Уставщик (ustavschik) wrote,
Уставщик
ustavschik

Category:

Канон преподобной Ирине, игумении Хрисоваланту

С разрешения автора выкладываю в «Уставные заметки» канон преподобной Ирине, игумении обители, именуемой «Золотой кошель» (Χρυσοβαλάντος), составленный Ириной Пятигорской (Лондон, Великобритания). Текст публикуется по авторской машинописи, выверенной Людмилой Павловной Медведевой (Москва); цензурными инстанциями текст пока не рассматривался.

Канон святой преподобной Ирине, игумении Хрисоваланту
Тропарь, глас 1:
Любовию горнею от юности уязвленная, царствие земное яко не сущее презрела еси; постом и молитвою демонския прилоги победившая, елеем милосердия светильник свой наполнила еси. Сего ради с мудрыми девами в чертозе Небеснем ныне ликовствуеши, преподобная Ирино, моли Христа Бога спастися душам нашим.
Ин тропарь, глас 6:
Молебное пение принесем святей угоднице Божией Ирине, яко прославилася велиею славою от Господа, да приклонит к нам своим ходатайством благоутробие Божие.
Богородичен, глас 6:
Упование христиан, Пресвятая Дево, со всеми святыми, от века Богу угодившими, моли Сына Твоего и Господа нашего Иисуса Христа оставление грехов даровати нам.
Канон, глас 6.
Песнь 1
Ирмос: Яко по суху пешешествова Израиль, по бездне стопами, гонителя фараона видя потопляема, Богу победную песнь поим, вопияше.
Припев: Преподобная мати Ирино, моли Бога о нас.
Победный твой исход из земнаго жития днесь поминаем, и восхищающеся духом горе, молим тя убогий труд сей наш благоугодным тебе сотворити, и песни твоея новыя Небесныя соделати ны причастницы.
Яко же иногда великий Иоанн Богослов посла ти утешение из рая, восшедши яко по суху на корабль, волнами влаемый, тако и ты ныне людем обуреваемым являешися, Небесное утешение приносящи; сего ради приими благодарение наше и не остави нас прочее твоими милостьми.
Слава: Стужает нас фараон мысленный, и где возьмем источники слезные, в коих мучителя сего безчеловечного потопити? Настави нас, ты бо иногда кладезь некий потаенный слезами твоими исполнила еси.
И ныне: Взбранная Воеводо, Владычице мира, Царице Небесе и земли, припадаем к Ти и молим Ти ся: укрой нас и сохрани в стенах державы Твоея непобедимыя.
Песнь 3
Ирмос: Несть свят, яко же Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего.
Смущается сердце наше, терпяще насилие падшаго естества, но взирая на подобное нам создание, к таковей святости вознесенное, утверждаемся в надежди спасения, на помощь твою уповающе.
Князь мира сего ходит, аки лев рыкаяй, иский нас поглотити; темже запрети ему: в дни земнаго бо твоего жития бысть той противу тебе аки щеня лающее, его же изгоняла еси.
Слава: Яко камень недвижимый, из негоже живая вода молитвы изливашася, денно и нощно Богу предстояла еси; сея воды, текущей в жизнь вечную, и нам у Христа Бога испроси.
И ныне: Ум наш, стихиями мира колеблемый, утверди, Мати Божия, в исповедании Сына Твоего; Ты бо еси твердое веры утверждение.
Песнь 4
Ирмос: Христос моя сила, Бог и Господь, честная Церковь боголепно поет, взывающи от смысла чиста, о Господе празднующи.
Немощни телом, немощни душею, немощни и духом есми, токмо милосердием Божиим живем и движемся; темже умоли о нас Христа Бога во еже совершитися Его силе в немощи нашей.
Церкве святыя чадо богопрославленное явилася еси; мы же, аще и уничижени, обаче члены сего же Тела Христова себе разумеюще, молим тя: помози нам благоукрасити души наша, да соделаемся и мы храмы Бога Живаго.
Слава: Аще не о Господе празднование наше, кий праздник, кая радость не земли идеже смерть и глад духовный? Якоже иногда Иосифа пред братиями его, посла тебе Господь пред нами в землю живых, в землю изобилия, напитати нас от трапезы твоея духовныя.
И ныне: Чистаго смысла исполни нас, Пресвятая Дево, Сеятеля чистоты родшая.
Песнь 5
Ирмос: Божиим светом Твоим, Блаже, утренюющих Ти души любовию озари, молюся, Тя ведети, Слове Божий, истиннаго Бога, от мрака греховнаго взывающа.
Недоумевает ум наш вообразити любовь твою, еюже предварила нас еси, не ведущих пети ти и во мраце греховнем пребывающих.
Руку твою светозарную, дары небесные иногда приявшую, ныне к нам простерла еси, щедрая, даров света сподобляющи нас.
Слава: Утреневати к Богу научаеши нас, лице и руце чисте омывше, да уразумеем чистоту страха Господня, и тако истинное начало премудрости в житии нашем положим.
