Уставщик (ustavschik) wrote,
Уставщик
ustavschik

Category:

Служба священноисповеднику Роману Медведю

Служба святому священноисповеднику Роману (Медведю) пресвитеру, Московскому, во иночестве Иосифу (†1937, память 21 июля и 26 августа) воспроизводится по книге: Житие священноисповедника Романа (Медведя) 1874–1937. Тверь: изд-во «Булат», 2015. Служба на стр. 103 – 119.

Служба священноисповеднику Роману Московскому
На велицей вечерни
На Г
осподи, воззвах: стихиры на 8, глас 2.
Подобен: К
иими похвальными венцы:
Приидите, вернии, / восхвалим исповедника, Романа мужественнаго, / в последняя лета явльшагося, / Христа не отвергшагося / и многая страдания претерпевшаго. / Ныне в раи сладости со святыми пребывающаго // и молящагося о спасении душ наших.
Скорбьми, яко злато в горниле, очистився, / достоин сосуд Святаго Духа явился еси / и силою Божиею козни вражия сокрушил еси, / Романе, исповедниче Христов. / Ныне же Престолу Божию предстоиши // и молишися прилежно о почитающих тя.
Страх Господень, иже есть начало премудрости, / в сердце твоем стяжав, / глаголы жизни вечныя возвещал еси / и многая люди ко Христу привел еси, / отче Романе премудре. / Ныне же, пребывая в Небесных кровех, // молися о почитающих святую память твою.
Слава, глас 6:
Попечение имея о пастве твоей, / яко отец чадолюбивый, / словом и делом наставлял еси ю. / Темже молим тя, / настави нас на путь правый / небовосходною стезею шествовати / и Царствия Небеснаго достигнути, / идеже вкупе с тобою сподобимся / прославляти Отца и Сына и Святаго Духа, // Троицу Единосущную и Нераздельную.
И ныне, Богородичен, глас тойже:
Кто Тебе не ублажит, Пресвятая Дево? / Кто ли не воспоет Твоего Пречистаго Рождества? / Безлетно бо от Отца возсиявый Сын Единородный, / Тойже от Тебе Чистыя пройде, / неизреченно воплощься: / естеством Бог Сый, / и естеством быв Человек нас ради; / не во двою лицу разделяемый, / но во двою естеству неслитно познаваемый. / Того моли, Чистая Всеблаженная, // помиловатися душам нашим.
Вход. Прокимен дне. Чтения три.
Пророчества Исаиина чтение:
Тако глаголет Господь: вси языцы собрашася вкупе, и соберутся князи от них. Кто возвестит сия в них; или яже от начала, кто слышана сотворит вам; да приведут свидетели своя, и оправдятся, и да услышат, и да рекут истину. Будите ми свидетели, и Аз свидетель, глаголет Господь Бог, и Отрок Егоже избрах, да познаете и веруете Ми, и разумеете, яко Аз Есмь: прежде Мене не бысть ин Бог, и по Мне не будет. Аз есмь Бог, и несть разве мене спасаяй. Аз возвестих, и спасох, уничижих, и не бе в вас чуждий. Вы Мне свидетели, и Аз Господь Бог, и еще от начала Аз есмь: и несть от рук Моих избавляяй, сотворю, и кто отвратит то; сице глаголет Господь Бог, избавляяй вас Святый Израилев.
Премудрости Соломоновы чтение:
Праведных души в руце Божией, и не прикоснется их мука. Непщевани быша во очесех безумных умрети, и вменися озлобление исход их. И еже от нас шествие сокрушение, они же суть в мире. Ибо пред лицем человеческим аще и муку приимут, упование их безсмертия исполнение. И вмале наказани бывше, великими благодетельствовани будут, яко Бог искуси я, и обрете их достойны Себе. Яко злато в горниле искуси их, и яко всеплодие жертвенное прият я. И во время посещения их возсияют: и яко искры по стеблию потекут. Судят языком, и обладают людьми, и воцарится Господь в них во веки. Надеющиися Нань разумеют истину, и вернии в любви пребудут Ему: яко благодать и милость в преподобных Его, и посещение во избранных Его.
