Уставщик (ustavschik) wrote,
Уставщик
ustavschik

Category:

Служба святителю Мартину Милостивому, епископу Турскому

Бденная служба святителю Мартину составлена протоиереем Илией Тетерько, клириком г. Одессы. В канон службы инкорпорированы тропари, содержащиеся в древнерусской Минее-ноябрь, принадлежащей к циклу рукописей, известному как «Минеи Ягича» (РГАДА. Ф. 381. Ед. хр. 91). Текст публикуется по авторской машинописи.

Служба иже во святых отцу нашему Мартину Милостивому, епископу Турскому
НА ВЕЛИЦЕЙ ВЕЧЕРНИ
Б
лажен муж: 1-й антифон.
На Г
осподи, воззвах: стихиры, глас 1:
Приидите, вернии, / с лики ангельскими воспоем / Богоблаженнаго святителя Мартина, / мудре упасшего стадо словесных Христовых овец, / той бо явися сосуд благодати Духа Святаго, // преизливающий милости, любовию его почитающим.
Православныя веры поборника, / благочестия учителя, / священническаго жития доброе правило, / града Тура архипастыря славнаго, / святителей украшение и христиан утешителя, / нищих помощника и питателя, // восхвалим днесь Мартина досточуднаго.
Целомудрен и кроток / от юности был еси, отче Мартине блаженне, / правостию сердца и ума чистотою добродетели удержав, / имиже Богу приблизился еси. / Егоже ныне моли, отче милостиве, / от тли и бед избавити // верою творящих честную память твою.
Догматов светлостию и жития красотою / благочестно удобрил еси священноначалие, Мартине приснопамятне, / и Церкве столп явился еси истинно, / просвещая вся словесы твоими. / Тем тя ублажаем и во псалмех же и пениих // святую и всечестную празднуем память твою.
Словом отгоня лукавыя духи злобы, / соделал еси духовныя люди Духа Святаго благодатию, / святителю Мартине милостиве, / возделая ниву сих сердечную и влагая семя Божественное, / еже Делателю приношал еси Небесному, // моля о восхваляющих тя верно.
Запад сиянии мысленными ты восток соделал еси, / солнца носящ Божия познания, / от Девы нам паче ума возсиявшаго, / и, зашед во трудех святительских, отче милостиве, / возсиял еси к Свету невечернему, / идеже, зерцалом разрешшимся, / зриши желаемую доброту Подвигоположника твоего, // Мартине, отче преподобне.
Слава, глас 8:
Торжествуй днесь радостно, граде Туре, / ликуй и веселися, Церковь Божия, / празднующи память Мартина Богомудраго, / песньми и пеньми духовными восхваляющи его и вопиющи: / не забуди род свой на земли, отче священнейший, / и всякую душу к тебе притекающую, / но присно моли Христа Бога, // во еже спасти всех нас.
И ныне, Богородичен, глас тойже: Царь Небесный:
Вход. Прокимен дне, и чтения 3.
Притчей чтение (главы 10, 3 и 8):
Память праведнаго с похвалами, и благословение Господне на главе его. Блажен человек, иже обрете премудрость, и смертен, иже уведе разум. Лучше бо сию куповати, нежели злата и сребра сокровища. Честнейшая же есть камений многоценных, все же честное недостойно ея есть. Долгота бо дней и лета живота в деснице ея; в шуйце же ея богатство и слава. От уст ея исходит правда, закон же и милость на языце носит. Послушайте убо мене, о чада, честная бо реку: и блажен человек, иже пути моя сохранит: исходи бо мои, исходи живота, и уготовляется хотение от Господа. Сего ради молю вас, и предлагаю мой глас сыновом человеческим: яко аз, премудрость, устроих совет и разум и смысл аз призвах: мой совет и утверждение, мой разум, моя же крепость. Аз мене любящия люблю, ищущии же мене обрящут благодать. Разумейте убо, незлобивии, коварство, ненаказаннии же, прилагайте сердца. Послушайте мене и паки, честная бо реку, и отверзу от устен правая; яко истине поучится гортань мой, мерзки же предо мною устны лживыя. С правдою вси глаголы уст моих; ничтоже в них стропотно, ниже развращенно. Вся права суть разумевающим и проста обретающим разум. Научаю бо вас истине, да будет о Господе надежда ваша, и исполнитеся Духа.
