Уставщик (ustavschik) wrote,
Уставщик
ustavschik

Category:

Служба святым Киевской Духовной Академии

Выкладываю в «Уставные заметки» текст полиелейной службы в честь святых Киевской Духовной Академии. Эта соборная память была первоначально установлена в 2012 году по благословению Блаженнейшего митрополита Киевского Владимира как местное празднование Академии, 3 апреля 2019 года определением Священного Синода Украинской Православной Церкви празднование было внесено в календарь УПЦ. Общее воспоминание святых воспитанников и преподавателей КДА совершается 27 октября (9 ноября), в актовый день Академии, приуроченный ко дню памяти преподобного Нестора Летописца, почитаемого как Небесный покровитель КДА. Служба одобрена Священным Синодом Украинской Православной Церкви 25 сентября 2018 года; в практике Академии она совершается по уставу всенощного бдения в соединении со службой преподобному Нестору. Бóльшая часть Богородичнов посвящена Киево-Братской иконе Божией Матери — главной святыне Киево-Братского Богоявленского училищного монастыря, училище которого считается предшественником Киевской Духовной Академии. Текст публикуется по брошюре, изданной в 2018 году КДА.

Месяца октября в 27 день
Собор святых Киевской Духовной Академии
На велицей вечерне
На Г
осподи воззвах: стихиры, глас 5.
Подобен: Р
адуйся:
Радуйся, духоносный саде, / при брезе Борисфена древняго насажденный, / и плоды благочестия и святыни / всему мирови / всечудно прозябший, / от нихже наслаждающеся / сладости богословия, / едиными усты глаголати дерзаем: / дивен и славен Бог, / от тьмы ко свету нас призвавый, / дивен и славен Бог, / лучами славы нас облиставый, / дивен и препрославлен Бог // во святых Своих.
Радуйся, вертограде Божественный, / десницею Вседержителевою / премудренно устроенный, / идеже яко крини всечуднии / прозябоша духоноснии отцы наши, / святителие, мученицы и преподобнии, / и апостолом подражатели, / прославившии Бога / в душах и телесех своих. / И мы взирающе на жительство их, / тому образу подражати тщимся, / и со умилением зовем: / дивен и препрославлен Бог // во святых Своих.
Радуйся, всесветлый личе / отцев духоносных, / в Академии Киевстей насажденный, / и, яко от благочестия училища, всечудно просиявый, / и лучами благодати / всю землю озаривый. / Темже, сих прославляюще, / трудам и учению их подражати потщимся, / да купно со наставники нашими / воспоим и прославим / Единаго Щедродавца Господа, / непрестанно вопиюще: / дивен и препрославлен Бог // во святых Своих.
Радуйся, преподобне отче наш Несторе, / богомудрый списателю / достопамятных деяний, / светом истины освященный, / и благодатию Господнею умудренный, / и блаженство святых / с первоначальниками Печерскими / наследовавый воистинну, / темже и ныне / чада твоя духовныя умудри, / да, твоим милостивым предстательством / единомудренно возопиим: / дивен и препрославлен Бог // во святых Своих.
Радуйся, святителю наш Петре всеблаженне, / скало нерушимая веры православныя, / непоколебимое и всетвердое основание Академии, / денница светозарная, / множество досточудных звезд / вслед себе возведшая, / от лет древних даже и до ныне / от школы нашея просиявших / и подвиги и чудесы своими / Господа прославивших, / ихже светом просвещаеми, / во умилении зовем: / дивен и препрославлен Бог // во святых Своих.
Слава, глас 6:
Память всечестная днесь возсия богоносных отец наших, / приидите, песньми сих прославим верно, / и со умилением возопиим: / о, всеблажении, / подвиги своими школу нашу украсившии / и образ жития всем верным показавшии, / не забудите ны, чада ваша, / но присно Господа молите, / да укрепит, сохранит и умудрит всех, // память вашу ублажающих.
