Уставщик (ustavschik) wrote,
Уставщик
ustavschik

Category:

Служба святым Отцам Всероссийского Поместного Собора (первоначальный текст)

С разрешения автора выкладываю первоначальный (до редактуры в Синодальной богослужебной комиссии и Священном Синоде) текст службы святым Отцам Поместного Собора 1917 – 1918 годов. Служба была составлена в Свято-Тихоновском Православном гуманитарном университете. Текст воспроизводится по авторской машинописи; автор пожелал, чтобы его имя осталось неопубликованным. В связи с ограничением на максимальный размер записи в Живом Журнале окончание утрени и молитвы выложены отдельной записью.

Месяца ноембрия, в 5-й день
Служба святым отцем и братиям,
участником Поместнаго Собора Всероссийскаго,
за Христа пострадавшим
НА МАЛЕЙ ВЕЧЕРНИ
На Г
осподи воззвах: стихиры на 4, глас 4.
Подобен: З
ванный свыше:
Приидите, вернии, / похвалами и песньми увенчаим / мученики, исповедники и преподобныя, / святители и веры учители, / Собора Всероссийскаго трудники, / судьбу гонимых за благочестие разделившия / со всею Церковию Русскою, / безбожными плененною. / Приидите, воспоим подвиги их, / и завет услышим русския святости преемников: / о, чада, храните веру Православную, // в нейже земли нашея утверждение.
Свыше званнии / явити в страждущей стране Российстей / соборнаго разума глас, / народа Божия избранницы, / прекраснейшии благочестиваго братства удове, / ревнителие дела церковнаго, / совесть добру имущии / и в себе носящии благий Христов мир, / исповедницы и мученицы, святостию увенчаннии / у славимаго в Троице Бога нашего, / Того молите // на подвиг веры укрепити души наша.
Церкве Русския печальницы, / собóряне святии показастеся, / егда месту патриаршему пустовати возбранисте, / во храме Богородицы, / идеже биется сердце Руси многострадальныя, / но Богу препоручивше / от триех избрати достойнейша, / и сего панагиями патриархов мучеников украсивше, / древнее благочестие возстависте // благословением соборным.
Светильницы церковнии / явистеся, о богомудрии, / собóряне новомученицы и исповедницы, / со Владимиром святителем в бурю мятежную убиеннии, / со Вениамином от властей безбожных осужденнии, / якоже Петр крепчайший в темницах мучимии, / якоже доблии Кирилл и Агафангел во изгнаниих томимии, / якоже светлый Иларион во стане страданий пожившии, / и во всех тяготах Христа не отвергшиися, / но желание имущии разрешитися и с Ним быти, / Егоже молите // о верою совершающих святую память вашу.
Слава, глас 2:
Верою собранныя во единое стадо Христово / и именем Патриарха Тихона украшенныя, / святыя Земли Русския, в годину гонений пострадавшия / восхвалим песньми, о мучениколюбцы, / заветом бо Патриаршим последовавше, / яко тихоновы ученицы мучимы быша, / и заключение многолетно, и убиение претерпеша. / Сих молитвами да сподобимся и мы // чада быти духовныя новомучеников и исповедников Церкве нашея.
И ныне, малый догматик гласа.
На стиховне стихиры, глас 8.
Подобен: О,
преславнаго чудесе:
О, крепости вашея, / новомученицы и исповедницы! / В темницах бо сердце свое утвердисте / молитвами ко святым Земли Русския. / У рова же могильнаго поставляеми, / воспевасте в клетех души вашея / словеса собрата вашего Афанасия, / велением соборным сложенная: // Русь Святая, храни веру православную!
Стих: Восхвалятся преподобнии во славе, / и возрадуются на ложах своих.
О, чистоты сердца вашего, / новомученицы и исповедницы! / Стяжасте бо в страданиях своих / единомыслие о Церкви в гонениях сущей, / смирением и ревностию раны раскола врачующе, / мудростию же болезнь разделения исцеляюще. / Темже молим вы: / сподобите души наша // глас истины всегда разумети.
Стих: Возношения Божия в гортани их, / и мечи обоюдоостры в руках их.
О, братолюбия вашего, / новомученицы и исповедницы! / Добро бо и красно вкупе братии жити, / вкупе же и умрети за Христа. / Ради жизни собравшеся, по мале идосте на смерть, / научая ны и жизнь устрояти, и смерти не страшитися, / пред разлучением образ братий в сердце печатлеюще, // до сретения во Царствии Небеснем.
