Уставщик (ustavschik) wrote,
Уставщик
ustavschik

Category:

Служба святителю Киприану, митрополиту Киевскому и всея Руси

Предлагаемая читателям «Уставных заметок» служба святителю Киприану, митрополиту Киевскому и всея Руси (†1406, память 16 сентября и 27 мая) составлена выпускником Сретенской духовной семинарии 2017 года Павлом Филипповым. Текст публикуется «as is» по авторской машинописи; править некоторые замеченные в службе языковые и литургические огрехи я не стал (знающие люди могут, например, обратить внимание на 2-й тропарь 7-й песни). Тропари и кондаки, составленные протоиереем Сергием Правдолюбовым, заимствованы составителем из сентябрьского тома «Зелёной» Минеи с двумя изменениями: изменён порядок тропарей (основным поставлен второй, как более краткий); первый кондак (как более пространный) поставлен на позицию икоса при сохранённом втором кондаке.

Месяца сентября в 16-й день
Святителя Киприана, митрополита Киевского и всея Руси
На великой вечерни
Поем: Б
лажен муж: 1-й антифон.
На Г
осподи, воззвах: стихиры праздника 3 и святого 5, глас 8:
На Единаго Бога упование свое возложил еси, / сопричастен был еси Божественному житию, / трудами своими и любомудрием велиим / стяжал еси людское держание, / ревностно страху Божию учивый, / святителю Киприане достохвальне, / молися о нас ко Господу, / да дарует нам разрешение грехов // и велию милость.
Закон Божий храняше в сердце своем, / и се Господь изведе яко свет правду твою / и смуту церковную устави, / первосвятителем Московским тя сотвори, Киприане, / зане бо ревновал еси о мире / и спасении мира.
Якоже взывал еси к Петру чудотворцу: / аще хощеши, подаждь ми болезни исцеление, / да достигну твоего престола / и поклонюся честным твоим мощем, угодниче Спасов, / такожде и мы ныне вопием ти, отче Киприане, / ведая, яко велие дерзновение имееши ко Господу: / помози нам и направи ны, / да предстанем достойни пред Престолом Божиим.
Скорби многия претепел еси, / взем крест свой со смирением велиим и кротостию / и молитвенником за люди своя соделался еси, / на святительском седалище седе, святителю. / Непрестанно украшаеши Церковь Христову / и молиши Владыку и Бога своего, / всем, с верою к Нему притекающым, // подати мир и велию милость.
Слава, глас 2:
Ныне страна Российская / о тебе хвалится и веселится, / имеющи тя, заступника непостыднаго, / якоже умолил еси Владычицу нашу, / спасти Царский град от нахождения поганых. / Образ срете честный Богоматере / и облобыза, яви людем покланяющымся / и со слезами вопияху Тебе: // избави рабы Твоя от всякия беды и печали.
И ныне, праздника.
Вход. Прокимен дне и чтения:
Притчей чтение (главы 3 и 8):
Память праведнаго с похвалами, и благословение Господне на главе его. Блажен человек, иже обрете премудрость: и смертен, иже уведе разум. Лучше бо сию куповати, нежели злата и сребра сокровища. Честнейшая же есть камений многоценных, все же честное недостойно ея есть. Долгота бо дней, и лета живота в деснице ея: в шуйце же ея богатство, и слава. От уст ея исходит правда, закон же и милость на языце носит. Послушайте убо мене, о чада! честная бо реку: и блажен человек, иже пути моя сохранит: исходи бо мои, исходи живота, уготовляется хотение от Господа. Сего ради молю вас, и предлагаю мой глас сыновом человеческим: яко аз премудрость устроих совет, и разум и смысл аз призвах. Мой совет и утверждение, мой разум, моя же крепость. Аз мене любящыя люблю, ищущии же мене обрящут благодать. Разумейте убо незлобивии коварство, ненаказаннии же прилагайте сердца. Послушайте мене и паки, честная бо реку, и отверзу от устен правая: яко истине поучится гортань мой, мерзки же предо мною устны лживыя. С правдою вси глаголы уст моих: ничтоже в них стропотно, ниже развращенно: Вся права суть разумевающим, и проста обретающим разум. Научу бо вас истине, да будет о Господе надежда ваша, и исполнитеся Духа.
