Уставщик (ustavschik) wrote,
Уставщик
ustavschik

Category:

Служба святому священномученику Дионисию Щёголеву

К завтрашней памяти свщмч. Дионисия (Щёголева) пресвитера, Чиганакского (†1937) выкладываю в «Уставные заметки» службу ему, составленную клириком г. Одессы протоиереем Андреем Николаиди aka ierokirik совместно с Уставщиком. Служба одобрена в 2015 году Высокопреосвященнейшим Лонгином, митрополитом Саратовским и Вольским, к местноепархиальному употреблению. С житием святого можно ознакомиться на портале «Православие и современность».
В практике Саратовской епархии служба свщмч. Дионисию правится в соединении со службой прпмч. Нифонту и муч. Александру Хвалынским (†1931), чья память также совершается завтра; последование этой службы было составлено теми же авторами. Но мне хотелось бы отдельно отметить св. Дионисия, поскольку это первый святой, прославленный по представлению от Саратовской епархии (на заседании Священного Синода 27 декабря 2000 г.).

Ме́сяца ное́мврия в 10-й день
Свята́го священному́ченика Диони́сия пресви́тера, Чигана́кскаго, Сара́товскаго
На вече́рни
На Г
о́споди воззва́х: стихи́ры, глас 4:
Свети́льника пресве́тлаго, на высо́цем све́щнице церко́внем возсия́вшаго, / восхва́лим ны́не Диони́сия пресла́внаго, / тьму безбо́жия по́двигом свои́м посра́мившаго / и ко спасе́нию путь мно́гим све́тло яви́вшаго. / Те́мже со умиле́нием вопие́м ему́: / му́чениче досточу́дный, свиде́телю и́стинный, // моли́ Христа́ Бо́га спасти́ся всем нам.
Свяще́нниче и му́чениче, пропове́дниче сладкогла́сный, / Диони́сие всеблаже́нне, / по́двигом сугу́бым подвиза́лся еси́ / и сего́ ра́ди вене́ц сугу́б от Бо́га прия́ти сподо́бился еси́, / я́ко па́стырь и́стинный и страстоте́рпец пресла́вный, / те́мже сугу́бую моли́тву вознеси́ ко Го́споду / о всех, по́двиги твоя́ воспева́ющих // и па́мять твою́ соверша́ющих све́тло.
Пе́щь о́гненную искуше́ний, / огне́м неи́стовства разжже́нную, / то́ками крове́й твои́х угаси́л еси́, прему́дре, / и посреде́ пла́мене гоне́ний, я́ко посреде́ све́тлаго хра́ма, / моли́тву вся́ческих благ Пода́телю / непреста́нно возноси́л еси́, Диони́сие, о́тче наш, / Его́же моли́ искуше́ний и собла́знов изба́вити нас, // па́мять твою́ благоче́стно воспева́ющих.
Слава, глас 2:
Адама́нте ве́ры, о́тче пресла́вне Диони́сие, / кто возмо́жет твоя́ по́двиги пове́дати / и воспе́ти дерзне́т во муче́ниях терпе́ние, / вся́кое бо кова́рство вра́жие превозмо́гл еси́, / вся́кое низве́ргл еси́ ухищре́ние сатанино́. / Те́мже, тя воспева́юще, вопие́м: // моли́ спасти́ся душа́м на́шим.
И ны́не, Богоро́дичен.
На стихо́вне стихи́ры Окто́иха.
Сла́ва, глас 6:
