Уставщик (ustavschik) wrote,
Уставщик
ustavschik

Categories:

Служба Пресвятой Богородице в честь иконы Ея «Всецарица»

Выкладываю в «Уставные заметки» службу Божией Матери ради чудотворной Ея иконы, именуемой «Всецарица» или «Пантанасса», составленную насельником Иоанно-Предтеченского скита Оптиной пустыни иеромонахом Никоном (Скаргой). Текст воспроизводится по авторской машинописи, никакими цензурными инстанциями на данный момент не рассматривался.

Служба Пресвятой Владычице нашей Богородице
в честь иконы Ея «Всецарица» или «Пантанасса»
На велицей вечерни
На Г
осподи, воззвах: стихиры, глас 4.
Подобен: Д
ал еси знамение:
Дал еси знамение / боящимся Тебе, Господи, / чудотворную икону Твоея Матери, / Всецарица именуемую, / юже от горы Афонския предпослал еси / людем российским на исцеление, / да восхвалят Тя и Матерь Твою, // Иисусе Всесильне, Спасе душ наших.
Дала еси знамения / от святыя Твоея иконы, Богородице, / исцеления от раковыя язвы, / и всегубительных болезней прогнанием / благодатных лучей лиянием / во славу Твоего Возлюбленнаго Сына / Иисуса, Всесильнаго Спаса душ наших.
Дала еси знамения / от святыя Твоея иконы, Владычице, / демонских полков прогнанием / и колдовских чар разорением, / благодатными струи напаяя верныя / и возвышая рог Церкви Сына Твоего // Иисуса, Всесильнаго Спаса душ наших.
Дала еси знамения / от святыя Твоея иконы, Всецарице, / свет Богоразумия испустивши / и от прелести сатанинской юношу спасла еси, / покаянием Церкви обручила еси / и Сыну Твоему заблудшую овцу привела, // Марие Всесильная, ходатаице о душах наших.
Слава и ныне, глас 1:
Светлый праздник Всецарицы наста, / горний лик созывая свеселитися на земли празднующим / и в веселии глаголющим: Радуйся, Небесная наша Матерь, / Небеси и земли Царице, / радуйся, всынившая Себе род земнородных / и небесная совокупльшая с человечеством. / Радуйся, Пантанасса, всего мира целительница, / избави от обдержащих напастей Твое стадо, Владычице, // и спаси души наша.
Вход, и паремии Богородичныя.
Стихиры на стиховне, глас 5.
Подобен: Р
адуйся:
Радуйся, Афона сокровище, / святогорская Похвало, иноком утешение. / Радуйся, монашеских обителей игумения, / древних уставов святоблюстительница, / падших возведение на высоту смирения, / добродетельных иноков умное созерцание, / всегда готовая во бранех помощь, / непобедимая Воевода иноческих ополчений, / Христа убо моли // даровати монашествующим утверждение.
Стих: Слыши Дщи и виждь, / и приклони ухо Твое.
Радуйся, русской земли Царице, / Державная заступнице и повелительнице, / иконою Пантанассы украсивши стольный град, / светлыми чудесами облистая верныя, / демонскую прогнавши от Церкви чуму / и исцеляя всяку раковую язву. / Темже ко Твоему образу, Всецарице, приходящия / сохрани от всякия беды и напасти, / Христа присно моля // даровати российстей земли в православии утверждение.
Стих: Лицу Твоему помолятся / богатии людстии.
Радуйся, исцеления источниче, / река Божия милости, / светолучная цельба слепым, / радуйся, быстрокрылая помощь страждущим, / смертоносных язв избавление, / радуйся, раковыя болезни всесильное поражение, / воздвижение со одра болезненнаго врачьми оставленных, / Материнское о роде человечестем попечение. / Темже, Всецарице, молим Тя // ниспослати душам нашим мир и велию милость.
Слава и ныне, глас 6:
От края небеси до края земли / покров Всецарицы простреся, / и чудеса Ея якоже песок вскрай моря / никтоже исчести возможет. / Темже во уповании великом притецем к Ея образу чудотворному, / умильно глаголя: / о Пантанасса, / отверзи сокровища исцелений верою просящим / и от враг видимых и невидимых Твое стадо сохрани, // любовию хвалящее Тя.
По Ныне отпущаеши: тропарь, глас 4:
Образом радостотворным честныя Всецарицы / желанием теплым взыскующих благодати Твоея спаси, Владычице; / избави от обстояний к Тебе прибегающих, / от всякия напасти огради стадо Твое, // к заступлению Твоему взывающее присно.
На утрени
На Б
ог Господь: тропарь трижды.
По 1-м стихословии седален, глас 4:
Удивляет благодать иконы Твоея, Богородице, егда юноша, ученьми сатанинскими омраченный, пред нею паде и недвижим бысть, паче чаяния от уз мрачных светом от Твоея иконы свобождается. Темже умильно просим: от козней диавольских рабы Твоя сохранити, благочестно праздник Твой совершающия.
Слава и ныне, тойже.
По 2-м стихословии седален, глас 2:
К пречудному Твоему образу Пантанасса прибегаем и теплому заступлению Твоему взываем, Дево: болезнетворных страстей изсуши греховное море, и волны искушений избави, Отроковице, пути же добродетелей отверзи вход; яко да в тишине Божественней воспоем Тя, Всепетая.
Слава и ныне, тойже.
По полиелее седален, глас 8:
Гласы радостными Тя величаем, Чистая, и славим пучину человеколюбия Твоего, яко от бед спасаеши и изымаеши от душетленных стрел невидимого врага и всякую язву смертоносную врачуеши, Богоневестная, Тя бо едину стяжа Предстательницу род христианский, и яко необориму стену имать икону Твою, и в покров Твой вси прибегаем, Всецарице, Мати Христа Бога нашего.
Слава и ныне, тойже.
По 50-м псалме стихира, глас 6, зри на стиховне великия вечерни:
О
т края небеси до края земли:
Канон Всецарице, глас 4, егоже краегранесие:
Д
ары исцеления Пантанасса раздает поющим.
Песнь 1
Ирмос: Отверзу уста моя, / и наполнятся Духа, / и слово отрыгну Всецарице Матери, / и явлюся светло торжествуя, // и воспою, радуяся, Тоя чудеса.
Да подвижатся собрания верных и благоумильно да восхвалят Пречистую Всецарицу, гласы песненныя возвышая, радостно славяще Тоя чудеса.
Афонская взыграй горо, с Российским уделом Богоматери: яко Саму Всецарицу приимшу от тебе, в чудотворнем образе Ея, чудесами просвещающу Русскую землю.
Речи празднующих светло да текут, обвеселяя град Москву яко жилище Божие, в немже водрузися Пантанассы икона, Царствующая над всеми царствами.
Испещренна Твоя, Пантанасса, икона златым и Божественным бисером, чудесы светится и красуется в граде Москве и в горе Афонстей почествуется.
Песнь 3
Ирмос: Твоя песнословцы, Богородице, / живый и независтный источниче, / лик себе совокупльшия, духовно утверди, / в Божественней Твоей славе // венцев славы сподоби.
Исцеления притече река, из горы Афонския, и всю землю Русскую напои чудесы, и неверия изсуши реку мутную.
Святогорская палато, исполненна чудес светлостьми, дары исцелений ныне верным раздает, и в чертоги благодати вводит, Твоя икона, Богородительнице.
Царское достояние и сокровище Божественныя милости, икона Всецарицы явися в российстей земли, и подает недужным исцеления, и полки гонит демонския.
Елейница Духа, источниче цельбы, стручец здравопишущий исцеления и разрешение грехов, и смертоносных язв потребление Твоя, Пантанасса, икона явися досточудная.
Лучи светозарных чудес, Богородице, испусти икона Твоя по всей земли русстей, от горы Афонския яко от востока взошла есть, и яко солнце притекла есть в землю Русскую.
Седален, глас 4:
От Духа Святаго зачала еси, Чистая, Содержащаго дланию Своею концы земли, и власть от Сына Твоего прияла еси прогоняти демоны и целити недуги, и чудодействовати преславныя знамения Своею иконою во всех концах земли. Просвети, Богородице, Твою икону чтущих, и умильно Тебе вопиющих: радуйся, Пантанасса, утешение христиан и умирение всех концев земли.
Слава и ныне, тойже.
Песнь 4
Ирмос: Седяй в славе на Престоле Божества / во облаце легце, / прииде Иисус Пребожественный / Нетленною Дланию и спасе зовущия: // слава, Христе, силе Твоей.
Единодержавная Всецарица землю чудесами всю исполняет, страсти врачует и прогоняет недуги и нетленную подает благодать зовущим: слава, Христе, силе Твоей.
Невестническими красотами убранна икона Твоя, ангельскими хранима чинми, Слово воплощенное изобразися в Ней, источающее мирови жизнь и нетление.
Исцелений непресыхаемую реку, чудес безкрайнее море мир обрет в Твоей иконе, Пантанасса, и тишайшую пристань, темже в радости зовет: слава Всецарице, силе Твоей.
Яко корабль небурно ходящий, яко недвижимая гора и добродетельми приосененная чаща, яко животечный источник и светозарная цельба, се икона Твоя земли Русстей, Пантанасса.
