Уставщик (ustavschik) wrote,
Уставщик
ustavschik

Category:

Служба священномученику Сергию Везенбергскому

К приближающемуся столетию со дня мученичества святого священномученика Сергия Флоринского, пресвитера Везенбергского (Раквереского), выкладываю в «Уставные заметки» бденную службу ему. Машинописный текст службы, составленной протодиаконом Андреем Килиным (г. Димитровград), получен из Рождество-Богородицкого прихода г. Раквере (Эстонская Православная Церковь), где почивают святые мощи новомученика; цензурными инстанциями текст не рассматривался. За помощь в отыскании этой службы благодарю достопочтенного corleiter.

Месяца декабря в 17-й день
Святаго священномученика Сергия Ракверскаго
Вечер
На Г
осподи воззвах: стихиры, глас 2:
Приидите, православных людей множества, / песньми вдохновенными почтим / Царства Небесного всельника, / угодника Божия священномученика Сергия, / усердно к нему взывающе: / радуйся страны Эстонския верное охранение, / града Раквере и храма Пресвятыя Богородицы дивное украшение // и всем христоименитым людем скорое поможение.
Яко воина непобедима, / и пастырем изряднаго поборника, / и подвижника благочестия искусна, / священномученика Сергия приснопамятного в песнех достойно восхвалим: // той бо мучителей посрами.
Иереи Божии / вкупе со архиереем и отцем своим / полунощную песнь Богови во обители Пюхтицстей воспеша, / града Везенберга достигоша, / мощи твоя тамо обретше, / благодарственно воспевающе: // радуйся, священномучениче Сергие, молитвенниче о душах наших.
Слава, глас 1:
Приидите, вси вернии, / восхвалим воинства царя земнаго пастыря добраго, / Царя Христа воина / и к Нему за ны молитвенника теплейша, // священномученика Сергия.
И ныне, Богородичен, глас тойже:
Радуйся, Богородице Дево, / горы Пюхтицкия и церкве Эстонския похвало, / радуйся Пречистая Мати Божия, / радуйся Благодатная, яко с Тобою Господь // и Тебе ради с нами, Присноблаженная.
Вход. Прокимен дне. И чтения три священномученическия.
На литии стихиры святаго, глас 5:
Днесь светло ликует Церковь Эстонская, / прославляя священномученика своего, / и к нему усердно взывает: / укрепи Православие в земли Балтийстей молитвами твоими / и всем чтущим Тя скорбей и напастей избавление даруй // и прощение прегрешений наших испроси.
О, преславный и святый угодниче Христов, / пастырю наш Сергие, / ходатайством твоим у Господа нам, верным чадом твоим, испроси / в вере Православней утверждение, / от ересей и расколов сохранение // и душ от геены спасение.
Слава, глас 1:
Радуйся, граде Раквере, / и веселися о Господе, / ликуй и торжествуй, Церковь Эстонская, / имущи в себе мощи священномученика, / кровьми своими землю нашу освятившаго. / Звезде сей, от Суздаля нам возсиявшей, / вернии, вси воззовем: / отче Сергие, / ты еси отечеству нашему и Церкви утверждение // и всем православным спасение.
И ныне, Богородичен, глас тойже:
Радуйся, Богородице Чистая, / Двере Райская и Церкве Похвало, / не остави людей от горы Пюхтицкия Тобою благословенных, / во тьме неведения пребывающих, // и просвети я светом Сына Твоего.
На стиховне стихиры, глас 6:
Возбранному Воеводе и Господу сил / воинство земное добре приведшему / и по проповеди своея мученичества венец доблестне приявшему, / священномученику пресвитеру Сергию / приидите, вернии, поклонимся и воззовем: / радуйся, священномучениче Сергие, // достоблаженный молитвениче о душах наших.
Стих: Священницы Твоя облекутся в правду / и преподобнии Твои возрадуются.
Пастырю наш добрый, / Богу и Церкве верен был еси даже до смерти. / Темже, зряще тя с лики мучеников предстояща Христу Царю, / любовию вопием Ти: / радуйся, священномучениче Сергие, // достоблаженный молитвениче о душах наших.
Стих: Честна пред Господем / смерть преподобных Его.
Иереев похвало и воинов радование, / приими пение чад твоих, / и молящим ти ся у Христа испроси / на диавола одоление, / да ублажающе тя, присно вопием: / радуйся, священномучениче Сергие, // достоблаженный молитвениче о душах наших.
Слава, глас 4:
Радостию страдание за Христа претерпети изволил еси, / славо Церкве Эстонския, / ныне же со исповедники и новомученики Российскими молишися о нас / и слышиши всегда: // радуйся, священномучениче Сергие, достоблаженный молитвиниче о душах наших.
И ныне, Богородичен, глас тойже:
Призри на моления Твоих раб, Всенепорочная, / и всякия скорби и беды избави землю Эстонскую, / явлением Твоим и кровьми мученик освященную. / Да не постыдимся, Владычице, Тя призывающии, / Ты бо еси нас, чад Церкве Русския, помощь, и покров // и священное прибежище.
Тропарь, глас 4:
Воинства царя земнаго пастырь добрый, / чада своя на подвиги ратныя укрепляя, / живот свой за други и отечество полагати тех назидал еси. / Сам же во граде Везенберге даже до крове за имя Господне пострадавый, / и от Небеснаго Царя венец нетленный приявый, / священномучениче Сергие, // моли Христа Бога спастися душам нашим.
На утрени
На Б
ог Господь: тропарь священномученика дважды.
Слава и ныне, Богородичен.
По 1-м стихословии седален, глас 2:
Во бранех и трясениих смерти не вкусивый, / но и старческих седин не достигнувый, / мудрость стяжал еси и венец приял еси мученичества, / помози и нам Дома Отчего достигнути, // мудре отревая от нас вся прилоги сопротивнаго.
Слава, и ныне, Богородичен, глас тойже:
Слова, из Тебе воплотившегося, познахом, / Мати Божия, / Того моли о спасении всех, // во святем храме Твоем священномученика Сергия воспевающих.
По 2-м стихословии седален, глас 2:
Добродетели твоя ведуще, / людие не убояшася безбожных властей веления / и оставиша тя на месте служения твоего, // да больных и уязвленных телом души исцелиши.
Слава, и ныне, Богородичен, глас тойже:
Пречистая Дево, / со священномучеником Сергием / и всем собором святых Эстонския земли, / моли во святых Своих почивающего Христа, / во еже спасти вся ны, // Тя воспевающия во веки.
Величание:
Величаем тя, / священномучениче, отче наш Сергие, / и чтем честная страдания Твоя, // яже за Христа претерпел еси.
Псалом избранный:
Крепость моя и пение мое Господь / и бысть мне во спасение.
По полиелеи седален, глас 6:
Явися ми милосерд, / яко чаду твоему духовну, / молитвою твоею святе Сергие, // ограждая мя от всякого падения греховнаго.
Слава, и ныне, Богородичен, глас тойже:
Богородице Дево Пречистая, / яже без семени рождши всех Творца, / Того со священномучеником Сергием умоли, / избавити и оградити мя // от всякого падения греховнаго.
Степенна 1-й антифон 4-го гласа.
Прокимен, глас 4: Возвеселится праведник о Господе, / и уповает на Него. Стих: Господь просвещение мое, и Спаситель мой, кого убоюся.
Всякое дыхание: Евангелие от Иоанна, зачало 51.
По 50-м псалме стихира, глас 6:
Пастырю наш дивный, / богатырю духовный, / мужества и любви к Богу проповедание, / за всех неусыпный молитвенниче, / Сергие, священниче и мучениче, / Христу Богу со воины, на брани погибшими за землю родную, / в вечней радости предстоящий! / Молися с ними, с мученики и всеми святыми / и нам вечная благая улучити, // и волю Отца Небесного на земли сотворити.
Каноны Богородицы, глас 8: Колесницегонителя фараона погрузи… со ирмосом на 6, и святаго на 8, глас 4.
Песнь 1
Ирмос: Моря чермную пучину / невлажными стопами / древний пешешествовав Израиль, / крестообразныма Моисеевыми рукама // Амаликову силу в пустыни победил есть.
Даждь ми слово, Слове Божий, / во отверзение уст моих, / и уясни ми язык, Милостиве, / и не помяни грехов моих множества, / да Твоею благодатию наставляем, // возмогу пети священномученика Твого Сергия.
Кровей теченьми, / мысленнаго фараона погрузил еси всевоинство / и, яко святый Божий служитель, / вселился еси, Сергие, / идеже множество мученик и священник // присно веселится.
Никая изящная витийства довлеют, / во еже прославити Тя, святе Сергие, / понеже из млада Христа возлюбил еси / и непостыдно смерть и страдания // за Него претерпел еси.
Дивное чудо, / яко ты, православно Богородицу чтити всех научивый, / днесь по прославлении твоем, / вкупе с Царицею Небесною / и всеми святыми на небеси вечно царствуеши, / на земли же во храме Рождества Владычицы // нетленно почиваеши.