И ныне, догматик, глас 6:
Кто Тебе не ублажит, Пресвятая Дево? / Кто ли не воспоет Твоего Пречистаго Рождества? / Безлетно бо от Отца возсиявый Сын Единородный, / Тойже от Тебе, Чистыя пройде, / неизреченно воплощся: / естеством Бог Сый / и естеством быв Человек нас ради; / не во двою лицу разделяемый, / но во двою естеству неслитно познаваемый. / Того моли, Чистая, Всеблаженная, // помиловатися душам нашим.
Таже вход. Прокимен дне.
И чтения три преподобническая.
Премудрости Соломони чтение.
Праведных души в руце Божией, и не прикоснется их мука. Непщевани быша во очесех безумных умрети, и вменися озлобление исход их, и еже от нас шествие — сокрушение, они же суть в мире. Ибо пред лицем человеческим, аще и муку приимут, упование их безсмертия исполнено. И вмале наказани бывше, великими благодетельствовани будут, яко Бог искуси я и обрете их достойны Себе. Яко злато в горниле, искуси их и, яко всеплодие жертвенное, прият я. И во время посещения их, возсияют, и яко искры по стеблию, потекут. Судят языком и обладают людьми, и воцарится Господь в них во веки. Надеющиися Нань разумеют истину и вернии в любви пребудут Ему, яко благодать и милость в преподобных Его и посещение во избранных Его.
Премудрости Соломони чтение.
Праведницы во веки живут, и в Господе мзда их, и попечение их у Вышняго. Сего ради приимут царствие благолепия и венец доброты от руки Господни, зане десницею покрыет я и мышцею защитит их. Приимет всеоружие — рвение свое и вооружит тварь в месть врагом. Облечется в броня правды и возложит шлем — суд нелицемерен. Приимет щит непобедимый — преподобие, поострит же напрасный гнев — во оружие, споборет же с ним мiр на безумныя. Пойдут праволучныя стрелы молниины и, яко от благокругла лука облаков, на намерение полетят, и от каменометныя ярости исполнь падут грады. Вознегодует на них вода морская, реки же потопят я нагло. Сопротив станет им дух силы и, яко вихор, развеет их, и опустошит всю землю беззаконие, и злодейство превратит престолы сильных. Слышите убо, царие, и разумейте, навыкните, судии концев земли. Внушите держащии множества и гордящиися о народех языков, яко дана есть от Господа держава вам и сила от Вышняго.
Премудрости Соломони чтение.
Праведник аще постигнет скончатися, в покои будет. Старость бо честна не многолетна, ниже в числе лет исчитается. Седина же есть мудрость человеком, и возраст старости — житие нескверное. Благоугоден Богови быв, возлюблен бысть и живый посреде грешник преставлен бысть. Восхищен бысть, да не злоба изменит разума его или лесть прельстит душу его. Рачение бо злобы помрачает добрая, и парение похоти пременяет ум незлобив. Скончався вмале, исполни лета долга, угодна бо бе Господеви душа его, сего ради потщася от среды лукавствия. Людие же видевше, и не разумевше, ниже положше в помышлении таковое, яко благодать и милость в преподобных Его и посещение во избранных Его.
На стиховне стихиры, глас 1:
Блажени есте, духоноснии отцы наша, / на совет нечестивых не шедшии, / но путь правый служения Господу избравшии / и в законе Его поучившиеся день и нощь. / Сего ради явистеся древа благонасаждении, / плодами веры и духа нас веселящии / и под благолиственною сению своею / вся покрывающия, // память вашу днесь радостию воспевающих.
Стих: Во всю землю изыде вещание их и во вся концы вселенныя глаголы их.
Во вся концы земли достиже / вещания проповеданий ваших, / всечестнии и богоблажении наставницы наши, / возвестисте бо всем людем славу Бога / и проповедасте любовию милосердие Его, / темже и нас утвердите / молитвами вашими, / да купно с вами прославим // Единаго Человеколюбца.
