Уставщик (ustavschik) wrote,
Уставщик
ustavschik

Category:

Служба святителю Адоану, епископу Руанскому

Бденная служба святителю Адоану (Уану, Оуэну), епископу Руанскому (†684, память 24 августа) составлена клириком Одесской епархии Украинской Православной Церкви протоиереем Илией Тетерько. Последование публикуется по авторской машинописи, цензурными инстанциями текст не рассматривался.

СЛУЖБА
иже во святых отцу нашему Адоану, епископу Руанскому
НА ВЕЛИЦЕЙ ВЕЧЕРНИ
Б
лажен муж: 1-й антифон.
На Г
осподи, воззвах: стихиры, глас 4:
Приидите, вернии, / с лики ангельскими воспоем / Богоблаженнаго святителя Адоана, / мудре упасшего стадо словесных Христовых овец, / той бо явися сосуд благодати Духа Святаго, // преизливающий милости, любовию его почитающим.
Имея житие Небесно, / от Бога поставлен был еси священствовати воистинну / и приносил еси Ему службы умом чистым. / Труды многи претерпел еси и болезни, блаженне Адоане, / проповедания ради Божественнаго и твердыя истины, / юже твоими словесы утвердил еси, // безумныя обличая явственно.
Православныя веры поборника, / благочестия учителя, / священническаго жития доброе правило, / Руана архипастыря славнаго, / святителей украшение и христиан утешителя, / нищих помощника и питателя, // восхвалим днесь Адоана досточуднаго.
Отца духоноснаго и молитвенника теплейшаго, / богомудраго святителя Адоана, / радующеся, днесь песньми прославим / и, воспоминающе болезни и труды его, / возвеличим преславное заступление / и ходатайство его дерзновенное, / прося душам нашим оставления прегрешений // и Божественныя милости.
Слава, глас 8:
Торжествуй днесь радостно, граде Руане, / ликуй и веселися, Церковь Божия, / празднующи память Адоана Богомудраго, / песньми и пеньми духовными восхваляющи его и вопиющи: / не забуди род свой на земли, отче священнейший, / и всякую душу к тебе притекающую, / но присно моли Христа Бога, // во еже спасти всех нас.
И ныне, Богородичен, глас тойже: Царь Небесный:
Вход. Прокимен дне, и чтения 3.
Притчей чтение (главы 10, 3 и 8):
Память праведнаго с похвалами, и благословение Господне на главе его. Блажен человек, иже обрете премудрость, и смертен, иже уведе разум. Лучше бо сию куповати, нежели злата и сребра сокровища. Честнейшая же есть камений многоценных, все же честное недостойно ея есть. Долгота бо дней и лета живота в деснице ея; в шуйце же ея богатство и слава. От уст ея исходит правда, закон же и милость на языце носит. Послушайте убо мене, о чада, честная бо реку: и блажен человек, иже пути моя сохранит: исходи бо мои, исходи живота, и уготовляется хотение от Господа. Сего ради молю вас, и предлагаю мой глас сыновом человеческим: яко аз, премудрость, устроих совет и разум и смысл аз призвах: мой совет и утверждение, мой разум, моя же крепость. Аз мене любящия люблю, ищущии же мене обрящут благодать. Разумейте убо, незлобивии, коварство, ненаказаннии же, прилагайте сердца. Послушайте мене и паки, честная бо реку, и отверзу от устен правая; яко истине поучится гортань мой, мерзки же предо мною устны лживыя. С правдою вси глаголы уст моих; ничтоже в них стропотно, ниже развращенно. Вся права суть разумевающим и проста обретающим разум. Научаю бо вас истине, да будет о Господе надежда ваша, и исполнитеся Духа.