Премудрости Соломоновы чтение:
Праведницы во веки живут, и в Господе мзда их и попечение их у Вышняго. Сего ради приимут царствие благолепия, и венец доброты от руки Господни, зане десницею покрыет я, и мышцею зашитит их. Приимет всеоружие рвение свое, и вооружит тварь в месть врагом. Облечется в броня правды, и возложит шлем, суд нелицемерен. Приимет щит непобедимый преподобие: поострит же напрасный гнев во оружие: споборет же с ним мир на безумный. Пойдут праволучныя стрелы молниины, и яко благокругла лука облаков, на намерение полетят. И от каменометныя ярости исполнь падут грады, вознегодует на них вода морская, реки же потопят я нагло. Сопротив станет им дух силы и яко вихор развеет их, и опустошит всю землю беззаконие: и злодейство превратит престолы сильных. Слышите убо царие, и разумейте, навыкните судии концев земли. Внушите держащии множества, и гордящиися о народех языков, яко дана есть от Господа держава вам и сила от Вышняго.
Стихиры на литии, глас 1:
Яко странник, на земли пожил еси, / Романе досточудне, / и, ничтоже из привременных имети желая, / Христа, Божию Силу и Божию Премудрость, обрел еси, / Егоже свидетель истинный пред мучители явился еси / и, прошед воды искушения, воспел еси: // помощь моя от Господа, сотворшаго небо и землю.
Отвратив очи от суеты мира / и в путех заповедей Господних непорочно ходив, / глагол Давидов исполнил еси, / блаженне Романе досточудне, / темже, яко пастырь добрый, / паству твою добре упасл еси / и лютыя волки отгнал еси. / Ныне во ограде Небесней пребываеши // с новомученики и исповедники Российскими.
Слава, глас 6:
О верный и добрый слуго Господень, / святе Романе страдальче, / мучения бо претерпев, Небеса наследовал еси, / и, временно пострадав, вечно радуешися, / воистину блажен еси, / тленная бо оставль, нетленная восприял еси, / ныне же со ангелы ликуеши, // прославляя Троицу Единосущную и Нераздельную.
И ныне, Богородичен:
Не имамы дерзновения к Тебе, Христе, / за премногия грехи наша, / но молитвами Богородицы и свяшенноисповедника Романа // милостив буди нам, грешным.
На стиховне стихиры, глас 4.
Подобен: Я
ко добля:
Евангельскому сеятелю уподобився, / слово Божие в сердца людий сеял еси / и напитал еси я пищею присноживотною, / богомудре Романе, отче наш, / от Источника жизни, Христа, Бога нашего, // Егоже славословим во вся веки.
Стих: Проидохом сквозе огнь и воду / и извел еси ны в покой.
Муки душевныя и телесныя подъял еси, / свяшенноисповедниче Романе, / Христа ради Подвигоположника, Спаса нашего, / возлюбившаго мир / и предавшаго Себе на смерть, // Егоже благословим во вся веки.
Стих: Блажени живущии в дому Твоем, / в веки веков восхвалят Тя.
Усладил еси сердца верных / словесы богомудрых учений твоих, / отче Романе приснопамятне, / ныне же, в Небесных кровех водворяяся, / молися ко Святей Троице // в вере, надежди и любви утвердитися нам.
Слава, глас 6:
Надеждею на вечную жизнь укрепляемь, / о телеси твоем небрегл еси, / отче Романе, исповедниче Христов, / и, терпя страдания, радовался еси, // благодарение и славу Богу возсылая.
И ныне, Богородичен, глас тойже:
Творец и Избавитель мой, Пречистая, / Христос Господь, из Твоих ложесн прошед, / в мя оболкийся, / первыя клятвы Адама свободи. / Темже Ти, Всечистая, / яко Божии Матери же и Деве, / воистину вопием немолчно: / радуйся ангельски, радуйся Владычице, / предстательство и покрове, // и спасение душ наших.
Тропарь, глас 4:
Заветы Кронштадтскаго пастыря исполняя, / Христу усердно последовал еси / и, яко отец чадолюбивый, / паству твою, блаженне Романе, добре упасл еси. / Во дни же гонений лютых на Церковь Русскую / твердость во исповедании веры показал еси. / Ныне же, Престолу Божию предстоя, / молися Господу, усердно молим тя: / Православию в земли нашей утвердитися, / отечеству в мире пребывати // и душам нашим спастися.
