Уставщик (ustavschik) wrote,
Уставщик
ustavschik

Category:

Служба преподобноисповеднику Рафаилу (Шейченко)

В эти дни практически подряд идут две памяти преподобного Рафаила (Шейченко) исповедника, старца Оптинского — 6 (19) июня преставление (1957 г.), 9 (22) июня — обретение мощей (2005 г.). Ко дням памяти святого и 15-летию перенесения его святых мощей в Оптину пустынь выкладываю в «Уставные заметки» текст полиелейной службы преподобному, написанной насельником Иоанно-Предтеченского скита Оптиной пустыни иеромонахом Никоном (Скаргой). Текст воспроизводится по авторской машинописи; цензурными инстанциями пока не рассматривался. При выкладке исправлены замеченные опечатки.

Служба преподобному Рафаилу Оптинскому, исповеднику
Вечер
На Г
осподи, воззвах: стихиры, глас 4.
Подобен: Я
ко добля:
Звезда светозарная показася, / исповеданием блистаяся, Христа, / и лучи благодати согревая души грехом озябшия, / и безбожия мрак прогоняюща; / неботечно прошедша землю Русскую / и в темнице неудержанную; / в песнех вси возвеличим тако преподобного Рафаила, / Оптинскаго старчества красную зарю // и молитвенника непрестаннаго о душах наших.
Злоключения претерпев мужественне, / во страданиих непреклонен был еси, / легце нося бремя Евангелия, / всюду сея семя слова Божия, / ралом Креста землю сердечную возделал еси / и исповедания спасительный дождь излияв, / отче блаженне Рафаиле, / класс сторичествующий принесл еси Христу / и утвердил еси Православие // во спасение душ наших.
В темнице затворяемь / и гладом изнуряемь, / притесняесь всячески был еси злоумышлением врага, / еже отлучити тя от любви Христове тщашеся; / но твоя богоподобная душа / излия благодать всеобильную, / враги ущедряющу и благословляющу клеветники своя, / всем прощение подающу, вся милующую, / вся побеждающую, / николиже престающую / любовь Сына Божия, любовь Крестную, / юже стяжал еси в сердще твоем, // Рафаиле преподобне.
Слава, глас 8:
Имя Христово добре исповедал еси пред враги беззаконными, / неправеднаго прещения не убоявся, / но верою пребыл еси яко адамант, / на изгнание и темничное заключение осуждаемь, / скорби и беды благодушно претерпел еси, / песнь нося во устех Златоустову: / слава Тебе, Боже, за вся; / но яко благодерзновение стяжал еси на небесех, / молися о стаде твоем, преподобне отче Рафаиле, / еже сохранитися от прелести змиевой / и благоугодными явитися пред лице Христово // во страшное пришествие Его.
И ныне, Богородичен: Царь Небесный:
Стихиры на стиховне, глас 2:
Рафаиле чудне, / Божия любве река, / землю Русскую исповеданием Христа наводнил еси / и безбожия изсушил еси потоки мутныя, / сладость веры искапал еси воды животочныя, / юже почерпл еси от источника приснотекущаго // Христа Бога нашего.
Стих: Исповемся Тебе всем сердщем моим, / повем вся чудеса Твоя.
Рафаиле премудре, / врага рода человеческаго посрамил еси, / во устех нося песнь благокраснаго исповедания, / во искушениях непреклонен явился еси / и безбожных свирепость обличил еси, / кротостию наказуя, мудре, / еже покоритися Божию Евангелию, / имже спасается всякая тварь // и жизнь райскую наследствует.
Стих: За словеса устен Твоих / аз сохраних пути жестоки.
Рафаиле пресветле, / темничное заключение доблественне претерпел еси, / присно облистаем Духа светлостию, / охладевшия сердца любовию согрел еси / и утвердил еси в вере малодушныя, / всерадостную благовестия песнь обнося, // и разсеял еси нощь безбожия.
Слава, глас 5:
Столп церковный, / иже не поколеба буря безбожия, / степень превысокая исповедания, / имже христоносец воистину явися, / старцев Оптинских избранное чадо / и новомучеников Российских благовонный цвете, / Рафаиле преподобне, / моли Избавителя всех Иисуса / землю Русскую избавити от годины лютыя // и спасти души наша.
Тропарь, глас 6:
Яко столп светозарный благочестия, / тьму попрал еси безбожия и нечестия, / исповедник явился еси Христа, благославный, / и утвердил еси Православие, / любве отеческия исполнен был еси / и венечник оптинскаго старчества показался еси; / отче преподобне Рафаиле, // моли Христа Бога, спасти и просветити души наша.
На утрени
На Б
ог Господь: тропарь дважды.
Слава, и ныне, Богородичен.