Притчей чтение (главы 10 и 11):
Уста праведнаго каплют премудрость: язык же неправеднаго погибнет. Устне мужей праведных каплют благодати, уста же нечестивых развращаются. Мерила льстивая мерзость пред Господем: вес же праведный приятен Ему. Идеже аще внидет досаждение, тамо и безчестие: уста же смиренных поучаются премудрости. Совершение правых наставит их, и поползновение отрицающихся упасет их. Не пользуют имения в день ярости, правда же избавит от смерти. Умер праведный, остави раскаяние: наручна же бывает и посмеятельна нечестивых пагуба. Правда непорочнаго исправляет пути, в нечестие же падает неправда. Правда мужей правых избавит их: безсоветием же пленяются беззаконнии. Скончавшуся мужу праведну, не погибнет надежда: похвала же нечестивых погибнет. Праведник от лова убегнет, вместо же его предается нечестивый. Во устех нечестивых сеть гражданом, чувство же праведных благопоспешное. Во благих праведных исправится град, усты же нечестивых раскопается. Ругается гражданом лишенный разума, муж же мудрый безмолвие водит.
Премудрости Соломоновы чтение (глава 4):
Праведник, аще постигнет скончатися, в покои будет. Старость бо честна не многолетна, ниже в числе лет исчитается. Седина же есть мудрость человеком, и возраст старости, житие нескверное. Благоугоден Богови быв, возлюблен бысть, и живый посреде грешник, преставлен бысть. Восхищен бысть, да не злоба изменит разума его, или лесть прельстит душу его. Рачение злобы помрачает добрая, и парение похоти пременяет ум незлобив. Скончався вмале, исполни лета долга. Угодна бо бе Господеви душа его. Сего ради потщася от среды лукавствия. Людие же видевше, и не разумевше, ниже положше в помышлении таковое: яко благодать и милость в преподобных Его, и посещение во избранных Его.
На литии стихиры храма.
Слава, святаго, глас 1:
Иерусалима Горняго жителя, / святых сонма сопричастника, / святителя и чудотворца Адоана возвеличим, / богодаровaнныя мощи его облобызающе, возопим: / моли, блаженне, прилежно Христа Бога // спастися душам нашим.
И ныне, глас тойже:
Богородице Дево, / Всеблаженная Марие, / угль Божества во утробе вмещшая неопально, / рождшая Спаса Христа Господа, / принеси фимиам сладкоуханных молитв Твоих / Сыну Твоему и Богу нашему, / да помилует нас многопрегрешивших // и спасет души наша.
На стиховне стихиры, глас 2.
Подобен: Д
оме Евфрафов:
Дом Духа Святаго / явился еси, досточудне, / благодатию Господнею, / просвещая и наставляя Христову Церковь // словесы Богоразумия.
Стих: Возвеличите Господа со мною / и вознесем имя Его вкупе.
Помаза тя достойно / благодать Святаго Духа, / всеблаженне Адоане, / истины Христовы ради // и нравов твоих ради благости.
Стих: На Тя, Господи, уповах, / да не постыжуся во век.
Земля Французская / веселится о тебе, Адоане, / имея в себе честныя твоя мощи, / и радостно прославляет // милость и чудеса твоя.
Слава, глас тойже:
Троицы вернаго служителя, / Церкве светильника всесветлаго, / Адоана, отца предивнаго, / ныне, в память его сошедшеся, // воспоим любовию.
И ныне, глас тойже:
Пресвятая Мати Божия, / с лики Небесными / молися из Тебе Воплощенному, / Солнцу Правды, Господу, / спасти и просветити души наша.
Тропарь святаго, глас 5:
Святых супруг отрасль пречестную, / Церкви святей благоплодное произрастание, / Евангелия Христова деятельнаго проповедателя, / умирителя враждующих и чудес творца, / Адоана дивнаго радостно восхвалим, / просяще его предстательством // от Господа велия милости.
Слава, и ныне, Богородичен, глас тойже:
Радуйся, двере Господня непроходимая. / Радуйся, стено и покрове притекающих к Тебе. / Радуйся, необуреваемое пристанище и неискусобрачная, / рождшая плотию Творца Твоего и Бога, / молящи не оскудевай от воспевающих, // и кланяющихся рождеству Твоему.
НА УТРЕНИ
На Б
ог Господь: тропарь святаго дважды. Слава, и ныне, Богородичен.