Стих: Уста праведнаго поучатся премудрости.
Возлюбили есте Премудрость и оныя достигнули есте, / преславнии чудотворцы Академии Киевския, / серпом бо проповедания вооружившеся, / изыдосте преславно на делание Божие, зряще нивы убелены, / и Господу усердно работающе, восприяли есте мзду трудов ваших, / яко рабы благия и верныя, / и ныне, пребывающе во обителех Отца Небеснаго, / о нас Того молите, да сохранит люди Своя от зол, // яко Благ и Человеколюбец.
Слава, глас тойже:
Нестора премудраго восхвалим песньми / и сему молитвы принесем, во умилении глаголюще: / Отче всечудне и достоблаженне, / Господу о нас присно молися, / да помилует землю нашу, / во Православии нас укрепит, / ересей и расколов шатание зловредное да утишит / и мир людем Своим дарует, // яко Един Благ и Человеколюбец.
И ныне, Богородичен, глас 6:
Освящается небо и земля, / Академия же Киевская веселится / и людие вси светло празднуют. / Се бо Владычица Богородица, / образ Свой Киево-Братский нам всечудно ниспославшая, / купно со святых ликом богоизбранным, / за ны молит Сына Своего и Бога нашего, / да помилует нас Господь и от бед избавит град и люди, // Богородицу непрестанно величающия.
Тропарь, глас 4:
Звезды пресветлыя неба церковнаго, / славо и украшение Академии Киевския, / преславнии и достоблаженнии заступницы наша, / Господа присно молите / во Православии недвижимо ны соблюсти // и даровати нам велия и богатыя милости.
На утрени
По 1-ом стихословии, седален, глас 4.
Достоблажении отцы наши, яко звезды небесныя украсившия небо Церкве Киевския, на ваше предстательство уповающе, присно молим: молитеся о нас у Престола Божия, да помилует нас Господь, присно славимый во святых Своих.
Слава, и ныне, Богородичен:
Всесвятая Богородице Владычице, на Тя упование свое возлагаем, и на образ Киево-Братский взирающе, глас молебный возносим: Владычице мира и Ходатаице, не остави нас сирых, но покровом Твоим сохрани от всякаго зла школу нашу, да Тя присно величаем.
По втором стихословии, седален, глас 2:
Веселися, Киеве всекрасный, Матерь и основание градов Руси Святой, се бо святыя чада твоя, Божественным мановением зде собранныя, и яко пресветлии звезды небо церковное озаряющия, молятся ко Господу, да укрепит вереи врат твоих и вся ны во православии утвердит, храмы и обители сохранит, премудрость воздвигнет, злочестие же потребит, вражды пламень и злобы и всякаго коварства да угасит, и мир людем христоименитым ниспослет, яже от купели Днепровския Крещение прияша.
Слава, и ныне, Богородичен:
Возсия яко заря всесветлая образ Твой, Владычице Богородице, Киево-Братский, людие же вси предстательством Твоим просветишася светом истиннаго боговедения. Темже, сей почитающе, Тя прославляем, Единую заступницу града нашего.
Величание:
Величаем вас, святии отцы наши, вся концы мудростию Христовой просветившии, и образ спасения нам светоявленно показавшии.
Псалом избранный:
Блажен муж, бояйся Господа, в заповедех Его восхощет зело. Во всю землю изыде вещание их, и в концы вселенныя глаголы их. Начало премудрости страх Господень, разум же благ всем творящым и. Уста праведнаго поучатся премудрости, и язык его возглаголет суд. Пойте Господеви, преподобнии его, и исповедайте память святыни его. Возлюбите Господа, вси преподобнии его: яко истины взыскает Господь.
По полиелее седален, глас 4:
Ангели земнии и человецы небеснии, всечуднии заступницы наши, святителие, мученицы и преподобнии, кровом молитв ваших от всякаго зла сохраните души наша, да, Господу работающе, память вашу присно величаем.