Премудрости Соломоновы чтение (главы 10, 6 и 9):
Уста праведнаго каплют премудрость: устне же мужей мудрых ведят благодать. Уста мудрых поучатся премудрости, правда же избавляет их от смерти. Скончавшуся мужу праведну, не погибнет надежда. Сын бо праведен раждается в живот, и во благих своих плод правды обымет. Свет праведным всегда, и от Господа обрящут благодать и славу. Язык мудрых добрая свесть, и в сердце их почиет мудрость. Любит Господь преподобныя сердца, приятни же ему вси непорочнии в пути. Мудрость Господня просвещает лице разумнаго. Постигает бо желающыя ю, прежде даже разумети ю, и удобь узрится от любящих ю. Утреневавый к ней, не утрудится, и бдяй ея ради, вскоре без печали будет. Яко достойных ея сама обходит ищущи, и во стезях ея является им благоприемне. Мудрости никогдаже одолеет злоба. Сих ради и рачитель бых доброты ея, и возлюбих ю, и поисках от юности моея. И взысках невесту привести себе, яко всех Владыка возлюби ю. Таибница бо есть Божия хитрости, и обретательница дел Его. Труды ея суть добродетели: целомудрию же и разуму та учит, правде и мужеству, ихже потребнее ничтоже есть в житии человеком. Аще же и многаго искусства желает кто, весть древняя, и быти хотящая разсмотрит: свесть извития словес, и разрешения гаданий, знамения и чудеса проразумеет, и сбытия времен и лет; и всем советник есть благ, яко безсмертие есть в ней, и благославие во общении словес ея. Сего ради беседовах ко Господу, и помолихся Ему, и рех от всего сердца моего: Боже отцев и Господи милости, сотворивый вся словом Твоим, и мудростию Твоею устроивый человека, да владеет бывшими от Тебе тварьми, и да управляет мир в преподобии и правде. Даждь ми Твоих Престолов приседящую премудрость, и не отлучи мене от отрок Твоих, яко аз раб Твой, и сын рабыни Твоея. Посли ю с Небес от святаго жилища Твоего, и от престола славы Твоея, да сущи со мною научит мя, что благоугодно есть пред Тобою, и наставит мя в разум, и сохранит мя в славе своей. Помышления бо смертных вся боязлива, и погрешительна умышления их.
Премудрости Соломоновы чтение (главы 4, 6, 7 и 2):
Похваляему праведнику, возвеселятся людие: безсмертие бо есть память его, яко от Господа познавается и от человек, и угодна Господу душа его. Возлюбите убо, о мужие, мудрость и поживете, восхощите ея и наказани будете: начало бо ея любы и соблюдение закона. Почтите премудрость, да во веки царствуете. Возвещу вам и не скрыю от вас таин Божиих. Яко Той мудрости наставник есть, и мудрых исправитель, и всякому смыслу и делу хитрец. И всем смыслом научит мудрость: есть бо в ней дух разумен и свят, и сияние света присносущнаго, и образ благости Божия. Та други Божия и пророки устрояет. Благолепнейши же есть солнца и паче всякаго сотворения звезд, свету сосуждаема обретается первейши. Та угождающих ей от болезни избави и настави на стези правыя. Даде им разум имети свят и сохрани я от ловящих, и подвиг крепок подаде им. Да разумеют вси, яко сильнее всего есть благочестие; и никогдаже преможет злоба мудрости, ниже прейдет злыя обличающи суд. Рекоша же в себе, помысливше неправедно: насильствуем праведному и не пощадим преподобства его, ни усрамимся седин старости многолетны. Будет бо нам крепость закон, и уловим праведнаго, яко неугоден нам есть, и противится делом нашим, и поносит нам отпадение закона, и обличает нам согрешения наказания нашего. Возвещает нам разум имети Божий и отрока Господня себе именует. Бысть нам на обличение помышлением нашим и тяжек нам есть, и видим, яко неподобно иным житие его и изменены стези его. В поругание вменихомся ему, и удаляется от путей наших, яко от нечистот, и блажит последняя праведных. Увидим убо, аще словеса его истинна суть, искусим, яже сбываются ему. Руганием и мукою истяжем его, да разумеем кротость его, и искусим беззлобство его, смертию безобразною осудим его, будет бо посещение от словес его. Сия помыслиша и прельстишася: ослепи бо я злоба их, и не разумеша таин Божиих и не разсудиша, яко Ты еси Бог Един, живота имеяй и смерти власть, и спасаяй во время скорби, и избавляяй от всякаго зла. Щедр и милостив, и даяй преподобным Своим благодать, и Своею мышцею гордым противляяйся.
