Уставщик (ustavschik) wrote,
Уставщик
ustavschik

Category:

Акафист преподобному Нектарию Бежецкому

Выкладываю в «Уставные заметки» акафист преподобному Нектарию, игумену Введенскому, Бежецкому чудотворцу (†1494, память 3 апреля). Акафист воспроизводится по брошюре «Преподобный Нектарий Бежецкий», выпущенной в 1994 году (без прочих выходных данных) в серии «Исконные святые Тверской земли» (текст акафиста — на стр. 9 – 16) к 500-летию со дня преставления преподобного. Текст был подвергнут осторожной редактуре, поскольку набирался он (сам по себе не самый грамотный) весьма неряшливо; я постарался убрать из текста хотя бы самые грубые языковые ошибки. Для Саратовской земли преподобный Нектарий значим тем, что имя святого заступника Бежецка носил в монашеском постриге приснопамятный епископ Саратовский и Вольский Нектарий (Коробов; 1942 – 1994), выросший в Бежецке и начинавшей в нём своё священное служение. В этом году исполняется 50 лет со дня иерейской хиротонии приснопамятного Владыки.

Акафист преподобному Нектарию Бежецкому
Кондак 1
Избранному на служение Богу в чине ангельстем, добре Господеви послужившему и преподобне пожившему, ныне же на небесех с лики ангельскими и всеми святыми водворяющуюся, тебе, отче наш Нектарие, яко великому о нас пред Богом ходатаю, смиренныя сия хваления усердно приносяще, с любовию зовем: Радуйся, преподобне отче Нектарие, иноков светлое украшение.
Икос 1
Ангел земный и человек небесный был еси, богоносне отче Нектарие, егда гласа Евангелия добре послушав, и взем крест свой во след Христа усердно потекл еси и в леса Бежецкия вселився, в них равноангельское житие показал еси. Тем же подвиги твоя достойно почитающе, ублажаем тя похвалами сими:
Радуйся, отечества твоего изрядное украшение.
Радуйся, града Бежецка Божественное просвещение.
Радуйся, богатство земное нивочтоже вменивый.
Радуйся, вся имения твоя, от родителей твоих тебе оставшияся, нищим и немощным разделивый.
Радуйся, в раздаянии того небесныя блага получивый.
Радуйся, преподобне отче Нектарие, иноков светлое украшение.
Кондак 2
Видев сердцеведец Господь души твоея чистоту и помышлений, подаде тебе крепость и силу противостояти искушениям, от мира, плоти и диавола находящим, да избегнув всех земных попечений, невозбранным помыслом и чистым сердцем Богу Единому поработаеши, поя Ему: Аллилуиа.
Икос 2
Разумев жития сего прелесть временну быти и скоропогибающу, потщался еси единаго нетленнаго и николиже оскудевающаго сокровища во Христе взыскати, и яко елень на источники водныя, сице устремился еси и другия удовлити, зовущия тебе таковая:
Радуйся, Божий избранниче, искушеньми мира сего никакоже прельстивыйся.
Радуйся, мудрый странниче, небеснаго отечества взыскавый.
Радуйся, вольную нищету Христа ради паче богатства возлюбивый.
Радуйся, чистоту души и тела твоего Христу непорочно соблюдый.
Радуйся, сердце твое любовию Того сладце уязвивый.
Радуйся, умом твоим непрестанно Тому предстоявый.
Радуйся, преподобне отче Нектарие, иноков светлое украшение.
Кондак 3
Силою благодати Божия укрепляем, удалился еси бегая мира суетнаго и водворился еси в лесах Бежецких, в дубенятах [1], чая Бога спасающаго Тя от малодушия, и тамо место обрет, келийцу малу создав, поучался еси мысленно на гору добродетелей восхождению, непрестанно поя Богу: Аллилуиа.
Икос 3
Имея едино попечение, како угодити Господеви, добрым подвигом подвизался еси, яко добр воин Иисус Христов, да возможеши козни вражия одолети и победитель тех явитися. Сего ради ублажаем тя:
Радуйся, ради Господа твоего не имевый где главу преклонити, обычнаго человекам жилища не стяжавый.
Радуйся, покров — небо, одр же — землю точию имевый.
Радуйся, первому новыя благодати Крестителю Иоанну подражавый.
