Уставщик (ustavschik) wrote,
Уставщик
ustavschik

Category:

Служба священномученику Митрофану, архиепископу Астраханскому

К приближающейся памяти (23 июня / 6 июля) священномученика Митрофана (Краснопольского), архиепископа Астраханского и Царевского (†1919), выкладываю в «Уставные заметки» текст бденной службы святому, составленной в Белорусской Православной Церкви. Святой Митрофан 14 лет прослужил в землях Белой Руси — сначала архимандритом, ректором Могилевской духовной семинарии, потом епископом, занимал Гомельскую и Минскую кафедры. Служба публикуется по машинописи, цензурными инстанциями текст не рассматривался.
Замечание от ведущего журнала: Церковью в Отечестве в лике святых прославлен лишь свщмч. Митрофан, но Русская Православная Церковь Заграницей прославила в лике святых новомучеников и второго астраханского иерарха, убиенного в тот же день вместе со св. Митрофаном — епископа Енотаевского, викария Астраханской епархии Леонтия (фон Вимпфен). В 1916 – 1917 годах еп. Леонтий был епископом Петровским, вторым викарием Саратовской епархии.

Служба священномученика Митрофана, архиепископа Астраханскаго
На велицей вечерни
Б
лажен муж: 1-й антифон.
На Г
осподи, воззвах: стихиры, глас 8:
Днесь светло красуется богоспасаемый град Астрахань в прославлении своего архипастыря святителя Митрофана и вси православнии хвалятся. Ты же, отче наш Митрофане, с Собором Новомучеников Христовых, моли Человеколюбца Христа Бога нашего, людем православным тишину даровати, земли плодородие и душам нашим велию милость.
Земля Воронежская прославися, яко в пределех ея от благочестиваго корене благокрасен плод позябе Димитрий отроча благонравное, Российскому Златоусту тезоименитое. В сем же имени велий путь тебе пронаречеся.
Отче святителю Митрофане, измлада Христу поработати пламенне вожделел еси и сего ради во градех Воронеже и Киеве богомудрию поучался еси, идеже слово Евангелия сердцем чистым восприим и на нем все житие твое утверждая, Христу верен явился еси даже до смерти.
Киево-Печерская Лавра всецело плени тя, и в сердце твоем возгореся огнь, мир и яже в мире оставити и в иночестем звании Богу послужити, еже и приим просимое, именем святителя Митрофана Воронежскаго наречен был еси, да последуя своему покровителю, ревностно Богу послужиши, моляся о спасении душ наших.
Божественное смотрение о тебе исполнися, святителю, егда к пастырскому деланию призва тя Бог, таже и святительством увенча, и души словесных овец твоему попечению предаде, да соблюдеши я во едином стаде Единаго Пастыря, Христа Бога нашего.
Приидите, вернии, согласно вси восхвалим святителя предивнаго священномученика Митрофана, иже достойно иго Христово чрез все житие свое понесе, и ныне во обителех Отца Небеснаго водворився, молится о спасении душ наших.
Слава, глас 5:
Плачем и рыданием земля наша огласися, крови святых мученик и исповедник Христовых потоки по ней излияся, храмы Божии осквернишася и попранию предашася. Увы, мне, земле моя, взывал еси, святителю, кое врачевание прилежит ти, да всех сих избавишися.
И ныне, Богородичен догматик, глас тойже:
В Чермнем мори неискусобрачныя Невесты образ написася иногда: тамо Моисей, разделитель воды, зде же Гавриил, служитель чудесе. Тогда глубину шествова немокренно Израиль, ныне же Христа роди безсеменно Дева. Море по прошествии Израилеве пребысть непроходно, Непорочная по рождестве Еммануилеве пребысть нетленна. Сый и прежде Сый, явлейся яко Человек, Боже, помилуй нас.
Вход. Прокимен дне и чтения 3.
