: благословен еси, Боже отец наших.
Человек воистину совершен и игумен был еси, преподобне, во угождении же Богу и всем учеником тако успев, еже и ныне зовеши: благословен Бог отец наших.
Богородичен: Едина Приснодева Благословенная, из Тебе воплотившагося Сына Божия моли, да в воли Его везде пребудем, поюще: отец наших Боже, благословен еси.
Песнь 8.
Ирмос: Вся дела Божия и вся тварь, / благословите Господа, / преподобнии и смиреннии сердцем, пойте Его // и превозносите во вся веки.
Смотрением Человеколюбца Бога, бывый Патриарх в Константинополи, Афанасий наставник твой, не забы тя, отче, и оттуду благословением посети, поюща Господа во веки.
Елма Святейший Патриарх присла в посещении тебе святыя иконы, яже и ныне суть в сей обители, тогда в радости со ученики твоими воспел еси Христа во веки.
Крепость в терпении твоем приим, преподобне, во дни и нощи молбы сотворяя Богу смиренно, небесное блаженство вечно получил еси.
Богородичен: Ааронов жезл прозябший образова Тя Чистейшую Деву, из Тебе бо прозябе Игумен Христос, вождествуя люди в небо, согласно поющия Его во веки.
Песнь 9.
Ирмос: Моисей на горе неопалимую купину виде, / Иосиф в вертепе неизреченное Рождество слыша, / Нескверная Дево, / Безмужная Мати, // песньми Тя, Богородице, величаем.
Рождение твое бысть град Ярославль, воспитався же и в добродетелех процвел еси, отче, в Серпухове граде, и во обители Девы Богородицы богоугодне совершився, Юже величаем.
Иисуса Христа Евангелию подражав, о требующих помощи свыше призрев, блаженне, егда град Серпухов обстоим зловерными татары и враждующими поляки, яве свободил еси.
Ограждение присещения и молитвы твоея ко Господу Богу и ко Владычице Деве Марии, град и обитель имеюще, в ней же почиваеши, отче, телом, славят Бога, и Богородицу величают.
Богородичен: Надежду на Тя, Богородице Дево, вси христианстии народи и во обители святаго отца Афанасиа живущии возлагаем; спасай грады и люди милостию Сына Твоего от всяких бед, величающия Тя.
Светилен:
Богоудобрен игумен вождь в жилище Божие духом, отче Афанасие, не токмо во обители монашествующим, но и всем людем, спасения образ подая и в немощех уздравляя, призывающия тя спасай и нас мольбами твоими.
Слава, и ныне, Богородичен:
В Твоей надежде, Богородице, раб Твой верный Афанасий святый, в Твоей обители труждаяся, благоразумным смыслом, получи у Христа обещанная благая, егоже молитвами водвори ны в райскую жизнь, Дево Чистая.
На хвалитех стихиры, глас 2:
Боголюбивый отче Афанасие, в богохранимом сердца твоего сокровищи, искушенное словес Господних сребро храняй, правым заповедей Божиих путем в Царство Небесное идущим шествовал еси знаменито. Богозданный храм Живаго Бога быв, приял еси со всеми святыми некончаемое блаженство.
Превечную Мудрость Божию, Единороднаго Сына Божия Спаса Христа, из всего сердца твоего возлюбивый, преподобне отче, и душеспасителная словеса в чистолюбнем сердце скрыв, еще младоумно отроча книжным богомудрым словесам научився, напоился еси потоком сладости, и знанием Бога в Троице напитался душеполезно.
Воистину из сродства сущаго на земли по плоти изшед, богомудре Афанасие, волю Небеснаго Отца творяй, сродствился еси Богочеловеку Иисусу Христу, Иже глаголаше: кто сотворит волю Отца Небеснаго, той Мой брат и сестра и мати Моя есть. Егоже моли, дати нам благодать творити волю Его всегда.
Слава:
Всеумнословесное человеческое естество, благочестивый народ христианский, сошедшеся в день празднества богоблаженнаго отца нашего Афанасия Серпуховскаго, Творца нашего Бога, в Триех Ипостасех славимаго воспоем, глаголюще: аллилуиа. Яко дивен во всей Своей твари, еже телесныма очима, чрез умнодушевная чувства видим, и в Божественном Писании ушима слышим. Недоволно бо ни едино слово к похвалению чудес Его Божественных. Темже дивен есть и в сем святем Своем евангельском сыне Афанасии, яко Его волею Господнею, бысть на земли жизнь его богоугодна, и конец богоприятен, яко ныне праведная его душа, по писанному в руце Божии. Егоже молитвами спаси люди Твоя, Господи.
И ныне, Богородичен:
Исхити мя, Владычице, руки змия человекоубийцы, хотяща мя лукавством поглотити до конца: сокруши челюсти его, молю Тя, и козни разори, яко да избыв от ногтей его, величаю заступление Твое.
Славословие великое. И отпуст.
На литургии:
Блаженны от канона, песни 3-я и 6-я.
Прокимен, глас 7: Ч
естна пред Господем / смерть преподобных Его.
Стих: Что воздам Господеви о всех, яже воздаде ми?
Апостол к Галатом, зачало 213.
Аллилуиа: Б
лажен муж бояйся Господа:
Евангелие от Луки, зачало 24.
Причастен: В
память вечную будет праведник, / от слуха зла не убоится.

Ссылка | Оставить комментарий | | Пожаловаться

Comments {1}

Андрей Петрович Власюк, орфодокс

(без темы)

from: chervinskij
date: ноя. 2, 2015 01:25 pm (UTC)
Ссылка

Спасибо!
Мне как серпуховичу весьма интересно.

Ответить | Ветвь дискуссии