По 1-м стихословии седален, глас 1:
Семя евангельское душею твоею восприим, преподобноисповедниче Рафаиле, / пощение яко цвет, во изгнаниях страдальчество яко плод принесл еси / и благоухание Христово был еси, / темже в вертограде небеснем со святыми нашими сродники ликовствуя, / моли спастися душам нашим.
Слава и ныне, Богородичен:
Едина рождшая Творца всех, Едина украсившая человечество Рождеством Твоим, Пречистая, / избави мя сетей льстиваго велиара: / постави на камени Христовых хотений, / Того молящи прилежно, Егоже воплотила еси.
По 2-м стихословии седален, глас 7:
Кто достойную похвалу принесет подвигом твоим, преподобне страдальче Рафаиле, / воздержанием бо и в гонениях терпением скорбей Христу сугубо угодил еси, / обаче евангельски неключимого раба себе почитая, / учиши любовию ко врагом величати Христа, Подвигоположника новомученик наших.
Слава и ныне, Богородичен:
Стена и Покров еси, Владычице, и Пристанище небурное всем в бедах сущим / и к Твоему заступлению с верою притекающим, / темже и мы усердно вопием Ти: / соблюди землю Русскую в Православии и единомыслии, Дево Пречистая.
Величание
Величаем тя, / преподобне отче наш Рафаиле, / и чтим подвиги и страдания твоя, / в нихже любовь ко врагам показал еси / и преславное исповедание.
По полиелее седален, глас 8:
Пастырь добр стаду твоему был еси, отче, / свирелию словес твоих овцы Христовы упасл еси, и душегубительных волков отгнав лесть безбожную, / доблемудр борец о Правде Христовой быв, / и образ евангельския любве подал еси верным, / богоносе и преблаженне Рафаиле, / моли Христа Бога грехов оставление даровати чтущим любовию святую память твою / и спасти души наша.
Слава, и ныне, Богородичен.
По 50-м псалме стихира, глас 6:
Яко тверд страдалец Христов / и евангельский, отче, послушниче, / старцев оптинских достойный ученик явился еси, / гонения и темничныя заключения доблественне претерпевая, / за зло воздал еси сугубою любовию, / исповедником восход к небеси превосходнейший показав, / Церкви Русския украшение красное, / Рафаиле премудре, // моли о чтущих любовию святую память твою.
Канон преподобноисповеднику, глас 8,
егоже граегранесие: Р
афаила почествити сладостно устнам.
Песнь 1
Ирмос: Внезапу древле море Израиль / яко в пустыни, ногою прашною прошед, вопияше: / Господеви Богу нашему, крепкому в бранех, поим песнь новую.
Ревностию Духа распалился еси, отче Рафаиле, и старцем оптинским поревновав, темже огня ми даждь добродетельнаго, да твою память светло чествую.
Ангельстии умы удивишася, богоносе, шествию твоему на земли, во изгнаниях яко бесплотен пребыл еси, легце ярем носяй тяжких скорбей.
Философию истинную добродетелию показал еси и мудрецов мира сего посрамив: буи есть вси вы, глаголал еси, иже Христа отрицаетеся, Дающего дождь земли и солнцу повелеваяй светити.
Богородичен: Ангельскую славу превзошла еси, Богородице, и песнь неумолчная им явилася еси, яко несказанно Отчее Слово родила еси, и Девой пребыла еси, Пречистая.
Песнь 3
Ирмос: Небеснаго круга Верхотворче, Господи, / и Церкви Зиждителю, / Ты мене утверди в любви Твоей, / желаний краю, верных утверждение, / Едине Человеколюбче.