Слава, глас тойже:
Пастве всероссийстей завещаху собóряне святии / никогдаже отрекатися гонимых за правду Божию, / но имена их собирати на поминовение усердное; / мы же пред очима диптихи сии имущии, // житию да поучимся новомучеников и исповедников Христовых.
И ныне, глас тойже: Владычице, приими:
Тропари писаны на велицей вечерни.
НА ВЕЛИЦЕЙ ВЕЧЕРНИ
На Г
осподи воззвах: стихиры на 8, глас 1:
Избранный на путь крестный и исповедный / святый Патриарх да восхвалится днесь, / иже с паствою всероссийскою чашу мученичества испи за веру Православную, / воззовем ему: святителю отче наш Тихоне, / прииди и осени благословением небесным // Богом собранныя люди твоя.
Войны и глад и кровавая смута / жребий твой тяжкий, святителю наш! / Ты же, в покаянии путь спасения нам указуя, звал озлобленныя: / возлюбите ближняго своего, // обратитеся ко Господу, и спасетеся.
Взываю к вам, архипастырие и пастырие, / вещал еси, святе Тихоне, Патриарше наш. / Сыны мои и дщери во Христе, спешите с проповедию покаяния, / противостаните врагом Церкви силою веры нашея. / Зовем вы на страдания вместе с собою / святаго апостола словесы: // Кто ны разлучит от любве Божия?
Страдания многая претерпел еси, отче Тихоне: / клеветы, суды, заточения, / предательства лжебратий и угрозы смертныя, / насильства и нападения врагов Церкве Христовы; / но ты пребыл еси мужествен и кроток, вещая: / не ожесточайте сердец ваших, // но возмогайте о Господе!
Ины стихиры, глас 5:
С мученическими днесь похвалами / воспомянем святителя Владимира, / у стен Лавры Киевския во время Собора убиеннаго, / о немже глас плача собóряне вознесоша / в Князь-Владимирстем храме, иже той созда, поминающе / вся за веру во дни горькия пострадавшия, / имже память церковную учиниша, / яко новомучеником и исповедником Российским, // и в чине сем сами послежде прославишася.
Во узах Патриарх наместники себе поставляет, / святители изрядныя Вениамина и Агафангела, / помале же первый на беззаконнем судищи к смерти осуждается, / светом лика своего соузники утешая, / другий же паству призвавый волчий отвергнути глас, / в пределы северныя изгоняется абие, / и оба адаманта сия твердейша / путь един в гонениих нам показуют, // за веру Христову страдание.
Вернии Церкве послушницы даже до смерти, / Петр и Кирилл священномученицы, / святителем Тихоном блюсти Престол Патриарший поставляются, / но един, утвержденный братией паству возглавити, /изгнание улучи и в темнице пребывание неисходное, / вторый же, на Патриаршество тайно избранный, / препровожден бысть от гонителей в пустыню Туруханскую, / и оба за послушание Богу мученичества сподобишася, / Духом Святым научени вся претерпети // единства ради Церкве Русския.
О, собóряне первомученицы, / подвигу Андроника и Гермогена подражателие, / о, рыбари богословцы соловетстии, Илариона сподвижницы, / о, Зырянския, Нарымския и Туруханския земли страдальцы бесчисленнии, / о, жертвы чистыя, со архипастыри упокоившияся / в ровех Бутовских и по всей Земли Русстей! / Имена ваша святителем Афанасием, вся претерпевшим, поминаемая, / ныне на скрижалех начерташася у Палаты Соборныя, // на Небесех же пребывают во веки.
Слава, глас 8:
Царь Небесный, / Божественное Слово и Премудрость, / во узы заключается и ко Кресту пригвождается, / и кто отбегнет пути, Владыкою начертаннаго, / аще хощет быти раб благоразумный? / Темже и вы, о собóряне, новомученицы и исповедницы, / избраннии от людей церковных, яко в добродетелех преизящнии, / во одеяние на земли облекшеся нищеты Христовы, / ныне же на Небеси веселящеся, // моли́теся о чтущих любовию память вашу.
На литии стихира, глас 3:
Глас Святыя Церкве Православныя / посреде Руси разоренныя воззва дерзновенно: / приидите, чада, послушайте отца вашего, / приидите, приимите даннаго вам от Бога предстоятеля, / приидите, видите, како умирает на всяк день, / приидите, словесем того последуйте, / припадите ко Христу и молитеся из глубины души: / сохрани, Господи, на Руси веру Православную, // Святаго Патриарха Тихона и новых мученик молитвами.