Тро́ицу воспои́м, вси ве́рнии, Живопода́тельную, / Сы́на со Отце́м и Свята́го Ду́ха, / Еди́но Божество́ и неразде́льное Существо́, / во Трие́х Ипоста́сех при́сно прославля́емое / и Триеди́ному во умиле́нии воззове́м: / сла́ва, хвала́, благодаре́ние и честь / венча́вшему му́ченики венце́м нетле́нным, // ди́вному во святы́х Свои́х Еди́ному Многоми́лостивому.
И ны́не, Богоро́дичен, глас то́йже:
Ко Всеми́лостивей Цари́це Богоро́дице ны́не вси возопии́м, / хва́ляще Ея́ предста́тельство за ны ко Го́споду, / Та бо ма́терски дерза́ет умоля́ти за мно́го прегреши́вшия // и от бед избавля́ти рабы́ Своя́.
Тропа́рь, глас 1:
Ри́зы твоя́ кровьми́ убели́в, / Престо́лу А́гнчу предстои́ши днесь, / о́тче Диони́сие, уго́дниче Христо́в, / сего́ ра́ди мо́лим тя ны́не, ча́да твоя́: / проле́й моли́тву твою́ за ны ко Го́споду, // о спасе́нии на́шем хода́тайствуя.
На у́трени
Кано́н, глас 7,
его́же краестро́чие: Д
иони́сию пе́ние, му́ченику и пресви́теру.
Песнь 1
Ирмо́с: Ма́нием Твои́м на земны́й о́браз преложи́ся / пре́жде удоборазлива́емое водно́е естество́, Го́споди. / Те́мже, немо́кренно пешеше́ствовав Изра́иль // пое́т Тебе́ песнь побе́дную.
Ду́ха Твоего́ Всесвята́го благода́ть пода́жь, Го́споди, рабо́м Твои́м, да возмо́жем неосужде́нно воссла́вити Диони́сия свяще́ннаго страда́льца, и́же ны́не в невече́рней сла́ве пое́т Тебе́ песнь побе́дную.
Изра́илю дре́внему подо́бящеся, прииди́те, соста́вим ли́ки и похвалу́ вознесе́м Диони́сию, пресви́теру же и му́ченику пресла́вному, и́же о нас мо́лит при́сно Бо́га, воспева́я Ему́ песнь побе́дную.
Огнезра́чному престо́лу Тро́ицы Пребоже́ственныя предстоя́, Диони́сие, всехва́льне священнострада́льче, ны́не о оте́чествии твое́м моли́тву Бо́гу возно́сиши, воспева́я Ему́ песнь побе́дную.
Богоро́дичен: Небе́снаго Царя́ Ма́ти Всесвята́я, Богоро́дице Влады́чице, не оста́ви ны си́ры, но моли́твами Твои́ми от вся́каго зла сохрани́ и сподо́би Сы́ну Твоему́ при́сно возсыла́ти песнь побе́дную.
Песнь 3
Ирмо́с: На вода́х зе́млю основа́вый, / Сло́ве Христе́ Бо́же, // и на́ша сердца́ сла́вити Тя утверди́.
И́стины ве́чныя вои́стину служи́тель пресла́вный яви́лся еси́ и овца́м па́жити церко́вныя па́стырь до́брый, ду́шу твою́ за ча́да твоя́ преда́вый, нас же во Правосла́вии моли́твами твои́ми утверди́.
Свяще́нствуеши вои́стину, па́стырю и́стинный, и от волко́в душехи́щных ста́до твое́ соблюда́еши и предста́тельством твои́м всю па́ству твою́ во и́стинней ве́ре утвержда́еши.
Иису́са Го́спода ку́пно со Отце́м Безнача́льным и Ду́хом Единосу́щным при́сно моли́, Диони́сие пресла́вне, ми́ром оте́чествие на́ше огради́ти и во и́стинней ве́ре вся утверди́ти.
Богоро́дичен: Ю́же а́нгели славосло́вят я́ко Небесе́ и земли́ Цари́цу, Сию́ при́сно мо́лим, да Покро́вом Свои́м огради́т зе́млю на́шу и во Правосла́вии утверди́т.
Седа́лен, глас 4:
Па́мять пра́веднаго с похвала́ми, / прииди́те, воспои́м велеле́пно и просла́вим / Диони́сия, пресви́тера же и му́ченика, / и сему́ усе́рдно возопии́м: / о́тче наш досточу́дне, не оста́ви си́рых чад твои́х, / но моли́твами твои́ми заступи́ / и от вся́каго зла изба́ви нас, всехва́льне.
Сла́ва, глас 5:
Я́ко фи́никс процве́л еси́ доброде́тельми / и я́ко кедр превозне́слся еси́ испове́дничеством, / Диони́сие, пресла́вне священному́чениче, / Го́спода при́сно моли́ дарова́ти мир держа́ве на́шей / и от бед изба́вити всех, / тя ны́не прославля́ющих.
И ны́не, Богоро́дичен:
Пое́м и благослови́м Тя, / Де́во Всепе́тая Богоро́дице, / к Тебе́ прибега́ем, находя́щим обстоя́нием, / и велича́ем чудеса́ Твоя́ многоразли́чная, / во умиле́нии взыва́юще: / ми́лостей Твои́х нас при́сно сподо́би.
Песнь 4
Ирмо́с: Услы́шах слух Твой, Го́споди, / я́ко яви́лся еси́ на земли́, / за е́же спасти́ ны, // тем вопие́м : сла́ва си́ле Твое́й, Го́споди.
Па́стырь и́стиннейший и му́ченик вседо́блий явля́ешися, Диони́сие пресла́вне, и па́ству твою́ по́двиги свои́ми наставля́еши при́сно взыва́ти: сла́ва си́ле Твое́й, Го́споди.
Егда́ предста́л еси́ суди́щу непра́ведному, пречу́дне священнострада́льче, тогда́ глаго́лал еси́ в се́рдце твое́м: укрепи́ мя в предстоя́щем по́двизе, Всеми́лостиве, да после́дую Ти, А́гнцу Всепра́ведну, и, вене́ц спасе́ния прии́м, вопию́: сла́ва си́ле Твое́й, Го́споди.
Ни настоя́щая, ни гряду́щая, ни челове́цы, ни а́нгели, ни ина́я ка́я тварь не возмо́жет мя отлучи́ти от любве́ Бо́жия, глаго́лал еси́, о́тче наш Диони́сие, обезу́мевшим судия́м, они́ же не разуме́ша пети: сла́ва си́ле Твое́й, Го́споди.
Богоро́дичен: Ипоста́сную Прему́дрость Христа́ Го́спода в ле́то безму́жно родила́ еси́, Ма́ти Де́во, Сего́ при́сно моли́ ра́зум просвети́ти наш во е́же пе́ти: сла́ва си́ле Твое́й, Го́споди.
Песнь 5
Ирмо́с: Го́споди Бо́же мой, / от но́щи у́треневав, Тебе́ молю́ся: / пода́ждь ми оставле́ние прегреше́ний мои́х / и к све́ту Твои́х повеле́ний // пути́ моя́ напра́ви, молю́ся.
Еле́ем ми́лости Бо́жия ума́стил еси́ се́рдце твое́, Диони́сие достосла́вне, и я́ко ратобо́рец добропобе́дный яви́лся еси́, вся́кое бо кова́рство безбо́жных превозмо́гл еси́ и вене́ц пра́вды восприя́л еси́, моля́ся.
Мраз претерпе́л еси́ и глад, заключе́н сый в стране́ Сиби́рстей, но не отступи́л еси́ от ве́ры правосла́вныя и от служе́ния иере́йскаго, непреста́нно Литурги́ю соверша́я и о па́стве твое́й моля́ся.
У́зы, изгна́ние и поноше́ние претерпе́л еси́ Го́спода ра́ди, Диони́сие пресла́вне, и терпе́нием твои́м просла́вил еси́ И́мя Тро́ицы Присносу́щныя, непреста́нно, я́коже Апо́стол глаго́лет, моля́ся.
Богоро́дичен: Челове́ческому предста́тельству не вве́ри ны, Влады́чице Всеблага́я, но от вся́кия беды́ и ско́рби изми́ ны Твои́ми моли́твами.
Песнь 6