Истинствовав послушанием, отче, и старцем Оптинским подражатель явился еси, яко воск растопился их любовию, и образ благочестномудренный в душе отпечатлел еси.
Любви исполнен быв, отче, и духом ко Христу пламенел еси, молитвою и послушанием мир Божий в сердце твоем стяжав, и сострадалец был еси, Рафаиле, всякой душе, богоблаженне.
Аще и изгнан из обители был еси, и в темнице мрачней затворен, но свободь пребыл еси, живя со Христом, отче блаженне, и духом не престал еси посещати чад твоих.
Богородичен: Поет Тя сладце в темницех затворенный Рафаил, и величия Твоя поведает во мрачных удолиях, яко Превысшую горних сил в песнех глаголет, возвеличим Деву Богородицу, Рождеством Своим разорившую адово царствие.
Седален, глас 8:
Богатство скорбей собрав, мудре Рафаиле, на земли пресельничество твое Христоподобно препроводя, в горьких узах пространство обрел еси райское, и в теснотах и гонениях, еже на небеса восход; темже и вопиеши всем: без креста несть венца, о возлюбленнии; но потерпим Христа ради вся беды, грех ради наших находящия, и улучим милость в день Судный.
Слава, и ныне, Богородичен, глас тойже:
Плоть от кровей Твоих прием Превечный Бог, Тя Предстательницу показа человеком, Чистая, темже избави рабы Твоя от всякия беды и обстояния и сетей лукаваго врага, и стения причаститися сподоби избранных, вся славящия и покланяющияся Тебе.
Песнь 4
Ирмос: Ты моя крепость, Господи, / Ты моя и сила, / Ты мой Бог, Ты мое радование, / не оставль недра Отча и нашу нищету посетив, / тем с пророком Аввакумом зову Ти: / силе Твоей слава, Человеколюбче.
Оптинский сонм умножив мысленных звезд, облистал еси концем славу великаго старчества, подобник бо был еси прежде бывших отцев, и вся утешил еси, отче Рафаиле, и водвигл еси падшия.
Честное житие твое монашествующих утверди, и верным пробави дерзновения; яко постника тя познавша, и яко страдальца Христова, и в годину гонений доблемудраго исповедника.
Евангельски, отче, пожил еси на земли, и верным подал еси образ совершенства, яко на врагов твоих излиял еси пучину любви, и благодетельствовав присно тя ненавидящим.
Богородичен: Сладкий Твой певец Рафаил, яко Честнейшую Тя Херувим в сониях возглашает, Пречистая; яко преимущую всея твари, яко рождшую Творца и Господа.
Песнь 5
Ирмос: Вскую мя отринул еси от лица Твоего, Свете незаходимый / и покрыла мя есть чуждая тьма окаяннаго, / но обрати мя и к свету заповедей Твоих пути моя направи, молюся.
Течение красных твоих ног ускори злочестивых погибель, яко луч Праведнаго Солнца пронеслся еси по земли, и сердца хладныя воспламенил еси, отче Рафаиле, и живоцерковников изобличил еси тайныя умыслы.
Весну Христову проповедал еси всюду, отче блаженне, цветник райский имуща в души твоей всажден, в немже плоды послушания, плоды радования и смиренномудрия процветоша, и любы яко река приизливающаяся всем.
Испустил еси милования твоего реку, славне Рафаиле, и безбожных ярость погасил еси, боговедения водами напоив сердца верных, и жажду сострадальцев твоих утолил еси.
Богородичен: Терпеливодушно прошед пещь гонений, в скорбех утешение велие от песней Богородичных почерпл еси, ихже в сониях не престал еси, Рафаиле, воспевати, глаголя: Богородицу и Матерь Света в песнех возвеличим вси.
Песнь 6