Деяний святых апостол чтение (глава 4):
Во дни оны, глаголющим апостолом к людем, наидоша на них священницы, и воевода церковный, и саддукеи, жаляще си, за еже учити им люди и возвещати о Иисусе воскресение мертвых; и возложиша на них руки, и положиша их в соблюдение до утрия: бе бо вечер уже. Мнози же от слышавших слово вероваша: и бысть число мужей яко тысящ пять. Бысть же наутрие собратися князем их, и старцем, и книжником во Иерусалим: и Анне архиерею, и Каиафе, и Иоанну, и Александру, и елицы беша от рода архиерейска. И поставльше их посреде, вопрошаху: коею силою, или коим именем сотвористе сие вы? Тогда Петр, исполнився Духа Свята, рече к ним: князи людстии и старцы Израилевы, аще мы днесь истязуеми есмы о благодеянии человека немощна, о чесом сей спасеся, разумно буди всем вам и всем людем Израилевым, яко во имя Иисуса Христа Назорея, Егоже вы распясте, Егоже Бог воскреси от мертвых, о Сем сей стоит пред вами здрав. Сей есть камень, укоренный от вас, зиждущих, бывый во главу угла, и несть ни о едином же ином спасения; несть бо иного имене под небесем, даннаго в человецех, о немже подобает спастися нам.
Деяний святых апостол чтение (глава 4):
Во дни оны, видяще иудеи Петрово дерзновение и Иоанново и разумевше, яко человека некнижна еста и проста, дивляхуся: знаху же их, яко со Иисусом беста. Видяще же исцелевшаго человека с нима стояща, ничтоже имяху противу рещи. Повелевше же има вон из сонмища изыти, стязахуся ко друг другу, глаголюще: что сотворим человекома сима? Яко убо нарочитое знамение бысть има, всем живущим во Иерусалиме яве, и не можем отврещися. Но да не более прострется в людех, прещением да запретим има ктому не глаголати о имени сем ни единому от человек. И призвавше их, заповедаша има отнюд не провещавати, ниже учити о имени Иисусове. Петр же и Иоанн, отвещавше к ним, реста: аще праведно есть пред Богом вас послушати паче, нежели Бога, судите? Не можем бо мы, яже видехом и слышахом, не глаголати. Они же, призапрещше има, пустиша я, ничтоже обретше, како мучити их, людей ради, яко вси прославляху Бога о бывшем: лет бо бяше множае четыредесяти человек той, на немже бысть чудо сие исцеления.
Деяний святых апостол чтение (глава 4):
Во дни оны, отпущена бывша апостола приидоста ко своим и возвестиста, елика к нима архиереи и старцы реша. Они же, слышавше, единодушно воздвигоша глас к Богу и рекоша: Владыко, Ты, Боже, сотворивый небо и землю и море и вся, яже в них; Иже усты Давида отрока Твоего рече: вскую шаташася языцы и людие поучишася тщетным? Предсташа царие земстии, и князи собрашася вкупе на Господа и на Христа Его. Собрашася бо воистину во граде сем на святаго Отрока Твоего Иисуса, Егоже помазал еси, Ирод же и Понтийский Пилат, с языки и людьми израилевыми, сотворити, елика рука Твоя и совет Твой преднарече быти. И ныне, Господи, призри на прещения их и даждь рабом Твоим со всяким дерзновением глаголати слово Твое, внегда руку Твою прострети Ти во исцеления, и знамением и чудесем бывати именем святым Отрока Твоего Иисуса. И помолившимся им, подвижеся место, идеже бяху собрани, и исполнишася вси Духа Свята, и глаголаху слово Божие со дерзновением.
На литии стихира, глас 3:
Живо Слово Господне и действенно не убойтеся от убивающих тело, души же не могущих убити, убойтеся же паче могущаго и душу и тело погубити в геенне огненней. Потерпе душа твоя в слово сие, священномучениче Митрофане: Единаго боюся, Живущаго на небесех, — рекл еси беззаконным. Что ми есть заточение? — сладость молитвы уединенныя. Что ми есть смерть? — радость отшествия ко Христу. Не боюся страха смертнаго, вся претерплю за возлюбльшаго мене, потерплю и не отвергуся. Сие разумейте и покоряйтеся, яко с нами Бог Своею благодатию.
Слава и ныне: Богородичен, глас тойже:
Заступнице усердная, Мати Бога нашего, и предстательнице Чистая, со святителем Митрофаном моли Сына Твоего о Твоих рабех.
На стиховне, стихиры, глас 8:
Приидите, вернии, видим иерарха всечестна право правившаго Слово Божественныя истины и жестокия муки даже до смерти небоязненно претерпевша, сими же страдании и смертию Господа прославивша, и венец славы от Него приимшаго, и молящагося выну о спасении душ наших.
Стих: Честна пред Господем смерть преподобных Его.
Трезвение ума сохранив и воли твоей не попустив поколебатися; таже сердце чисто и чужде показав духу озлобления, сице твою душу целу и невредиму соблюд, мужественно и небоязненно Христа ради смерть приял еси, Его же возлюбил еси, святителю.