Слава, и ныне, Богородичен:
Образ Твой Киево-Братский воспеваем, Владычице, Тобою бо от злых избавление прияхом. Тя присно молим Богородице Дево: во Православии ны недвижимо утверди, и от бед избави нас, Едина Чистая и Благословенная.
Степенна: Первый антифон 4 гласа.
Прокимен: Уста моя возглаголют премудрость, / и помышления сердца моего разум.
Стих: Блажен муж бояйся Господа, в заповедех Его восхощет зело.
Евангелие, от Матфея, зачало 11.
По 50-м псалме стихира, глас 6:
Память святых с похвалами совершающе, / иже обретоша Премудрость и уведеша разум, / Тя молим, Отче наш Небесный: / предстательством их от всякаго зла сохрани души наша, / да во свете Твоем узрим Свет, / и Истины причастницы будем, / о Тебе же надежду обретше, // исполнимся вси Святаго Твоего Духа.
Канон святым отцам, глас 2, егоже краестрочие:
С
охрани и спаси, Господи, на Тя уповающия.
Песнь 1.
Ирмос: Глубины открыл есть / дно и сушею Своя влечет, / в ней покры противныя, / крепкий во бранех Господь, яко прославися.
Создателю наш и Творче Господи, отверзи недостойныя уста наша, да возвеличим богоблаженныя избранники Твоя, от лет древних просиявшия во Академии нашей, ихже Ты прославил еси.
Отцы наши достоблажении, заступницы всеусерднии, приимите ныне пение и молитву чад ваших, и предстательством вашим недвижимо в Православии школу свою сохраните, яко от Господа прославление прияли есте.
Хранителие всеусерднии отеческих преданий, достославнии и предивнии чудотворцы, славо и украшение Академии Киевския, присно о нас Господа молите, да усердно последуем стопам вашим, вы бо от Бога прославлени есте.
Богородичен: Радуйся, некогда возгласи ликов ангельских первостоятель, темже, сему подражающе, и мы дерзаем воспети Ти, Богомати: радуйся, Всеблагословенная, радуйся, Обрадованная, радуйся, Препрославленная, Господь с Тобою.
Песнь 3.
Ирмос: Крепость даяй царем нашим Господь / и рог помазанных Своих возносяй / от Девы раждается, грядет же ко Крещению. / Тому, вернии, возопием: / несть свят, яко Бог наш.
Академии днесь летное празднество совершающее, усердно возславим отцев Печерских, подвиги своими град Киев и землю нашу благословивших, и ныне всех нас научающих взывати: несть свят, якоже Бог наш.
Нестора воспоим ныне преподобнаго, яко начальника книжныя премудрости, того бо подвиги и труды научени есмы взывати: несть свят, якоже Бог наш.
Избранниче возлюбленный Премудрости Божественныя, Петре святителю, града Киева преславное украшение и Академии духовныя устроителю достопетый, молитвами твоими просвети сердца наша, да купно с тобою воспоим во истине: несть свят, якоже Бог наш.
Богородичен: Избави от бед люди Твоя, Владычице Дево, да под Кровом Твоим соблюдаеми, пети присно возможем Сына Твоего и Господа нашего: несть свят, якоже Бог наш.
Седален, глас 2:
Моление ваше вознесите, преславнии, и от всякаго зла сохраните град и люди, память вашу днесь светло совершающия.
Слава, и ныне, Богородичен:
Моление теплое и стена необоримая, милости источниче, мирови прибежище, прилежно вопием Ти: Богородице Владычице, предвари и от бед избави нас, Едина вскоре предстательствующая
Песнь 4.
Ирмос: Услышах, Господи, глас Твой, егоже рекл еси, / глас вопиющаго в пустыни, / яко возгремел еси над водами многими, / Твоему свидетельствуяй Сыну, / весь быв сошедшаго Духа, возопи: / Ты еси Христос, Божия мудрость и сила.