На литии стихиры, глас 3:
Добрый рабе, благий и верный, / ревностный труженниче Христовы нивы, / источниче милости неиссякаемый, / наставниче верных Богомудрый, / святителю Христов Киприане, / даруй скорбящым утешение, / подай страстей исцеление, / вразуми неверныя люди, / да восславят Христа Бога, / моли Ему непрестанно о всех нас, // чтущих ныне святую память твою.
Слава, глас 4:
Празднуем тебе ныне во храме сем, / храмом себе Господа соделавша / очищением сердца своего от скверны / и Христа ради гонения претерпев, / смирение высокое показа, // и ныне неувядаемым венцем увязлся еси.
И ныне, праздника.
На стиховне стихиры, глас 2:
Днесь красуется и веселится / царственный град Москва, / иже приемый добраго пастыря, / святою верою назидающаго себе и люди / и Духом Святым молящагося, / в любви Божией паству свою соблюдающаго, / чающаго милости Господа и жизни вечныя. / Приидите ныне, праведника воспойте, / святителя мудраго восхвалите / и предстателя за ны молите / о мире и спасении душ наших.
Стих: Блаженни живущии в дому Твоем / в веки веков восхвалят Тя (Пс. 83:5).
Премудростию словес твоих, / Киприане приснославный, / уверил еси маловерныя, / и сердца верных возрадовал еси. / Ныне воспоим тя, Христова святителя, / Церкви утверждение, архиереев похвалу, / священников славу, мирян утешение. / Темже ти убо взываем: / молися о спасении душ наших.
Стих: Близ боящихся его спасение его, / вселити славу в землю нашу (Пс. 84:10).
Радуйся, слепых наставниче, / немощных крепкий заступниче, / своим вещанием укреплявшаго вои, / молящагося Владычице со слезами, / о спасении верных и поганых поражении. / И ныне Христа умоли / Отечество наше укрепити, / в единении люди сохранити / и веру правую утвердити, / да возможем праздновати светоносное твое преставление.
Слава, глас 8:
Благочестно последовал еси Христу, / усекнув плотское мудрование воздержанием, / на Святей Горе подвизавыйся, / святителю Христов Киприане, / столпе и утверждение Церкви Русския, / непрестанное Ея украшение, / вонми гласу моления нашего, / буди нам заступник крепкий / и молитвенник изряднейший пред Господем // да помилует нас и всякия скорби избавит.
И ныне, праздника.
Тропарь, глас 4:
Православия учителю, / просвещения ревнителю, / красото болгарския страны / и Руси достославный светильниче, / святителю отче наш Киприане, / моли Христа Бога // сохранити нам веру до скончания века.
Ин тропарь, глас 4:
Иже от Бога свыше Божественною благодатию совершен / и благими нравы украшен, / Духом Святым просвещен, / совершив святыню в страсе Божии, / сподоблен бысть благодати Божественнаго Духа, / пасый Церковь Божию Русския митрополии, / постом вся поборая, волнение претерпе, гонение преминув, / святаго Петра митрополита всегда себе в помощь призывая, / и сего помощника имея, / и того стопам последуя. / Служитель благоприятный, / заповеди Божия соблюдая, Духом Божиим наставляемь, / просвещая верныя люди учением словес твоих, / пощением украси житие свое, / ярем Господень измлада восприим, / и паче всех Христа возлюби. / Того ради и архиерейским седалищем почтен, / и, яко светозарное солнце, от Сербския земли произшед, / и по вся концы русския земли добродетелию просияв, / светило явися мирови, / и преставися ко Господу от сея жизни в вечный покой, / великий архиерею Божий, Киприане митрополите, / учителю и наставниче Русския земли, / всегда предстоя Престолу Пресвятыя Троицы, / моли Господа прилежно / об архиереях и о всех христианах, // да спасет тебе ради душы нашя.