Стих: Священницы Твои облекутся в правду и преподобнии Твои возрадуются.
Молитву твою пролиял еси ко Господу, святителю Митрофане, и Тому возвестил еси печали твоя, глаголя: се аз душу мою полагаю за овцы моя, Господи, приими ю; яко кадило молитвы о Руси Православней, да пребудет свята и правоверна во веки.
Слава, глас 6:
Пастырь добрый, милосердия исполнен, явился еси пастве твоей святителю Христов: егда мор жесток и глад велий землю Астраханскую постиже, о людех страждущих и алчущих попечение непрестанное полагая, многия от смерти избавил еси, темже моли от бед и глада душевнаго нас избавити.
И ныне, глас тойже:
Тебе вси роди человечестии хвальныя дары приносят, Владычице, и молятся яко Царице и Матери Божия, пророцы Тя премудро проповедаша, левиты благословиша, апостоли и мученицы исповедаша, вся сословия поклоняются, архиереи проповедуют, монаси и простии благоговеют, богатии и убозии, сироты и вдовы, и всяк возраст, и всяко преспеяние, старческое и младенченское, под кров Твой державный с верою прибегаем: покрый и соблюди, Госпоже, молитвами Твоими, и спаси от бед души наша.
Тропарь, глас 4:
От юности твоея заповеди Господни добре сохраняя, Богови во всяком долготерпении благоугождал еси, ревнуя о благоустроении и процветении Церкве Православныя, да прославится Отец Небесный во чадех ея, и в годину лютых гонений на веру святую исповедник безстрашен явился еси, за Христа мученическую кончину прияв. И ныне, предстоя Престолу Святыя Троицы, молися, святителю отче Митрофане, о всех любовию чтущих святую память твою.
На утрени
На
Бог Господь: тропарь, глас 3:
Подвигом добрым яко святитель Христов подвизался еси, веру Православную непорочно соблюд, во время гонения лютаго мучителей прещения не убоялся, священномучениче Митрофане, яко первомученик Стефан, убивающим тя рекл еси: Господь да простит вас. Сего ради уготовал ти венец правды, егоже да воздаст Господь, молитвами твоими всем почитающим тя.
Слава, ин тропарь, глас тойже:
Воронежския земли прозябение, во иночестве святителю Митрофану тезоименитый, страну Белорусскую труды своими украсивый, слова Божия проповедниче велегласный, Собора Поместнаго уста богодухновенная, Патриарха Тихона соработниче верный, во граде Астрахани священномученика Иосифа прославивый, егоже преемник на престоле и в страданиих явился еси, отче наш Митрофане, моли Христа Бога о спасении всех почитающих тя.
И ныне, Богородичен:
Тя, Ходатайствовавшую спасение рода нашего, воспеваем, Богородице Дево: плотию бо от Тебе восприятою Сын Твой, и Бог наш, крестом восприим страсть, избави нас от тли, яко Человеколюбец.
По 1-м стихословии
Притецем вернии к святителю нашему Митрофану и молитву пролием пред ним, возвестим печаль нашу и скорбь нашу, да обрящем велие утешение, всяк бо веруяй не отыдет тощ.
Слава, и ныне:
Утоли, Владычице, болезни душ наших, радостию благодатною о Тебе исполни сердца наша, на Тя бо надеющиися, причастницы будем жизни вечныя.
По 2-м стихословии
Верен был еси Христу даже до смерти, святителю Митрофане, и якоже Стефан апостол, молился еси о убивающих тя: Господь да простит вас. Сего ради к тебе усердно взываем: дар всепрощения и незлобия нам испроси, многими грехи обремененным.
Слава, и ныне:
Ублажим Владычицу мира, радующуюся о славе новомученика, имать бо дерзновение многое в молитвах об Отечестве нашем. Еяже предстательством и мольбами святителя да сподобит Господь и нас милости Своея.
По полиелеи, седален, глас 4:
Вонмем, о христолюбивии людие, днесь бо святитель Митрофан в сонме святых земли нашея предстоит и молитвы о нас к Богу возносит. Таковое милосердие Божие о нас ведяще, согласно воспоим: Боже, дивный во святых своих, молитвами и предстательством угодника Твоего Митрофана, помилуй и спаси всех нас.