Светом небесным просветите души наша, Феодосие и Димитрие, святителие преславнии, млеком богопознания воспитаннии в Академии Киевстей, и концем земли проповедавши Христа, Божию мудрость и силу.
Православия явилися есте столпи непоколебимии в земли Сибирстей, Иоанне, Филофее, Павле и Софроние, купно со Иркутским святителем Иннокентием, тамо бо Христа всем проповедасте, Божию мудрость и силу.
Архиерея Великаго служителю преславный, Иоасафе, Белгородская похвало, молитвами твоими соблюди нас от всякаго зла, да поем купно с тобою Христа, Божию мудрость и силу.
Богородичен: Соблюди ны неврежденны от находящих на ны обстояний, Дево Владычице Богородице, на Тя бо уповаем, и Тебе молитвы яже от сердца приносим, Ты бо едина родила еси плотию Христа, Божию мудрость и силу.
Песнь 5.
Ирмос: Иисус, живота Начальник, / разрешити осуждение грядет Адама первозданнаго, / очищений же, яко Бог, не требуя, / падшаго очищает во Иордане, / в немже вражду убив, / преимущ всяк ум мир дарует.
Истиннаго свидетеля и преславнаго мученика воспоим Константина иеромонаха, купно же с ним прославим и Паисия, афонскаго подвижника и обители Нямецкия украшение, на колесницу молитвы возшедших, достигших же Небеснаго Царствия и мира, всяк ум преимущаго.
Горняго Иерусалима достигл еси, Арсение священномучениче, всякую неправду и оклеветание Христа ради и Церкве Его приемше, темже купно со Кирионом и Каллистратом, земли Иверския первосвятителями, вселился еси, идеже несть болезнь, ни печаль, ни воздыхание, но мир, всяк ум преимущий.
Огнедохновенная уста, пророков подобниче, Иннокентие, Одесская похвало, купно же и Феофане, затворниче и святителю, Георгие, Мелетие, Антоние и Рафаиле с Филаретом, милостивым святителем Киевским, Господа молите, да дарует людем Своим мир, всяк ум преимущий.
Богородичен: Стено еси и ограждение от лютаго неистовства вражия, Владычице Богородице, темже, на милость Твою уповающе, Тебе моление возносим, да оградиши землю нашу миром, всяк ум преимущим.
Песнь 6.
Ирмос: Глас Словесе, светильник Света, / денница Солнца, Предтеча в пустыни, / покайтеся! всем вопиет людем, и предочиститеся: / се бо предстоит Христос, / от тли мир избавляяй.
Победниче многопетый, священнострадальче вседобльственнейший, первенствующий лика новомучеников, Владимире митрополите, кровию твоею украсил еси ризы души своея, и ныне во славе предстоиши Христу, от тли мир избавляющему.
Огня не убоявшеся гонений, ниже мучителей неистовства устрашилися есте, Макарие, Пимене, Митрофане, Неофите и Сильвестре, но возшли есте в радость Господа Своего, яко раби благия и верныя, и ныне о нас молите Спаса Христа, от тли мир избавляющаго.
Дивнии и преславнии священномученицы, Назарие, Иоанне, Дамаскине и Никодиме, кровь ваша семенем христианства явися, и подвиги ваша яко лествица быша, возводящая к Пренебесному Престолу Господа славы, от тли мир избавльшему.
Богородичен: Искупителя и Господа родила еси плотию, Мати Дево, и Сему ныне молишися, да недвижимо укрепит Церковь, юже стяжа Кровию Своею, и мир умирит, егоже от тли избавил есть.
Кондак, глас 4:
Яко духоноснии светильницы, души человеческия светом богоразумия просвещающии, и дарами Духа Всесвятаго нас веселящии, воспеваем вас, преславнии заступницы и молитвенницы о душах наших.