На утрени
На Б
ог Господь: тропарь праздника, дважды.
Слава, тропарь святителя, и ныне, тропарь праздника.
По 1-м стихословии седален, глас 1:
Паству свою мрежею слова от неразумия отженил еси, / и заблудшия просвещая Божественною благодатию, / яко Христовы апостолы человеки к Богу привел еси. / Добродетелей на высоту возшед, славне Киприане, / темже яко друга тя ближняго Христова ублажаем, / славя светоносную и святую память твою.
Слава, и ныне, праздника.
По 2-м стихословии седален, глас 4:
Измлада разум имел еси непорочен / и, Божественный глас восприимше, / воспроповедал еси прилежно, святителю. / Присно верныя доброучительствова и ко Христу приводя, / архиерействовал богоугодно еси, преподобне.
Слава, и ныне, праздника.
Величание:
Величаем тя, / святителю отче Киприане, / и чтим святую память твою, / ты бо молиши за нас // Христа Бога нашего.
Псалом избранный:
Услышите сия, вси языцы, внушите вси, живущие по вселенней.
Уста моя возглаголют премудрость, и поучение сердца моего разум.
Приидите, чада, послушайте мене, страху Господню научу вас.
Благовестих правду в церкви велицей. Истину Твою и спасение Твое рех.
Повем Имя Твое братии моей, посреде церкве воспою Тя. Услышати ми глас хвалы Твоея и поведати вся чудеса Твоя.
Господи, возлюбих благолепие дому Твоего, и место селения славы Твоея.
Возненавидех церковь лукавнующих, и с нечестивыми не сяду.
Яко сохраних пути Господни и не нечествовах от Бога моего.
Уста праведнаго поучатся премудрости, и язык его возглаголет суд.
Правда Его пребывает в век века.
Священницы Твои облекутся правдою, и преподобнии Твои возрадуются.
Блажени живущии в дому Твоем, в веки веков восхвалят Тя.
По полиелеи седален, глас 4:
Пристанище спасительное показался еси, блаженне, / и сосуд богоизбранный, благодать изливающий, яко миро, / дарствующее верным гобзование щедрот. / Воспеваем тя ныне, святителю чудный, / нищих заступниче и исцелений подателю, / и молим ти ся: / поминай вся, поющыя тя, Киприане.
Слава, и ныне, праздника.
Степенна 1-й антифон 4-го гласа.
Прокимен, глас 4: Яко Бог судия есть: / сего смиряет, и сего возносит (Пс. 74:8).
Стих: Вся роги грешных сломлю, и вознесется рог праведнаго (Пс. 74:11).
Всякое дыхание: Евангелие от Иоанна, зачало 36:
Рече Господь ко пришедшым к Нему иудеем: Аз есмь дверь, Мною аще кто внидет, спасется, и внидет, и изыдет, и пажить обрящет. Тать не приходит, разве да украдет, и убиет, и погубит, Аз приидох, да живот имут и лишше имут. Аз есмь пастырь добрый, пастырь добрый душу свою полагает за овцы. А наемник, иже несть пастырь, емуже не суть овцы своя, видит волка грядуща и оставляет овцы, и бегает, и волк расхитит их, и распудит овцы. А наемник бежит, яко наемник есть и нерадит о овцах. Аз есмь пастырь добрый, и знаю Моя, и знают Мя Моя. Якоже знает Мя Отец, и Аз знаю Отца, и душу Мою полагаю за овцы. И ины овцы имам, яже не суть от двора сего, и тыя Ми подобает привести, и глас Мой услышат, и будет едино стадо, и един Пастырь.
По 50-м псалме стихира, глас 6:
Благочестия истинный проповедниче, / Церкви православныя светолитие, / святче Христов многочудный, / святителю отче наш Киприане, / тя ныне песньми похвальными почтим, / да твоими молитвами исправимся, / и ко Господу с упованием возопиим: // спаси душы нашя.
Канон праздника со ирмосом, на 6, и святителя, на 8.