И ныне: Мати Света присносущнаго, отыми от нас скверну греховную и сподоби нас о Господе мудровати и деяти; Ты бо еси любы, всякое желание побеждающая.
Песнь 6
Ирмос: Житейское море, воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиве.
Внегда обступят нас напасти и беды, пробуждается душа наша от сна лености; темже восприявшие в чувстве сердца ,како опасно ходим, прибегаем к тебе, помощнице нашей; понеже сама искушена бысть, можеши и нам, искушаемым, помощи.
Горце зрети нам себе в рабстве падшему веществу, и стенает дух наш по непреходящему и нетленному; сие семя жизни удобрити и взрастити помози нам молитвами твоими.
Слава: Имущи таковое облако свидетелей, како вознерадим о спасении? Многомилостивый Господь посла Тебе к нам, да возгоримся желанием в первое свое достояние взыти и наследие чад Божиих улучити.
И ныне: Пресвятая Владычице Богородице, избави нас от ада преисподняго, Тобою бо той низвержеся, и райские двери нам отверзошася.
Кондак, глас 3:
Радуются Силы Небесныя, яко воспевают людие имя твое, ты бо чудесы твоими многая сердца возвеселила еси, к горнему миру нас путеводиши, преподобная Ирино, славим Божие о тебе промышление.
Песнь 7
Ирмос: Росодательну убо пещь содела Ангел преподобным отроком, халдеи же опаляющее веление Божие, мучителя увеща вопити: благословен еси, Боже отец наших.
Не пещь ли огненную разжигает для нас мучитель наш и в сем житии и в будущем? Не поклонитися ли истуканом тщится он принудити нас? Ты, преподобная, вещественный огнь от него претерпела еси, тем же укрепи нас, да не отречемся делы своими от Бога истинна.
Ангел Господень сплета тебе венец за терпение твое; мы же терпети жжения диавольскаго не можем; сего ради взываем ти: прохлади нас росою молитвеннаго твоего за нас предстательства.
Слава: Огнем Божественным, огнем любви горния пламенела еси, преподобная; что сотворим, да разгорится огнь сей на земли сердец наших?
И ныне: Пламя страстей в росу бесстрастия преложи нам, Богородице Дево, огня поклонение угасившая.
Песнь 8
Ирмос: Из пламене преподобным росу источил еси, и праведнаго жертву водою попалил еси: вся бо твориши, Христе, токмо еже хотети, Тя превозносим во вся веки.
Кто есть человек, познавый пути Господни? Егоже хощет наказует, егоже хощет милует: тебе, святая, от века избра Господь ко славе Своей; наше же есть молитися с тобою ко Господу о еже благоволити Ему святая хотения и действия в нас произвести, благословенно буди имя Его во веки.
Бог, сотворивый мир, положи законы естеству, обаче, идеже хощет, побеждается естества чин: сия суть чудеса Господня, ихже обильный источник в тебе, преподобная, нам даровася, да превозносим имя Христа, Бога нашего.
Слава: Вемы, яко не благоволит Господь всесожжения, обаче духа сокрушенна; темже страхом поражаемся, како дерзаем пети Богу в купе с праведными и смиренными сердцем; сего ради припадаем ти: заступи нас, ты бо жертву правды принесла еси Богу, выну молящи Его сокрыти тя от славы человеческия.
И ныне: Пресвятая и преблагословенная Мати Дево, выше всех Небесных сил бесплотных превознесенная, научи нас творити волю Сына Твоего и Бога нашего, Ты бо еси велений Его главизна.
Песнь 9
Ирмос: Бога человеком невозможно видети, на Негоже не смеют чины Ангельстии взирати; Тобою же, Всечистая, явися человеком Слово воплощенно, Егоже величающе, с Небесными вои Тя ублажаем.
Како воззрим на Господа, егда прииде час? Како стерпим светлости Небесных воев сияние? Дондеже в теле ходим, испроси нам у Бога память смертную, да не постигнет нас час сей неготовыми.
Горе нам, имена святых носящим, делам же их подражати усердия не имущим; темже плачемся к тебе: не отступи от нас, но со Ангелом нашим Хранителем выну сердца наша красотою небесною уязвляй.
Слава: Милость Царицы Небесныя преклони к нам, преподобная; како бо спасемся без Ея Матерняго заступления?
И ныне: Ублажают Тя, Всечистая, по слову Твоему вси роди на земли; темже приими и наше смиренное приношение и не отврати от нас лице Твое, но сподоби ны нескончаемыя радости в Царствии Сына Твоего.
Tags: Минея Дополнительная, богослужебные тексты, июль, канон
Subscribe

  • Post a new comment

    Error

    Anonymous comments are disabled in this journal

    default userpic

    Your IP address will be recorded 

  • 0 comments