Уставщик (ustavschik) wrote,
Уставщик
ustavschik

Служба святым Праотцам, почивающим в Хевроне

Служба святым праотцам Аврааму и Сарре, Исааку и Ревекке, Иакову и Лии, чьи гробницы находятся в городе Хевроне близ Мамврийской дубравы, где святые Авраам и Сарра сподобились явления Пресвятой Троицы, была составлена в 1938 году игуменом Филиппом (Гарднером), на тот момент — членом Русской Духовной Миссии на Святой Земле (РПЦЗ). К сожалению, напечатана была только первая часть службы — малая и великая вечерня, вторая часть (утреня и литургия) так и остались в рукописи, и судьба этой рукописи пока неизвестна. Возможно, что в каком-то из древлехранилищ Русского Зарубежья следы второй половины этой службы всё же обнаружатся. Текст вечерней части службы воспроизводится по публикации в журнале «Святая Земля» (№5, 1939 г., служба на стр. 83 – 88). За бесценную помощь при отыскании этой уникальной публикации я благодарю члена Издательского Совета РПЦЗ протоиерея Петра Перекрестова (Сан-Франциско) и исследователя наследия И. А. Гарднера протоиерея Бориса Даниленко (Москва). Орфография службы оставлена в неприкосновенности, лишь исправлены замеченные опечатки, однако запятые и заглавные буквы расставлены в приближении к правилам, принятым при издании богослужебных текстов «гражданской» азбукой в наши дни.

Служба святымъ Праотцамъ, почивающимъ въ Хевронѣ,
совершаемая 9 октября (или въ иный день)
въ православномъ русскомъ храмѣ въ Хевронѣ у Дуба Мамврійскаго.
Написалъ игуменъ Филиппъ; одобрено Сѵнодомъ Русской Зарубежной Церкви.
Аще изволитъ настоятель, творимъ бдѣніе.
На малѣй вечерни
На Г
осподи, воззвахъ, стихиры, гласъ 6.
Подобенъ: В
се отложше:
Праотцы похвалимъ (дважды).
Р
адуйся отче всѣхъ вѣрныхъ (единожды).
(Писаны на велицѣй вечерни)