Канон святителя Киприана, егоже краегранесие по алфавиту. Глас 6.
Песнь 1.
Ирмос: Яко по суху пешешествовав Израиль, / по бездне стопами, / гонителя фараона / видя потопляема, / Богу победную песнь / поим, вопияше.
Ангелогласен явился еси, святителю, / воспевая Христа Бога и Его Пречистую Матерь, / наветы вражеския отгоняя твоими молитвами, Киприане.
Благовестителей доброе наследие восприял еси, / и, искапая из устен твоих сладость Божественную, / напоил еси верных питием правды и добродетели.
Возсиял еси яко солнце полуденное, святителю Божий, / и светом своим тьмы врагов просветил еси, / Отечества нашего ради спасения и поганых поражения.
Богородичен: Грозу сопостатов и верных Заступницу / ныне согласно восхваляют небо и земля, вопиюще: / радуйся, Бога Родительнице и Хранительнице жизни нашея.
Песнь 3.
Ирмос: Несть свят, / якоже Ты, Господи Боже мой, / вознесый рог верных Твоих, Блаже, / и утвердивый нас на камени / исповедания Твоего.
Душеводче и святителю Киприане Богозванный, / на первосвятительства стязи многия приборствова преткновения, / последи же за терпение твое и молитвы богопочтенен быв.
Евангельския истины учитель и истый Христу подражатель быв / ко Владыце всяческих привел еси человецы мнози. / Темже проповедника тя правды и друга Христова вси именуем.
Жатву убо многу имел еси, святителю, / и делателем ревностным соделался еси, просвещая ю. / Се ныне молитвами твоими спасай нас, / яко твое есмы стадо и новая жатва.
Богородичен: Звезд большая и светлейшая еси, Луно, / Херувимов и Серафимов превышшая еси, Богородице, / Солнце правды прияла еси в Твоем чреве, Невместимаго Бога. / Темже Тя вси вернии песньми ублажаем.
Седален, глас 5:
Путем Божеству подобенства верно ходил еси, / прелесть лукавую попаляя и прилоги врагов отбегая, / верныя просветил еси, сыном Света являя ся, / лучами словес поведая славу Небесную, Киприане богоблаженне.
Песнь 4.
Ирмос: Христос моя сила, / Бог и Господь, честная Церковь / боголепно поет, взывающи / от смысла чиста, о Господе празднующи.
Запаление страстей угасил еси, преподобне, / умертвив плотское мудрование воздержанием. / Се ныне со ангели и архангели радующеся ликуеши, / мы же тебе смиренно просим молитися ко Господу / о грехов оставлении и спасении душ наших.
Исполнен сый благодати и разума Божия, / Егоже ради, яко солнце просиял еси, просвещая верных, / и Христа величал еси делами твоими, чудне. / Кто тя достойно восхвалит, святителей украшение и похвало?
Иераршаго служения образ достойный явился еси, / преподобен, незлобив, безскверен, якоже речено, / и своим предстательством верныя ограждаеши, Киприане святителю, / истинный защитниче и молитвенниче изряднейший пред Господем.
Богородичен: Кореню девства и цвете чистоты неувядаемый, / Владычице державная и Заступнице сирых, / воспеваем и славословим Тя ныне и во вся дни, / Тобою бо прииде всему миру Спасение.
Песнь 5.
Ирмос: Божиим / светом Твоим, Блаже, / утренюющих Ти души / любовию озари, молюся, / Тя ведети, Слове Божий, / истиннаго Бога, / от мрака греховнаго взывающа.
Любви Божией неразлучен быв даже по смерти, / благодатию обогащен и светом Вышняго озаряемь, святителю, / узрел еси неизреченную славу в Троице сущаго Бога / и ангельски ныне песненно Господа хвалиши.
Мрака языческаго не убояся, блаженне, / но молитвами твоими озарилися суть тьмы сопостатов. / Такожде и ныне верных можеши спасти, / моля Владыку всяческих очистити и просветити душы нашя.
Наветы и гонения смиренно терпяше, / и о досаждающих тя моляше непрестанно, Киприане, / яко Господь тебе бе помощник и не убоялся еси, / но благодаря, приял еси крест свой и служение Церкви, / да воспрославится имя Господне до века.