Радуйся, подобно тому дивиим былием земным питавыйся.
Радуйся, смирением высокая, нищетою богатая дарования стяжавый.
Радуйся, преподобне отче Нектарие, иноков светлое украшение.
Кондак 4
Бурею неистовых страстей одержими, разбойницы на тя нападоша и келийцу твою разориша. Ты же незлобив сый молился еси Богу не поставити им греха сего, сам же ино место, суровейшее, обреет, на вящия подвиги устремился еси, Богу благодарения возсылая, пел еси: Аллилуиа.
Икос 4
Видя, преподобне, возлюбленнаго ти сродника Луку к тебе грядуща, зело удивился еси, и тек в сретение тому, облобызая его с любовию, Бога же вельми благодарил еси, яко такова юна отрока на безмолвное житие приведе, его же приим, на участие подвигов твоих соделал еси. Темже слыши сия:
Радуйся, монашескаго жития правило изряднейшее.
Радуйся, безмолвия образе любезнейший.
Радуйся, лествице духовнаго восхождения.
Радуйся, трудов постнических прохождение.
Радуйся, праведною жизнию Господу угодивый.
Радуйся, преподобне отче Нектарие, иноков светлое украшение.
Кондак 5
Боготечная звезда явился еси сроднику твоему, наставляя его на стезю добродетелей, якоже бо звезда оная волхвам явльшаяся вертеп рождшагося на земли Господа показа, тако и ты Господа, в сердцах ищущих Его почивати изволящаго, тем показал еси, научая непрестанно воспевати Ему: Аллилуиа.
Икос 5
Слышав отец отрока, яко сын его купно с тобою в лесу в благоугождении пребывает, ослеплен духом злобы, не разуме прославити о сем Бога, но в ярости исполнился еси досаждения тебе, преподобне, со словесы укоризненными. Ты же кроток сый и смирен сердцем, ничтоже противу вещал еси, в тайне сердца своего о обращении палимаго молился еси. Сего ради зовем ти:
Радуйся, кротости и незлобия рачителю.
Радуйся, от брата твоего по плоти оскорбления и поругания приемый.
Радуйся, по словеси Евангельскому не противитися злу, ничтоже вопреки отвещавый.
Радуйся, возлюбленнаго ти юношу духовно воспитавый.
Радуйся, лишеннаго того сожительства, зело огорчивыйся.
Радуйся, преподобне отче Нектарие, иноков светлое украшение.
Кондак 6
Проповедует дубовый лес Бежецкий и чудеса твоя, отче преподобне Нектарие, ты бо крест Христов на рамена твоя взем, усердно и неуклонно Тому последовал еси, с Павлом Апостолом дерзновенно глаголяй: вся могу о укрепляющем мя Христе; Ему же предстоял еси умом и сердцем, зовый: Аллилуиа.
Икос 6
Возсия свет познания человеколюбнаго смотрения Божия о спасении коегождо человека в сердце брата твоего, преподобне, егда узре он сына своего, нуждею от тебе уведеннаго, смертоносным змия уязвления мертва лежаща, познав убо грех свой, раскаявся и возвратився к тебе поведа о приключшемся, зело плачася прощения прося. Ты же слышав о смотрении Божии, дивяся, повелел еси отрока при пещере твоей погребсти, да над гробом его молитися возможеши. Приими убо от нас сицевая:
Радуйся, яко твоею молитвою ученику твоему нуждею в мир влекомому, никакоже тамо возвратитися попустивый.
Радуйся, яко смерть того не смерть, а паче преселение в жизнь вечную явися.
Радуйся, яко сею смертию сына, ослеплен сый духовными очами, просветися.
Радуйся, яко много может молитва твоя, яко молитва праведника.
Радуйся, незлобием твоим ярость брата на кротость преложивый.
Радуйся, того к покаянию приведый.
Радуйся, преподобне отче Нектарие, иноков светлое украшение.
Кондак 7
Хотяй душу свою спасти, о плоти твоей всяко небрегл еси, на земли бо лежанием, пощением же и бдением себе изнуряя, плоть твою духови совершенно покорил еси и единаго хлеба животнаго Иисуса сладкаго взыскал еси, Емуже во всенощных стояниях, яко ангел безплотен немолчно пел еси: Аллилуиа.
Икос 7
