Уставщик (ustavschik) wrote,
Уставщик
ustavschik

Category:

Служба святой исповеднице Матроне Анемнясевской

Служба святой исповеднице Матроне Анемнясевской составлена протоиереем Владимиром Сергеевичем Правдолюбовым, племянником составителей жития святой — мученика Владимира (†1937) и священномученика Николая (†1941) Правдолюбовых. Текст воспроизводится по малотиражной брошюре, изданной в Касимове без прочих выходных данных. К сожалению, текст сканировал не я, поэтому огрехи распознавания вычищены «из общих соображений», без бумажного оригинала перед глазами. Надеюсь, текст я не повредил, однако некоторые недочёты текста я исправить не в состоянии — в частности, в 9-й песни канона отсутствует 1-й тропарь, что видно по сбою в краегранесиии (пропущенной букве).

16 / 29 июля
Служба святой блаженной Матроне исповеднице, Анемнясевской
На велицей вечерни
Стихиры на Г
осподи воззвах: глас 4:
Веси Анемнясевския слава, / Касимовских пределов украшение / и Рязанския земли похвала, / Матрона многострадальная / священными песньми да почтится днесь / яко великая угодница Божия // и молитвенница о душах наших.
Подвигом добрым подвизаяся, / многоскорбное житие от Господа прияла еси, / болезни горькия терпя силою Божественною, / Матроно святая, / являя верным образ учительнаго пути // верою поющим святую память твою.
Страданием добре искусившися, / блаженная Матроно, / Церкви Христовей яко молния возсияла еси / и течение Божественное совершив, / верных сердца просветила еси, / воспевающих блаженное твое житие // и радостно славящих память твою.
Иные стихиры, глас 6:
Богородице Дево, / благая подвигоположнице, / Ты возлюбила еси отроковицу Матрону, / слепотою страждущую, / и ей, приемлющей тяжкие раны от матери ея, / вручила еси утешительное слово Твое, / благославляя ю на крестный подвиг / тяжкия болезни во вся дни живота ея, / благодатную помощь ей подающи / и свет Христов в мире заблудшем ею являющи, / и ныне молим Тя молитвами ея: / испроси нам у Сына твоего и Бога // очищение грехов и велию милость.
Господи Боже, / милосердый Спасителю наш, / Ты утешил еси явлением Твоим / страждущую отроковицу Матрону, / давши ей облобызати раны Твоя, / кровию текущия, / и сим укрепил еси ю / без ропота нести тяжкий крест ея, / благодатную помощь Твою в скорби подавая ей, / сего ради даруяй нам молитвами ея // очищение грехов и велию милость.
Терпением, слезами, скорбьми многими / якоже бисером многоценным / от младенчества украсилася еси, / блаженная девице Матроно, / болезни бо тяжкия своя / яко от рук Христовых прияла еси / и николиже возроптала еси, // возлюбив Христа даже до смерти.
Слава, глас 8:
Солнце правды Христос Бог наш, / просвещаяй сущия во тме, / дарова ти, Матроно, зрение небесное, / имже, очам телесным слепотствующим / зрела еси оком духовным / вся потребная к вразумлению и помощи // в нуждах своих и скорбех приходящим к тебе.
И ныне, догматик, глас той же.
Стихиры на литии, глас 8:
О, блаженная мати Матроно! / Ныне творящи честную память твою, / песньми хвалебными почитаем тя; / ты бо Христа возлюбила еси, / боголепным твоим житием / яко звезда светлая возсияла еси, / озарила еси вся концы величием подвиг твоих, / кротостию и терпением украсившися, / на небеса возшла еси; / и престолу Божию со ангелы предстоящи / за ны Богу молися / от бед избавити ны // и спасти души наша.
Страданьми вышеестественными / чисту и святу яви тя / Христос подвигоположник, / блаженная Матроно, / и дарова ти утешительницу благую / пречистую Матерь Свою / и лику избранных Своих причте Тя, / с нимиже моли Его благоутробие // о спасении душ наших.
Слава, глас 2:
Слепотою телесною страждущая, / блаженная девице Матроно, / обрела еси зрение духовное, / имже видела еси ближняя и дальняя, / мысли и воздыхания страждущих / и теплыя взывания далече сущих, / притекая к ним скоро на помощь / сильною молитвою и дерзновением, // подая им Божию помощь и избавление.
И ныне, Богородичен, глас тойже:
Все упование мое / на Тя возлагаю, / Мати Божия; // сохрани мя под кровом Твоим.
Стихиры на стиховне, глас 2:
Вонми, Господи, многоболезному стенанию души моея, / просвети очи мои во тьме сущия, / виждь болезнь мою и скорбь мою: / даруй душе моей избавление: // Матрона взываше.
Стих: Дивен Бог во святых Своих, / Бог Израилев.
Верен Бог и несть неправды в Нем, / праведен и преподобен Господь, / яко правдою и судом наведе на мя скорбь сию: // Матрона глаголаше.
Стих: В церквах благословите Бога, / Господа от источник Израилевых.
Верую, Господи, Твоему милосердию, / яко не оставиши мя в скорби моей; / аз же и во тьме и на одре болезни / присно прославляю Тя: // Матрона вопияше.
Слава, глас 7:
Вышняго благодать приемши, / блаженная Матроно, / мудростию словес твоих / верных смыслы озарила еси / и стезею правою ходити их учила еси / яко угодница Христова, / Ему же за ны молися // спасти и просветити души наша.
И ныне, Богородичен, глас тойже:
Под кpов Твой, Владычице, / вси земноpоднии пpибегающе, вопием Ти: / Богоpодице, упование наше, / избави ны от безмеpных пpегpешений // и спаси души наша.
Тропарь, глас 8:
Яко зарница небесного огня возсия в Рязанстей стране / блаженная старица святая Матрона, / еяже память днесь творяще, воспоим Христа Бога, / моляще Его даровати нам тоя предстательством / в болезнех, бедах и скорбех терпение // и душам нашим велию милость.
На утрени
На Б
ог Господь: тропарь дважды.
Слава, и ныне, Богородичен, глас 8:
Иже нас ради рождейся от Девы / и распятие претерпев, Благий, / испровергий смертию смерть / и воскресение явлей, яко Бог, / не презри, яже создал еси рукою Твоею; / яви человеколюбие Твое, Милостиве, / приими рождшую Тя Богородицу, молящуюся за ны, // и спаси, Спасе наш, люди отчаянныя.
По 1-м стихословии седален, глас 8:
Посреди мира греховнаго пребывала еси, святая Матроно, / похотей мира отверглася еси; / и миру страждущему сострадала еси, // молящи о нем Всемилостиваго Бога.
Слава, и ныне, Богородичен:
Ты верных похвала еси, Безневестная, / Ты предстательница, Ты и прибежище христиан, стена и пристанище. / Состраждущи бо страждущим, // Ты молиши о нас всемилостиваго Бога.
По 2-м стихословии седален, глас 4:
Светлую твою память днесь творяще, / Спаса и Господа молити прилежно / тя молим, блаженная Матроно, // всем дати вечное блаженство.
Слава, и ныне, Богородичен:
Теплое заступление сущим в бедах, / и помощницу нашу / и к Богу пременение, / Еюже тли избавихомся, // Богородицу, вернии, ублажаем.
По полиелеи седален, глас 5:
Явилася еси яко лоза, / богомудрая Матроно, / имуще тело изгнетенное нестерпимыми болезньми, / вино нам мысленное образ терпения источающи, / сердце утешающее // и страстей отревающее пиянство.
Слава, и ныне, Богородичен:
Человеколюбца рождши Бога, / боголюбивая Владычице, / Того моли // огня геенны избавитися нам.
Прокимен: Дивен Бог во святых Своих, / Бог Израилев.
Стих: В церквах благословите Бога, Господа от источник Израилевых.
Евангелие от Иоанна, зачало 54.
Слава: М
олитвами исповедницы Матроны, / Милостиве, очисти:
И ныне: Молитвами Богородицы:
Стихира по Евангелии, глас 6:
Омый нас, Господи, от беззаконий наших / и от грехов наших очисти нас / и дух правый обнови во утробах наших // молитвами святыя старицы Матроны.
Канон, глас 8, егоже краегранесие:
Б
лаженная мати Матроно, моли Бога о нас.
Песнь 1
Ирмос: Воду прошед, яко сушу, / и египетскаго зла избежав, / израильтянин вопияше: // Избавителю и Богу нашему поим.
Богоматери послушание явивши, раны от матери твоея терпела еси, хранящи души благородие, Матроно достохвальная.
Лютость матери твоея претерпевши, утешение от Матери Божией прияти сподобилася еси, и Ею укрепленная, терпением потекла еси на предлежащий ти подвиг, Матроно всехвальная.
Ангелы возвеселила еси и человеки удивила еси великим терпением твоим. На одре болезни недвижимо лежащи, глад и поношения от ближних обильно прияла еси, Матроно преславная.
Жениху Христу измлада уневестилася еси, давшему ти облобызати раны Его, кровию текущия, причастнице крестных страданий Его.
Богородичен: Его же родила еси, Мати Дево чистая, моли Сына Твоего и Бога о спасении душ наших.
Песнь 3
Ирмос: Небеснаго круга Верхотворче, Господи, / и Церкве Зиждителю, / Ты мене утверди в любви Твоей, / желаний краю, верных утверждение, // Едине Человеколюбче.
