Уставщик (ustavschik) wrote,
Уставщик
ustavschik

Category:

Канон в честь Ковадонгского чуда Божией Матери

Сегодня в нашем церковном календаре — празднование в честь Испанской (Ковадонгской) иконы Божией Матери (воспоминание чуда, совершившегося в 718 году). Подробнее об этом великом чуде можно посмотреть в моей публикации 2017 года. К празднику выкладываю канон в честь Ковадонгского чуда, составленный в 2018 году. Автор гимна пожелал остаться неизвестным. Текст публикуется по авторской машинописи, цензурными инстанциями пока не рассматривался.

Празднование Пресвятей Богородице, честнаго и славнаго ради явления иконы Ея Испанския
Тропарь, глас 4:
Испанския страны Заступница, православным во бранех Поборница, Ангелом Царица, земнородным Ходатаица от запада днесь прииде к православному русскому языку, чудеса яко дождь кропящи, недуги отгоняющи, покаяние и очищение дарующи; приидите убо, христолюбивии людие, ко освящения источником усердно притецыте, радость и спасение почерпите. Обновляет бо и сердца и души, телес исцеляет немощи, и всем вся яже ко спасению подавает полезная Едина Пречистая.
Канон, глас 4, имеяй краегранесие по азбуце.
Песнь 1
Ирмос: О
тверзу уста моя:
Аще и немощни суще, обаче с Вышнею помощию на пение дерзаем, в похвалу Пречистыя Владычицы, кланяющеся честней Ея иконе, и славяще Тоя чудеса.
Блажат Тя на небесех Ангельстии лицы, на земли же верных поют собори, от рода в род поведающе милость Твою, и славяще Твоя чудеса.
Внегда скорбети ми, воззвах из глубины души моея ко Пречистей, древния милости Ея помянув, и еже в человецех безчисленная чудеса.
Гнева чада сами грехми нашими содеяхомся, но Ты, Дево, Единаго Безгрешнаго во утробе Своей вмещьши, Божию Царствию наследники нас показала еси.
Песнь 3
Ирмос: Т
воя песнословцы, Богородице:
Древле Аннину молитву услышав Бог, Самуила из чрева ея произведе, да судит Израилю, ныне убо Пресвятая вернаго воеводу Пелагия избра, верным на избавление.
Егда Слова ради трудяся, племенам и языком благовестя, Павел до Испании прошед, истины насея семя, ныне же сие обильный клас принесе, Богородицы молитвами.
Жизнь нам Христос, и смерть приобретение, реша иже с Пелагием доблии. Не боимся убивающих тело, Тому бо единому воинствуем, Иже от Девы прииде на спасение наше.
Зело желанен ти есть Град Небесный, и со святыми житие, Пелагие. Но верных ради продлил есть Господь дни твоя на земли, иже на варвары победами венчав тя.
Седален, глас 8.
Подобен: П
овеленное тайно:
Молитву Матере исполняя, Божественным милосердием подвизаемь Царь Славы, малому христианскому останку, иже в горах от сопостат последняго убежища ищущу, паче надежды победу дарует, яко да от малаго семене, паки благочестия сад во Испанстей стране возрастет. Мы же, преславнаго чудесе обновляюще память, Приснодеве верою зовем: радуйся, Невесто Неневестная.
Песнь 4
Ирмос: С
едяй в славе:
Земля сущи доброплодная, яже прекрасен Крин израсти, благоухание безсмертия источающь мирови, земли, Павловыми труды насеянней, не попустила еси обуяти неверствием.
Ига измаильтеска христианы спасающи, Царский град многажды защитила еси честною ризою Своею, от образа же Твоего испаняном верным победу преславно даровала еси.
Иисусова пречистая Мати, Пелагию воеводе Твоему Крест Сына Твоего и Бога, яко оружие неодолеемое вручила еси, сим бо вернии побеждаем темнаго миродержца.
Крест Христов от древ дуба сотворь Пелагие, на враги устремился еси, силою всепобедною Небеснаго Царя препоясан, со дерзновением вопия: слава, Христе, силе Твоей.
Песнь 5
Ирмос: У
жасошася всяческая:
Лепо есть дела Божия проповедати, и яко Герман патриарх Богородицу благодаряше о града спасении, и Дамаскин о исцелении, тако и людие Испанстии ликоваху, Тоя скорую помощь во брани славяще.
Мене острови ждаша и корабли Фарсийстии, привести издалеча чада твоя, да созиждут стены твоя, Исаия древле Иерусалиму рече: днесь убо сынове Фарсийстии христианское царство разоренное возградиша, помощию Богоматере.
Новаго Завета непреложное показующи, Ветхаго писания проречения исполняющи, страна Фарсийская, ревностию по благочестии возгоревшися, доблестию чад своих хвалится, вражию сокрушших силу.
Обнаженных от всякия мирския надежды, от всякия человечи помощи, во броню упования облекла еси, противу зловерных еже свыше препоясавши силою, истинная Воеводо, Яже всем воспевающим Тя спасение подаваеши.