Ирмос: Очисти мя, Спасе, / многа бо беззакония моя, / и из глубины зол возведи, молюся, / к Тебе бо возопих и услыша мя, / Боже спасения моего.
Искапаша сладость уста Рафаиловы, и в скорбех сущия утешашася, и темничное затворение показася яко пространнейший рай, силою словес богопроповедника.
Славий добропесенный да похвалится днесь, неумолчный в темницах проповедник, тьму потребивший безбожия и возвестивший день Христов, в песнех да возвеличится Рафаил, исповедник Оптинский.
Льстивых старания не возмогоша отвратити тя от Христа, пригвожденнаго к Нему, Рафаиле, любовию; ни глад, якоже речеся, ни гонение, ни ина всяка тварь не разлучиша тя от любве Иисусовы.
Богородичен: Аще и в мрачную темницу затворен быв, Рафаиле мудре, Матерь Света имел еси утешением в нощных видениях, богоблаженне, яко николиже тя оставила есть, певца Своего, Гавриилова Ей обрадование присно носящаго.
Кондак, глас 2:
Крест на рамо взем, / ко скорбем распространился еси, / любовь твою яве показав ко врагам / и благости воистину пучину, / Христов подобник явился еси / и дерзновение улучив непостыдное; / темже молися о нас, отче Рафаиле, / еже предание православное соблюсти неуклонно // и улучити милость в день Судный.
Икос
Древу Креста Твоего поклонитися изволив доблий исповедник Оптинский, и умножив тому лета живота и подвига во славу Твою, Господи, в немже добльствовав благодерзновенно, терпя гонения и глад и темничное заключение, всюду знамение обнося Твоего, Спасе, Святаго Креста, имже низложи возношение вражие и бурю безбожных гонений прекрати; о нас ныне молится у Престола Высочайшего: еже предание православное соблюсти неуклонно, и улучити милость в день Судный.
Песнь 7
Ирмос: Божия снисхождения / огнь устыдеся в Вавилоне иногда, / сего ради отроцы в пещи радованною ногою / яко во цветнице ликующе пояху: / благословен еси, Боже отец наших.
Добльствовав во страданиях, во изгнаниях терпеливодушне пребыл еси, Рафаиле мудре, и проповедию утвердил еси полки монашеския, и разсеяв словом истины богоборных лживую мглу.
Оптинский страдалец в песнях да поется днесь, Никона исповедника сотрудник искренний; имиже ниспровержеся глубокая прелести нощь, и прерадостно Церкви русския поют: благословен Бог отец наших.
Скорбное возлюбив житие, богомудре Рафаиле, силою Духа Святаго разметав вся беды находящия, в радости поя глаголал еси: слава Промыслевшему тако о мне, единому Благословенному.
Богородичен: Тебе утреннюет в песнех благовестник Твой, Богородице Дево, Рафаил Оптинский, и величает Тя, паче Херувим возвысившуюся, с нимже и мы Тебе вопием: благословен плод чрева Твоего, Чистая.
Песнь 8
Ирмос: Победители мучителя и пламене / благодатию Твоею бывше, / заповедем Твоим зело прилежаще, / отроцы вопияху: / благословите, вся дела Господня, Господа.
На брань ополчился еси яко доблемудр борец, и одеявся, Рафаиле, во броня веры, и посекл еси глаголом Божиим яко обоюдоострым мечем нечестивых вся вышения.
Обвеселяет память твоя иноческия полки, в вере же утверждает все церковное собрание, яко высочайший подвиг любви показав ко врагам, и Господа благословив во вся веки.
Ужасает ревности твоея огнь, и пламенеющая любы твоя согревает сердца хладная, и словеса твоя яко разженное сребро куплю деют спасения, внемлющим и, еже к деланию.