Притчей чтение (главы 10 и 11):
Уста праведнаго каплют премудрость: язык же неправеднаго погибнет. Устне мужей праведных каплют благодати, уста же нечестивых развращаются. Мерила льстивая мерзость пред Господем: вес же праведный приятен Ему. Идеже аще внидет досаждение, тамо и безчестие: уста же смиренных поучаются премудрости. Совершение правых наставит их, и поползновение отрицающихся упасет их. Не пользуют имения в день ярости, правда же избавит от смерти. Умер праведный, остави раскаяние: наручна же бывает и посмеятельна нечестивых пагуба. Правда непорочнаго исправляет пути, в нечестие же падает неправда. Правда мужей правых избавит их: безсоветием же пленяются беззаконнии. Скончавшуся мужу праведну, не погибнет надежда: похвала же нечестивых погибнет. Праведник от лова убегнет, вместо же его предается нечестивый. Во устех нечестивых сеть гражданом, чувство же праведных благопоспешное. Во благих праведных исправится град, усты же нечестивых раскопается. Ругается гражданом лишенный разума, муж же мудрый безмолвие водит.
Премудрости Соломоновы чтение (глава 4):
Праведник, аще постигнет скончатися, в покои будет. Старость бо честна не многолетна, ниже в числе лет исчитается. Седина же есть мудрость человеком, и возраст старости, житие нескверное. Благоугоден Богови быв, возлюблен бысть, и живый посреде грешник, преставлен бысть. Восхищен бысть, да не злоба изменит разума его, или лесть прельстит душу его. Рачение злобы помрачает добрая, и парение похоти пременяет ум незлобив. Скончався вмале, исполни лета долга. Угодна бо бе Господеви душа его. Сего ради потщася от среды лукавствия. Людие же видевше, и не разумевше, ниже положше в помышлении таковое: яко благодать и милость в преподобных Его, и посещение во избранных Его.
На литии стихиры храма.
Слава, святаго, глас 4:
Подвигни с собою, святе Мартине, / Безплотныя вся силы, пророки и апостолы, / мученики и святители с постники, / молитися за нас, грешныя, / егда сядет на Престоле Бог, / воздая коемуждо противу делом его. / Темже тебе вопием, милостиве отче, молящеся Христу, // мольбами твоими даровати нам мир и велию милость.
И ныне, глас тойже:
Богородице Дево, / Всеблаженная Марие, / угль Божества во утробе вмещшая неопально, / рождшая Спаса Христа Господа, / принеси фимиам сладкоуханных молитв Твоих / Сыну Твоему и Богу нашему, / да помилует нас многопрегрешивших // и спасет души наша.
На стиховне стихиры, глас 2:
Подобен: Д
оме Евфрафов:
Дом Духа Святаго / явился еси, досточудне, / благодатию Господнею, / просвещая и наставляя Христову Церковь // словесы Богоразумия.
Стих: Возвеличите Господа со мною / и вознесем имя Его вкупе.
Помаза тя достойно / благодать Святаго Духа, / Мартине всеблаженне, / истины Христовы ради // и ко всем нравов твоих милостивных.
Стих: На Тя, Господи, уповах, / да не постыжуся во век.
Земля Французская / веселится о тебе, Мартине блаженне, / имея в себе честныя твоя мощи, / и радостно прославляет // милость и чудеса твоя.
Слава, глас тойже:
Троицы вернаго служителя, / Церкве светильника всесветлаго, / Мартина, отца предивнаго, / ныне, в память его сошедшеся, // воспоим любовию.
И ныне, глас тойже:
Пресвятая Мати Божия, / с лики Небесными / молися из Тебе Воплощенному / Солнцу Правды, Господу, / спасти и просветити души наша.
Тропарь святаго, глас 4:
Делы милостивыми просиял еси, яко денница, / люди многи научил еси заповедем Господним, / святителю Мартине, отче милостиве, / верных же сердца просветил еси воспевати и славити Троицу Единосущную. / Темже, днесь память творяще, вопием ти: / моли Христа Бога // спастися душам нашим.