Ирмо́с: Возопи́х, Го́споди, / внегда́ скорбе́ти ми к Тебе́, / и возве́л еси́ живо́т мой, // Многоми́лостиве.
Е́ву прама́терь дре́вле искуси́вый, вся́ческим тща́нием на тя воздви́же вражду́, ты же сего́ человекоуби́йцу иско́ннаго му́жественно препобеди́л еси́, непреста́нно хвалу́ вознося́ Многоми́лостивому.
Неро́на безу́мнаго и Иулиа́на богоотсту́пнаго насле́дницы но́вии возжеле́ша Це́рковь одоле́ти и И́мя Бо́жие забве́нию преда́ти, но ты, о́тче святы́й Диони́сие, тем противобо́рствуя, всех науча́л еси́ сла́вити Еди́наго Многоми́лостиваго.
И́стины ве́чныя свиде́тель яви́лся еси́, о́тче всесла́вне Диони́сие, предстоя́ суди́щу нечести́вому и облича́я безбо́жных безу́мие му́жеством твои́м, сего́ ра́ди венце́м нетле́ния тя венча́ Еди́ный Многоми́лостивый.
Богоро́дичен: Крест претерпе́вый и смерть упраздни́вый Сын Твой ны́не Твоя́ моли́твы прие́млет, и́миже от вся́каго зла избавля́емся и дерзнове́ние обрета́ем прославля́ти Еди́наго Многоми́лостиваго.
Конда́к, глас 4:
Зри́телю та́ин небе́сных соиме́нниче, / зри́ши ны́не Тро́ицу Святу́ю лице́м к лицу́, / по́честь зва́ния го́рняго восприе́мый, / му́ченических крове́й свои́х проли́тием убели́вый ри́зы твоя́. / Ны́не нас, на земли́ чту́щих па́мять твою́, / от бед и зол огради́ предста́тельством твои́м, // о́тче святы́й Диони́сие.
И́кос
Сквозе́ огнь гоне́ния / и во́ду зло́бы безбо́жныя / невре́дно проше́л еси́, / со апо́столом воспева́я: / вся могу́ о укрепля́ющем мя Иису́се. / Те́мже по́двиги твоя́ воспева́юще, вопие́м: / сла́ва Пода́вшему тебе́ кре́пость во страда́ниих; / сла́ва Венча́вшему тя венце́м нетле́ния; / сла́ва Явля́ющему кровь твою́ се́менем ве́ры; / сла́ва Избавля́ющему зе́млю на́шу от вся́кия напа́сти / и всем нам ми́лости Своя́ Да́рующему моли́твами твои́ми, // о́тче святы́й Диони́сие.
Песнь 7
Ирмо́с: В пещи́ су́ще халде́йстей / авраа́мстии о́троцы / ликова́ху со А́нгелом, глаго́люще: // оте́ц на́ших Бо́же, благослове́н еси́.
Уби́йцы су́ще судии́ непра́веднии, тя на смерть за И́мя Христо́во осуди́ша, Диони́сие пресла́вне, ты же страда́ньми от жи́зни вре́менныя к Животу́ нетле́нному восте́кл еси́, воспева́я: оте́ц на́ших Бо́же, благослове́н еси́.
Ископа́ша себе́ ров и я́му и впадо́ша в ня мучи́тели твои́, отче, ты же, крест свой прии́м, Подвигополо́жнику после́довал еси́, взыва́я: оте́ц на́ших Бо́же, благослове́н еси́.
По́двигом твои́м безу́мие безбо́жников посрами́л еси́, ве́ру же правосла́вную укрепи́л еси́ в сердца́х благочести́вых; и нас ны́не науча́еши пе́ти: оте́ц на́ших Бо́же, благослове́н еси́.
Богоро́дичен: Ре́ку собла́знов и искуше́ний мо́ре проходя́ще неврежде́нно моли́твами Твои́ми, Де́во Всепе́тая, Сы́на Твоего́ воспева́ем, глаго́люще: оте́ц на́ших Бо́же, благослове́н еси́.
Песнь 8
Ирмо́с: Вои́стину Су́щаго Бо́га / и всех существа́ Вино́внаго, / Христа́ превозно́сим // и славосло́вим во вся веки.