Таже стихиру сію, гласъ и подобенъ тойже:
Радуйся, Сарро блаженная, прамати Господа Спаса нашего, обѣтованіе отъ Бога получившая и радощами взыгравшая, слышавши о рожденіи чада отъ тебѣ, сего ради Ісаакъ сынъ твой наречеся, еже есть сказаемо играніе смѣха радости, съ нимже молися, прамати, Хрісту Господу, спастися всѣмъ намъ.
Слава, гласъ тойже:
Троицы откровеніе сподобился еси зрѣти, великій въ патріарсѣхъ Аврааме, егда тріе странники пріялъ еси въ сѣни шатра твоего, и егда со Ангеломъ Великаго Совѣта глаголалъ еси дерзновенно, обѣтованіе благословеннаго наслѣдія пріемля, нынѣ же свѣтомъ Пресущныя Троицы насыщаешися. Моли о чадѣхъ твоихъ, иже умножишася паче песка морскаго, сохранити имъ вѣру непорочну и благочестіе неложно и тако спастися всѣмъ.
И нынѣ, Богородиченъ, гласъ тойже:
Творецъ и Избавитель мой, Пречистая, Хрістосъ Господь изъ твоихъ ложеснъ прошедъ, въ мя оболкійся, первыя клятвы Адама свободи. Тѣмже Ти Всечистая, яко Божіей Матери же и Дѣвѣ воистину, вопіемъ немолчно: радуйся, ангельски, радуйся, Владычице, предстательство и покрове, и спасеніе душъ нашихъ.
На стиховнѣ стихиры, писаны на велицѣй вечерни.
Тропарь писанъ на велицѣй вечерни.
На велицѣй вечерни
На Г
осподи воззвахъ, ставимъ стиховъ 8, и поемъ стихиры, гласъ 6.
Подобенъ: В
се отложше:
Праотцы похвалимъ, Авраама, Ісаака и Іакова, и супружницы ихъ праведныя, праматери вѣрныхъ, Сарру, Ревекку и Лію, здѣ праведно пожившыя, и вѣрою во Обѣтованнаго утверждавшыяся, и благословенный плодъ сѣмене ихъ намъ возрастившыя, Хріста Бога нашего, Егоже молятъ непрестанно о еже спастися намъ.
Радуйся, отче всѣхъ вѣрныхъ, Аврааме всеправеднѣйшій, отъ твоего бо сѣмене прозябе безсѣменно Хрістосъ Господь, о Немъ же благословишася вся племена земная, и мы усыновихомся Богу, Ему же былъ еси рабъ и другъ возлюбленный, сего ради, отче великій Аврааме, молися Хрісту Господу, о еже спастися намъ.
Радуйся, сыне обѣтованія, играніе радости нечаянныя, Ісааче кроткій, прообразъ былъ еси заколенія таинственнаго и спасительнаго, Единороднаго Сына Божія, радуйся, единый наслѣдниче обѣтованія великаго, радуйся, паче надежды рожденный, молися Хрісту Господу, о еже спастися намъ.
Радуйся Іакове, рода благословеннаго умноженнаго начальниче, радуйся, зрителю откровеній преславныхъ, таинство Богоматере предзрѣвый въ сонномъ видѣніи, радуйся, первый, рожденіе Благословеннаго отъ Іуды предрекій, радуйся великій патріарше, молися Хрісту Господу, о еже спастися намъ.
Сарру нынѣ воспоемъ, праматерь Благословенныя въ женахъ, Матере Господа нашего, и матерь всѣхъ вѣрныхъ, супружницу Авраама великаго всеправеднѣйшаго, сія бо сподобися учредити Господа, и обѣтованіе благословеннаго плода получити. Молися, прамати, о чадѣхъ твоихъ Хрісту Господу, о еже спастися намъ.
Ревекку воспомянемъ, мудрую супружницу Ісаакову, сія бо благословеніе Іакову исхити, яко кротчайшему и достойнѣйшему, Богу сіе промыслительно устроившему, во исполненіе обѣтованія великаго. Тѣмже сія молится Хрісту о чадѣхъ своихъ, вѣрующихъ во имя Его.
Лія многоскорбная, обаче многочадная, да почтится нынѣ купно съ праотцы, яко супружница Израилева и матерь Іуды богоотца, отъ него же пріиде чаяніе языковъ, Хрістосъ Богъ нашъ, безъ сѣмене отъ Духа Свята заченшійся отъ кровей Пречистыя Маріи Богоотроковицы: отъ колѣна Іудова бѣ бо сія. Молися, Ліе благословенная, спастися душамъ нашимъ.