Икос:
Поминающе наставники наша, иже глаголаша нам слово Господне, подражати потщимся тех вере и житию, и светло совершающе их летнее торжество, во умилении возопиим: радуйтеся, святителие богодухновеннии; радуйтеся, священномученицы преславнии; радуйтеся, страстотерпцы непобедимии; радуйтеся, исповедницы веры правыя; радуйтеся, преподобнии и богоноснии отцы наша; радуйтеся, преславнии заступницы и молитвенницы о душах наших.
Песнь 7.
Ирмос: Юноши благочестивыя, / пещи огненней приобщившияся, / шумящ дух росный невредимы сохрани / и Божия Ангела снизхождение. / Темже, в пламени орошаеми, благодарственно воспеваху: / препетый отцев Господи и Боже, благословен еси.
Начало премудрости, страх Господень стяжавше, препрославленый священномучениче Анатолие митрополите купно с Парфением преславным и вседобльственнейшим Антонием, не убоялися есте неистовыя мучителей ярости, темже купно с мученики древними воспеваете: препетый отцев Господи и Боже, благословен еси.
Адаманты вседрагии Церкве Божия, священнострадальцы преславнии, пресвитери купно же и мученицы, Димитрие, Александре, Викторе, Леонтие, Петре и Григорие, вознесите о нас молитву, да предстательством вашим неосужденно Господу послужим, непрестанно поюще: препетый отцев Господи и Боже, благословен еси.
Трапезу страдания вкусивше, мученицы всеславнии Владимире и Иоанне, трапезы Небесныя ныне причащаетеся всесветло, яко страдальцы мужествении Христа ради, Емуже ныне со ангелы возглашаете: препетый отцев Господи и Боже, благословен еси.
Богородичен: Яко Царице и Матери песнь Ти приносим, и яко Владычицу и Утешительницу молим: помози нам, обремененным всякими искушеньми и прилогами вражиими, яко не имамы разве Тебе иныя надежды; Ты же, о Всемилостивая, сохрани от бед всех, ныне взывающих: препетый отцев Господи и Боже, благословен еси.
Песнь 8.
Ирмос: Тайну преславную вавилонская показа пещь, / источившая росу, / яко струями имяше невещественный Огнь восприяти Иордан / и объяти плотию крещаема Зиждителя, / Егоже благословят людие и превозносят во вся веки.
Упование на Господа возложше, пред лицем мучителей злочестивых исповедали есте безбоязненно веру православную, и сего ради ныне почитаетеся светло, священноисповедницы достопетии Антоние, Амвросие и Василие, купно же Сергие и Петре, священницы Господа вышняго, Егоже благословят людие и превозносят во вся веки.
Православия поборника и светило всеславное земли подкарпатския, воспоим ныне Досифея пречуднаго, исповедника и святителя, Господа служителя преславнаго и проповедника богоноснаго, иже житием и страданьми своими всех нас научает Господу служити, Егоже благословят людие и превозносят во вся веки.
Отцев древних подражателя и подвигом их ревнителя, подвижника же и пиита, проповедника и храмоздателя, преподобного восхвалим Симеона, обители Дайбабския начальника и украсителя, Академию Киевскую подвиги и чудесы своими прославльшаго, и ныне молитву возносящаго о всех, во умилении поющих Господу, Егоже благословят людие и превозносят во вся веки.
Богородичен: Воистину Богородицу Тя величаем, и яже от сердца слезы приносим: защити от всякия скорби рабы Твоя, и Сыну Твоему вознеси матерния Твоя молитвы, да помилует нас Господь, Егоже благословят людие и превозносят во вся веки.
Песнь 9.
Ирмос: Недоумеет всяк язык благохвалити по достоянию, / изумевает же ум и премирный пети Тя, Богородице, / обаче, Благая сущи, веру приими, / ибо любовь веси Божественную нашу: / Ты бо христиан еси Предстательница, Тя величаем.
Архиерея великаго грядущих благ, Господа и Спаса глас услышавше, изошли есте на делание Божие, и вспять никогдаже обратилися есте, преславнии заступницы наши, темже молитвами вашими и нас утвердите, да, Господу присно работающе, вас, яко ходатаев наших, присно величаем.