Песнь 6
Ирмос: Б
ожественное сие и всечестное:
Познана быша в мире чудеса Твоя, яже верным несуща спасение от варварския руки, якоже во Влахерне, и днесь в Испанстей стране, но и в велицей Русии, даже до днесь не иссякающая.
Русская земля яко иное небо, от востока и до запада, от юга и до севера, безчисленными звездами сияет, еже есть чудесы и знамении от святых икон Твоих, Владычице.
Сладости райския вкусят, и Бога уже не в гадании, но лицем к лицу узрят, иже до смерти Христа исповедаша, и Богоматере багряницу мученически кровьми украсиша.
Твой всечестный образ, Пречистая, Испанскую страну озаряет, и над Афонскою горою милости простирает покров, и яко крепкое забрало Русию храня от напастей вражиих.
Кондак, глас 8.
Подобен: В
збранной Воеводе:
Взбранной Воеводе Испанския земли, Русии неложному упованию, чудес и исцелений Подательнице, празднественная пения приносим, вернии. Святолепно убо чтущих пречестную икону Твою, Владычице, от всяких скорбей и бед свободи, да зовем Ти: радуйся, Невесто Неневестная.
Икос
Ангельских чинов благоговению подражающее, земнии, радостию и страхом Богоневесте послужим. И собравшеся в церковь Ея со свещами и кадилы, молитвы и хваления единеми усты возгласим, вопиюще:
Радуйся, Яже Бога Слова во чреве Твоем вмещшая;
радуйся, Яже земных безсловесия избавльшая.
Радуйся, Яже глас радования от Ангела услыша;
радуйся, Яже Радость неконечную мирови породи.
Радуйся, Яже возлюбленнаго Твоего Сына и Бога от гроба жива прияла еси;
радуйся, яко воскресение и живот вечный ходатайствуеши.
Радуйся, Яже во успении Твоем на небо вознесена;
радуйся, Яже в Небесное Царствие возводящи верныя.
Радуйся, яко Испанию агарянскаго зловерия свобождаеши;
радуйся, яко Русию от погибельнаго безбожия спасаеши.
Радуйся, Невесто Неневестная.
Песнь 7
Ирмос: Н
е послужиша твари Богомудрии:
Уже не первым благочестием сияет страна Испанская, латинскими догматы смущена, ты же, о Русие, храни святую веру якоже прияла еси, вопиющи: препетый отцев Господь и Бог, благословен еси.
Фараона мысленнаго избегающее, вернии, Чермное море невлажно пройдем, Пречистыя Девы помощию, да в землю млеко и мед точащу внидем вопиюще: Иже отцев Господь и Бог, благословен еси.
Хранящи Сына Твоего Церковь от ереси и раздора, и всякаго порока невреждену соблюдающи, подаждь нам заповеди Его творити, Пречистая, яко да вси поем: Иже отцев Господь и Бог, благословен еси.
Отчих недр не оставль, во утробу Девы Марии, предочищену Духом, сниде, Безначальне Слове, да спасеши вся, иже православною верою зовущия: препетый отцев Господь и Бог, благословен еси.
Песнь 8
Ирмос: О
троки благочестивыя в пещи:
Царице, Яже вышнему Царствию сподобляющи верных, буди нам Помощница на земли же и в мори, в сем убо веце и в будущем Хранительница, Господа поющим делы, и превозносящим Его во веки.
Чадом Твоим, Пресвятая, идеже убо от злочестивых ратуемым, Крестом Сына Твоего победу подаждь, якоже Константину царю и Пелагию, и Александру Невскому, и Димитрию на Мамая безбожнаго.
Шестокрилатый серафим пламенным оружием древле праотцем врата рая загради, но Ты, Пречистая, Небесному Царю врата бывши, паки рай отверзла еси нам, Христа поющим во веки.
Щедрот Твоих, Мати, никий же ум изочтет, и чудес яже в концех вселенныя: никто убо от Тебе забвен бысть, никто призвав Тя в нужди, тощь отыде, но кийждо спасаем поет Тя во веки.
Песнь 9
Ирмос: Р
ождество Твое нетленно явися:
Ездяй на херувимех, на крилу ветреню восходяй, Иже с небесе громы и стрелы испускаяй, паки стадо Свое спасе, поразив ненавидящих е, тем Тя, Богородице, величаем.
Юже от века избра Себе пресветел чертог, приими, Спасе, молитву Матерню, о мире всего мира, и о всякой души, Твоея милости чающей, да вси Богородицу величаем.
Яже всякия вышши твари, приими хвалы яже в святей церкви Ти возносимыя, страну нашу соблюди, мир утверди, церквам единомыслие даруй, да Тя, Богородице, величаем.
О всеблагая Царице и Мати, покланяемся честному образу Твоему, и немолчно радуйся о безчисленных милостех Твоих вопием, купно с небесными вои Тя величающе.
Tags: Минея Дополнительная, апрель, богослужебные тексты, канон, тропарь/кондак, чудо в долине Ковадонга
Subscribe

  • Post a new comment

    Error

    Anonymous comments are disabled in this journal

    default userpic

    Your IP address will be recorded 

  • 0 comments