На утрени
По 1-м стихословии седален, глас 1:
Яко крин сельный, процветший посреде терния, / явися житие твое посреде нечестиво живущих, святе Романе, / подвигом бо добрым подвизався, течение жизни скончал еси. / Ныне поминай нас во Царствии Небеснем.
Слава, и ныне, Богородичен:
Явилася еси, Владычице Богородице, Дверь, / Еюже сниде в мир Христос Бог наш. / Темже молим Тя: / отверзи нам двери милости Твоея.
По 2-м стихословии седален, глас 2:
Кронштадтскаго пастыря наставника имея, / яко послушливый сын повиновался еси ему, Романе досточудне, / и, якоже той, принесение безкровныя жертвы Христовы во главу пастырскаго служения поставил еси. / Ныне же, вкупе с ним Престолу Божию предстоя и Пасхи вечныя наслаждаяся, / моли о земнем Отечестве твоем и спасении душ наших.
Слава, и ныне, Богородичен:
Волны напастей восташа на ны, Дево, / в нихже люте обуреваеми, бедствуем, / Ты же, о Богомати, простри державную Твою десницу / и из глубины зол в пристанище милости Твоея введи, Владычице.
Величание
Величаем тя, / святый священноисповедниче Романе, / и чтим святую память твою, / ты бо молиши за нас / Христа Бога нашего.
Псалом избранный:
Бог нам Прибежище и Сила.
Господи, воздвигни силу Твою и прииди, во еже спасти ны.
Глаголах о свидениих твоих пред цари и не стыдяхся.
Вси языцы обыдоша мя, и именем Господним противляхся им.
Тебе ради умерщвляемся весь день, вменихомся, яко овцы заколения.
Крепость моя и пением мое Господь, и бысть мне во спасение.
По полиелеи седален, глас 6:
Горняго града Небеснаго Иерусалима взыскуя, / телесныя болезни, темничная заточения и горькия работы / мужественне претерпел еси, страдальче Романе, / памятуя, яко многими скорбьми подобает внити в Царствие Божие. / Помози и нам, угодниче Христов, подвигом добрым подвизатися, / течение жизни достойно скончати, веру соблюсти / и венцем правды от Христа Бога увенчатися.
Слава, и ныне, Богородичен:
Ковчег свят явилася еси, Пресвятая Дево, вместивши невместимаго Бога. / Помози и нам, Всемилостивая Владычице, / покаяние истинное о гресех наших принести и слезами души очистити, / да сподобимся от Бога милости в день судный.
Степенна, 1-й антифон 4-го гласа.
Прокимен, глас 4: Честна пред Господем / смерть преподобных Его.
Стих: Что воздам Господеви о всех, яже воздаде ми?
Евангелие от Луки, зачало 64.
По 50-м псалме стихира, глас 6:
Мужайся, Церковь Христова, / и державствуй над всуе борющими, / Христови бо друзи, / предстояще пред престолом Божиим, / молебнеи руце своя выну простирают / и молитву к Богу о тебе возсылают, / с ними же вкупе и святый Роман исповедник, // земли московския похвала и украшение.
Канон Богородицы со ирмосом на 6 и святаго на 8, глас 6.
Песнь 1
Ирмос: Яко по суху, пешешествовав Израиль / по бездне стопами, / гонителя фараона / видя потопляема, // Богу победную песнь поим, вопияше.
Предивный отче Романе, твердый исповедниче Христов, / помолися Господу Иисусу, да подаст ми разум, / воспети память твою дерзающему.
Божественное разумение от Духа Святаго прием, / евангельская словеса на скрижалех сердца твоего написал еси, богомудре, / и был еси пастырь добрый, / являя верным образ словом, житием, любовию, духом, верою и чистотою.
Яко древо, насажденное при исходищих вод, / на земли процвел еси, Романе досточудне, / и плоды добродетелей терпением твоим возрастил еси. / Ныне же, Престолу Божию предстоя, / помози нам в вере, надежди и любви утвердитися.
Богородичен: Яко же блудный сын, аз, грешный, душу плоти поработив, / но, Боже и Спасе мой, / молитвами Богородицы свободи мя сего плена греховнаго, / яко древле Израиля от работы египетския.
Песнь 3
Ирмос: Несть свят, / якоже Ты, Господи, Боже мой, / вознесый рог верных Твоих, Блаже, / и утвердивый нас на камени // исповедания Твоего.