И ныне, глас тойже:
Б
ез семене от Божественнаго Духа:
На стиховне стихиры, глас 1.
Подобен: Н
ебесных чинов:
Воли Божия праведный искателю и поборниче, / отче Тихоне, молитвенниче пламенный за Церковь и Землю Русскую, / любве Христовы святый и кроткий подвижниче, / заступниче безстрашный невинно страждущих! / Пророчеств твоих видехом страшное сбытие. // Моли спастися душам нашим.
Простоту, мир и кротость с любовию / возгревал еси в сердце твоем, отче Тихоне, / молитвою тихою ограждал еси стадо Христово // от волков, губящих е.
Светлым облаком страдальцев Христовых, / ихже на подвиг укрепил есть Собор Всероссийский, / Небеса небес освящают нас, / сошедшихся в память святых собóрян во храм, / идеже тии с Патриархом Тихоном воспеваху: // Днесь благодать Святаго Духа нас собра.
Слава, глас 8:
Друзи мои есте, рече Господь учеником Своим, / аще заповеди Моя соблюдете, / храняй бо заповеди пребывает в любви Моей. / Вы же, о собóряне, в темницах и изгнаниих / нищете евангельстей навыкше, / чистоту сердечную и любовь стяжасте. / Сего ради писания ваша / истинное дружество нам являют, / яко братолюбия исполненная, // емуже научити нас усердно молим вы.
И ныне:
О,
преславнаго чудесе, Небесе и земли Царица:
Тропарь святому Патриарху Тихону, глас 3:
В годину тяжкую Богом избранный, / в совершенней святости и любви Бога прославил еси, / во смирении величие, в простоте и кротости силу Божию являя, / положил еси душу за Церковь, за люди своя, / исповедниче святе патриарше Тихоне, / моли Христа Бога, / Емуже сораспялся еси, // и ныне спасти землю Русскую и паству твою.
Тропарь собóрянам новомученицам, глас 6:
Днесь благодать Святаго Духа нас собра,/ прославити отцы Собора Церкве Русския / с Первосвятителем Московским Тихоном,/ иже верныя люди земли нашея / на подвиг исповедания правыя веры благословиша // и страдании своими Церковь нашу прославиша.
НА УТРЕНИ
По 1-м стихословии седален, глас 3.
Подобен: К
расоте девства:
Красоту Православия возлюбивше, / законов ради отеческих подвизатися возжелевше, / от конец Руси стекошася народа церковнаго лучшии, / имже похвалу приносим смиренно, / светильники веры именуем их, / удивляемся ими явленному во страданиях терпению, / ихже благодаряще, сице взываем: // радуйтеся, древних мучеников наследницы.
Слава и ныне, Богородичен:
Милосердному заступлению Твоему / и множеству чудес Твоих / страдальцы во узах сущии удивишася, Дево Богородице, / посреде горьких бед покровом Твоим хранимии, / благодатию Твоею светло утешаеми, / и молитвами яже к Тебе укрепляеми./ Темже и глас ангельский приношаху Ти: // радуйся, Благодатная.
По 2-м стихословии седален, глас 2.
Подобен: Б
лагоутробия сущи:
Благоутробия Божия не разумевше, / людие Российстии от Господа отступиша, / но ты, святый Патриарше наш, возстал еси, взывая святыню Руси хранити, / о нейже день и нощь в молитвах подвизался еси, / темже в память твою сошедшеся, радуйся, вопием ти, // святителю Тихоне, новых мучеников сопричастниче.
Слава и ныне, Богородичен:
Гонимых сущи прибежище, / Церковь Русскую от бед огради, Богородице, / призри на чада Ея Тебе молящаяся, / и благослови дела наша, во славу Божию начинаемая, / на Тя бо уповающе, радуйся, вопием ти, // с наставники нашими, новомученики и исповедники.
Величание Патриарху Тихону:
Величаем тя, / исповедниче святый Патриарше наш Тихоне, / и чтим подвиги и страдания твоя, / яже подъял еси // за Христа, Бога нашего.
Псалом избранный:
Исповемся Тебе, Господи, всем сердцем моим о милости Твоей и истине Твоей.
Господь Помощник мой, на Него упова сердце мое, и исповемся Ему.
Поношения поносящих Ти нападоша на мя.