Богородичен: Огнесиянием Твоего образа, Пречистая, / благословися престольный град, / и молитвами Твоими грешницы к покаянию приведошася и разумению, / яко Владыце всех молиша о спасении и жизни вечней.
Песнь 6.
Ирмос: Житейское море, / воздвизаемое зря напастей бурею, / к тихому пристанищу Твоему притек, вопию Ти: / возведи от тли живот мой, / Многомилостиве.
Пастырю истинному и предобрейшему соображаяся, Киприане, / путевождем явился еси полезнствующим ко спасительному пристанищу, / вразумляя, просвещая, даруя надежду и упокоение.
Радуйтеся, вернии, и взыграйте, / яко имате скораго себе помощника на небесех / и в бедах крепкаго предстателя немощствующым, / молящася Христу Богу присно о всех нас.
Светонаставника тя, Киприане, именуем, / яко возлюбил еси селения Господни и в них вселился еси, / ныне же в сердца верных к Свету стези полагаеши, / да возвеселятся и прославят имя Господне.
Богородичен: Таинства страннаго и преславнаго Содетельницу Деву воспеваем, / яко Пресущественнаго родила еси Святым Духом, / и Сына Твоего жертвы крестныя Свидетельницу превозносим, / яко Приносящаго и Приносимаго во утробе восприяла еси.
Кондак, глас 6:
Святителю Христов, пастырю добрый, / учителю Небесныя мудрости, / светильниче света духовнаго, / Киприане досточудне, / не престай молитися за паству свою, / за любящих и чтущих тя, // града нашего крепкий заступниче.
Икос:
Необоримь столп Православия, / вере Христовой утверждение, / церквам украситель, премудрый учитель, / сербское воспитание, русское процветение, / Господнею любовию распалаемь. / Духу Пресвятому дом явися, / и душу, яко жертву непорочну, Господеви принесе, / досточудне и всечестне Киприане, святителю Христов, / сего ради вселися в широту райскую, / предстоя Христу в лице святых, / Емуже молися и спасай град и люди от поганых нахождения, яко да зовем ти: // радуйся, отче Киприане, учителю премудрый.
Песнь 7.
Ирмос: Росодательну убо пещь / содела Ангел / преподобным отроком, / халдеи же опаляющее / веление Божие, / мучителя увеща вопити: / благословен еси, Боже отец наших.
Удобоувядаемаго мира отлучился еси с юности / и на Святей горе вселился еси, молитвенниче, / с преподобными и праведными увеща непрестанно: / Богу нашему пойте и радуйтеся пред Ним.
Фелонию обличен благодати Христовы и митрою истины, / зане еси ты похвала Его, Киприане, и слава, / и со святители милость Его и спасение возвещаеши, вопия: / Богу нашему пойте и радуйтеся пред Ним.
Хвалебныя песни Богови воспеваеши, святителю, / с лицы ангелов и архангелов купно глаголя: / Господь наш есть Бог, творяй чудеса, / люди Своя яко овцы наставляяй, / Богу нашему пойте и радуйтеся пред Ним.
Богородичен: Царицу Небесную вси восхвалим, / якоже палата бысть всех Царя и Владыки, / восхотевша и победивша естества уставы. / Ныне же чудяхуся восклицаем: / Богу нашему пойте и радуйтеся пред Ним.
Песнь 8.
Ирмос: Из пламене преподобным росу источил еси / и праведнаго жертву водою попалил еси: / вся бо твориши, Христе, токмо еже хотети. / Тя превозносим во вся веки.
Чудодетеля Христа истиннаго сподвижника тя почитаем, / живот свой предавша Владыце всех и Богу святителя, / славою и честию увенчавшася, и вопием: / о спасении Твоем возрадуемся и превозносим Тя во вся веки.
Шестокрилатым подражая песнь победную припеваеши, святителю: / Свят, Свят, Свят Господь Бог Вседержитель, Иже бе и Сый и Грядый. / Тому умильно глаголем: избави нас от всякия скверны, / о спасении Твоем возрадуемся и превозносим Тя во вся веки.
