Уставщик (ustavschik) wrote,
Уставщик
ustavschik

Category:

Молебный канон святому Иоанну Предтече (творение преподобного Максима Грека)

Пока не закончились дни Святого Богоявления, выкладываю в «Уставные заметки» молебный канон честному пророку и Предтече Господнему Иоанну, написанный преподобным Максимом Греком во время его подвижничества на Святой Горе. Греческий текст (вместе с указанием рукописей, по которым готовилась публикация) выложен в блоге «Μαξιμολογία», перевод выполнен Наталией Бахаревой aka ulita_n.



Молебный канон Честному Предтече
Творение преподобнаго Максима Святогорца
Тропарь, глас 4.
Подобен: В
ознесыйся:
Господень великоименитый проповедниче и апостолов основание, Иоанне, богоподражательно презри, всесвяте, вся прегрешения окаянныя души моея, избави от всяких мя и различных бед, и умоли всех Бога, да подаст мне на Суде оставление.
Таже канон, глас 8.
Песнь 1.
Ирмос: В
оду прошед:
Припев: Предтече Христов, моли Бога о нас.
Лютых помышления мя обуревают, к тебе прибегаю, спасения иский, Пророче и Предтече Господень, от всякаго недуга и вреда мя избави.
Страстей мя смущают прилози, многаго уныния исполнити мою душу, умири, блаженне, молитвами твоими к Богу, Предтече, и спаси мя.
Иже земли и моря, и небесе, Творца всяческих, невидимых и видимых, яко Того крестивый, умоли от всякаго недуга и вреда избавити мя.
Богородичен: Недугующа телом и душею, посещения божественнаго и промышления от Тебе сподоби, Едина Богомати, яко Благая, Благаго же Родительница.
Песнь 3.
Ирмос: Н
ебеснаго круга:
Предстательство и покров твой всегда подаждь ми, тя призывающему, Пророче, ты мя окорми моленьми твоими к незыблему пристанищу, и от уз врага избави мя.
Молю, Пророче, душевное смущение и прилоги лютых недугов, находящих ми всегда от мене далече скоро отжени, Предтече вселюбезне, моленьми твоими.
Тяжкими грехми и болезненными страстьми потопляему, Пророче, ты ми помози, под кров твой всецело прибегающему и тепло вопиющему: Спаси мя, Предтече.
Богородичен: Благодетеля рождши, добрых Виновнаго, благодеяния богатство всем источи. Вся бо можеши, яко сильнаго в крепости Христа рождши, Богоблаженная.
Спаси от всякаго недуга, Предтече Спасов, иже под твой покров прибегающыя, и избави вечных мук.
Призри благосердием, Всепетая Богородице, на мое лютое телеси озлобление, и изцели души моея болезнь.
Седален, глас 4.
Подобен: С
коро предвари:
Яко божественное сокровище, сокрытое в земли, Христос нам откры главу твою, Пророче и Предтече: Вси убо сошедшеся, о тоя обретении песньми богоглаголивыми Спаса воспеваем, спасающаго нас от тли молитвами твоими.
Песнь 4.
Ирмос: У
слышах, Господи:
Страстей моих смущение, иже мира Начальника крестивый Господа, молитвами твоими успи, и в землю кротких мя приведи.
Благоутробия пучино, безбоязненно всем проповедавый, молися, молю тя, от мук да избавимся.
Вкушающе, Предтече, от даров твоих, благодарственное воспеваем песнопение, наслаждающеся твоим заступлением.
Богородичен: Надежду и утверждение, и спасения стену недвижиму стяжавше Тя, Всепетая, неудобства всякаго избавляемся.
Песнь 5.
Ирмос: П
росвети нас:
Исполни наша прошения, чтущих тя, света невечерняго подсолнечную исполнивый проповеданием твоим, Предтече.
Избави нас от бед, Крестителю Христов, вечное избавление возвестивый и мир, всяк ум превосходящий.
Разреши лютых болезней неможение теплотою молитв твоих, Спаса крестити явивыйся по достоянию.
Богородичен: Изцели, Чистая, страстей моих неможение, посещения Твоего сподобльшая, и здравие молитвами Твоими подаждь ми.
Песнь 6.
Ирмос: М
олитву пролию:
Смерти и тления исхити, нетления ми подав вкусити, от искушений и бед всяческих, и от нахождения недугов изимая мя моленьми твоими, Крестителю, ко Господу, и спаси мя, молюся.