От бездн земли паки возвел мя еси, ибо аз исповемся Тебе в людех, Господи.
Величание святым:
Величаем вас, / святии новомученицы и исповедницы, на Соборе Всероссийстем потрудившиися, / и чтим честная страдания ваша, / яже за Христа // претерпели есте.
Псалом избранный:
Бог нам Прибежище и Сила.
Господи, воздвигни силу Твою и прииди, во еже спасти ны.
Тебе ради умерщвляемся весь день, вменихомся, яко овцы заколения.
Крепость моя и пение мое Господь и бысть мне во спасение.
По полиелеи седален, глас 8.
Подобен: П
овеленное тайно:
Повеленное во Евангелии начертав в разуме, / в ризы священныя, яко любяй Христа, облеклся еси, святителю Тихоне; / сказуя пастве слово утверждения, / учил еси Церкве ради живота не щадити / и даже до смерти во истинней вере стояти, / юже словом молитвенным и крестным подвигом стяжавше, / с новомученики на Небесех взываеши: // Пресвятая Троице, Боже наш, слава Тебе.
Слава и ныне, Богородичен:
Беззаконное тайно содевающе истязание, / вину небывшую святым подписуют мучителие, / но сокровенная вся яве зрит Господь, / приклонивый снитием к людем Небеса, / и вечною славою свидетели Своя одевает, / Матери Его Пречистей в скорбех вопиющия: / Заступнице наша и надеждо, // радуйся, Невесто Неневестная.
Степенна, 1-й антифон 4-го гласа.
Прокимен, глас 4: Проидохом сквозе огнь и воду, / и извел еси ны в покой.
Стих: Разжегл ны еси, якоже разжизается сребро.
Всякое дыхание: Евангелие от Матфея, зачало 36.
Слава: М
олитвами святителя Тихона и святых собóрян, новомучеников и исповедников:
И ныне: Молитвами Богородицы:
По 50-м псалме стихира, глас 6:
Многострадальнии Руси Святыя молитвенницы, / многи души заблуждшия ко Христу обратившии, / новомученицы, исповедницы и праведницы, / Патриарха Тихона самовидцы и послушницы, / имя того приимшии, яко знамя победное, / лишения и скорби претерпевшии, / молитеся о чтущих верою и любовию // соборную память вашу.
Канон, глас 6
Песнь 1
Ирмос: Жезлом пророка рассечеся / древле море Чермное, / прехождение волн разделяя таинственно / в погибель воинству мучителеву, верным же во спасение, / песнь богокрасную воспевающим: // славно прославися Христос Бог наш.
Надвое бурею рассечеся / Русь Православная, удел святых, / утратиша бо мнози отеческую веру, / темже отпадоша Небеснаго Царствия, / Церковь же мучеников, именем Патриарха Тихона украшенную, // присно прославляет Христос Бог наш.
Бога смотрение утаися / людей, умом помраченных, / узником царственным ругающихся; / егда же слух убиения царева верных достиже, / молитву Патриарх с Собором Всероссийским сотвори, // злодейство обличая с дерзновением.
Церкве Христовы верный сыне, / праведный и прямодушный, святителю Владимире, / твое у Лавры Киевския убиение / начало положи памяти соборней новых мученик, / темже песнь о тебе заупокойна воспевашеся // во храме Владимирстем, тобою созданнем.
Святитель Перми Андроник да почтится, / пылающий огнь веры Христовы, / самодержцу отвержену сострадалец, /паствы усердный учитель, / мученик, в земли еще жив погребенный, // яко клас зрелый и адамант крепчайший.
Андрониково ятие слышавше, / ревностию же о спасении того распалившеся, / повеление соборное потщашася исполнити / святитель Василий Черниговский, мучениколюбец, / Матфей же, пермских пастырей воспитатель, и Алексий, веры поборник; // темже за верность и любовь мученических венцев сподобишася.
Града Саратова в вере утверждение, / Тобольския же паствы избранниче, / России предателей и крамольников безбожных обличителю, / святителю Христов Гермогене, / царственныя юзники крестом благословив пророчески, // смерти мученическия утоплением сподобился еси.
Ревнитель быв благочиния церковнаго, / Афон другий Белую гору показавый, / и сею Уральския пределы осветивый благодатно, / Варлааме пречудне, иноков похвало, / мученический венец прием, // молитвами твоими обитель твою укрепляеши.