Дивный воистину образ подвижничества показал еси, отче, в дупло бо древесное вместо келлии вселился еси, всяку тесноту претерпевая, по апостольскому словеси: лишен, скорбящ, озлоблен, аще весь мир не бе достоин еси тебе. Приими убо, отче, аще и скудное, но с любовию тебе приносимое хваление сие наше:
Радуйся, терпения столпе неподвижный.
Радуйся, мужества духовнаго адаманте твердый.
Радуйся, в бреннем телеси твоем, яко же и в души твоей Бога прославивый.
Радуйся, еще жив сый Христу сраспныйся и Тому умерый.
Радуйся, образом подвижничества твоего Ангелы удививый.
Радуйся, тем полки демонския отгнавый.
Радуйся, преподобне отче Нектарие, иноков светлое украшение.
Кондак 8
Странно бе пастырем в необитаемой пустыне узрети человека, в кожану ризу одеяна, необувенна и без покрова главнаго, под лучами солнца палящаго на горе стояща. Текше убо в селение поведаша людям, призывающа их, да шедше видят сего ангела во плоти и прославят Дивнаго во святых Своих, поюще Ему: Аллилуиа.
Икос 8
Все жители селения того, слышавше от пастырей о твоем в пределах их пребывании, возрадовася и Бога вельми благодариша, таковую благодать им тобою даровавшего, к тебе же, отче, приити потшашася, благословения и молитв твоих просяще, и тако возглашаша ти:
Радуйся, града нашаго светильниче всесветлый.
Радуйся, молитвенниче и предстателю о нас пред Богом теплый.
Радуйся, пастырю и отче наш предобрый.
Радуйся, недугов наших телесных врачу безмездный.
Радуйся, душевных наших язв целителю благодатный.
Радуйся, преподобне отче Нектарие, иноков светлое украшение.
Кондак 9
Всякое естество ангельское радуется о единем грешнике покаявшемся и на добродетельное житие обращающемся, кольми паче возрадовашася вси Ангели Божии, видяще твое не точию добродетельное, но и воистину равноангельское житие, емуже ты и приходящия к тебе ученики твоя наставлял еси, и собор иночествующих ко Христу привел еси, вопиющих Ему: Аллилуиа.
Икос 9
Витийства риторские, аще и много глаголют в похваление преподобных пустынножителей, но никакоже возмогут по достоянию воспети я: тии бо яко звезды на тверди церковней десницею Творческою возженныя, светло сияющия, мглу страстей земных прогоняют и к небесному отечеству странникам земным путь указуют, в нихже и ты, отче преподобне, сияеши и тако звати тебе научаеши:
Радуйся, звездо светозарная, солнце мысленное, нам путь указующее.
Радуйся, наставниче и учителю наш премудрый.
Радуйся, сосуде земли, гноение душевное отъемлющия.
Радуйся, жертва самосожженная Агнцу Божию, за мир закланному.
Радуйся, Владыце мира служителю благоприятный.
Радуйся, преподобне отче Нектарие, иноков светлое украшение.
Кондак 10
Спасти восхотеша благочестивыя людие собрата своего от мучащаго его диавола, нуждею привлекоша его к тебе, отче Нектарие, ты же милосердствуя о страждущем, молитвою и креста знамением духа прогнав, здрава того сотворил еси. Смирен же быв сердцем, недостойна и немощна себе быти сказуя, Богу Единому благодарение возсылати научал еси и пети Ему: Аллилуиа.
Икос 10
Стене подобную скалу каменную неприступныя высоты обрет, не устрашился еси взыти на ню и вселитися, яко бо елень от стрел на горы убегает, тако и ты стрел похвал человеческих и славы суетныя бегая, на неприступную гору возшел еси, идеже подвиги твоя усугубил еси, тем же слышиши сия:
Радуйся, еленю мысленный, на высоту боговедения возшедый.
Радуйся, славы человеческия избегнути тщавыйся, но от прославленнаго тобою Господа прославленный.
Радуйся, дар чудотворения от Того приемый.
Радуйся, бесы от человек прогоняяй.
Радуйся, от коварства и искушений тех соблюдаяй.
Радуйся, на стезю добродетели нас наставляяй.
Радуйся, преподобне отче Нектарие, иноков светлое украшение.
Кондак 11
Пение благодарственное принесе тебе муж оный, тобою от беснования исцеленный, и припад, омываше нозе твои слезами и лобызаше. Такоже и вси людие, чудо сие тобою сотворенное видевше, похвалами тя почтоша, преподобне, Бога же таковую благодать тебе даровавшего, вельми благодариша, поюще Ему: Аллилуиа.