По 1-м стихословии седален, глас 1:
Яко архиерей всечестен / и благочестия поборник, / храмоздатель говейный, / чудотворец всеистиннейший, / святителю Адоане, // моли Христа Бога спастися душам нашим.
Слава, и ныне, Богородичен, глас тойже:
Едина истинная христиан Покровительнице, / всяких лютых обстояний, / бед и скорбей нас избави / и молитвами Твоими спаси души наша.
По 2-м стихословии седален, глас 2:
Служитель быв Христу, всяческих Владыце, / научил еси люди и просветил еси Божественным Крещением, / к разумению сего наставль, отче Адоане чудне: / темже проповедника тя истины вси именуем, // святителя и угодника Христова.
Слава, и ныне, Богородичен, глас тойже:
Устами и сердцем величаем Тя, / Дево Мати: / Ты же, рождшая Бога, // не отрини нас от Твоего заступления.
Величание:
Величаем тя, / святителю отче Адоане, / и чтим святую память твою, / ты бо молиши о нас // Христа Бога нашего.
Избранный псалом:
Лик 1: Услышите сия вси языцы, внушите вси, живущии по вселенней. 2. Уста моя возглаголют премудрость, и поучение сердца моего разум. 1. Приидите, чада, послушайте мене, страху Господню научу вас. 2. Благовестих правду в церкви велицей. 1. Истину Твою и спасение Твое рех. 2. Повем Имя Твое братии моей, посреде церкве воспою Тя. 1. Услышати ми глас хвалы Твоея и поведати вся чудеса Твоя. 2. Господи, возлюбих благолепие дому Твоего, и место селения славы Твоея. 1. Возненавидех церковь лукавнующих, и с нечестивыми не сяду. 2. Яко сохраних пути Господни и не нечествовах от Бога моего. 1. Уста праведнаго поучатся премудрости, и язык его возглаголет суд. 2. Правда Его пребывает в век века. 1. Священницы Твои облекутся правдою, и преподобнии Твои возрадуются. 2. Блажени живущии в дому Твоем, в веки веков восхвалят Тя.
По полиелеи седален, глас 8:
Божественный быв священнопроповедник, / Божественным учением Церковь обогащая, / тайнонаучителю всехвальне Адоане, / Христово вочеловечение изъяснил еси / и многи люди светом Истины просветил еси. / Темже вси чтим верно память твою, // просяще прияти нам от Бога велию милость.
Слава, и ныне, Богородичен, глас тойже:
Тя надежду, прибежище и Предстательницу обретше, вернии, / к Тебе притекаем и прилежно вопием: / помилуй, Богородице, на Тя уповающия / и прегрешений оставление нам испроси / молитвами Твоими, Пречистая.
Таже степенна, 1-й антифон, глас 4.
Прокимен, глас 4: Уста моя возглаголют премудрость, / и поучения сердца моего разум.
Стих: Услышите сия, вси языцы, внушите, вси, живущие по вселенней.
Всякое дыхание: Евангелие от Матфея, зачало 11.
По 50-м псалме стихира, глас 6:
Яко злато чисто, / обретохом честныя твоя мощи, святителю Адоане блаженне, / и сих любовию почитаем, торжествующе радостно, / и Христа, источника чудес, в сих прославляем, // да нас сподобит вечнаго наслаждения.
Канон святому, глас 2,
егоже краегранесие: Д
имитрия и Илии честное приношение.
Песнь 1
Ирмос: Грядите, людие, / поим песнь Христу Богу, / раздельшему море, / и наставльшему люди, яже изведе из работы египетския, // яко прославися.
Дарованием вышним моего разума мрак отжени твоими молитвами, иерарше Христов, яко да воспою, славне, твою священную и светозарную память песньми.
Избра тя благодать, отче Адоане, от утробы матере твоея, поставити тя святителя людем своим, ходатайствовати ко Господу о спасении мира и оставлении невежеств их, блаженне.