Щедролюбца Христа ревнитель явился еси, / по вся концы земли Русския добродетелию просияв, / егоже молитвами, Боже, благодетельствуеши нам непрестанно, / мы же согласно Тебе воспеваем: / о спасении Твоем возрадуемся и превозносим Тя во вся веки.
Богородичен: Юноту юнот и Юницу юниц чистейшую величаем, / яко Девая родила еси Бога, / сокрушивша смерть и рая двери отверзивша нам, / и к Нему возопием: / о спасении Твоем возрадуемся и превозносим Тя во вся веки.
Песнь 9.
Ирмос: Бога / человеком невозможно видети, / на Негоже не смеют чини Ангельстии взирати; / Тобою же, Всечистая, явися человеком / Слово Воплощенно, / Егоже величающе, / с небесными вои Тя ублажаем.
Яко изрядный Владыце подобник, / учитель дивный премудрости и истины показался еси, / прилежно научение книжное стяжав / и людем верным живот во благочестии показуя. / Сего ради тя ублажаем.
Псаломски в себе глагола: / да скончается злоба грешных, и исправиши праведнаго, / и обидиму бе, благословляше тя досаждающих. / Терпением твоим стяжал еси Божественную благодать. / Сего ради тя ублажаем.
Фаворскою славою Господнею осененный, / яко иго Христово взем, добре понесл еси, Киприане, / и зерцало светлое и теплый молитвенник стране Российстей явился еси. / Сего ради тя ублажаем.
Богородичен: Ипостасное Слово Божие вместившую славословим / и песнь умильную приносим Ти, Владычице, / не оскудевай благодатною Твоею помощию, / на верныя люди Твоя, зовущыя: / радуйся, смертных к Богу дерзновение, радуйся, Невесто неневестная.
Светилен:
Славно спразднуем днесь светозарное торжество, яко во свете славы лица Божия предстоиши, святителю отче наш Киприане, помяни нас, хвалящих твою память.
Слава, и ныне, праздника.
Стихиры на хвалитех, глас 4:
Народи боголюбивии, / приидите ныне, премудраго иерарха восхвалим / и песньми почтим изряднаго ученика Христова, / истиннаго учителя и наставника нам, / просвещающа и освящающа верных сердца // учением словес своих и молитвами.
Людие многочисленнии / днесь собрашася славити Христа / и его вернаго поспешника и друга, / иже бе избран православных пастырем / и врагов поганых отгнал еси, яко волки. / Ныне же, предстоя пред лицем Господа, / заступи паству твою словесных овец // и молися, лютых избавляя ны.
Днесь веселием исполним наша сердца, / совершающе честную память твою, / блаженне отче Киприане, / егда бо агаряны восхотеша погубити христоименитое людство, / бысть яко столп светлый новому Израилю предводяща / и святительским взыванием его воинство укрепил еси. / Ныне же с небеси призри на чтущыя тя, // да твоим молением мир приобрящем, о Христе Иисусе, Господе нашем.
Слава, глас 6:
Великаго во святителех ныне поем, / благодатию призваннаго бескровную совершати жертву, / яко непорочен явился еси, служа Богу, / егоже ученьми оляденевшая сердца утеплишася, / достоин явися угодник Вседержителя, // молится о душах наших.
На Литургии
Блаженна от канона праздника песнь 3-я и канона святого песнь 6-я.
Прокимен, глас 1: У
ста моя возглаголют премудрость, / и поучение сердца моего разум. Стих: Услышите сия вси языцы, внушите вси живущии по вселенней.
Апостол ко Евреем, зачало 318А (7:26-8:6).
Аллилуиа, глас 2: У
ста праведнаго поучатся премудрости, и язык его возглаголет суд. Стих: Закон Бога его в сердце его, и не запнутся стопы его.
Евангелие от Луки, зачало 24 (6:17-23А). Конец: Се бо мзда ваша многа на небеси.
Причастен: В память вечную будет праведник:
Tags: Минея Дополнительная, богослужебные тексты, май, сентябрь, служба
Subscribe

Recent Posts from This Journal

  • Post a new comment

    Error

    Anonymous comments are disabled in this journal

    default userpic

    Your IP address will be recorded 

  • 5 comments