На камени исповедания утвердив стопы твоя, славне Романе, / безбожных лесть отринул еси / и, темничная заточения претерпев, / веру Христову соблюл еси.
Помазався елеом благодати, славне Романе, / явился еси ратоборец сопротив диавола и аггелов его. / Темже, победив их силою Духа Святаго, / приял еси венец неувядаемый от Десницы Божией во Царствии Небеснем.
Огнем Божественныя ревности возгревся, / попалил еси плевелы бесовския, отче Романе, / и, пшеницу словес Евангельских в сердце твоем возрастив, / Христу сторичный плод принесл еси.
Богородичен: Блаженству девственников не поревновав, аз окаянный, / оскверних ризу крещения своего и удалихся благодати Твоея, Агнче Божий, / молитвами Богородицы даждь ми исправление живота моего.
Седален, глас 3:
Крест на рамена твоя вземь, / мужественне последовал еси Христу, Романе священноисповедниче, / и, не обращся сердцем твоим вспять, / многи скорби и болезни от безбожных претерпел еси. / Ныне же, во славе со всеми святыми пребывая, / поминай нас, память твою благочестно почитающих.
Слава, и ныне, Богородичен:
Оскверних тело и омрачих ум аз, окаянный, / да не низведен буду по грехом моим в преисподняя земли, / молитвами Богородицы, Едине Человеколюбче.
Песнь 4
Ирмос: Христос моя Сила, / Бог и Господь, / честная церковь / боголепно поет, взывающи: // от смысла чиста о Господе празднующи.
Апостольски мертвенность Христову в себе нося, / чашу страданий с терпением до конца испил еси, святе. / Ныне же сияеши во славе Небесней с новомученики и исповедники Российскими.
Розга многоплодная Лозы Христовы явился еси, Романе досточудне, / гроздия бо добродетелей в страданиих и болезнех возрастив, / вино милости нам ныне источаеши и молишися о душах наших.
Христа имея в сердце твоем, / Тому непрестанно молился еси, досточудне, / Егоже силою укрепляемь, от безбожных гонения претерпел еси. / Буди о нас молитвенник теплый, / память твою светло почитающих.
Богородичен: Острупися сердце мое язвами греховными и лежу, яко же прокаженный. / Не презри стенания моя, Богородице, / и спаси мя.
Песнь 5
Ирмос: Божиим светом Твоим, Блаже / утреннюющих Ти души любовию озари, молюся, / Тя ведети, Слове Божий, / истиннаго Бога, // от мрака греховнаго взывающа.
Жертву благоуханную непрестанныя молитвы в сердце твоем Богу приносил еси, / ум горе возводя и трапезы духовныя наслаждаяся. / Во дни же гонений лютых на земли нашей, святе исповедниче, / яко всесожжение богоприятное всего себе Христу принесл еси.
Праведному Иосифу в благодушии и Иову Многострадальному в терпении подражая, отче Романе, / евангельски иго Христово смиренно понесл еси, / сего ради обрел еси покой души твоея.
Боговещанный учитель благочестия и чистоты пастве твоей был еси, святе Романе, / обаче не словом точию, паче житием твоим поучавый ю. / Темже и Христос, яко вернаго Своего раба, тя прослави / и, яко правило веры и образ исповедания, нам яви.
Богородичен: Буди нам Путеводительница, Богородице Дево, / странствующим во временней сей юдоли, / да не уклонимся в распутия греховная, / но, Тобою направляеми, достигнем вечнаго Горняго отечества.
Песнь 6
Ирмос: Житейское море, / воздвизаемое зря / напастей бурею, / к тихому пристанищу Твоему притек, вопию Ти: / возведи от тли живот мой, // Многомилостиве.
Страх Божий основание в сердце твоем положив / и в послушание отцу твоему духовному всего себе предав, / многия добродетели стяжал еси, славне Романе.
Мрежу словесную в житейское море ввергнув, / яко рыбы, многия души уловил еси, славне Романе, / и, яко ловец премудр, от тины страстей и бездны греховныя избавил я еси.
Пастыря Кронштадтскаго ученик быв, отче Романе, / многия духовныя плоды принесл еси Христу. / Ныне же, во Царствии Небеснем пребывая, / помяни и нас, подвиги твоя прославляющия.