Богородичен: Успения Твоего благодатию / чад Твоих собираеши / во имя Христово в России страждущей, / Введением же Твоим во Храм Господень / богоизбранного Патриарха совводиши, от всех воспеваемая, // о Преблагая Мати Бога нашего.
Песнь 3
Ирмос: На твердем веры Твоея камени / помышление утвердив души моея, утверди, Господи: / Тя бо имам, Блаже, // прибежище и утверждение.
Руси благочестие убити желая, / краснаго, тезоименнаго кровопролитию тиранства устроителие / слову грозному Патриарха не внемлют, // но кровь новых мученик бысть Церкве Русския утверждение.
От меча предрек погибель / Святейший Тихон властителем злым, / свободы узником и жизни смертником требует, // яко печальник гонимых и паствы утверждение.
Твое в делех церковных тщание и благонравие видев, / архиерея тя поставляет святитель Тихон, славне Лаврентие, / тебе же гониму без милости, судий неправедных вопрошает: // за кую вину чистаго осудисте на смерть?
Христовы свидетелие и проповедницы / святитель Ефрем с Николаем, муку приемше, радуются на Небеси, / тысящи же верных с ними ныне сликовствуют, // яко заступити отцев своих пред гонители не убояшася.
Помянем, братие, мужество и крепость / Митрофана Астраханского и Платона Ревельского, святителей, / не страдания бегати восхотевших, // но лютых ран мучение и убиение претерпевших.
Христова человеколюбия святии общницы / Тихон Воронежский и Омский Сильвестр явишася: / ов яко пастырь сострадательный и кроткий // ов же яко наставник благочестия неусыпный.
Ревнитель сый древняго чина благолепна, / единства же Церкве Божия поборник, / Симоне, единоверия друже и ходатаю, // дерзновением мученическим уврачуй раны церковныя.
Богородичен: Братоубийство кровавое слышавше, / рекоша нецыи яко безумнии: несть Бог, / попечения Христа и Матере Его не ведуще // о спасении мучимых и всех душ христоименитых вкупе.
Кондак Святому Патриарху Тихону, глас 5:
Служение твое исполнено стона и горя, / священномучениче Тихоне, Патриарше наш, / но был еси правило веры и образ кротости, / побеждая распри и разделения; / силою смирения и любве Христовы противостал еси злобе сатанинстей, / возглавил еси доброе воинство новых мучеников, // Церковь Русскую утвердивших во веки.
Седален святым, глас 4.
Подобен: У
дивися Иосиф:
Ужасошася вернии страданиям вашим, / и внимаша сердцем словесем, во утешение их реченным вами, о, новомученицы: / о вере, страданьми не умаленней, / о истине, за блага земная не продаемей, / и свидетельством вашим, в мучениих обретенным, веровавше, вси взываху: // истина Господня, на Кресте распинаема, во век таяжде пребывает.
Слава и ныне: Удивися Мати Твоя, вышеестественная от Ангела слышавши, / но слагаше в сердце Своем вся глаголы Божественныя, / яже в безсеменнем зачатии, в Рождестве и по Рождестве Твоем: / Симеоном скорбь прореченную, / Тобою же восхождение ко Отцу учеником изъясненное, / и свидетельствует в смерти Твоей, со учеником возлюбленным взывающе: // истина Господня, на Кресте распинаема, во век таяжде пребывает.
Песнь 4
Ирмос: Удивися Твой разум от мене, / услышавшу преславная величия смотрения Твоего, / укрепися же возлюблением Твоего схождения: // Ты бо моея нищеты не отверглся еси.
О, святе Патриарше наш Тихоне, / како достойно ублажим верность тебе сохраншия, / егда твоего отречения требующии лжепастырие от гонителей поставлени быша, // яко властителие в Церкви законнии?
Гладу бывшу в стране, братоубийством умерщвляемей, / пастыри увещавал еси, святителю Тихоне, / молитвою прощение ей у Господа исторгати, // да омыется покаянием и Святыми Тайнами да обновится.
Узилище, суд позорищный, заплевание претерпевый, / предательство, клеветы, судей лукавых изречение смертное, / святителю Петроградский Вениамине, о Церкви и пастве печальниче, // мучеников возлюбивый издетска, к ним причтался еси.
Монашество и священство прияти не убоявыйся / в час испытания Церкве Русския, отче богомудре Сергие, / священномученика же Вениамина быв сподвижник верный, // с сим осуждение неправедное и смерть приял еси.