На одре болезни яко на кресте от отрочества до глубокия старости и праведныя кончины недвижимо лежала еси, святая страдалица Матроно.
На одре твоем аки во мрачнем затворе пребывала еси, слепотствуя телесныма очима, святая страдалица Матроно.
Аще и слезами скорбными омочила еси постелю твою, обаче ни злобе, ни осуждению, ни унынию и ропоту не дала еси омрачити святыню души твоея, святая страдалице Матроно.
Богородичен: Явлении Твоими утешала еси отроковицу Матрону и благословение и помощь благодатную даровала еси ей, преблагословенная Дево Марие, Мати Божия.
Седален, глас 7:
Благословение Матери Божией приявшая / на подвиг страдальческий во всем житии твоем, / благословение Ея и нам испроси, / блаженная страдалице Матроно, / да покровом славы ея ограждаеми, / в покаянии добре поживше, // внидем в радость Господа нашего.
Слава, и ныне, Богородичен:
Благословенная паче всея твари / Пречистая Дево Богородице Марие, / очисти наш смысл и волю укрепи / и сердце ко благочестию управи, / да тобою от бед охраняеми / в покаянии добре поживше, // внидем а радость Господа нашего.
Песнь 4
Ирмос: Услышах, Господи, / смотрения Твоего таинство, / разумех дела Твоя // и прославих Твое Божество.
Мала телом осталася еси от отрочества твоего, но дух твой взрастила еси в меру возраста Христова, пачеестественным бо терпением и непрестанною молитвою храмину Духа Святаго себе сотворила еси, и явилася еси Его обиталищем, чистая дево Матроно.
Аще и недвижимо в дому твоем прбывала еси, но духом твоим храмом Божиим привитала еси, и обитель Дивеевскую возлюбила еси, жаждущи монашеского жития, святая мати Матроно.
Тебе, люте страждущей, повеле Господь быти светом мира. Яви бо тя скорбящим утешение, колеблющимся утверждение, заблудшим вразумление, нечествующим обличение, проповедницу покаяния и спасения.
Богородичен: Источник исцелений явила еси в рабе Твоей Матроне, Пресвятая Мати Дево.
Песнь 5
Ирмос: Просвети нас повелении Твоими, Господи, / и мышцею Твоею высокою // Твой мир подаждь нам, Человеколюбче.
Милость Божию явила еси болящему жителю веси твоея, познавшему в тебе угодницу Божию, молитвенно милосердовав о нем, и чрез то восприяла еси новый тяжкий крест попечения о людех, во множестве стекавшихмя к тебе, угоднице Божия Матроно.
Апостолу Павлу подобна была еси Матроно, ты бо беды от сродник, беды от лжебратий, беды от врагов Христовых в тяжцей болезни терпящи, попечение о всех скорби своя тебе приносящих имела еси. Како возмогла еси ты понести вся сия? Поистине, сила Божия в немощи совершается!
Богородичен: Твое предстательство имущи, Пречистая, и Твоими молитвами лютых избавляеми, по долгу Тя вси благочестно величаем.
Песнь 6
Ирмос: Молитву пролию ко Господу, / и Тому возвещу печали моя, / яко зол душа моя исполнися / и живот мой аду приближися, / и молюся, яко Иона: // от тли, Боже, возведи мя.
Разорение благочестия и благоденствия постиже землю нашу, и людие страждущия во множестве стекахуся к тебе. Ты бо им ободрение, вразумление и укрепление веры подавала еси, мудрая старице Матроно.
Озаренная благодатию Святаго Духа, многия люди на подвиг мученический благословила еси, твердому стоянию в вере православной наставляя их, и укрепляя надеждою вечнаго блаженства.
Научила еси, мати, приходящих к тебе посты соблюдати, иконы почитати, храмом Божиим прилежати, чин священнослужителей чтити, и в чистоте хранити веру Православную, в нейже и нас молитвенно утверди.
Богородичен: О, Преблагая! Молитвами старицы Матроны укрепи нас и чад наших в роды родов до скончания века хранити веру Православную и благоговейно чтити Тя и Сына Твоего Христа Бога нашего.
Кондак, глас 8:
В немощех силу, в слепоте очи нетленныя обрела еси, / пребывающи на одре болезни, всюду яко птица духом носилася еси, / младенствующи телом, была еси мати скорбящим и обуреваемым; / темже чтущих твою память не остави в молитвах, / и помози нам избавитися от грехов покаянием // и улучити с тобою Царство Небесное.
Икос:
Отверзи ми устне, преблаженная, богоприятными твоими молитвами, предстоящи Богу, всеславная подвижнице, да воспою божественное твое житие, и возглаголю страдания твоя, яже на земли теплою любовию совершила еси, и крестоносица была еси непобедима, воздержание верою исправила еси и чистоту возлюбила еси.
Песнь 7
Ирмос: От Иудеи дошедше отроцы, / в Вавилоне иногда, / верою Троическою пламень пещный попраша, поюще: // отцев Боже, благословен еси.
Многими знаменьми и чудесы, прежде и ныне совершаемыми тобою, святая Матроно, свидетельствуеши, яко жив Господь Бог наш и жива святая Церковь Его, новых святых раждающая благодатию Его.
От раскола ревностно ограждала еси, мати, приходящих к тебе, обличая малодушных и с любовию похваляя твердых в исповедании Православия.
Любовию к Богу и ближним горела еси, егда в тяжцей болезни многия люди приимала еси, утешая и вразумляя их. Не остави и нас попечением твоим, ибо любы николиже престает.
Богородичен: Исполни, Милостивая, радости сердца наша в празднестве угодницы Твоея, и сподоби нас, Владычице, предстательством Твоим улучити радость вечную, уготованную от Бога любящим Его.
Песнь 8
Ирмос: Царя Небеснаго, / Егоже поют вои Ангельстии, // хвалите и превозносите во вся веки.
Блажени изгнани правды ради, глагола Господь, яко тех есть Царство Небесное. Воистину блаженная и ты, мати Матроно, сподобльшаяся изгнания от безбожных и злых.
Отторгнута была еси от людей твоих и принесена была еси пред судилище нечестивых, и узы претерпела еси, славная Матроно, Христа, Творца всех и Владыку, Бога Слова проповедающи.
Господу Богу дар честен принесла еси в житии твоем, исповедничеством скончавши тяжкое злострадание твое, мзду прияла еси, блаженная Матроно, Царство Небесное и вечнующее наслаждение.
Богородичен: Ангельскую песнь воспоим Ти, всепетая Владычице Богородице, Бога бо от ангельских сил воспеваемого плотию родила еси, Пречистая.
Песнь 9
Ирмос: Воистину Богородицу / Тя исповедуем, / спасеннии Тобою, Дево Чистая, // с Безплотными лики Тя величающе.
Надеющихся на тя не остави, но якоже дальним и не знавшим тя помогаеши, тако и нам буди помощница в нуждах наших, от бед и страстей избавляя.
Аще и грешни и нерадивы есмы, обаче радость Небеснаго Царствия улучити желаем, юже исходатайствуй нам молитвами твоими, да присно славим тя, святая мати Матроно.
Богородичен: Славнейшая небесных воинств, прославившая рабу Твою Матрону, сподоби нас, Дево Мати Божия, видети небесную славу ея.
Светилен, глас 1:
Светом духовным просветил еси, Спасе, / света вещественнаго измлада лишенную / святую исповедницу Матрону, // великую угодницу Твою.
Слава, и ныне: Богородичен:
Свет миру рождшая Господа, / просвети помраченную страстьми душу мою / и сподоби мя видети, Владычице, // свет невечерний Царствия Его.
Стихиры на хвалитех, глас 4:
Воспоим, вернии, хвалебную песнь / Христу Богу нашему, / дивному во святых Своих, / и памяти блаженныя Матроны, / страдалицы и исповедницы, / да молитвами ея очистимся от греховныя скверны // и унаследим Царство Небесное.
Воспоим, вернии, / Христа Бога нашего, / возжегшаго во мраце безбожия / светильник веры и благочестия, / блаженную страдалицу Матрону, / да взирающе на подвиги ея // научимся вере и терпению.
Да радуется небо и земля / в явлении новыя чудотворицы, / блаженныя исповедницы Матроны, / та бо ближним и далече сущим / дарует вразумления и исцеления / и молится Христу Богу нашему // о спасении душ наших.
Слава, глас 8:
Слава Тебе, Христе Боже наш, / воздвигшему в стране нашей, / погруженной в пучину безбожия, / новомученики и исповедники Твоя, / явившия миру силу Православия: / в них же яко звезда светлая сияет / святая угодница Твоя, / блаженная исповедница Матрона; / от вышеестественныя скорби и терпения / в славу небесную прешедшая / и земным нам даром чудес помогающая, // еяже молитвами помилуй нас.
И ныне, глас тойже:
Владычице, приими молитвы раб Твоих / и избави нас // от всякия нужды и печали.
На Литургии
Апостол, к Галатам, зачало 208.
Евангелие от Луки, зачало 106.
Tags: Минея Дополнительная, богослужебные тексты, сканированное, служба
Subscribe

  • Post a new comment

    Error

    Anonymous comments are disabled in this journal

    default userpic

    Your IP address will be recorded 

  • 4 comments