Богородичен: Якоже раб в стране чуждей помышляет о отечестве своем, / тако и аз, страстей раб, на Небо взирая, взываю Ти, Богородице: / возьми от мене бремя тяжкое греховное / и свободи от страстей душу мою, / Сыну Твоему всем сердцем и душею работати желающаго.
Кондак, глас 2:
Восхвалим, вернии, / изряднаго во священницех / и славнаго во исповедницех / Романа досточуднаго, / Православия поборника, / благочестия ревнителя, / земли Русския красное прозябение, / града Москвы похвалу и украшение, / иже, страданием Небесе достиг, / тепле молит Христа Бога / спастися душам нашим.
Икос:
Приспе день духовнаго торжества в памяти святаго исповедника Романа, / той бо, во священстве благочестно пожив, / образ верным в терпении и скорбех яви / и венец исповеднический от Господа прият, / темже и похвалами венчается сими:
Радуйся, на путь священства от Кронштадтскаго пастыря наставленный;
радуйся, во мнозех градех и весех веру Христову проповедавый.
Радуйся, за веру Православную пострадати сподобивыйся;
радуйся, мощи твоя, яко дар священный, земли Московстей во утверждение веры оставивый.
Радуйся, Романе, теплый наш заступниче и в скорбех скорый помощниче.
Песнь 7
Ирмос: Росодательну убо пещь / содела Ангел / преподобным отроком, / халдеи же опаляющее / веление Божие / мучителя увеща вопити: // благословен еси, Боже отец наших.
Святителя Тихона верный ученик был еси, святе Романе, / егда во дни юности мудрость духовную во граде Холмстем постигнути восхотел еси. / Темже и при кончине живота твоего / душу твою вкупе с ним за Господа положил еси.
Священства чистыми лучами / от пресветлых звезд, праведных Иоанна Кронштадтскаго и Алексия Московскаго просветился еси, славне. / С ними же вкупе паству Христову добре упасл еси / и к свету невечернему управил еси.
Прохладою духоносных словес твоих, богомудре, / остудил еси пламень мятежа, / егоже нецыи воини на корабли устроиша. / Темже, и огня вечнаго сих избавив, / мир и тишину в сердца их вселил еси.
Богородичен: Почто, душе моя, греху работаеши, / почто страстей плотских раба бываеши, / невозможно бо двема господинома работати, глаголет Писание, / невозможно Господа любити и страстем служити, / но возопий к Богородице, / да умолит о тебе Сына Своего, Христа Бога нашего.
Песнь 8
Ирмос: Из пламене преподобным росу источил еси / и праведнаго жертву водою попалил еси, / вся бо твориши, Христе, токмо еже хотети. // Тя превозносим во вся веки.
Дух мирен стяжав, Романе блаженне, / в уничижении и славе, в темницах и на горьких работах Бога всегда благодарил еси, / яко Подателя всех благ и Спасителя душ наших.
Препоясав, яко воин, чресла твоя истиною, / облеклся еси в броню правды, отче Романе, / веру же Христову, яко щит восприим, / мечем духовным тшетная шатания безбожных посекл еси, / сего ради приял еси венец нетленный.
Подвизався в добром исповедании веры, богомудре Романе, / яко злато, в горниле страданий очишен был еси. / Ныне же, яко звезда пресветлая, сияеши во Царствии Небеснем.
Троичен: В Триех Лицех богословим Тя, Святая Троице, / Отца, и Сына, и Духа Святаго, / Божество Единосущное и Нераздельное.
Песнь 9
Ирмос: Бога / человеком невозможно видети, / на Негоже не смеют чини ангельстии взирати, / Тобою же, Всечистая, явися человеком / Слово воплощенно, / Егоже величающе, // с Небесными вои Тя ублажаем.
Любовию отчею, яко чад твоих, всех нас объемлеши, святе, / и, яко дерзновение ко Господу стяжав, / усердно молиши Его, да спасет души наша.
Закону естества повинуяся, зашел еси яко солнце, священне Романе, / ныне же паки восстал еси в явлении цельбоносных мощей твоих, / яже лобызающе, Христа прославляем.
Житие многотрудное прошед и законно подвизався, чудне Романе, / от Христа приял еси венец нетленный и благоуханный. / Мы же восхваляюще тя и к раце мощей твоих притекающе, / любовию память твою ублажаем.