Юдоль юности вашея ущедрите, преславнии, и молитву свою вознесите о всех, зде обучение свое проходящих, да стопам вашим последующе и образом подвигов ваших наставляеми, возможем Господу послужити и купно с вами во вся веки Сего величати.
Троичен: Щедродавче и Господи, Боже Триипостастный и всепетый, Отче, Сыне и Душе Святый, молитвами избранных Твоих, от Академии Киевския просиявших преславно, от всякаго зла неврежденну сию сохрани, и во всяком деле блазе укрепи, да на скончание подвигов их взирающе и вере тех подражающе, во веки веков Тя величаем.
Богородичен: Избранной от всех родов Матери и Деве пение похвальное приносим и молитвы: Преславная Владычице, покровом Твоим землю нашу защити, и от всякаго зла рабы твоя избави, Ты бо христиан еси Предстательница, Тя величаем.
Светилен:
Яко светила Небесныя явишася днесь школе нашей, преславнии чудотворцы и заступницы, светом бо вашим просвещаеми и подвиги наставляеми, Господу служити научаемся, присно славимому во святых Своих.
Слава, и ныне, Богородичен:
Яко Владычице и Деве пение смиренное приносим, и молитвы своя вознести дерзаем, и во умилении молим Тя: светом Сына Твоего просвети вся ны, Богородице Владычице, да, премудрости Божественныя научившеся, служити неосужденно возможем Христу Богу нашему, присно прославляемому во святых Своих.
На хвалитех стихиры, глас 4.
Подобен: З
ваный свыше:
Воспоим ныне Господеви песнь нову, / яко дивна сотвори Господь, / и воздвиже нам облак / свидетелей и заступников, / имиже сказа нам спасение Свое / и пред языки откры правду Свою, / темже, память их днесь светло совершающе, / воскликнем пред Господем в веселии сердечнем, / и со гласом псаломским воспоим: / Слава Тебе, Боже прещедрый, / милостию Твоею даровавшему нам // заступников и молитвенников преславных.
Угобзися ныне нива церковная / и, плодами многими украшена сущи, / веселится Академия Киевская, / прославляюще вся святыя, в ней просиявшия, / святители, мученики же и преподобныя, / иже явишася столпи веры / и наставницы благочестия, / православия ревнители / и потребители богомерзскаго злочестия, / храмоздатели и проповедницы, / чудотворцы и молитвенницы всеусерднии, // и заступницы наши преславнии.
Возсия днесь всечестная память ваша, / заступницы и молитвенницы наши достоблаженнии, / млеком бо богопознания / воспитасте души своя, / и явистеся основание непоколебимое / веры православныя, / наставляюще ко благочестию и кротости чада ваша, / во умилении днесь поющия: / радуйтеся, богоизбраннии светильницы; / радуйтеся, отцы наши богоблажениии; / радуйтеся, ограждение и покрове Академии Киевския, // и ходатаи преславнии о душиах наших.
Слава, глас тойже:
Радуйтеся, праведнии, о Господе, / и веселитеся о плодах трудов ваших, / се бо, десницею святителя Петра насажденная, / и водами подвигов ваших удобренная, / Академия духовная днесь светло красуется, / торжество свое летное совершающе / и восхваляюще вся святыя отцы, / от лет древних даже до ныне в ней воспитанныя. / Темже, вас прославляюще, / Господа молим, / да недвижимы ны в Православии утвердит // и благодатию Своею помилует и спасет души наша.
И ныне, Богородичен, глас 8:
Владычице, приими молитвы раб Твоих, / и избави нас // от всякия нужды и печали.
На Литургии
Блаженны от канона, песнь 3 и песнь 6.
Прокимен, глас 4: Б
ог прославляемь / в совете святых.
Стих: Во всю землю изыде вещание их, и в концы вселенныя глаголы их.
Апостол ко Евреем, зачало 330, или 334.
Аллилуиа, глас 4: В
оззваша праведнии и Господь услыша их.