Икос 11
Светозарное житие твое, яко свеща десницею Вышняго возженная, не возможе утаитися по словеси Евангельскому: никтоже вжег светильник под спудом поставляет его, но на свещнице, да светит всем. Тако услышано бысть повсюду и о твоем равноангельском житии, еже увидев царь болгарский Петр, вожделе видети тя и благословение от тебе прияти. Послав убо к тебе от себе моление, злата довольно в дар принесе. Ты же отвечал еси царю: злата твоего не требую, любовь же твою приемлю, обаче в житии сем временнем не имамы друг друга видети. Печален бысть царь о словеси сем, но исполнь сый любве к тебе, сия приглашаше тебе:
Радуйся, над всеми мира сего прелестьми преславно воцаривыйся.
Радуйся, злато, яко блато вменивый.
Радуйся, нищету паче богатства возлюбивый.
Радуйся, тою небесное наследие купивый.
Радуйся, Царя царствующих воине изряднейший.
Радуйся, Господа господствующих служителю предобрый.
Радуйся, преподобне отче Нектарие, иноков светлое украшение.
Кондак 12
Благодатию Божией уведев время от жития сего отшествия, призвал еси ученики твоя, последнее благословение им подал еси, завещая пустыннаго жития уставы неуклонно соблюдати, наипаче же во устах и в сердце имя сладчайшее Господа Иисуса непрестанно имети, и тако в руце Господа душу твою предал еси, не преставая пети Ему: Аллилуиа.
Икос 12
Поюще подвиги и труды твоего равноангельского жития и множество чудес твоих, имиже прославя тя Христос, ублажаем тя, яко таинника Божия благодати, с любовию зовуще тебе:
Радуйся, благий рабе и верный, вшедый в радость Господа твоего.
Радуйся, небеснаго Иерусалима гражданине блаженный.
Радуйся, Царства Божия наследниче.
Радуйся, сеявый слезами, радостию пожинавый.
Радуйся, лицезрением наслаждаяйся сладчайшаго Иисуса, Егоже в сердце твоем носил еси.
Радуйся, преподобне отче Нектарие, иноков светлое украшение.
Кондак 13
О, преподобне и богоносне отче Нектарие, тебе на небесах ныне молящемуся, мы, грешнии, на земли ныне странствующия и многими напастьми и беды обуреваемии, усердно молимся: помози нам прочее время жития нашего безбедно прейти в покаянии и исправлении зол, содеянных нами, да помиловани бывше от Праведнаго Судии и Господа нашего, сподобимся с тобою и всеми святыми всегда воспевати Ему: Аллилуиа.
Кондак 13 читается трижды, затем Икос 1 и Кондак 1.
Молитва
Земная звезда чудесная, облиставшая пределы града Бежецка, предивный постниче и угодниче Божий, отче Нектарие, преподобных радование, Церкви Русския украшение, крепкий адаманте веры православныя и живый свещниче, всю землю Русскую светом правды Божия осиявый!
Ты еси скорый помощник с верою и любовию к тебе прибегающим и великий предстатель ко Господу о всех нас. Приими, преблаженне, наша моления, да вси тобою наставляеми людие словенстии, пребывают союзом братския любве связуеми в мире и благочестии, и да избавит их Господь видимых и невидимых враг, от нашествия иноплеменных, от недуга, глада и всякия скорби, наипаче же от искушений врага темнаго. Предстоящим же зде и молящимся пред пречистым твоим образом испроси, преподобне, у Господа Бога нашего вся, яже ко спасению они просят, да вси с тобою прославляем Отца, и Сына, и Святаго Духа, ныне и присно и во веки веков. Аминь.

[1] Микрорайон Бежецка, расположенный на месте, где среди дубравы, по преданию, стояла Введенская обитель преподобного Нектария, носит до сих пор название «Дубенята».
Tags: акафисты, апрель, богослужебные тексты, сканированное
Subscribe

  • Post a new comment

    Error

    Anonymous comments are disabled in this journal

    default userpic

    Your IP address will be recorded 

  • 2 comments