Богородичен: К Тебе усердно притекающе, / заступнице наша и Мати, / мольбу смиренно приносим: / мир подаждь церкви православней / и всем людем спасение испроси, // во граде Нарве Одигидрии образ прославльшая.
Песнь 3
Ирмос: Веселится о Тебе Церковь Твоя, Христе, зовущи: / Ты моя крепость, Господи, // и прибежище и утверждение.
О маловременней и тлеющей славе неберегл еси, / на земли сущим оставив сию, / с воины пребываяй, / Божию любовию уязвился еси, блаженне, / темже, яко воин Христов ныне водворяешися, // идеже праведных селения.
Осужден быв, / за Христа пострадал еси, святе Сергие: / ныне же осужденна мя суща прегрешеньми, / исцели молитвами Твоими, // огорчившаго Господа паче всякаго человека.
Во убиении твоем дивно прославися имя твое, отче Сергие, / и ныне собрася окрест мощей твоих новая чада твоя, // ожидающе от тебе помощи и заступления.
Уведев твою даже до смерти любовь / Владыка Иисус восприят тя / и дарова тя нам заступника граду и стране, / идеже пострадал еси, / ихже сохраняй заступлением твоим присно, // яко да ублажаем тя, отче наш Сергие.
Богородичен: Бога преестественне зачала еси во чреве, Пречистая, / и во граде Нарве честно почитающим Тя / икону Твою от огня невредиму сохранила еси, / ныне, рождши, пребываеши Приснодева, / и, запалением град наш наказавши, // благочестная его Заступница.
Седален, глас 8:
Яко преподобнаго избраннаго тезоименит и подражатель быв, / беды претерпел еси, отче, и искушения вражия. / Ревности подражая пророка Илии, / мужески обличил еси безбожныя. / Яко милоть, тело твое на земли нам оставил еси / и, яко благоухания аромат, изливаеши благодать духовную. / Сергие, священниче и мучениче, / моли Христа Бога // грехов оставление даровати чтущим любовию память святую твою.
Слава, и ныне, Богородичен:
Приидите, вернии вси, / поклонимся чудотворному образу Божия Матере, / и к ней с любовию возопиим: / радуйся, присно воспеваемая, / радуйся, явлением Своим гору Пюхтицкую освятившая, / радуйся, обитель иноческую зде преславно устроившая, / радуйся, источник воды живыя в той открывшая. / Радуйся, Дево Чистая, / руце Свои милостивно к нам простирающая.
Песнь 4
Ирмос: Вознесена Тя видевши Церковь на Кресте, / Солнце праведное, / ста в чине своем, / достойно взывающи: // слава силе Твоей, Господи.
Тя, священномучениче отче наш, песнословим, / радуйся, тебе, Сергие, зовуще: // хранилище всех и ограждение и священное прибежище.
Молитвенниче наш неусыпный, / Живоначальней Троице вкупе с тобою чтимым всероссийским игуменом, / блаженным аввою Сергием, / ныне предстоящя, / молися с ним о всех нас, // любовию сердцем и усты вас величающих.
Христу Иисусу, Агнцу Божию, служити хотя, / приял еси за Него смерть поносну, / и, восходя от земных в Горняя, приял еси венец мученичества, / настави же нас,отче Сергие, / евангельски жительствовати и любити слово Божие, // да внидем и мы в радость Господа своего.
Священномучениче Сергие, / не возгнушайся чада твоего нерадения ради моего, / ниже отступи от мя, тяжких ради беззаконий моих, / но милость от Создателя ми испроси, молящуся: // Милостиве, помилуй мя падшаго.
Богородичен: Радости Божественныя мое сердце исполни, / Радость и Спаса миру порождшая, / во время же оно рекшая: // о Бозе Спасе моем дух мой возрадовася.
Песнь 5
Ирмос: Ты, Господи мой, Свет / в мир пришел еси, / Свет Святый, обращаяй из мрачна неведения, // верою воспевающия Тя.
Не служу демоном, ни устрашаюся смерти, ни мук различных, / — священномученик взываше Сергий, — / Сына, Отцу Собезначальна и Духу, исповедую, / священник бо есмь, / и Богу Слову пою: // на стези свидетельств Твоих, Христе, утверди мене.
Посреде судища безбожных, святе Сергие, / радуяся, воскликнул еси: // Господи Боже наш, слава Тебе!
Просветися лице Твое, / егда на судище беззаконных вину свою сам поставил еси, / рек: священник бо Божий аз есмь, // и сердце твое веселия о Господе исполнися.