Еди́ному в житии́ твое́м послужи́л еси́ Бо́гу и Еди́наго в сме́рти твое́й просла́вил еси́ Го́спода, священному́чениче сла́вне, те́мже и вене́ц сла́вы я́ко победи́тель от Него́ прия́ти сподо́бился еси́, и ра́дости ве́чныя прича́стник яви́лся еси́; и ны́не, во оби́телех небе́сных предстоя́, Его́ славосло́виши во вся ве́ки.
Све́та испо́лнился еси́, о́тче, от Присносу́щнаго Све́та облиста́ем, и све́тиши по́двиги твои́ми всем нам, ча́дом твои́м духо́вным, и подвиза́еши Го́споду после́довати и Его́ прославля́ти во вся ве́ки.
Воспева́еши ны́не Го́сподеви песнь но́вую, всем житие́м твои́м Сего́ просла́вивый, и сла́ве невече́рней Ца́рствия Бо́жия причаща́ешися, доброде́тели жития́ увенча́вый кро́ве проли́тием, Диони́сие пресла́вне, и Подвигополо́жника и Спа́са славосло́виши во вся ве́ки.
Богоро́дичен: Ипоста́сныя Прему́дрости селе́ние непоро́чное, Пресвята́я Де́во Всепе́тая, любо́вию Твое́ю нас вразуми́, да Сы́на Твоего́ пое́м и велича́ем во вся ве́ки.
Песнь 9
Ирмо́с: Па́че естества́ Ма́терь и по естеству́ Де́ву, / Еди́ну в жена́х Благослове́нную, // пе́сньми, ве́рнии, Богоро́дицу велича́ем.
Терпя́ потерпе́л еси́ Го́спода и прия́л еси вене́ц сугу́б я́ко иере́й же и му́ченик, Диони́сие священнострада́льче, те́мже, по́двиги твоя воспомина́юще, Ди́внаго во святы́х Свои́х велича́ем.
Еди́н Сый Свят во дво́рех святы́х прие́млет тя, му́чениче и свяще́нниче, и со святы́ми упокоева́ет в по́двизех сла́внаго. Та́мо о нас моли́тву вознеси́, да во ве́ки веко́в с тобо́ю ку́пно возмо́жем во святы́х Свои́х Ди́внаго велича́ти.
Ра́дости ве́чныя прича́стниче блаже́нный, священному́чениче Диони́сие, не оста́ви ны, ча́да твоя́ духо́вная, но, Престо́лу Бо́жию предстоя́, о нас при́сно моли́ся, да и мы с тобо́ю вку́пе возмо́жем во ве́ки веко́в Ди́внаго во святы́х Свои́х велича́ти.
Богоро́дичен: Умири́ на́шу жизнь, Влады́чице Де́во, и от вся́кия беды́ и ско́рби изми́ ны моли́твами Твои́ми, да, искуше́ний избе́гше, возмо́жем купно с Диони́сием пресла́вным Ди́внаго во святы́х Свои́х воспева́ти и велича́ти во ве́ки.
Свети́лен:
Свет сый, Христе́, просвети́ зе́млю Ру́сскую, да тьмы неве́рия отбе́гше, во све́те лица́ Твоего́ по́йдем и о И́мени Твое́м возра́дуемся, Еди́ный прославля́емый во святы́х Твои́х.
Сла́ва, и ны́не, Богоро́дичен:
Де́во Всеми́лостивая Богоро́дице, све́том Сы́на Твоего́ просвети́ рабы́ Твоя́, да мглы нече́стия изба́вльшеся, ра́достно просла́вим Тя, Засту́пницу на́шу Всепе́тую.
На стихо́вне стихи́ры Окто́иха.
Сла́ва, глас 2:
О, безче́стия зло́бы окая́нныя, / на благоче́стие дерзну́вшаго вооружи́тися, / о я́ростного наме́рения люде́й безбо́жных, / возста́вших на Це́рковь Святу́ю! / Ны́не сии́ посра́млены суть / и погубле́ны всечестны́м Кресто́м Христо́вым, / его́же, я́ко меч восприе́м, священному́ченик Диони́сий / страда́ньми во пренебе́сная селе́ния восхо́дит, / и явля́ется лю́дем правосла́вным заступле́ние необори́мое // и моли́твенник пресла́вный о душа́х на́ших.