Миром добродетелей облагоуханныя святыя мощи твоя, всечестне иерарше Адоане, основание твердое явися граду Руану, и источник чудес приснотекущий, во утверждение веры и благочестия.
Богородичен: Истощивый Себе нас ради, Спасе наш Господи, благословен еси, яко посети и сотвори избавление людем Твоим, и Матерь Твою, Деву Чистую, даровал еси роду нашему неусыпную Молитвенницу, Юже присно боголепно ублажаем с лики святых.
Песнь 3
Ирмос: На камени мя веры утвердив, / разширил еси уста моя на враги моя. / Возвесели бо ся дух мой, внегда пети: / несть свят, якоже Бог наш, // и несть праведен паче Тебе, Господи.
Таин Божиих служитель и делатель быв заповедей Господних, святителю Адоане, сего ради возшед на Небеса, и ныне предстоиши Престолу Владычню, со Ангельскими лики непрестанно воспеваеши: несть праведен паче Тебе, Господи.
Ризою благодати одеян, святителю всечестне, покровом молитв своих осеняй присно паству твою и всю землю Русскую, мощи твоя благоговейно приявшую.
Иже к единому Владыце простертое твое помышление во время служения твоего святительскаго, утешение и облегчение тебе творяше пастырских подвигов твоих, Адоане досточудне.
Богородичен: Яко Бога заченши, Содетеля же и Зиждителя, и Господа, роди Тя вси человечестии, Чистая, ублажают, и безтелесных разумная чиноначалия яко Матерь Божию Тя славят.
Седален, глас 3:
Явился еси, отче, Церкви и граду твоему, якоже другое солнце, озаряя сих молниями Божественных словес твоих, яко ученик Господень, Адоане всечестне.
Слава, и ныне, Богородичен:
Пречистеи Твои руце, Дево Мати, простерши, / покрый уповающия на Тя и к Сыну Твоему зовущия: // всем подаждь, Христе, Твоя милости.
Песнь 4
Ирмос: Пришел еси от Девы, / не ходатай, ни Ангел, / но Сам, Господи, воплощся, / и спасл еси всего мя человека. / Тем зову Ти: // слава силе Твоей, Господи.
Избавитися стаду твоему всякаго озлобления и скорби молися, святителю Адоане, ты бо еси нам спасения надежда непостыдна, упование известно, истина необоримая.
Илии огнеколесничнику подобляяся, отче, ревнуя поревновал еси по Господе Бозе Вседержителе и обтекл еси пределы паствы твоея, научая веровати в Троицу во едином Божестве.
Любовь твоя, отче всехвальне Адоане, излияся на ближния и дальния, и миром покрываше землю твою, таже по успении твоем в чудесех нам источися, славящим твое к Богу восшествие.
Имуще честныя мощи твоя, от нихже исцеления дары приемлем, память твою чтим, святе Адоане, Христа Спаса славяще яко Всемогуща.
Богородичен: Истины светлыми лучами Твоего Сына, Богородице, просвети омраченную мою душу, страстей смущение отжени, Твоими, Чистая, ходатайствы.
Песнь 5
Ирмос: Света подателю и веков Творче, Господи, / во свете Твоих повелений настави нас; // разве бо Тебе иного бога не знаем.
Честныя святыни твоея величия никтоже возможет, святителю, по достоинству поведати. Обаче мы, любовию твоею побеждаеми, прославляем подвиги и чудеса твоя.
Евангелия Твоего, Христе, возвестителя, святителя Адоана день славяще, державу Твою славословим, Господи, грехов оставление просяще и недугов исцеление.
Смиренен сердцем и кроток и всем свят был еси, повелению Христову последствуя, отче наш Адоане, темже вселися в тя Божий Дух и премудрость, еюже просвети нас.
Богородичен:Тя Невесту безневестну и чисто, Чистая, селение Иисусово, святейшую Херувим вемы, Богородице.
Песнь 6
Ирмос: В бездне греховней валяяся, / неизследную милосердия Твоего / призываю бездну: // от тли, Боже, мя возведи.