О благословенніи праотцы, здѣ почивающіе и здѣ вѣрою пожившыя, наслѣдницы обѣтованія великаго, се нынѣ умножишася чада ваша яко песокъ морскій, и яко звѣзды небесныя, се исполнися обѣтованіе, Благословенный пріиде Хрістосъ, и вся языки совокупи и усынови Отцу Своему Небесному. Тѣмже молитеся Хрісту Господу спастися вѣрнымъ всѣмъ.
Слава, гласъ 8:
Первообѣтованнаго Сѣмене Жены, обѣтованія великаго таинники, праотцы благословенніи, святители Церкве Завѣта Вѣтхаго, зрители откровеній спасительныхъ, патріархи великіе, Аврааме, Ісааче и Іаковѣ, здѣ сокровенно почивающіе въ тѣлеси, душею же на небеси пребываюшіи, молитеся Обѣтованному въ раи Избавителю Хрісту Господу, спасти и просвѣтити души наша.
И нынѣ, Богородиченъ догматикъ, гласъ тойже:
Ц
арь небесный.
Входъ. Прокименъ дне. И чтенія три:
Бытія чтеніе (XVIII, 1 - 14):
Я
вися Богъ Аврааму у дуба мамврійскаго.
Бытія чтеніе (XXII, 1 - 18):
Б
ысть по глаголѣхъ сихъ.
Бытія чтеніе (XLIX, 1 - 3, 8 - 12, 28 - 33):
П
ризва Іаковъ.
На литіи стихиры, гласъ 3:
Пріидите вѣрніи хрістоименитіи людіе, страннолюбія Авраамова насладимся: се учреждаетъ патріархъ трапезу духовную въ сѣни шатра своего, въ немже учреди Безтѣлеснаго и получи обѣтованія сынорожденія, сѣмене благословленнаго; се и древо свидѣтель есть посѣщенія таинственнаго и обѣтованія преславнаго. Блажени горы и холмы сіи, Богошественнымъ посѣщеніемъ благословенніи, блаженно древо сіе, осѣнившее покой Неусыпаемаго и трапезу треблагословенную. Тѣмже радостію воспоемъ Хрісту, молитвами праотца Авраама, егоже отца вѣрныхъ положилъ еси, огради насъ отъ всякаго зла, Церковь твою умножи паче песка морскаго, и всѣхъ насъ ущедри, Хрісте Боже, и спаси насъ.
О, таинственнаго учрежденія, о, дивнаго странствованія, како Великаго Совѣта Ангелъ является возвѣстити радость благовѣствованія великаго, о немже благословятся вся племена земная; блажени есьмы, вѣрніи, стоящіи на мѣстѣ святемъ семъ и осѣняеміи древомъ, подъ нимже вся сія бысть. Возрадуемся же и воспоемъ: се и мы чада авраамова вѣрою есьмы, сонаслѣдницы обѣтованія изрѣченнаго здѣ. Тіи вѣрою во Грядущаго оправдишася, мы же вѣрою во Пришедшаго спасаемся. Емуже вси согласно воспоемъ: молитвами праотца Авраама, егоже отца вѣрующихъ положилъ еси, Хрісте Боже, огради насъ отъ всякаго зла, отъ всякаго озлобленія и соблазна, клеветы же и смущенія, и спаси душы наша.
Вѣрою исшелъ еси отъ родства твоего, и вселился еси въ землю пришельствія твоего, послушливъ бывъ Богу до конца, жертвы благопріятныя приносилъ еси Тому, тѣмже отъ Мелхиседека, царя же и священника Бога Вышняго, таинственное благословеніе пріялъ еси, великій патріарше Аврааме. Вѣры ради твоея посѣти тя Богъ въ сѣни дубравы Мамврійскія, ея же мѣсто сохраняемъ, вѣрніи, почитающе посѣщенія божественнаго. Почитаемъ память твою, Аврааме, отче вѣрныхъ всѣхъ, вкупѣ же и Сарры, благословенныя супружницы твоея, моли Хріста Бога, избавити отъ всякаго зла и даровати намъ велію милость.