Стих: Уста праведнаго поучатся премудрости.
Евангелие от Матфея, зачало 10.
Причастен: Р
адуйтеся, праведнии, о Господе, правым подобает похвала.
Молитва преподобному Нестору Летописцу
О преблаженне и богоносне отче наш Несторе, премудрый учителю, великий подвижниче, Печерския Лавры похвало и о всем мире молитвениче! Ныне предстояй со дерзновением престолу Триипостасного Бога, помози нам, со слезами и сокрушенным сердцем к тебе приходящим, веру православную до конца жития нашего в чистоте сохранити.
Дух ревности, имже ты пламенил еси, возгрей предстательством Твоим и о нас, ихже Христос постави пастырями, да всеусердно просвещаем и утверждаем во православии словесное стадо Христово!
Испроси, о великодаровитый наставниче, у Пастыреначальника Христа всем нам всякий дар коемуждо благопотребен: отроком — целомудрие и послушание, юным — ума просвещение во еже скоро прияти им и спешно навыкнути Божественнаго закона и всему благому и полезному учению; наставником — терпения, начальствующим — мудрости образ!
О Боголюбезнейший отче, любителю и ревностный научителю святыя истины, научи и нас быти достойными подражателями трудов твоих. Приведи нас, отче Святый, молитвами твоими к уразумению душеполезного знания, да внимая преподаваемому нам учению Христову, поживем Богу Нашему во славу, Церкви и отечеству нашему на пользу.
Настави нас на стези спасения, да молитвами твоими, заступниче наш, во учении да не леностны пребудем, в усердии не ослабевая, духом пламенея внидем в вечное Царство славы восхваляя Отца, Сына и Святого Духа, во веки веков. Аминь!
Молитва святым Киевской Духовной Академии
О всеславнии богопроповедницы и угодницы Христови, Богоноснии отцы, святителие, пастырие, учителие, наставницы, преподобнии, мученицы, новомученицы, исповедницы, и вси святии сродницы наши, иже от лет древних и в последния дни подвизавшиися в Академии нашей. Церковь Христову ученьми своими и труды прославльшии, и ныне в предивных селениих Отца Небесного почивающии. Мы пред иконою всечестною вашею молящеся, соборную память вашу празднующе, со умиленным сердцем и со слезами припадаем пред ликом вашим всесиятельным, и молим вы: милостию, юже стяжали есте пред Господем, испросите нам у престола Живоначальныя Троицы пламенную ревность о спасении пасомых, мужества и одоления отчаяния и нерадения, в подвиге пастырского крестоношения. Иночествующим молитвы пламенеющей а воздыхания их о спасении всего мира да будут благоприятны пред Лицем Божиим. Наипаче же, просим отеческого попечения о воспитании юных сердец в целомудрии и любви ко Господу и во всеусердном послушании Святей Церкви.
О, велиции угодницы Божии, сродницы и друзи наши: столпы веры святителю Петре и преподобне отче наш Несторе: Возмолитеся со всеми святыми собора угодников ко Господу нашему Всемилостивому, да дарует всем верным чадом Его нескончаемую мудрость, дух братолюбия и молитвенное сраспинание друг за друга и за всех во еже не преткнутися нам грешным о соблазны диавола, ниже преступити словес Евангельских, и темже да сподобит нас покаяния всесмиреннаго, ни да отступит от нас недостойных милостию Своею, во еже и нам востати во время подобно одесную престола Вседержителева, идеже и вы, заступницы наши, предстоите, и вкупе со ангельскими силами воспеваете Животворящую Троицу, в Нейже Отца, и Сына, и Святаго Духа ныне, и присно, и во веки веков: Аминь.
Tags: Минея Дополнительная, богослужебные тексты, сканированное, служба
Subscribe

  • Post a new comment

    Error

    Anonymous comments are disabled in this journal

    default userpic

    Your IP address will be recorded 

  • 3 comments