Богородичен: Сына Отчаго Божественную Мать в песнех единомудренно, вернии, восхвалим: яко пророческую Дверь; яко Ааронов прозябший Жезл и несекомую гору Даниилову; яко Купину несгораемую, вкупе же и Дщерь Давидову.
Песнь 9
Ирмос: Таин еси, Богородице, рай, / невозделанно возрастивши Христа, / Имже Крестное Живоносное на земли насадися Древо; / Тем ныне возносиму, / покланяющеся Ему, Тя величаем.
Таковообразен путь избрав: гонения, уничижения и заточения, вся Христа ради претерпев до конца и наследовав радость неизглаголанную; темже величающия тя посети, Рафаиле богоблаженне, и в скорбех подаждь отраду.
Альт хвалы моея Богу последний есть, сие третие уже мое заточение, возгласил еси, Рафаиле преподобноисповедниче; и потекл еси во изгнания радуяся, широтою любви покрыв врагов, и долготою скорбей заселяяся в небесное Царствие.
На высоту подвига исповедническаго востекл еси, и даров сподобился еси прияти сыноположения; се покой мой, зде вселюся во век, сие прорекл еси, Рафаиле, исперва, темже и мощьми в обитель твою возвратился еси, имже кланяяся, тя величаем.
Богородичен: Мученичестии лицы Тя, Отроковице, чтут, горним умам явившаяся удивлением; како, страдальчествуя плотию, сладостную песнь Тебе поют: Богородицу и Матерь Света возвеличим.
Светилен, глас 2:
Силою Христовою вжиляем, беды превозмог вся, на рамех крест скорбей нетрудно понесл еси, Рафаиле, и истину исповедания концем возвестил еси, противников победил еси любовию.
Слава, и ныне, Богородичен:
Отверзи, Богородице, небеснаго Царствия двери, верою исповедающим Тя, Едину от века избранную Пречистую всех Бога Матерь.
На хвалитех стихиры, глас 4.
Подобен: Д
ал еси знамение:
Дал еси знамение / боящимся Тебе, Господи, / Рафаилово любомудрие, / иже врагов своих до конца возлюбив / и сокровище благостыни в души показав, / Твоего подобия отображения, // Иисусе Всесильне, Спасе душ наших.
Дал еси знамение / исповедником Твоим, Господи, / любомудрие старцев Оптинских, / еже душу за чада положити научает / и за веру до смерти стояти помогает, / в небеса показует молитвенный восход / к Тебе, Иисусе Всемилостиве, // Спасе душ наших.
Дал еси знамение / твое, Рафаиле, к Богу подражание / и любви крестныя воспламенение, / еюже демонскую злобу испепелив / и ангельских достигл еси ликов, / дерзновенно исповеданием возгремев: / Слава Богу Всесильному, // Спасу душ наших.
Слава, глас 6:
Исповедают небеса чудеса Твоя, Господи, / исповедует и верный раб Твой Рафаил / чудеса веры православныя, / Крест Твой верно держа, / любовь имея яко пучину морскую, / в нейже враги веры потопи, / созывает днесь собор церковный / и монашеския ликостояния / во оружия веры одеятися, / во еже не дати на попрание врагом отечества нашего, / но утвердити в нем православие // до скончания века.
И ныне, Богородичен.
Славословие великое.
Tags: Минея Дополнительная, Новомученики и исповедники Российские, Оптинская Минея, богослужебные тексты, июнь, служба
Subscribe

  • Post a new comment

    Error

    Anonymous comments are disabled in this journal

    default userpic

    Your IP address will be recorded 

  • 0 comments