Возведите, вѣрніи, окрестъ очи ваша: се древо отъ дубравы Мамврійскія, се градъ Давидовъ Хевронъ, и гробы сокровенные, въ нихже благолѣпно тѣлеса праотцевъ почиваютъ. Здѣ Авраамъ и Сарра, здѣ Ісаакъ и Ревекка, здѣ Іаковъ многочадный и Лія многоскорбная. Нынѣ память ихъ совершающе, воспоимъ вси Хрісту Богу: молитвами праотцевъ святыхъ, ихже удѣлъ есть здѣ, Хрісте Боже, спаси всѣхъ насъ.
Слава, гласъ 3:
Троицы явленіе здѣ бысть древле, егда Авраамъ тріе мужи учреди, якоже бытописатель глаголетъ: въ полудни сѣдя бѣ Авраамъ у дверій сѣни своея, и се тріе мужи стоятъ надъ нимъ. Сей же притекъ поклонися имъ, Владыку Единаго именуя, и позва ихъ подъ сѣнь древа сего егоже нынѣ видимъ, вѣрніи. Таже, трапезу Сарра учреди, и обѣтованіе чадородія благословеннаго сподобися. Таже дерзновенно съ Господомъ великій патріархъ глагола, милосердіе Божіе призывая, яко возлюбленный и вѣрный рабъ. Сего ради молимъ тя, отче треблаженнѣйшій Аврааме: молися въ Троицѣ единому Богу, помиловати ны и призрѣти прегрѣшенія наша, да не до конца погибнемъ.
И нынѣ, Богородиченъ, гласъ тойже:
Благословеннаго сѣмене плодъ благокраснѣйшій, первообѣтованія райскаго исполненіе, праотцевъ и праматерей радованіе, Богородице Дѣво Всенепорочная, мати Благословеннаго и Обѣтованнаго, Помазанника Великаго, Спаса Бога нашего, Егоже моли, Мати Безневѣстная, спасти родъ нашъ и даровати намъ грѣховъ оставленіе.
На стиховнѣ стихиры, гласъ 5:
Радуйся, отцевъ начало, Аврааме, обѣтованія таинниче, вѣры столпе непоколебимый, богоизбранниче дивный, святителю Завѣта Ветхаго, моли Хріста Бога, вкупѣ съ Саррою благословенною, спастися душамъ нашимъ.
Стіхъ: Праведникъ яко финиксъ процвѣтетъ, и яко кедръ иже въ Ливанѣ умножится.
Отъ отечества твоего исшелъ еси, послушая гласа Божія, Аврааме праотче, и во пришельцѣхъ вмѣнился еси въ земли чуждей, послушанія же ради наслѣдникъ всемірный явленъ былъ еси: во всей вселеннѣй чада твоя, иже усыновишася тебѣ вѣрою. О нихъ моли возсіявшаго отъ корене твоего Хріста Бога нашего спастися душамъ нашимъ.
Стихъ. Насажденіи въ дому Господни во дворѣхъ Бога нашего процвѣтутъ.
Пришельствія позналъ еси скорби, Аврааме благословенный, егда во Египтѣ вселился еси, обаче послушалъ еси вѣрою гласа Божія, и не усумнился еси обѣтованія чуднаго, паче надежды и естества даннаго ти. Сего ради благословися имя твое въ роды родовъ. Молися Хрісту Богу съ Саррою благословенною, спастися душамъ нашимъ.
Слава, и нынѣ, гласъ тойже:
Троицы явленіе на семъ мѣстѣ бысть, якоже бытописатель глаголетъ: Господа здѣ праотецъ учреди, Бога въ тріехъ Ипостасѣхъ Единичнѣ покланяемаго, и Сарра пріемля обѣтованіе дѣторожденія радуется, отъ нея же возсія Матерь Бога нашего, Обѣтованнаго Избавителя и Спаса душъ нашихъ, Ему же вси воспоимъ, молитвами праотцевъ и Пречистыя Матере Твоея, Хрісте Боже спаси души наша.
На благословеніи хлѣбовъ, тропарь, гласъ 8:
Праотцы и патріархи великіе нынѣ воспоимъ, здѣ вѣрою пожившіе и сокровенно почивающіи, обѣтованія великаго таинники, отцы вѣрующихъ Хрісту Богу. Отъ сѣмене бо ихъ бысть безъ сѣмене рождшая Спаса нашего. Молитвами праотцевъ и Богородицы, Хрісте Боже, спаси насъ. (Трижды).
Tags: Минея Дополнительная, богослужебные тексты, сканированное, служба
Subscribe

  • Post a new comment

    Error

    Anonymous comments are disabled in this journal

    default userpic

    Your IP address will be recorded 

  • 0 comments