Слава и ныне:
Кто возможет разлучити нас от богатства милосердия Твоего, о Богомати, аще не грехи наша, имиже отлучаем себе от любве Божия? Ты же, Благая, не остави нас, но благодатию данною Ти от Бога возведи от тли греховныя и призови к покаянию, да сподобимся со святыми сродники нашими жизни вечныя.
Степенна, 1-й антифон 4-го гласа.
Прокимен, глас 4: Честна пред Господем смерть преподобных Его. Стих: Что воздам Господеви о всех, яже воздаде ми.
Евангелие от Луки, зачало 67.
По 50-м псалме стихира, глас 6:
Память священномученика Митрофана вернии людие празднуют: небеса радуются и земли нашея концы торжествуют, того молитвами даруй, Господи, душам нашим велию милость.
Канон, глас 4, егоже краегранесие:
С
вятителю Митрофане, моли Бога за Русь Православную.
Песнь 1
Ирмос: Тристаты крепкия, Рождейся от Девы, безстрастия во глубине, души тричастное потопи молюся, да Тебе, яко в тимпане, во умерщвлении телесе победное воспою пение.
Страхом Господним утверждаемь, начало бо премудрости сей есть, терпением стяжал еси душу твою, еще отрок сый, любовию прилепился еси премудрости, о Митрофане, отче наш, Богу победное пение.
Воронежское прозябение был еси, блаженне Митрофане, родителей твоих Иоанна и Анастасии благочестивый сын, смирением, любовию к ближним украшаяся, яко луч божественнаго света возсиял еси нам. Приидите, чада света, озаримся ею, да воспоем Богу победное пение.
Яже по благодати Божией призван был еси, святителю Митрофане, работати Господеви, и сего ради во градех Воронеже и Киеве богомудрию поучался еси, идеже слово Евангелия сердцем чистым восприим во еже пети Господеви победное пение.
Терпением стяжал еси душу твою, блаженне Митрофане, в Киево-Печерской Лавре подвизался еси, идеже и иноческий образ восприял еси, да всего себе любви Божией предаси, воспевая Ему победное пение.
Изрядное житие твое во обители, досточудне, всеми познано бысть. Сего ради Божественное смотрение о тебе исполнися, святителю Митрофане, егда к пастырскому деланию призва тя Бог, таже и святительством увенча, и души словесных овец твоему попечению предаде, да научиши всех воспевати Богу победное пение.
Богородичен: Теплая Заступнице к Тебе прибегающих и ненадеющихся Надеждо, виждь скорбь людей Твоих и подаждь помощь, в знамении Твоем, Пречистая.
Песнь 3
Ирмос: С высоты снизшел ecи волею на землю, превышше всякого начала, и смиренное вознесл ecи, из ада преисподняго, естество человеческое: несть бо свят паче Тебе, Человеколюбче.
Елень на источники водныя устремляется, ты же, святителю Митрофане, ко славе Церкви Христовы вся деяния и помыслы твоя присно устремлял еси. Яко сын верный святыя Церкве, ты ревнитель прославления Астраханскаго священномученика Иосифа был еси, храмов создатель, просвещения православнаго попечитель и монашества покровитель, да вси вопиют Господеви: несть свят, паче Тебе, Человеколюбче.
Любовь небесную на земли евангельски стяжавый, Царю Небесному управил еси душу твою, преславне Митрофане, земнаго православнаго царя почитатель был еси, веление его по перенесению мощей преподобныя Евфросинии из Киева в Полоцк с любовию исполнил еси, сопровождая оные по водам Днепра до Могилева, идеже крестным ходом в храм принесл еси, со всеми радующеся, воспевая хвалу Господеви: несть свят, паче Тебе, Человеколюбче.
Юнаго Соломона, не богатства, но мудрости от явившагося Господа просяща, похваляет Вышний и вселенная присно прославляет, но того мудрейший Митрофан показуется, Церковь Христову от еретиков защищающий и православных научающий единому Богу работати и воспевати песнь, яко Человеколюбцу.
Многия труды подъял еси в житии твоем, святителю всечестне Митрофане, егда высочайше утвержден был еси архипастырем Минским и Туровским, пастве твоей заповедал веру Православную хранити и почитати своих небесных покровителей: святителей Кирилла и Лаврентия, и мученика младенца Гавриила, и всех святых, их же молитвами да сохранит Господь Человеколюбец.
Инок нестяжателен на престоле архиерейства пребыл еси, святителю, подвиги поста и молитвы умножая, доброе себе и о людех вознося моление, пребыв на Астраханскую кафедру, любовь и благословение пастве преподал, научая всех прославляти Господа Человеколюбца.