Слава, и ныне, Богородичен, глас тойже:
Еже от века утаенное / и Ангелом несведомое таинство, / Тобою, Богородице, сущим на земли явися Бог, / в неслитном соединении воплощаем, / и, Крест волею нас ради восприим, / имже воскресив первозданнаго, // спасе от смерти души наша.
НА УТРЕНИ
На Б
ог Господь: тропарь святаго дважды. Слава, и ныне, Богородичен.
По 1-м стихословии седален, глас 2:
Подъял еси подвиги постническия / и апостольскую благодать стяжал еси, / достоблаженне Мартине. / Темже и ныне не отрини нас от твоего заступления, // любовию восхваляющих тя.
Слава, и ныне, глас тойже:
Устами и сердцем величаем Тя, / Дево Мати: / Ты же, рождшая Бога, / не отрини нас от Твоего заступления.
По 2-м стихословии седален, глас 2:
Яко архиерей всечестен / и благочестия поборник, / храмоздатель говейный, / чудотворец всеистиннейший, / святителю Мартине, // моли Христа Бога спастися душам нашим.
Слава, и ныне, глас тойже:
Едина истинная христиан Покровительнице, / всяких лютых обстояний, / бед и скорбей нас избави / и молитвами Твоими спаси души наша.
Величание:
Величаем тя, / святителю отче Мартине, / и чтим святую память твою, / ты бо молиши о нас // Христа Бога нашего.
Избранный псалом:
Лик 1: Услышите сия вси языцы, внушите вси, живущии по вселенней. 2. Уста моя возглаголют премудрость, и поучение сердца моего разум. 1. Приидите, чада, послушайте мене, страху Господню научу вас. 2. Благовестих правду в церкви велицей. 1. Истину Твою и спасение Твое рех. 2. Повем Имя Твое братии моей, посреде церкве воспою Тя. 1. Услышати ми глас хвалы Твоея и поведати вся чудеса Твоя. 2. Господи, возлюбих благолепие дому Твоего, и место селения славы Твоея. 1. Возненавидех церковь лукавнующих, и с нечестивыми не сяду. 2. Яко сохраних пути Господни и не нечествовах от Бога моего. 1. Уста праведнаго поучатся премудрости, и язык его возглаголет суд. 2. Правда Его пребывает в век века. 1. Священницы Твои облекутся правдою, и преподобнии Твои возрадуются. 2. Блажени живущии в дому Твоем, в веки веков восхвалят Тя.
По полиелеи седален, глас 8:
Евангелия Спасова быв священнопроповедник, / Божественным учением Церковь обогащая, / и Христово вочеловечение изъяснил еси, блаженне отче, / и многи люди светом Истины просветил еси. / Темже вси чтим верно память твою, всехвальне Мартине, // просяще прияти нам от Бога велию милость.
Слава, и ныне, Богородичен, глас тойже:
Тя надежду, прибежище и Предстательницу обретше, вернии, / к Тебе притекаем и прилежно вопием: / помилуй, Богородице, на Тя уповающия / и прегрешений оставление нам испроси / молитвами Твоими, Пречистая.
Таже степенна, 1-й антифон, глас 4.
Прокимен, глас 4: Уста моя возглаголют премудрость, / и поучения сердца моего разум.
Стих: Услышите сия, вси языцы, / внушите, вси, живущие по вселенней.
Всякое дыхание: Евангелие от Матфея, зачало 11.
По 50-м псалме стихира, глас 6:
Священнейшими твоими нравы украшаемь, / священства одеждею озарился еси, / всеблаженне Богомудре Мартине, / милостивным сердцем своим, / Спасову милость преклонил еси / и исцеленьми многими обогатился еси; // молися непрестанно о всех нас.
Канон святому, глас 4.
Песнь 1
Ирмос: Отверзу уста моя, / и наполнятся Духа, / и слово отрыгну Царице Матери, / и явлюся, светло торжествуя, / и воспою, радуяся, Тоя чудеса.