Тебе, Господи мой, люблю / и, Тебе ища, мучения зрака не ужасаюся / — велиим гласом священномученик Сергий воспеваше, // егда на убиение его безбожныя уготовляху.
Богородичен: Пред чудной иконой явления Твоего / великий пастырь кронштадтский молися, / и ныне обстоят ю чада церкве Эстонския, / просяще от Тебе, Богомати, // великия и богатыя милости.
Песнь 6
Ирмос: Пожру Ти со гласом хваления, Господи, / Церковь вопиет Ти, / от бесовския крове очищшися, / ради милости от ребр Твоих // истекшею Кровию.
Да заградятся уста безбожных / мощей нетления убиеннаго священномученика доброты // не могуще зрети.
Да узрят мнозии страны нашея людии / молитвами Твоими, святе Сергие, / Свет Христов, просвещающий во тьме безбожия // и беззакония пребывающия.
Да насладятся вернии зарею всеобщаго воскресения, / Христа воскресшаго ведяще / и преславна угодника Его, священника и мученика Сергия, // нетленнаго плотию.
Да святится Имя Твое, / — тако в молитвах ко Отцу Небесному взывал еси, / ныне же, предстоя Ему, молися: / да сподобит и нас, чад твоих, // в животе своем Троицу Святую прославляти.
Богородичен: Да возрадуются вернии, / гору Пюхтицкую, аки Сион, возлюбившии, / уведевше Владычицу, / Сыновнему Престолу предстоящую / и мира во успении своем не оставляющую.
Кондак, глас 2:
Яко страдальца честнаго, / Царства Небеснаго всельника, / и пастыря доблестнаго, / достойно воспоим мученика иереа Сергия: / той бо духом и мощми с нами пребывая, / не престает светом жития своего // наставляти души наша.
Икос
Ангелов лики и люди земли Эстонския зело удивишася, зряще воинства царя земнаго пастыря добраго на судище, аки злодея безбожными ведомаго и того, яко истиннаго воина Царя Небеснаго даже до смерти непостыдное свидетельство. Тем же и мы, о подвизе твоем, святе Сергие, умиляющеся, зовем ти: Радуйся, воине Царя Царствующих: Радуйся, отче чадолюбивый притекающих к тебе. Радуйся, тведая оградо духовным твоим овцам: Радуйся, украшение не Суздальския токмо, но и Эстонския земли. Радуйся, венец мученичества приявый и на небо преселивыйся: Радуйся, к лику иереев избранных тамо приобщивыйся. Радуйся, кормчий хотящих спастися: Радуйся, споборниче верным на врага рода человеческаго. Радуйся, щите крепкий присно ны охраняяй: Радуйся, мечу Божий неверие посекаяй. Радуйся, яко церковь нашу неусыпно защищаеши: Радуйся, яко страну нашу, подвигом твоим освященную, присно покрываеши. Радуйся, священномучениче Сергие, достоблаженный молитвенниче о душах наших.
Песнь 7
Ирмос: В пещи Авраамстии отроцы персидстей, / любовию благочестия паче, / нежели пламенем, опаляеми, взываху: // благословен еси в храме славы Твоея, Господи.
Любовию страстворився Христу, возлюбившему тя, / и Тому последовал еси, / даже до крови пострадав, // хвальный воспевая, Бог и препрославленный.
На гору, идеже облак мученик и священник / непрестанно веселится, возшел еси, / и, радуяся, спасения чашу приял еси // хвального отцев Бога и препрославленаго.
С воины и чады твоими / на трясениих храняше тя Господь Иисус, / да венец мученический восприимеши / и небесная улучиши веселия, // хвальный отцев Бог и препрославленный.
Священства не отверглся еси, / дара Божия не посрамил, / вся безбожных устрашения оплевал еси, вопия: / ко Творцу моему пойду // хвальному отцев Богу и препрославленному.
Богородичен: Научи ны, Отроковице, смирению / Гавриилу смиренно рекшая: / се раба Господня, // хвального отцев Бога и препрославленнаго.
Песнь 8
Ирмос: Руце распростер Даниил, / львов зияния в рове затче, / огненную же силу угасиша, / добродетелию препоясавшеся, / благочестия рачителие отроцы, взывающе: // благословите, вся дела Господня, Господа.
Град почитаем Ракверский, / идеже Христос со Отцем и Духом подвигом твоим, блаженне, прославися, / место, идеже мужественное твое тело почивает в церкви Владычицы, ублажаем / и Христа, давшаго ти крепость таковую, // хваляще, поем во веки.
Отче наш Сергие, / пресвитером украшение, / всем христианом к Богу предстатель явился еси. / Не престай моляся о пастве твоей, / священнолепно память твою совершающей, // да поем Христа во вся веки.