Богородичен: Все упование мое на Тя возлагаю, Мати Божия, / буди ми Ходатаица пред Сыном Твоим / и Надежда в день лютаго испытания.
Светилен:
Яко луч солнца посреде нощи явися житие твое, святе Романе, / тьму неверия отгоняя и путь во след Христа идущим освещая, / и терпению в скорбех научая. / Моли непрестанно о всех нас.
Слава, и ныне, Богородичен:
Под Твою милость прибегаем, Богородице Дево, / молитв наших не презри в скорбех, / но избави нас от них, / едина Чистая и Благословенная.
На хвалитех стихиры, глас 6.
Подобен: Ч
то вас наречем:
Добродетели многия стяжав в житии твоем, / чистоту, целомудрие и кротость, / милосердие, терпение и веру, / над всеми же сими любовь нелицемерну, / и теми, яко лествицею духовною, / возшел еси к высоте небесней, / святе исповедниче Романе, / ныне же тамо радуешися, // обретый мзду трудов твоих.
Гонению лютому на земли Русстей утвердившуся, / в уныние не пришел еси, / Романе терпеливодушне, / ниже мучителей убоялся еси, / но, верный сын патриарха Тихона явився, / паству Московскую духовне окормлял еси. / Ныне вкупе с ним Престолу Божию предстоиши // и молишися о спасении душ наших.
Божественным Духом просвещаемь, / на гору добродетелей возшел еси, / тишиною и миром духовным сердце твое исполнивый, / многия люди ко Христу привел еси / и, во одежду исповедничества облекся, / достоин Зовущему тя явился еси. / Сего ради обрел еси вечное блаженство, // Романе священне отче наш.
Слава, глас 8:
Тя, всехвальне Романе, / ни скорбь, ни теснота, ни глад, / ниже гонения, ниже раны / возмогоша от Бога разлучити, / но, паче разгоревся к Нему любовию, / истину Христову пред человеки исповедал еси. / Сего ради Господь по словеси Своему // прослави тя во Царствии Небеснем.
И ныне, Богородичен, глас тойже.
Подобен: О,
преславнаго чудесе:
О, преславнаго чудесе! / Небесе и земли Царица, / от святых сродников наших умоляемая, / до ныне землю русскую покрывает / и лика Своего изображении милостивно обогащает. / О, Владычице Державная, / не престани и на будущее время / во утверждение на Руси Православия // милости и чудеса изливати до века. Аминь.
На Литургии
Блаженны от канона, песнь 3-я и 6-я.
Прокимен, глас 7: В
осхвалятся преподобнии во славе / и возрадуются на ложах своих. Стих: Воспойте Господеви песнь нову, хваление Его в церкви преподобных.
Апостол ко Ефесеем, зачало 233.
Аллилуия, глас 6: Б
лажен муж, бояйся Господа, в заповедех Его восхощет зело. Стих: Сильно на земли будет семя его.
Евангелие от Луки, зачало 64.
Причастен: В
память вечную будет праведник, от слуха зла не убоится.
Молитва
О, священная главо, святый священноисповедниче Романе! Ты во дни земнаго жития твоего образ верным словом, житием, любовию, верою, наипаче же терпением в скорбех был еси, и ничтоже возможе тя разлучити от Христа, Егоже всем сердцем возлюбил еси. Ты, огнем святыя ревности по Бозе разжженый, безбожие обличив, явился еси, яко светильник во тьме блуждающим. Сего ради, поминающе подвиги твоя, молим тя: умоли Всешедраго Бога грехов прощение нам даровати. Помози нам в немощех наших: исцели болезни, уврачуй страсти, буди нам ко спасению путевождь, да, молитвенным твоим предстательством покрываеми, достигнем Царствия Небеснаго, идеже ты ныне во славе пребываеши, и тамо сподобимся со всеми святыми прославляти великолепое Имя Святыя Троицы: Отца и Сына и Святаго Духа во веки веков. Аминь.
Tags: Минея Дополнительная, богослужебные тексты, сканированное, служба
Subscribe
  • Post a new comment

    Error

    Anonymous comments are disabled in this journal

    default userpic

    Your IP address will be recorded 

  • 0 comments