Светильниче Церкве, Иларионе, / Патриарха Тихона верный споборниче, / крамолы лжеобновителей ревностный обличителю, // похвало Соловецкая, исцели и ныне раны церковныя.
Наставников духовных наследниче, / сокровищница же словес евангельских и учений святоотеческих, / преподобне Алексие, многих мученик воспитателю, // не престай Зосимову пустынь хранити и монашество православное.
Амвросия, старца обители Оптинския не солгася пророчество: / преемник бо его Исаакий самовидец бывает разорения тоя, / и яко от креста своего бежати не восхотевый, // в годину лютую смерти за Христа сподобляется.
Богородичен: Церковь князю мира поработити тщащимся, / даже до уз и смерти противосташа отцы святии, / верность бо Христу паче жизни возлюбиша, // якоже с Богоматерию Кресту предстоящии.
Песнь 5
Ирмос: Свет и мир Твой, Христе, / рабом Твоим подаждь, Блаже: / Ты бо еси всех мир, / и союз любве, Человеколюбче, / Тя познавшим утро светлое, // и Владыку воистинну, и Господа.
Соборное пророческое веление исполняя, / святый Патриарх преемники себе указует, / в тайне завещание храня опасно / даже до времене преставления своего, / и сим показует лжесоборов бегати, // созываемых силою власти безбожныя.
Умирание твое за Церковь Русскую / на всяк день претерпевал еси, Патриарше Тихоне, / обещаньми свободы собратиям твоим / от безбожных искушаемь, / но чист от греха явился еси, // паству от волков соблюдый непорочно.
Во имя правды и достоинства Церкве Русския / житие твое бысть, святителю Кирилле, / смерть же твоя в земли пустынней / мученичество показася за веру православную; / аще и во изгнании многа лета пребыл еси, // но и оттуду собратий твоих утвердил еси на камени веры Христовы.
Лжею и нечестием льстивно обновляющим / веру святую отеческую / противостал еси безбоязненно, святе Агафангеле, / и за сие изгнан был еси, да уведят вернии, / яко время приспе за правду страдати, // а не угождати гонителем Церкве Русския.
О, крепосте несокрушимая, / святителю отче Петре! / Страданием твоим лютым Церковь Русскую от раскола спасл еси, / славою духовною быв имя твое возносящим, / яко верный до смерти Патриарха Тихона послушник, // зову мучителей: сниди со креста, не внемлющий.
О, великая обитель Соловецкая, / колико новомученик в стенах твоих подвиг понесоша и страдание! / От нихже святых собóрян ныне восхвалим: / последняго настоятеля Вениамина, в пустынножительстве злодеи убиеннаго, / архиереи Церкве Русския Евгения и Василия, изгнанники твоя, // еще же протоиерея Михаила и иныя, и в богословцех изрядна мучениколюбца Иоанна.
Колькраты искаху убити тя беззаконнии, / святителю Иоанне, / чистоты православия ревнителю, / раскола хульнаго пензенскаго обличителю, / Латвийских предел молитвенниче, // в нихже мученичества венцем украсился еси.
Богородичен: Службу Божию совершающе / в местех потаенных иже за веру страдальцы, / образ Твой, о Богомати, / яко зеницу ока храняху, / на дщицах и каменех малых писан, исткан на холстех, // рукама ревнителей истины Христовы.
Песнь 6
Ирмос: Зверю бездны предается / пророк Иона, глубине морской, / прообразуя Твое, Слове, тридневное возстание, / тем и взываше: / из глубины преисподния // возведи живот мой, Благоутробне.
В лето тридесять седьмое века горькаго / подписанием трости окровавленныя / велие губительство на Руси бысть, / и ови люди ея насильством умроша, / ови же в горьких работах погибоша: // темже воспомянем тако истребленныя Патриарха Тихона сподвижники.
Древле в коемждо граде Руси / палач едва един обреташеся, / како же в лета гонения безбожнаго / толика тьма душегубец вольных воста? / Како не устрашишася сынове адовы // святыя воины Христовы смерти предати?
Во граде скорбей зельных, / горьких работ, глада, уничижения, / в земли Зырянстей многия муки претерпел еси, / Анатолие, архиерею Одесский, / о нихже с плачем самовидцы послежде поведающе, // верность твою Евангелию свидетельствоваша.
Многа страдания твоя, / архипастырю Александре, / Самарския пределы ныне славят с нами, / в нихже добльственно потрудился еси, / гонимым заступник быв и прибежище, // сего ради смерть приял еси за други своя.