Краснейшими песньми светло ликующе днесь Христовая церковь, тя почитает, богоблаженне Христов служителю, Мартине пресветле, поющия тя просвети.
Миром добродетелей облагоуханныя святыя мощи твоя, всечестне иерарше Мартине, основание твердое явися граду Туру, и источник чудес приснотекущий, во утверждение веры и благочестия.
Престолу предстоя, святе Мартине, со Безплотными силами, Владыце, помолися за люди твоя, яко да избавятся от всех зол и напастей.
Богородичен: Яко душевная Трапеза, жизнь вмещаеши жизни нашей, яко купина ношаше огнь не опалилася еси, яко виноград ненапоен прозябе грозн, Непорочная.
Песнь 3
Ирмос: Твоя песнословцы, Богородице, / живый и независтный источниче, / лик Себе совокупльшия духовно, утверди, / в Божественней Твоей славе / венцев славы сподоби.
Премудростию освящен свыше, яко солнце мирскому отечеству велий заступник проявлен, Мартине преподобне, блаженне.
Житием просияв, преподобне, и словесы Божественными твоими, светильник явился еси всем человеком, присно сияя делы и ученьми и озаряя концы.
Кроплением Пресвятаго Духа, Мартине чудне, очищься и Божественных добродетелей во одежду одеявся, вшел еси в незаходимая священнодействовати тебе помазавшему.
Богородичен: Из врат адовых воздвигл мя есть Рождейся из Тебе, Дево Чистая, древнею снедию лютою умерщвлена мя оживи, смерть вольную приимь.
Седален, глас 3:
Явился еси, отче, Церкви и граду твоему, якоже другое солнце, озаряя сих молниями Божественных словес твоих, яко ученик Господень, Мартине, отче милостиве.
Слава, и ныне, Богородичен:
Пречистеи Твои руце, Дево Мати, простерши, / покрый уповающия на Тя и к Сыну Твоему зовущия: // всем подаждь, Христе, Твоя милости.
Песнь 4
Ирмос: Седяй в славе на Престоле Божества, / во облаце легце, / прииде Иисус Пребожественный, / нетленною дланию, и спасе зовущия: / слава, Христе, силе Твоей.
Тресветлыми зарями светло украшен паче солнца, Мартине блаженне, западу сияеши, и неверствия тьму отгоняеши, премудре. Тем же просвети ны, тя блажащая.
Исполнен Божественнаго Духа явился еси, мудре Мартине, питая богатно благочестия сладостию и словом живительным сердца зрящих к тебе.
Якоже злато огнем, священнейше, воздержанием честное тело твое очистив, мудре Мартине, красно показал еси Творцу. Сего ради тебе одеяние священства дарова Бог.
Знанию Божественному навык, был еси иерарх священен, всем преподал еси просвещение и Божественную светлость во спасение душ, Мартине достославне.
Богородичен:Невесту Тя безневестну и чисто, Чистая, селение Иисусово, святейшую Херувим вемы, Богородице.
Песнь 5
Ирмос: Ужасошася всяческая / о Божественней славе Твоей: / Ты бо, Неискусобрачная Дево, / имела еси во утробе над всеми Бога / и родила еси Безлетнаго Сына, / всем воспевающим Тя / мир подавающая.
Верно облистался еси, яко солнце лучами, делы и устнами грады вся просветил еси, проповедая Христа, Сына Божия, во плоти пришедша.
Утверждься в любви Божия Слова, видимых, Мартине, пристрастия всякаго возгнушался еси; темже тя почитаем, яко равноангельна и святителя честна.
Богомудраго Твоего, Христе, святителя Мартина день славяще, державу Твою славословим, Господи, грехов оставление просяще и недугов исцеление.
Богородичен: Дреманием уныния мя сон греховный, Отроковице, постиже, бодренною молитвою Твоею возставимя к покаянию.
Песнь 6
Ирмос: Божественное сие и всечестное / совершающе празднество, / Богомудрии, Богоматере, / приидите, руками восплещим, / от Нея рождшагося Бога славим.
Чудесы исполняеши весь мир, прехвальне, источая реки исцелений, Богогласе. Имиже и нас просвети, молим ти ся, Мартине преблаженне.