И ны́не, Богоро́дичен.
На Литурги́и
Блаже́нны от кано́на, песнь 3-я и песнь 6-я.
Проки́мен, глас 4: А́
ще пойду́ посреде́ се́ни сме́ртныя, / не убою́ся зла. Стих: Госпо́дь пасе́т мя и ничто́же мя лиши́т.
Апо́стол к Тимофе́ю, зача́ло 292.
Аллилу́иа, глас 4: Ж
ивы́й в по́мощи Вы́шняго, в кро́ве Бо́га Небе́снаго водвори́тся. Стих: Рече́т Го́сподеви: Засту́пник мой еси́ и Прибе́жище мое́, Бог мой и упова́ю на Него́.
Ева́нгелие от Иоа́нна, зача́ло 52.
Прича́стен: В
па́мять ве́чную бу́дет пра́ведник, от слу́ха зла не убои́тся.
Моли́тва священному́ченику Диони́сию
О па́стырю до́брый, кровь свою́ за Христа́ проли́вый, уго́дниче Христо́в Диони́сие! Во сла́ве го́рней ны́не пребыва́я, преше́дый по́прище земна́го твоего́ жития́, му́ченическим венце́м увенча́нный во Ца́рствии Христо́вом, обита́яй иде́же па́жити святы́х и ме́сто упокое́ния, проле́й ны́не твою́ богоуго́дную моли́тву пред Престо́лом Пресвяты́я и Живонача́льныя Тро́ицы о нас, непотре́бных и гре́шных, зде ны́не на земли́ па́мять твою́ и кончи́ну твою́ му́ченическую ублажа́ющих. Ве́мы, о́тче, я́ко мно́го мо́жет моле́ние твое́ у Го́спода Бо́га, Ему́же ты всем се́рдцем в житии́ послужи́л еси́. Ве́мы та́кожде, я́ко недосто́йни есмы́ нарещи́ся ча́да твоя́, оба́че припа́даем ти и вопие́м: умилосе́рдися, уго́дниче Христо́в, над на́ми, и при́зри на нас, во грехи́ при́сно впа́дающих, утоли́ боле́зни душ на́ших, да́руй нам покая́ние и́стинное. Даждь нам, о́тче, вся я́же ко спасе́нию поле́зная, я́ко да преше́дше земна́го жития́ преде́л, сре́тим тя, и ку́пно с тобо́ю в безконе́чныя ве́ки возсла́вим Пресвяту́ю и Живонача́льную Тро́ицу, Отца́ и Сы́на и Свята́го Ду́ха, во ве́ки веко́в. Ами́нь.
Tags: Минея Дополнительная, богослужебные тексты, моё творчество, святые Саратовской епархии, служба
Subscribe

Recent Posts from This Journal

  • Акафист преподобному Никифору Прокаженному

    С разрешения автора (пожелавшего остаться неназванным) выкладываю в «Уставные заметки» текст новосоставленного акафиста преподобному Никифору…

  • Текущее

    В процессе разбора (ещё не завершённого) одного сетевого архива акафистов (подробнее напишу в akathistos) рубеж в 2400 пройден. Сейчас…

  • Молитва преподобному Максиму Греку

    Текст молитвы преподобному Максиму Греку утверждён к общецерковному богослужебному употреблению решением Священного Синода от 17 июня 2021 года…

  • Post a new comment

    Error

    Anonymous comments are disabled in this journal

    default userpic

    Your IP address will be recorded 

  • 0 comments