Богородичен: Твою, Богомати, всечестную и чудотворную икону русския люди стяжавше, яко заступление крепкое и стену нерушиму, молятся Ти, на враги победу даровати Отечеству нашему.
Седален, глас 8:
Коя польза человеку, аще мир весь приобрящет, душу же свою погубит, или что даст человек в измену за душу свою, — рече Господь. Сими словесы от юности наставляем, тело твое на смерть уготовал еси, святителю, да душу живу сохранив, со Христом пребываеши.
Слава, и ныне, Богородичен:
Благословенную нарекий Твою Матерь, пришел еси страсть вольным хотением, возсияв на Кресте, взыскати хотя Адама, глаголя Ангелом: срадуйтеся Мне, яко обретеся погибшая драхма. Вся мудре устроивый, Боже наш, слава Тебе.
Песнь 4
Ирмос: Седяй в славе на Престоле Божества, во облаце легце, прииде Иисус Пребожественный, нетленною дланию, и спасе зовущыя: слава, Христе, силе Твоей.
Ревностию Божественною присно объят быв, неуклонно Богу предстоял еси, Астраханской пастве в военное время дела милосердия милостынею и непрестанными молитвами совершал. Ныне же молися о нас, святителю Митрофане, совершающих память твою.
Образ неусыпнаго стража Церкве Христовы явил, святителю Митрофане, покров и защищение Астраханской пастве твоей был еси, в кротости и незлобии страдания приемля, безбожных мучителей благословляя, простил еси, не ведущих пети: слава, Христе, силе Твоей.
Фарисейскаго возношения чужд явился, отче Митрофане, монашеское же смирение от юности возлюбив, тайными подвиги плоть смирял еси, и душу твою молитвою пред Отцем Небесным просвещал еси. Молился еси за Церковь Христову, да единомюсленно вопиет: слава, Христе, силе Твоей.
Апостолов преемника, святителей сопрестольника, преподобных сожителя Астраханская паства избрала тя, святителю Митрофане, для участия в Поместном Соборе, на нем же ты всех призывал к восстановлению Патриаршества, да Православная Русская Церковь со своим Патриархом вопиет: слава силе Твоей, Господи.
Ныне время торжества, ныне радость духовная явися, возвеселимся убо, христоименитии людие. Изволися Духу Святому со иерархи поставити Церкви Российския Патриарха Тихона во дни испытания веры, свидетельствующа крепкое в ней стояние, и паству неврежденну от наветов вражиих добре соблюдающа, вопиюще: слава, Христе, силе Твоей.
Богородичен: Егда в нощи Жених приидет судити земли, тогда во сретение Его со светлою свещею благоволи, Пречистая, изыти ми, и поклонитися Того пришествию.
Песнь 5
Ирмос: Ныне восстану, пророчески рече Бог, ныне прославлюся, ныне вознесуся, падшаго прием от Девы и к Свету умному возносяй Моего Божества.
Многия беды и напасти беззаконнии отступницы воздвигоша на тя, исповедниче святителю Митрофане, обаче в кротости и смирении чистоту веры хранити и в лоне единыя Православныя Российския Церкве пребывати паству твою призывал еси.
О коликих благ, окаяннии лишистеся раскольницы: ни священноначальника бо имате, ни вождя истиннаго ко спасению, ниже Безкровныя Жертвы, ниже других Таинств сподобляетеся, но поне познайте свое заблуждение, приидите с покаянием к Отцу Небесному, да приимет в своя вечныя кровы, взывал еси, святителю Митрофане, полагая душу свою за пасомыя.
Любы николиже отпадает, глаголет Божественный Дух. Истина сия в чудесех любве твоея известися, святителю Митрофане, яко болящим исцеление и скорбящим утешение источаеши, паствы твоея Астраханския украшение.
Имея ревность о славе Божией, святителю Митрофане, вся труды твоя подъял еси во благо Церкве, иже есть Невеста Христова, с благословения Святейшаго Патриарха Тихона прославление Астраханскаго священномученика Иосифа совершил еси. Сего ради и Бог прослави тя и дарова ти дерзновение велие, молися о чтущих святую память твою.
Богородичен: Богородице Владычице, державная Помощнице, укрепи славящую Тя страну на враги, да якоже древле спасла еси Царский град от нахождения поганых, тако и ныне спаси страну Русскую от врагов, от междуусобныя брани, от глада и труса, Дево Неискусобрачная, да Тя вернии с любовию песньми величаем.