Песнь 5
Ирмос: Ужасошася всяческая / о Божественней славе Твоей: / Ты бо, неискусобрачная Дево, / имела еси во утробе над всеми Бога / и родила еси Безлетнаго Сына, / всем воспевающим Тя // мир подавающая.
Пантанассы чудесную зрим славу, всечестный совершая праздник, ейже ангельския дивятся чини и демонския полки трепещат, видя на руку Девичу носимаго Бога.
Афонская предыграй горо, Россию видя почитающу Твою чудодейственную икону, и псаломски светло с нами воспой единодержавную власть Марии Всецарицы.
Нареченная Всецарицей, Ты игумения горы Афонския явилася еси и монашествующим показала еси твердое заступление, всюду совершая преславная иконою Своею, чудесы еретики посрамляюща.
Твой светозарный, Пантанасса, образ тьму греха потреби, чудесами блистаяся многовидными, и прелести лед растопи, и бури прогоняет болезнетворныя.
Ангел высши, Дево, царствуеши на небеси, милостивым взором стадо словесное назираеши и спасаеши от бед и чарований различных, и демонския козни разрушаеши.
Песнь 6
Ирмос: Божественное сие и всечестное / совершающе празднество, / Богомудрии, Богоматере, / приидите, руками восплещим, // от Нея рождшагося Бога славим.
Небесною, Всецарице, украшенна славою, Царю Христу на престоле соседя, Егоже на объятиях Твоих носила еси, Всеблаженная, Егоже и ныне не престай молити о чтущих Твой праздник священный.
Аще и явленна бысть на Афонстей горе Твоя икона Всецарице, но чудесы просвещаеши мирския концы и в России нов список первоподобней показала еси, и чудодействуеши им преславныя делы.
Святогорским иноком утешение, радуйся, Афонская похвало; радуйся, Ватопедския обители славо; радуйся, России сокровище, подающая монашествующим и мирским исцеления.
Спасения дар и от раковых язв исцеления с верою к чудотворному Твоему образу, Пантанасса, приходящия приемлют, и от Тебе рождшагося Бога благодарно славят.
Архангельскую Тебе песнь несем, Всецарице, бренныма устнама зовуще: радуйся, Слова приятелище, Духа обителище; радуйся, Ангелов сладость и земных исцеление.
Кондак, глас 4:
Небеси Царице и земли Владычице, / Дева Мария Богородительнице, / чудотворный Твой образ чтущих / от бед избави и недугов свободи, / да в радости зовут Ти: // Радуйся, Пантанасса, всего мира умирение.
Икос:
Многоразличными недуги одержимии, о Всецарице, от святыя иконы Твоея паче чаяния исцеления получают, и ходатайством Твоим грехопадения многоплетенныя разрешаются. Темже благодать исцелений верою приимшии велегласно Тебе зовут: Радуйся, снадобие, боль утоляющее; радуйся, Прохладо, жар недужных остужающая; радуйся прижигающая раковыя язвы, аки пламенем; радуйся подымающая со одра оставленных врачьми; радуйся, Пластырю, струпы душевныя заживляяй; радуйся, Елее, язвы телесныя умащаяй; радуйся, бесовских полчищ от Церкви отгнание; радуйся, мглы греховной разсеяние. Радуйся, Пантанасса, всего мира умирение.
Песнь 7
Ирмос: Тя, живописующий ассирийский пламень / юноши три спасе, Господи, / якоже и Деву не опали, Отроковицу, / в Божественном Рождестве Твоем Божественная Искра, // препетый отцев Боже, благословен еси.
Радости ходатаица, Пантанасса, Твоя явися икона, яже российских людей обвесели множество, и недугов многоразличных яко безкрайнее море изсушила есть, пришествием к нам Твоего образа.
Алчущим подаеши исцеления, напаяя здравием страждущих яко питием, и очищение прегрешений даруеши, Всецарице, с верою приходящим к чудотворней иконе Твоей.
Зарею светлых чудес Твоих, Пантанасса, просветила еси землю русскую, гору же Афонскую духовно возвеселила еси, и здравие подала еси поющим: препетый отцев Боже, благословен еси.
Дары Всецарица раздает поющим и исцеления струю независтно точит всем, и потребляет раковыя язвы, и греховные прижигает струпы, и благодарно подвизает вопити: препетая Мати Бога нашего, благословенна еси.
Песнь 8
Ирмос: Отроки благочестивыя в пещи / Рождество Богородично спасло есть; / тогда убо образуемое, / ныне же действуемое / вселенную всю подвизает пети Тебе: / Господа пойте, дела, // и превозносите Его во вся веки.