Любовь твоя, отче всехвальне Мартине, излияся на ближния и дальния, и миром покрываше землю твою, таже по успении твоем в чудесех нам источися, славящим твое к Богу восшествие.
Имуще честныя мощи твоя, от нихже исцеления дары приемлем, память твою чтим, святе Мартине, Христа Спаса славяще яко Всемогуща.
Богородичен: Молитвами Твоими да посрамятся вси оскорбляющие душу мою, Богородице Пресвятая, и вспять, якоже Давид вопиет, да возвратятся.
Кондак, глас 2:
Милостивен нрав приим, благосерд явился еси / и подателен нищим и требующим, Мартине Богодухновенне. / Сего ради званием деянию подобно, / обогати тя зело Христос — Податель благих: / Емуже, Богомудре иерарше пребогате, молися // грехов оставление подати празднующим любовию святую память твою.
Икос:
Подай ми разум божественен, мрак неведения от моего сердца отжени молитвами твоими, яко да пою твоя добродетели, и, якоже цветы сплетше, твою главу венчаю достойно, просяще от тебе прияти злых жития разрешение, враг же видимых избавится и невидимых твоими молитвами, отче наш Мартине блаженне, и грехов оставление подати празднующим любовию святую память твою.
Песнь 7
Ирмос: Не послужиша твари Богомудрии, / паче Создавшаго, / но огненное прещение мужески поправше, / радовахуся, поюще: / препетый отцев Господь и Бог благословен еси.
Восияв, блаженне, яко солнце на земли, благодатию свыше озаряем, отче Мартине, угасив страстей пламень слез росою, чудеса источил еси, всечестне, имиже врачуеши недуги душ и телес наших.
Милости Датель, одарив милостивное твое помышление, помилова многия Божественным твоим ходатайством, был еси во утешение душ и нищих же промышление, Мартине, отче преподобне.
В рай мысленных вшел еси добродетелей, от нихже цветы пожал еси истинныя и красныя, отче Мартине, имиже в мире благоухал еси.
Богородичен: Тьмою лютою жития объят быв, соскорбящаго и сболезнующаго не обретох: Твоею, Дево, светлостию разреши тьму прегрешений и озари пети Тебе, Благословенная, Яже Бога плотию рождшая.
Песнь 8
Ирмос: Отроки благочестивыя в пещи / Рождество Богородично спасло есть, / тогда убо образуемое, / ныне же действуемое, / вселенную всю воздвизает пети Тебе: / Господа пойте дела / и превозносите Его во вся веки.
Житие ангельское, мудрование смиренно стяжав о Христе, отче Мартине Богоблаженне, кроток был еси и ныне вселился еси в земли кротких, радости Божественныя исполняемы.
Исправно Богу работая и святительскую твою одежду священную носив священно, нечестивыя просветил еси, честный святителю, Единство Несозданно в Трех Лицех, Мартине премудре, проповедал еси.
Нарочитый святый день славныя твоея памяти творяще духовно, тя молим, Богоблаженне иерарше: моли прилежно, Мартине, отче милостиве, спастися нам.
Богородичен: Образ Отечь явила еси миру, Богородице Марие, и Того сияние соприсносущное, Христа Спасителя нашего, Егоже присно моли за люди Твоя.
Песнь 9
Ирмос: Всяк земнородный / да взыграется, Духом просвещаемь, / да торжествует же Безплотных умов естество, / почитающее священное торжество Богоматере, / и да вопиет: / радуйся, Всеблаженная, / Богородице Чистая Приснодево.
В лице ныне предстоиши со бесплотными силами, Мартине, отче всеблаженне. Подвигни пророки и апостолы премудрыя с мученики, прилежно за ны смолитися Богу, да достойно тя величаем.
Струю нам всегда честная твоя рака исцелений источает, отче, страстей излияния всяческих изсушающи и всяку напаяющи душу к благоплодию Божественному, священне Мартине, Христов угодниче.
Совокупился еси ликом архиереев, пророков, апостолов и мучеников: с нимиже поминай, отче Мартине чудне, честно восхваляющих тя.