Песнь 6
Ирмос: Возопи прообразуя погребение тридневное пророк Иона, в ките моляся: от тли избави мя, Иисусе Царю Сил.
Огненную ревность о исправлении церковнем являл еси в Астраханском пределе, Митрофане святителю, призывая всех к покаянию, темже и днесь подавай Церкви мир, верным утверждение.
Глумления и поругания, имже подвергоша тя гонители твоя, не возмогоша понудити тя в жестокия дни оставити возлюбленную паству, сего ради и явился еси пастырь добрый, полагая душу за овцы Христовы.
Ангели на небеси радуются, человецы на земли духовно торжествуют, память совершающе святителя Митрофана, дивнаго о всех нас молитвенника.
Землю Астраханскую, безбожными гонении нещадно жегомую, слезами и кровьми твоими напоил еси, священномучениче Митрофане, сего ради плоды веры, чада церковная, возрастил еси.
Богородичен: Архангельски воспоим, вернии, Небесный Чертог и Дверь запечатану воистину: радуйся, Еяже ради отрасте нам Спас всех Христос, Жизнодавец и Бог. Низложи, Владычице, мучители, безбожныя враги наша, рукою Твоею, Пречистая, Упование христиан
Кондак, глас 5:
Исповедниче веры православныя, благочестия ревнителю и чистоты, священномучениче отче Митрофане, пастырь добрый и трудолюбивый Материю Церковию явлен был еси, и волков, разорити ю грядущих, не убоявся, душу твою за чада Ея положил еси, злобу диавола Христовою любовию побеждая, темже и нам помози, молим ти ся, в терпении Евангельстем стяжати души наша.
Икос
Красуйся и ликуй, Церковь Русская, торжествуй земле Астраханская, яко благоплодная лоза священнаго страдальца израстившая, добропобедным мучением сердца верных укрепившаго, заповеди Господни исполнившаго и присно Евангельски учившаго: приидите чада, послушайте мене, не убойтеся от убивающих тело, души же не могущих убити. Убойтеся же паче могущаго душу и тело погубити в геенне. Темже, священномучениче Митрофане, моли Христа Бога в терпении Евангельстем стяжати души наша.
Песнь 7
Ирмос: Юноши три в Вавилоне, веление мучителево на буйство преложше, посреде пламени вопияху: благословен ecи, Господи Боже отец наших.
Рекл еси, святителю Митрофане, боящимся Господа: не бойся, малое стадо, яко благоволил есть Отец Небесный даровати нам одоление врагов веры православныя. Тако веровал еси и тако по вере восприял еси. И се Святая Церковь радуется и благословляет Господа во вся веки.
Увы нам, увы, вопиял еси, священномучениче Митрофане, видяще, яко безумнии богоборцы святыни земли нашея разориша, обители яко узилища темничная содеяша, храмы Божия в скверная и позорищная места обратиша и кровь христианскую в них пролияша. Сего ради опустошишася сердца нечестивых и живот их аду приближися, не ведуще пети: благословен еси, Господи Боже отец наших.
Словеса премудра, о еже не леты, но деяньми благими полнота жития человеческаго пред Богом измеряется, на тебе исполнишася, святителю Митрофане, темже душу добродетельми обогащенну имея, на путь исповедничества уготовал еси ю, идеже вся мужественно за Христа и Церковь претерпевая, взывал еси: благословен еси, Господи, Боже отец наших.
Плач, стенание и горе великое, грядущее на Церковь Русскую прозрел еси, священномучениче Митрофане. Обаче Христовою любовию укрепляемь, мужественно взывал еси: благословен еси, Боже отец наших.
Богородичен: Радуйся, благодатная Богородице Дево, прилежно вопием Ти, Владычице, избави нас от плена греховнаго и всякаго прилога вражия, сохрани от злых человек, возстающих на ны, на Тебе крепце надеемся, и пред враги нашими хвалимся, Ты бо еси Заступница рода христианскаго.
Песнь 8
Ирмос: Избавителю всех Всесильне, посреде пламене благочествовавшыя, снизшед оросил ecи, и научил ecи пети: вся дела благословите, пойте Господа.