Ангельския силы престол Твой окружают, Всецарице, немолчными гласы Тя, Всесвятую, херувими славословят, и трепещет Твоея славы демонское полчище, мы же радостно зовем: Господа пойте, дела, и превозносите Матерь Его во вся веки.
Елей от Твоея иконы, Пантанасса, болезней исцеляет множество, егоже знамения бесы трепещут и бегут, и разрушается волхвов чародейство всяческое, и насильства демонскаго свобождаются с верою приходящия к иконе Твоей.
Твердыни сокрушаеши демонския, Богородице, и утверждаеши Царство Сына Твоего, Всецарице, и возвышаеши православных рог, зовущих: Господа пойте, дела, и превозносите Матерь Его во веки вся.
Притецыте, страждущих все множество, и с верою припадите к чудотворней иконе Пантанассы, исцеляет бо всяк недуг и потребляет раковыя язвы, и от всякого пристрастия свобождает зовущих: Господа пойте, дела, и превозносите Матерь Его во веки.
Троичен: Поклоняемся Тебе, Триипостасный Боже, в Лицех Разделимый и единый Существом: нерожденность Отца почитаем, и воплощение Сына хвалим, Духа же исходность богословим, и православно во вся веки поем.
Образом Твоим чудотворным, Всецарице, землю русскую радования исполнила еси и концы ея просветила еси чудесами, и исцеленьми снабдила еси страждущих, и вжиливши мертвенным жизнь, слышиши от них: превозносим Тя, Мати Божия, во вся веки.
Песнь 9
Ирмос: Всяк земнородный / да взыграется, Духом просвещаем, / да торжествует же Безплотных умов естество, / почитающее священное торжество Богоматере, / и да вопиет: / радуйся, Всеблаженная Богородице, // Чистая Приснодево.
Юношески ныне, старцы, взыграйте, и заматоревшия в болезнех людие, возвеселитеся вси; се обновление прииде: образ Свой Всецарица знаменоносный показует и величающим Ю творит пресечение скорбей.
Шестокрилих множество херувим и огнеочитии серафими Твоему престолу служат, Всецарице Дево, Ангельския же чини Твою икону дарохранят, вси внемлют Твоим повелениям, Владычице, темже кровом крил Твоих покрый Тя величающия.
Источник исцелений приснотекущий, кладезю неисчерпаемых Божественных щедрот, Всецелительнице многоразличных, Пантанасса, болезней и раковых язв всесовершенное поражение явися Твоя икона, Всецарице, величающим ю.
Мария, неискусобрачная Дево, жилище Неприступнаго Света явися утроба Твоя, и солнце победися Твоею славою, яко всех Царя родила еси и Всецарицей нареклася еси, тем Тя вси величаем.
Светилен, глас 2:
Царя Славы родила еси, Чистая, и Божественною славою яко в солнце облеклася еси, Отроковице, лучи исцелений и чудес испушая во всю вселенную; темже Тя поем, Мати Всецарице.
На хвалитех стихиры, глас 6.
Подобен: Т
ридневен:
Яко утро духовное явися праздник Твой, Пантанасса, / и веселие вечное и радость миру от Твоея иконы возсия, / торжествует гора Афонская, / и страна российская велегласно прославляет чудеса Твоя, / темже неоскудную Тя поющим подаждь благодать // и душам нашим ниспосли велию милость.
Трисветлую благодать источает Твоя икона, Пантанасса, / и прогоняет демонскую тьму, / и обращает на путь истины прельщенных, / и исцеляет слепоту души, / темже Тя славит род человеческий // и воспевает Твоя чудеса.
От лютых болезней исцели нас, Всецарице, / и от смертоносных недугов свободи, / и раковыя язвы потреби, Благая, / и всякую немощь таящуюся искорени, / да славят Тя благодарно роди человечестии // и воспевают Твоя чудеса.
Слава, и ныне, глас тойже:
Высочайший Престол Божественный, / Скиния Слова Одушевленная / Отроковице Чистая, вместилище Духа, / Всецарице горних умов, / Тя молим, Богоневестная: / сродства нашего не забуди / и долу живущия небожители сотвори, / преклоняя Матерний слух ко всякому прошению / и болезней лютых избави стадо Твое, / богатно изливая на ны благодать Сына Твоего / от святыя Твоея иконы, // Всечудная Пантанасса.
Tags: Минея Дополнительная, богослужебные тексты, служба
Subscribe
  • Post a new comment

    Error

    Anonymous comments are disabled in this journal

    default userpic

    Your IP address will be recorded 

  • 3 comments