Предстателя тя живота вем и теплаго во обстояниих молитвенника, искушений мглу разрешающаго, и всяк недуг и вред отгоняющаго, и молюся, окаянный, от тли страстей моих избавити мя.
В ров согрешений впадох, и оттуду востещи не могу, но Бога, из рова левскаго Даниила древле пророка избавиваго моли, да изведет мя из него, честне Предтече.
Богородичен: Яко стену прибежища стяжахом и душ всесовершенное спасение, и пространство в скорбех, Отроковице, и просвещением Твоим присно радуемся, о Владычице, и ныне нас от страстей и бед спаси.
Спаси от всякаго недуга, Предтече Спасов, яже под кров твой прибегающыя, и избави вечных мук.
Пречистая, яже словом Слово неизреченно в последняя дни рождшая, умоли, яко имущи матернее дерзновение.
Кондак, глас 2.
Подобен: В
ышних ища:
Пророче Божий и Предтече благодати, главу твою, яко шипок священнейший, от земли обретше, изцеления всегда приемлем, ибо паки, якоже прежде, в мире проповедуеши покаяние.
Прокимен, глас 4: Праведник, яко финикс, процветет и яко кедр, иже в Ливане, умножится.
Стих: Насажден в дому Господни, во дворех Бога нашего.
Евангелие от Иоанна, зачало 3.
Слава: Молитвами Твоего Предтечи, Милостиве, очисти множество моих согрешений.
И ныне: Молитвами Богородицы, Милостиве, очисти множество моих согрешений.
Стихира, глас 6.
Подобен: В
се отложше:
Пророче и Предтече, души моея веселие, приими, всенескверне, приносимое тебе моление мое. Скорбь бо обдержит мя, и лютая всяческая, Иоанне великоимените, спаси раба твоего, и от руки змиевы исхити мя, и сетей его ныне, яко благосерд, свободи, молитву принося, зане ходатай нам еси к Богу, и всякаго недуга избави самоосужденнаго.
Песнь 7.
Ирмос: О
т Иудеи:
Адамова греха рукописание раздравшаго Слова во струях иорданских вопия, приял еси, Иоанне всехвальне: Отец наших Боже, благословен еси.
Милости хотящаго Человеколюбца, блаженне, о рабех твоих умоли, прегрешений и недугов ядовитых избавити поющыя: Отец наших Боже, благословен еси.
Сокровище спасения и тихое пристанище, и от бед скораго предстателя призывающым ведуще тя, зовем: бурю утиши немощей, Крестителю, молитвами твоими.
Богородичен: Телесныя слабости и душевныя недуги, Богородительнице, любовию приступающих к крову Твоему изцелити сподоби, Спаса Христа нам рождшая.
Песнь 8.
Ирмос: Ц
аря Небеснаго:
Помощи от тебе требующыя не презри, Пророче, вопиющыя и просящыя твоего предстательства.
Изцеления обильная изливаеши верно поющым тя, Пророче, и восхваляющым, всеблаженне Иоанне.
Спасения Начальника умоляя, Христа, Пророче, не престай, яко да избавимся вечных мук.
Богородичен: Напастей Ты прилоги отгоняеши, и страстей находы, Дево: Темже Тя поем во вся веки.
Песнь 9.
Ирмос: В
оистинну Богородицу:
Тока слез моих не отвратися, иже во струях Иорданских всех Бога сшедшаго крестивый, Егоже величаем.
Злобы бесовския непрестанно источаемыя, Пророче, мя избави и налога их покажи вышши.
Сила и врачевство от невоздержания и греха тяжкаго, Пророче, буди озлобляемей души моей, да тя величаю.
Богородичен: Радости мое сердце исполни, Дево, яже радости приемшая исполнение, греховную печаль потребляющи.
Величальны:
Безсеменну и безплодну душу стяжах, всеблаженне, листие едино без плодов, пусту всякаго деяния блага, Пророче, добродетельми мя покажи плодоносяща.
Крестителю и Предтече Христов, светильниче светоносный, молю тя прилежно, светильник возжзи души мене окаянному, омраченну сущу озари.
Молюся, Пророче и Крестителю, недостойнаго молитвенника не презри, потопленнаго житейскими страстьми и в рове суща, ты возстави.
Tags: Минея Дополнительная, богослужебные тексты, канон, переводы, святые Максимы
Subscribe

  • Post a new comment

    Error

    Anonymous comments are disabled in this journal

    default userpic

    Your IP address will be recorded 

  • 0 comments