Житием и словесы Христа проповедал еси / в пределех Холмских, Орловских и Смоленских, / мудростию, благостынею и любовию / паству уча и от соблазн ограждая, / темже венец тебе терновен исплетеся, // Серафиме, священномучениче предивный.
Градов России Великия и Малыя проповедницы, / Патриарха же Тихона сынове вернии, / преосвященнии Никодим и Прокопий достойно да почтутся, / подвиг служения архиерейска, / сугубейший подвига, всем верным общаго, // мученичеством усовершиша, яко богомудрии.
Священноисповедника пресвитера Василия почтим, / во изгнании в пределех Архангельских живот скончавша, / священники же Господни прославим, / Илию, сострадальца Фаддею, Тверскому архипастырю, / Константина же, Вологды молитвенника, // убиенныя в годину, исполнену кровей.
Богородичен: Неистов есть, законопреступен / и смерти повинен, / рекоша Сыну Твоему человецы, / Богородительнице Пречистая, / Ты же утешала еси такожде оклеветанныя служители Его, // яко Мати Благоутробная.
Кондак, глас 6:
Иже в годину гонений сошедшияся вкупе отцы / поминаем днесь на месте, идеже тии бяху собрани, / и взирающе на лики святыя их, / яко живым сущим с нами молитвы приносим и почитаем верно, / ихже подвигом мир в Церкви утвердися, // и чада Ея уготовляются на делание во имя Христово.
Икос
Хотяй Христос Господь нас сподвигнути чудне / к памяти усердней святых новомучеников и исповедников, / дом Божий, святителем Владимиром созданный и в гонениих пострадавый, / благолепно возставляет, научая в нем собóрян святых изобразити зрак, / яко да лики их воочию видяще, / поучаемся в повестех деяний славных / и страданий безмерных, / познавающе житие и кончину, / всех Святому Патриарху Тихону последующих, / и имя того в годину гонений приявших, / ихже подвигом мир в Церкви утвердися, // и чада Ея уготовляются на делание во имя Христово.
Песнь 7
Ирмос: Отроцы в Вавилоне древле / во огни не опалишася, / на муки бо дерзнувше за веру отеческую, / в оней непоколеблеми пребыша, / и зрети Господа и пети Тому сподобишася: // Избавителю Боже, благословен еси.
Три тьмы жизней в лета злая отъяты быша, / идеже ныне храм Новомученик Бутовских устроися. / Тии тогда из темницы в темницу последствующе, / птиц пением предрассветным / убиение скорое познаваху, // но верою взываху: Боже, благословен еси.
Саровскаго чудотворца списатель жития, / митрополит тезоименитый, / в старости мастите непощажден со одра болезни емлется; / о сонме новомученик в России пророчествовавый, к сим приобщается, / вскрай рова Бутовскаго приведенный в сердце воспевает: // Избавителю Боже, благословен еси.
За верность Петру святителю опальному / страдания многа претерпел еси, / архипастырю града Владимира, Николае, / темже видение лика твоего верным бысть утверждение: / уготовился бо и не смутился еси за веру смерть прияти, // с насмертники взывая: Боже, благословен еси.
Службы Божия рачитель, / Патриархом Тихоном на путь священства благословенный, / тем добре шествова Сергий пресвитер, посреде гонения лютаго / красотою словес церковных окриляемь, / и к мученичеству достиг, Христу воззва благодарственно: // Избавителю Боже, благословен еси.
В книжней мудрости ум изостривый, / некнижному ученику Петру апостолу подражати потщася / Иоанн, служитель престола Божия, / сердца же глас услышав, зовущий / к самоотвержению, любви и состраданию, / с дерзновением мученическим песнь поет красную: // Христе, Спасе мира, благословен еси.
Сергия преподобнаго послушник от юности, / попечение о сердце Руси, обители Троицкой яко игумен имеяй, / сие до смерти соблюл еси, авво Крониде богомудрый, / о иноцех своих во благоденствии и злоденствии руце молитвенно воздвизая, / с нимиже во Царствии Божии взываеши: // Отче, Сыне и Святый Душе, благословен еси.
Во Америце дальней и в стольном граде Москве / Святителю Тихону вернаго помощника, / Александра пресвитера почтим, / близ гроба патриаршего к мученической кончине призваннаго, / свинцем устреленнаго и огнем сожженнаго, // ныне же поющаго: Боже, благословен еси.