Нищету, и смирение, и худость, и нестяжательство от души возлюбил еси, отче, человек и славы бегая, но Промыслом Вседетеля на свещник церковный поставлен был еси и просветил еси верных сердца.
Очищенную душу свою скорбию крепкою за люди твоя раздирая, ходатай явился еси за паству пред владыки земными, но паче же молитвенник всеизрядный ко Пресвятей Троице.
Еже к нам Божию смотрению и Христову вочеловечению любовию покланяяся, Богомудре Адоане, обтекл еси грады и веси дальния, назидая люди словесы истинными и чудесы преславными уверяя.
Богородичен: Премилостиваго Слова рождшая, Своею Кровию от тли человеки избавльшаго, милости Твоея, Богородице, сподоби мя.
Кондак, глас 4:
Благаго Бога благий рабе и верный, / винограда прилежный делателю, / добре стадо упасл еси, / и Евангельскими словесы людей твоих напоил еси, / и семя благочестно в них возрастил еси, / и ныне, предстоя Христу, / молися, святителю Адоане, // спасти и просветити души наша.
Икос:
Гроб твой, святителю всечестне, / источник явися, источая исцелений благодати / всегда верою приходящим к мощем твоим, блаженне отче Адоане. / Тем вопием и мы: / молися, святителю всечестне, // спасти и просветити души наша.
Песнь 7
Ирмос: Да преславное рождество Твое, Христе, / еже от Девы прообразиши яве, / неопалимы в пещи отроки сохранил еси, / песньми поющия Тебе: // отцев, Боже, благословен еси.
Разумеим вси Божие предивное смотрение во пренесении святых мощей твоих, отче Адоане, в землю Русскую, имиже отечество наше освятися, граду же, хранящему их, быша во утверждение и людем православным в присное прославление.
Исправно Богу работая и святительскую твою одежду священную носив священно, нечестивыя просветил еси, честный святителю, Единство Несозданно в Триех Лицех, Адоане премудре, проповедал еси.
Нарочитый святый день славныя твоея памяти творяще духовно, тя молим, Богоблаженне иерарше: моли прилежно, Адоане, спастися нам.
Богородичен: Образ Отечь явила еси миру, Богородице Мирие, и Того сияние соприсносущное, Христа Спасителя нашего, Егоже присно моли за люди Твоя.
Песнь 8
Ирмос: Пещь иногда огненная в Вавилоне действа разделяше, / Божиим велением халдеи опаляющая, / верныя же орошающая, поющия: // благословите, вся дела Господня, Господа.
Шатания языков и вельмож тихостию нрава укротил еси, мир Христов и любовь проповедующе, святителю всечестне, и коварствия врага победил еси телесными пощеньми и молитвою сердечною.
Единому Спасу Христу возследуя и добродетельми красуяся, величием подвигов твоих возсиял еси и вся земныя концы озарил еси, богомудре Адоане. И душ наших мрак разжени, да присно Господа величаем.
Недостойными усты воспеваемое тебе малое хваление наше, отче святителю Адоане, не презри, но приими, и всех, прославляющих тя, освяти, бед и напастей, и вечнаго мучения избавитися нам Господа умоли, Егоже с тобою величаем.
Истинная Духа Пресвятаго мироположница, отче, ты показался еси изливанием миродухновенных твоих и мудрых учений, потребляя прелести злосмраднейшую тлю, и благовонствуеши нравом твоим Честную Церковь.
Богородичен: Единаго от Святыя Троицы рождшая, Дево Мария Чистая, возсияй нам свет Того истины и правды, да Тя, Всенепорочная, песньми величаем.
Песнь 9
Ирмос: Безначальна Родителя Сын, Бог и Господь, / воплощься от Девы нам явися, / омраченная просветити, / собрати расточенная: // тем всепетую Богородицу величаем.
Честныя принесл еси дары, благоприятны добродетели твоя, великодаровитому Владыце, избавльшияся от лести ересей тобою, отче преподобне, Зиждителя всех величающия.