Святе Сергие, / облагодати наш помысл, / еже звати нам, / покрове, стено, и утверждение наше: // благословите вся дела Господня Господа.
Яко подвигоположник Твой, / тако и ты претерпел еси смерть поносную: / помози, отче молитвою своею нам / пригвоздившемуся нас ради на древе / Христу сораспятися // и жити с Ним во вся веки.
Богородичен: Не попущай, Пречистая, воле моей совершатися, / неугодна бо есть: / но утверди мя на камени воли Божия / и сподоби с Сыном Твоим // жити во веки вся.
Песнь 9
Ирмос: Камень нерукосечный / от несекомыя горы Тебе, Дево, / краеугольный отсечеся, Христос, / совокупивый разстоящаяся естества. // Тем веселящеся Тя, Богородице, величаем.
Просвещаемый присно светом Божия благодати, / Сергие славне и премудре, / победу нам от Бога на враги испроси / и молися о чтущих твоя страдания, // яко да непрестанно тя величаем.
Сергие священниче! / Воином наставниче и верным защитниче, / не престай моляся за ны, / да тя воистину сердцем и устнами // непрестанно величаем.
Не премолчи за ны ко Господу, святе и мучениче, / — священницы вопиют ти, / — поминай присно и молися о грешных земли, / издревле эстам Богом данней, / и о преемницех твоего / на месте сем служения, // яко да непрестанно тя величаем.
Исходатайствуй всем, / мощи твоя любовию лобызающим, / вся потребная душам и телесем, / Сергие блаженне, // да тя непрестанно величаем.
Богородичен: Церковь Эстонскую, / днесь священномученика своего прославляющую, / во вся же дни вражия нападения и от злых человек и / хитона церковнаго раздрания терпящую, / Богомати, покрый, и от всякого зла ризою Твоею честною защити, // яко да непрестанно Тя величаем.
Светилен
Собор Святых земли Эстонския / ныне радостно ликует, / священника и мученика Сергия зря / Троице Святей // за ны молящася.
Слава и ныне, Богородичен:
Милостивая Мати, Богородице, / Слова Божия красная Палато, / помози нам молитвами Твоими / Сына Твоего и Бога нашего паче жизни возлюбити // и спасение улучити.
На хвалитех стихиры, глас 6:
Церкве предстателю Русския, / ея благое прозябение, / ветви ея эстонския красный плод, / не презри ни единаго от малых чад ея / и выну Господа моли // спастися всем нам.
Проповедника мужества, / терпения и кротости зрим тя, священномучениче отче наш Сергие / во всех озлоблениих, яже творяху ти безбожныя, / и непостыдней кончине твоей. / Темже ти верно зовем: / сия добродетели и в нас возрасти / и Троице Святей молитву вознеси // о спасении душ наших.
На судилищи безбожных предстоя, / мужески Христа исповедал еси. / Помози и нам, святе Сергие, / в животе сем Христа исповедати, // Его ради погубити и спасти души наша.
Слава, глас тойже:
Ты еси пастырь добрый, / священномучениче отче Сергие, / тя всегда восхваляюще, сице вопием ти: / Тобою Бог украси церковь Матери Своея, / и тело твое за Христа пострадавшее, / многолетно же в земли сокровенное / верным возврати и люди Твоя возвесели. / Темже моляся не престай о хвалящих и чтущих память твою, // прося оставления грехов и спасения душ наших.
И ныне, Богородичен, глас тойже:
Богородице, Ты еси лоза истинная, / возрастившая нам плод живота, / Тебе молимся: молися, Владычице, со святыми апостолы, // помиловати души наша.
Славословие великое и прочее по уставу.
На Литургии:
Блаженны, песнь 3 на 4 и песнь 6 на 4.
Прокимен, глас 7: Ч
естна пред Господем / смерть преподобных Его. Стих: Что воздам Господеви о всех, яже воздаде ми?
Апостол дне и святаго, к Римляном, зачало 99.
Аллилуиа, глас 2: С
вященницы Твои облекутся в правду и преподобнии Твои возрадуются. Стих: Блажен муж, бояйся Господа, в заповедех Его восхощет зело.
Евангелие дне и святаго, от Луки, зачало 106. Конец: В терпении вашем стяжите души ваша.
Причастен: В память вечную будет праведник:
Tags: Минея Дополнительная, богослужебные тексты, служба
Subscribe

  • Post a new comment

    Error

    Anonymous comments are disabled in this journal

    default userpic

    Your IP address will be recorded 

  • 0 comments