Процвел еси, отче, во дворех Бога нашего, яко финикс высокорасленный, яко кипарис, возвеличился еси Божественными возношении. Отонудуже память твою верно вси празднуем, в нюже молимся: искушений нас всяких спаси.
Богородичен: Глас Тебе архангелов, Пречистая, вопием: радуйся, спасение всех человеков и славных мученик Божественное венчание.
Светилен:
Трисиянному Великому Свету ныне предстоя и в неизреченней светлости со всеми святыми пребывая, святителю всечестне Мартине, помяни всех нас, память твою светоносную совершающих.
Слава, и ныне, Богородичен:
Света Превечнаго родила еси нам, Христа, Бога нашего, Пречистая Дево, избавльшаго весь мир от лести диавола. Темже молим Тя: не престай молящи, да подаст нам милость Свою в День Судный.
На хвалитех стихиры, глас 2:
Восхваляем песни священными / чудодеяния твоя, прехвальне Мартине: / ты бо даруеши здравие человеком, / бесы молитвами твоими изгоняеши / и чудес дарование источаеши, / и Господеви ходатай о всех предстоиши, // и молишися о душах наших.
Владыце Христу во всем последовал еси, Мартине Богомудре, / и по стезям Его Царствия наследник соделался еси, / нам же по блаженнем преставлении честныя твоя мощи / в наследие священное оставил еси, / точащия исцеления различна. / Темже тебе с благоговением вопием: / моли Христа Бога и болезней душевных исцеление подавай // чтущим любовию святую память твою.
Яко украшение царское, / град Тур обрете твое тело, святителю Мартине, / о немже украшается и, хваляся о словесех твоих, / вселенную созывает на веселие / Божественных дарований и неизреченных чудес твоих, / и до ныне сотворяемых тобою, отче милостиве, / темже и мы припадающе к щедротам твоим, // на велию милость твою уповаем.
Святителю Мартине всечудне, / разумнаго света заре, / церковное светило, святительская похвало, / красоте монашескаго постнаго жития и истинное правило, / нам же заступник изряднейший, // свобождай от губителя души наша.
Слава, глас 8:
Возсия днесь пресветлая радость, / и многоцелебныя мощи твоя источают здравие, / недужныя исцеляюще, лукавыя духи отгоняюще / и от всякой язи избавляюще, / приидите убо ныне, вернии, / радостными усты восхвалим Мартина целомудреннаго и милостиваго, / сподобившагося таковыя благодати приятия, / той бо молится Христу Богу // спастися душам нашим.
И ныне, глас тойже:
Владычице, приими молитвы раб Твоих / и избави нас // от всякия нужды и печали.
Славословие великое и отпуст.
НА ЛИТУРГИИ
Блаженны от канона святаго песнь 3-я и 6-я. Прокимен, глас 1: Уста моя возглаголют премудрость / и поучение сердца моего разум. Стих: Услышите сия, вси языцы, / внушите вси, живущие по вселенней. Апостол ко Евреем, зачало 335. Аллилуиа, глас 4: Уста праведнаго поучатся премудрости, / и язык его возглаголет суд. Стих: Праведник, яко финикс, процветет, / яко кедр, иже в Ливане, умножится. Евангелие от Иоанна, зачало 36. Причастен: В память вечную будет праведник:
МОЛИТВА
О, великий Святителю и пастырю наш добрый и милостивый, отче священнейший Мартине!
К тебе смиренно припадаем и усердно молимся: яви нам, грешным, любовь твою отеческую и многомощное твое заступление. Испроси предстательством твоим у Всемилостивого Бога нашего вся яже на пользу душам и телесем нашим, согрешений наших прощение, любовь нелицемерную, ревность о спасение нашем, да благодатию Его Божественною соблюдаеми и спасаеми, славу, благодарение и поклонение возсылаем Отцу и Сыну и Святому Духу, ныне и присно, и во веки веков. Аминь.
Tags: Минея Дополнительная, богослужебные тексты, служба
Subscribe
  • Post a new comment

    Error

    Anonymous comments are disabled in this journal

    default userpic

    Your IP address will be recorded 

  • 0 comments