Богородичен: Кто бы возмогл от людей Российских / узы, биения, уничижения претерпети и лютую смерть, / аще Ты не бы предстояла еси коемуждо страждущу, / о Мати Божия, Премилостивая, / скорби и страдания мученическая утоляющи, и научающи пети: // о, Спасителю Христе Боже, благословен еси.
Песнь 8
Ирмос: Преподобнии Твои отроцы / в пещи Херувимы подражаху, / трисвятую песнь воспевающе: / пойте, благословите // и превозносите во вся веки.
Велия страдания претерпели есте / со Отечеством вкупе, / народа церковнаго избранницы, / яко соль Земли Русския, // еяже святость неистленна во веки.
Сердце твое, о Русь, пройде оружие / воев германских, в твои пределы вторгшихся, / сынове же твои, жизнь за тебе положившии, / вкупе со страдальцы, во узах умученными, // Христу песнь нову воспевают во веки.
Исчислил еси дни страданий своих и сострадальцев имена, / суды Божия благословив, святителю Афанасие, / зане во узах сый, святых русских песнословец показался еси, / о новомученицех же почивших молитвенник усердный, // с нимиже упокоивыйся, Бога славиши во вся веки.
В долгих летех юнейший из собóрян / в пещи гонений искушен быв, / яко богомудрый наставник в земли Владимирстей является / Петр, исповедник Великодворский, любве Христовы исполненный, // яже не иссякнет во веки.
Вся по имени помянувше / собóряны, в лике новомученик прославленныя, / о прочих молитвы вознесем Господеви, / ихже безвестны житие и кончины образ, // да милость улучат от Бога, создавшаго веки.
Мощи твоя огнем открышася, / святителю отче Тихоне, Патриарше святый, / но обрящем ли мощи сподвижник многих твоих, / в местех пустых и непроходных погребенных, // ихже память нетленна во веки;
Богородичен: Имже пение надгробное никтоже принесе, / Сама предстала еси, Чистая, с лики ангельскими, / имже беззаконное мучительство безвестну уготови кончину, / сама отверзла еси, Препетая, райския входы, // да царствуют со Христом во веки.
Песнь 9
Ирмос: Словом Слово едина Рождшая, / еретическая уста загради злоречивая. / Ино ново небо, некрадомый рай, Пречистая, // Тя величаем.
В память Патриарха Тихона сошедшеся, вернии, / вся сподвижницы его, иже от собóрян, помянувше, / за радость на месте стояти, идеже тии бяху собрани, // Христа величаем.
Соборов вселенских догматы, / еретическая уста заградивше злоречивая, / сохранили есте в сердцах ваших, собóряне новомученицы, // темже вас величаем.
Святыя Руси собори престаша иногда, / с патриаршеством упразднившеся вкупе, / но глас соборный прозябший, яко крин посреде камене, // в годину бедствий громоподобне возвестися.
Устами пророк, Господи, Израиля наставлей, / людем, пророки избившим, царя поставляеши; / людем же, православнаго царя отвергшим, гонения посылаеши, // да воли Твоея познание покаянием обрящут.
Жизнь Церкве на соборных началех определивше, / послежде же сию гониму видевше, / судом Божиим неспостижимым удивистеся, о собóряне новомученицы, // подвигом Христа возвеличившия.
Нарекли есте прозорливо, о собóряне, / страдальцы за веру яко новомученицы и исповедницы Российстии, / память ежелетную сим определивше, // темже с ними величаетеся.
Отче, Сыне и Душе Всесвятый, / призри с Небесе на Церковь Русскую, / в правой вере в Тя сию соблюди, // да и мы, чада ея, Тя во истине величаем.
Богородичен: Догматы хранити и заветы Христовы творити с любовию / настави нас, Богоневесто Владычице, / да и мы, веру соблюдше непорочно, // Царствия Божия вход улучити возможем.
Светилен:
Свет Отца и Сына, и Духа Святаго / вселися в душах ваших, о собóряне, новомученицы и исповедницы, // и сего ради память вашу с Патриархом Тихоном вкупе прославляем.
Слава и ныне:
Свет Христов всем светит Тобою, Мати Дево, / вселися бо во утробу Твою Слово паче слова, // и сего ради род наш песньми немолчными Тя величает.
Tags: Минея Дополнительная, богослужебные тексты, служба
Subscribe

  • Post a new comment

    Error

    Anonymous comments are disabled in this journal

    default userpic

    Your IP address will be recorded 

  • 3 comments