Тучами слез твоих страстей угасил еси пламень, и безстрастием Зиждителю послужил еси, и славы лучшия сподобился еси, Адоане, Сего поя и величая присно.
С Вышними ликуя Ангелы, и святыми, и преподобными, о иже верою чтущих тя и восхваляющих, отче Адоане, Благодетеля Господа непрестанно моли.
Богородичен: Глас Тебе архангелов, Пречистая, вопием: радуйся, спасение всех человеков и славных мученик Божественное венчание.
Светилен:
Трисиянному Великому Свету ныне предстоя и в неизреченней светлости со всеми святыми пребывая, святителю всечестне Адоане, помяни всех нас, память твою светоносную совершающих.
Слава, и ныне, Богородичен:
Света Превечнаго родила еси нам, Христа, Бога нашего, Пречистая Дево, избавльшаго весь мир от лести диавола. Темже молим Тя: не престай молящи, да подаст нам милость Свою в День Судный.
На хвалитех стихиры, глас 2:
Божественная благодать духовная помаза тя миром разумным, святителю, / преславному граду Руану первопрестольника, / в немже Богоугодное твое житие / прекрасна тя показа, Богомудре Адоане, / святителей был еси благолепие, / преподобных украшение, // и ныне мир весь просвещаеши чудесными зарями.
Отче священне Адоане, / ты, Бога издетска возлюбив, / возненавидел еси вещное пристрастие / и мира непостоятельное / и, крест Христов восприим, / своему Владыце последовал еси, / плачем и слезами душу очистив свою // и ум весь был еси Боговиднейший.
Добродетельными светлостьми прославися имя твое на земли, / столп и утверждение был еси, отче Адоане, / души верных укрепляя и тьму греховную отгоняя. / Темже, светоносную твою память празднующе днесь, молим: // моли спастися душам нашим.
Житие присно очищено / и скверны несмешено явив, / Христов священ сосуд, премудре, / показался еси на земли, Адоане блаженне. / Сего ради приидоша ныне вернии люди, / припадающе к честным мощем твоим, / просяще от тебе здравия и спасения, // Христа величающе.
Слава, глас 6:
Богоблаженне отче Адоане, / от земли преставився, востекл еси к Небесным, / и в Горних жити селениих сподобился еси, всечестне, / жизнь свою всецело Христу и пастве твоей отдав, / Егоже ныне моли // даровати душам нашим мир и велию милость.
И ныне, глас тойже:
Богородице, Ты еси лоза истинная, / возрастившая нам Плод живота, / Тебе молимся: молися, Владычице, со святыми апостолы // помиловати души наша.
Славословие великое и отпуст.
НА ЛИТУРГИИ
Блаженны от канона святаго, песнь 3-я и 6-я.
Прокимен, глас 1: У
ста моя возглаголют премудрость / и поучение сердца моего разум. Стих: Услышите сия, вси языцы, внушите вси, живущие по вселенней.
Апостол ко Евреем, зачало 335.
Аллилуиа, глас 4: У
ста праведнаго поучатся премудрости, и язык его возглаголет суд. Стих: Праведник, яко финикс, процветет, яко кедр, иже в Ливане, умножится.
Евангелие от Иоанна, зачало 36.
Причастен: В
память вечную будет праведник:
МОЛИТВА
О, великий святителю и пастырю наш добрый, отче священнейший Адоане!
К тебе смиренно припадаем и усердно молимся: яви нам, грешным, любовь твою отеческую и многомощное твое заступление. Испроси предстательством твоим у Всемилостиваго Бога нашего вся яже на пользу душам и телесем нашим, согрешений наших прощение, любовь нелицемерную, ревность о спасении нашем, да благодатию Его Божественною соблюдаеми и спасаеми, славу, благодарение и поклонение возсылаем Отцу и Сыну и Святому Духу, ныне и присно, и во веки веков. Аминь.
Tags: Минея Дополнительная, богослужебные тексты, служба
Subscribe

  • Post a new comment

    Error

    Anonymous comments are disabled in this journal

    default userpic

    Your IP address will be recorded 

  • 8 comments