Ангели на небесех радуются и земнии ликовствуют: ныне время торжества, ныне радость духовная явися: в юбилей великий Рождества Христова Церковь Русская прославляет сонм новомученик за веру Православную умученных. Возвеселимся убо и мы, христоименитии людие, прославляюще царя Николая со всеми царственными и прочими мученики и священномученика Митрофана, архипастыря Астраханскаго, радостно воспевающе: вся дела благословите, пойте Господа.
Вси в песнех духовных воспоим в благочестии просияшаго святителя Митрофана, егоже Церковь воспита, к нему взываем: моли человеколюбца Бога, да возведет от тли живот наш.
О, святителю Митрофане, моли Господа и Пречистую Его Матерь даровати всем нам силу Господа от всея души и всего сердца любити и имя Его Пречистое славити, и воспевати во вся веки.
Страстию озлобления обуреваемии, злочестивии людие смерти лютей предаша тя, таже телеси твоему глумляхуся и честному погребению его претяху, обаче не имеяху власти над душею твоею, непобедимый страдальче, оставлени быша тщи во злобе своей.
Богородичен: Лютыми недуги и болезненными страстьми истязаему, Дево, Ты ми помози, исцелений бо неоскудное Тя знаю сокровище, Пренепорочная, неиждиваемое.
Песнь 9
Ирмос: Рождество Твое нетленно явися: Бог из боку Твоею пройде, яко Плотоносец явися на земли, и с человеки поживе. Тя, Богородице, тем вcи величаем.
Апостолов преемника, святителей сопрестольника, преподобных сожителя прославляет тя, священномучениче Митрофане, паства твоя Могилевская, тобою просвещенная пети Господу и Пречистую Матерь Его величати.
В темнице томящуся ти, святителю, о Церкве премного болезновал еси, иерарси бо и священницы нецыи, на стезю Иуды предателя ступиша, злохудожная деяния своя, яко обновления благо нарекоша; и сим паству Российскую в смятение приведоша. Ты же, многострадальне, сих обличал еси деяния, за сие мученическим венцем венчался еси от Подвигоположника Христа Бога нашего.
Новаго и дивнаго попечителя Церкве православныя вемы тя, святителю Митрофане, понеже во исповедании твоем не устрашился еси человеческих прещений и, видя, како плачем и рыданием земля наша огласися, крови святых мученик и исповедник Христовых потоки по ней излияся, храмы Божии осквернишася и попранию предашася, взывал еси: увы мне, земля моя, увы, людие Русстии, Господа забыхом, попечение же о душе николиже имехом, благоволения Божия не обрящем, аще души наша слезами покаяния пред Господем не потщимся очистити.
Утвердися сердце твое в воли Господней, егда ты, святителю Митрофане, веры бронями и щитом благодати, и креста копием вооружився, мучителей прещения не убоялся и, яко первомученик Стефан, убивающим тя рекл еси: Господь да простит вы. И в день памяти Владимирския иконы Богородицы — Покровительницы и Хранительницы града Астрахани — предал еси дух твой в руце Господни.
Богородичен: Юже древле предвозвести Тя пророческое сословие Стамну и Жезл, и Скрижаль. Мы же Тя воспеваем Родительницу Божию и Ходатаицу к Богу, едину Помощницу роду человеческому и Заступницу от всех зол, находящих на ны.
Светилен:
Священномученика Митрофана днесь прославим, память его благочестно почитающе, той бо яко светильник пресветлый просиял есть и образом исповедническаго жития своего ревностному служению Богу люди научает.
Слава, и ныне, Богородичен:
Пресветлая днесь милостивная светлость, Божия благодать, вся радостно одождяет небесными тучами, на стези сладкия направляющи, Богородице Владычице, всех, познавших Тя земных, Приснодево, ныне бо вся земля Русская радуется, верою Тя славящи.
На хвалитех стихиры, глас 4:
Приидите, ублажим пастыря добраго земли нашея, за веру православную вся претерпевшаго и душу свою положившаго, и ныне милостию Божиею чудотворца, явленнаго во утверждение веры немощствующих и во упокоение озлобленных грехи многими, да вси возрадуемся, и поем ему: радуйся, любы, нас согревающая, радуйся сило, нас исцеляющая, радуйся, разуме, всех просвещаяй, радуйся, страже, православие наше охраняяй; радуйся, священномучениче Митрофане.
Вере в людех оскудевшей, любви истощившейся, надежде иссякнувшей — попусти Господь бедствия на люди Отечества нашего. Ты же, святителю Митрофане, болезнуя о народе своем, преклоняя колена, молился еси, да к покаянию, Господь призовет паству твою.
Во дни безбожнаго лютаго гонения, восхоте Господь веру людей укрепити подвигом Патриаршаго служения, тебе же, святителю Митрофане, Господь избра, да потрудишися в возстановлении Патриаршества. Мы же, труды твоя ублажающе, благодарение Богу приносим. Той бо пробави милость Свою нам, Тихона блаженнаго, Первоиерарха Церкве Своей постави, да во дни испытаний обрящем в нем образ веры, от наветов вражиих непоколебимый, неложнаго упования на помощь Божию и любовию Христовой исполненный.
Внимайте убо себе, люди Русстии! Пробави бо Господь ныне милость Свою нам, потоки крови мученик иссякоша, пленения от власти безбожных свободихомся, попраныя храмы Божии восстанавливаются — бежим всемерно приражения греховнаго, да не паки гнев Божий наведем на ся, и не будет нам последняя горша первых.
Слава, глас 8:
Кровьми святых мученик Церковь Христова древле утвердися, такожде и во дни твоя, священномучениче Митрофане, во Отечестве нашем яко потоцы водныя, кровь святых мученик пролияся, обаче смотрением Божиим, сия семенем явися, из негоже прозябе благосеннолиственное древо Руси Православныя.
И ныне, Богородичен, глас тойже:
Пречистая Дево Мати благоволила еси святителю Митрофану в день празднования иконы Твоея Владимирския — покровительницы и хранительницы града Астрахани — поприще земнаго пути его скончати и яко избранника Твоего в небесныя чертози вселити. Темже, о Богомати, молитвы святителя Митрофана о страждущей стране Русстей и людех ея к Сыну Твоему и Богу вознеси.
На Литургии:
Блаженны от канона песнь 4-я, 6-я и 9-я.
Тропари и кондаки по Уставу.
Прокимен, глас 7: Ч
естна пред Господем смерть преподобных Его. Стих: Что воздам Господеви о всех, яже воздаде ми.
Апостол к Римляном, зачало 99.
Аллилуиа, глас 6: С
вященницы Твои облекутся в правду, и преподобнии Твои возрадуются. Стих: Бог нам прибежище и сила, Помощник в скорбех, обретших ны зело.
Евангелие от Луки, зачало 106.
Причастен: В
память вечную будет праведник:
Молитва
О, священномучениче и исповедниче Христов Митрофане! Услыши слезныя молитвы чад твоих и воздыхания, сердцем сокрушенным и смиренными приносимыя. Се бо беззаконии омрачихомся и того ради бедами, яко тучами, обложихомся.
Но ты, святе Митрофане, понеси, яко сильный, немощи наша, не отлучайся от нас духом, да не разлучимся в конец от любве Божия.
Призри милостивно на предстоящия и молящияся пред святою иконою твоею и вся прошения их во благое исполни.
Ты пред лицем лютых врагов Христовых Истиннаго Бога дерзновенно исповедал еси даже до смерти, молитвою своею укрепи нас, малодушных, да и мы всегда и всюду противостанем духу безбожия и льсти.
Веруем бо, яко твоих страданий ради за Отечество и люди русския велие дерзновение ко Господу имаши.
Его же умоли со святителем Тихоном, патриархом Всероссийским, да избавит нас многомилостивый Господь в сии наступившия дни от обольщения богомерзкаго и злохитраго антихриста, близ грядущаго, подаст нам крепость и мужество твердаго исповедания имени Божия Святаго, да страха ради диавольскаго не отступим от Спасителя и Искупителя нашего, от святой Его Церкви, но да укрепит нас Господь в Православии и единомыслии даже до смерти исповедати веру нашу.
Многомилостивый Господь да сохранит твоим предстательством в мире и безмятежии страну нашу, да укрепит Святую Церковь нашу Православную, да не оскудеет она истинными пастырьми, добрыми делательми, право правящими слово Евангельския истины, да подаст им ревность о спасении пасомых.
Наипаче же моли Господа сил, да возродится Русская земля святым покаянием и единым сердцем и едиными усты прославит дивнаго во святых своих Бога, в Троице славимаго Отца, и Сына, и Святаго Духа во веки веков. Аминь.
Tags: Минея Дополнительная, богослужебные тексты, служба
Subscribe
  • Post a new comment

    Error

    Anonymous comments are disabled in this journal

    default userpic

    Your IP address will be recorded 

  • 0 comments