Уставщик (ustavschik) wrote,
Уставщик
ustavschik

Category:

Греческая служба преподобному Серафиму Саровскому

Выкладываю в «Уставные заметки» перевод службы преподобному Серафиму, Саровскому чудотворцу, написанной монахом Малого скита святой Анны на Святой Горе Афон Герасимом (Грэкасом; 1905 – 1991), Великим песнописцем Константинопольской Православной Церкви. Перевод выполнен достопочтеннейшим yuri_orthodox.

2 января
Служба преподобному Серафиму Саровскому
Творение Герасима монаха Микрагианнанита
Вечер
Стихиры преподобнаго, глас 4.
Подобен: Я
ко добля:
Преподобных стопами / непреклонно следовал еси, Серафиме блаженне, от юности, / и жительство равноангельно пожив, яко бесплотный, / Небесных даров сосуд явился еси пречестен, / очистив свою душу и тело вкупе: / сего ради твою память // световодящую празднуим.
Закону Божественному повинуяся, / монах Божественнейший, / Серафиме блаженне, был еси, / и вперився Божественным желанием, / в пустыне непроходней изволил еси жити, / и спротяженными воздержании / умертвил еси плоти желания / жизноноснаго действия светяся даровании // и благодатьми.
Духа благодатию, / спасительными ученьми / душевныя недуги исцелял еси, / и грядущих сбытие предглаголя явственнейше, / Серафиме чудодейственне, / благочестивых направлял еси мудрования, / и медведя, яко агнца ручнаго, / питая рукою своею, // всем говеин явился еси.
Слава, глас тойже:
Постническую изволив жизнь, / вся своя от юности Спасу возложил еси, / Серафиме Богоприятне, / и крест твой взем, себя распял еси мiру и страстем, / живый паче видимых. / Темже благодать Духа богатно приял еси, / и Божественнаго действия / Богодвижимый орган явился еси, / темже везде твоя провозгласися добродетель, / и приступающим спасения слово предлагал еси, / и ныне от века преподобным спребывая, / и Божественныя славы наслаждаяся, // моли о чтущих тя.
И ныне, глас тойже:
Иже Тебе ради богоотец пророк Давид / песненно о Тебе провозгласи, / величия Тебе Сотворшему, / предста Царица одесную Тебе, / Тя бо Матерь, Ходатаицу Живота показа, / без отца из Тебе вочеловечитися благоволивый Бог, / да Свой паки обновит образ, истлевший страстьми, / и заблуждшее горохищное обрет овча, / на рамо восприим, ко Отцу принесет / и Своему хотению / с Небесными совокупит Силами, / и спасет, Богородице, мiр // Христос, имеяй велию и богатую милость.
Прокимен дне. Свете Тихий:
И чтения.
Премудрости Соломоновы чтение [Глава 3]:
Праведных же души в руце Божией, и не прикоснется их мука. Непщевани быша во очию безумных умрети, и вменися озлобление исход их, и еже от нас шествие сокрушение: они же суть въ мире. Ибо пред лицем человеческим аще и муку приимут, упование их безсмертия исполнено: и вмале наказани бывше, великими благодетелствовани будут, яко Бог искуси их и обрете их достойны Себе: яко злато в горниле искуси их, и яко всеплодие жертвенное прият я. И во время посещения их возсияют, и яко искры по стеблию потекут: судят языком и обладают людьми, и воцарится в них Господь во веки. Надеющиися Нань уразумеютъ истину, и вернии в любви пребудут Ему, яко благодать и милость в преподобных Его и посещение во избранных Его.
Премудрости Соломоновы чтение [главы 5 и 6]:
Праведницы во веки живут, и в Господе мзда их: и попечение их у Вышняго. Сего ради приимут Царствие благолепия, и венец доброты от руки Господни: зане десницею покрыет я, и мышцею защитит их. Приимет всеоружие рвение свое, и вооружит тварь в месть врагом. Облечется в броня правды, и возложит шлем, суд нелицемерен. Приимет щит непобедимый преподобие. Поострит же напрасный гнев во оружие: споборет же с ним мир на безумныя. Пойдут праволучныя стрелы молниины, и яко от благокругла лука облаков, на намерение полетят. И от каменометныя ярости исполнь падут грады. Вознегодует на них вода морская, реки же потопят я нагло. Сопротив станет им дух силы, и яко вихор развеет их, и опустошит всю землю беззаконие, и злодейство превратит престолы сильных. Слышите убо царие, и разумейте, навыкните судии концев земли. Внушите держащии множества, и гордящиися о народех языков, яко дана есть от Господа держава вам, и сила от Вышняго.
Премудрости Соломоновы чтение [главы 4 и 5]:
Праведник же аще постигнет скончатися, в покои будет: старость бо честна не многолетна, ниже в числе лет изчитается: седина же есть мудрость человеком, и возраст старости житие нескверно. Благоугоден Богови быв, возлюблен бысть, и живый посреде грешных преставлен бысть: восхищен бысть, да не злоба изменит разум его, или лесть прельстит душу его. Рачение бо злобы помрачает добрая, и парение похоти пременяет ум незлобив. Скончався вмале исполни лета долга: угодна бо бе Господеви душа его, сего ради потщася от среды лукавствия: людие же видевше и не разумевше, ниже положше в помышлении таковое, яко благодать и милость в преподобных Его и посещение во избранных Его.
На литии стихиры, глас 1:
От юности, отче, возложився Христу, / Его наставляющей стезей / непреклонно шествовал еси, / вся бо оставль, постническими облеклся еси подвиги, / и древних преподобных / подражатель Божественнейший явился еси во всем, / и Святаго Духа благодать приим, / будущей славы наслаждение, / яко в зерцале являеши, / еяже ныне приобщаяся откровенным лицем, / Серафиме досточудне, // молися о душах наших.
Глас 2:
В пощении труды твоя и воздержания / сильное ума нескитательное / и безмолвия молчание, / яко миро благоухания / прият всех Бог, Серафиме отче преподобне, / темже Божественных даров сокровище тя показа, / к добродетели мудраго наставника / и предводителя действительнаго, / всех промышляяй Господь, / сердец бо устроения зря Божественным страхом направлял еси / в слове благодати верно к тебе притекающия: // темже вси почитаем святую память твою.
Глас 3:
Яко светильник новосветлый, / иже в России Церковь Божия имея тя, отче, / добродетелей озаряется лучами / и веселится славою твоею, / плоти бо умертвив мудрование, / безстрастия пажить благовонная явился еси, / и вечныя жизни плоды возделал еси, / имиже верных души питаются в Дусе Святом, / и в Бозе плодоносят умножение, / злых отгоняюще. / Но, Серафиме досточудне, моли Господа, // просветитися и нам светом благодати.
Глас 4:
Ангельское жительство показав, / и к добродетелей возшед добродетели, / в таинственных видений вшел еси мрак, / и таин неизреченных приял еси разум, / темже царем, и князем, и всякой души / Бога желающей, / говеин явился еси, Серафиме блаженне, / всех бо учил еси не мудрствовати паче, / еже подобает мудрствовати: / но мудрствовати в целомудрии. / Христос бо тя прослави, / прославивыйся житием твоим, / и подает тобою нам // прегрешений оставление.
Слава, глас тойже:
Преподобным Боговиднаго / и Церкве Русской наказателя, / и светильника, Серафима Богоприятнаго, / песньми и песнопеньми восхвалим, / постнически бо Христу благоугождав, / и древних преподобных равночестен явися, / и пророческим обогатився даром, / чудес действия богата точит, / яко Святаго Духа жилище, / и телес и душ страсти исцеляет, // моляся о душах наших.
И ныне, Богородичен.
На стиховне стихиры, глас 8.
Подобен: О,
преславнаго чудесе:
Отче Серафиме блаженне, / от юности Христа вседушно возлюбил еси, / и держание, преподобне, / ко всему в мiре оставил еси, / и жительство пожив равноангельное, / равноангельной славы сподобился еси, / еюже браней твоих, / имиже низложил еси враждебнаго, // и богатой благодати от Бога получил еси.
Стих: Честна пред Господем / смерть преподобных его.
Отче Серафиме Богоприятне, / преестественными дарми / общение Божественное / обильно обогатил еси, / очистився разумом, / воздержании бо и молитвою / в пустыне Саровстей возсиял еси, / темже источил еси простым людем и князем / богоприличная научения, // будущая предглаголя всем.
Стих: Блажен муж бояйся Господа, / в заповедех его восхощет зело.
Отче Серафиме блаженне, / прославивыйся непорочным пощением твоим, / душ исцелял еси и телес страсти, / и ныне точит приближающимся твоих мощей рака, святе, / благодать и милость, / и Божественнаго Духа, / темже твою память // празднуем, веселящеся.
Слава, глас тойже:
Cтезю добродетелей / постническими пешешествов болезньми, / к безстрастия верху возшел еси, преподобне, / влекущих бо долу призрев умным Богомудрием, / все житие сотворил еси совершенства восход, / лучших ревнуя дарований, / и ныне древа жизни абие наслаждаяся / и положением обожаемь, Серафиме досточудне, // непрестанно моли помиловатися душам нашим.
И ныне, Богородичен.
Тропарь, глас 4:
Христу от юности последовав тепле, / молитвами и прошении, / в пустыни Саровстей, яко безплотный подвизался еси, / темже Утешителя прием благодать, / явился еси Богородицы богоносный угодник, / тем тя ублажаем, // Серафиме отче преподобне.
Слава, глас 1:
России прозябение и Сарова чествование, / и православных всех светлое удобрение / воспоим Божественнаго Серафима, последующе его поученьми, / ибо Духа стяжание духоносным жительством провозгласи. / Слава Всельшемуся в тя, / слава тя Просвещшему, // слава Давшему ти множество дарований, преподобнейше.
И ныне, глас тойже:
Гавриилу вещавшу Тебе, Дево, радуйся, / со гласом воплощашеся всех Владыка, / в Тебе, святем кивоте, / якоже рече праведный Давид; / явилася еси ширшая Небес, / поносивши Зиждителя Твоего. / Слава Всельшемуся в Тя, / слава Прошедшему из Тебе, // слава Свободившему нас Рождеством Твоим.
На утрени
По 1-м стихословии седален, глас 1.
Подобен: Г
роб Твой, Спасе:
Яко Ангел, мудре, во плоти живый, / даров Божественных богатно сподобился еси, / и всем источил еси спасительная учения, / темже днесь светоносную твою память празднующе, / тя, Серафиме, благохвалим, / яко Божественнаго угодника. [Дважды].
Слава и ныне, Богородичен, глас тойже:
Явилася еси тайно Серафиму преподобному, / облистающи, Чистая, в свете неизреченном, / темже сияние твое величая преподобный вопияше Ти: / Радуйся, Рождшая мiру пресветлый свет / во образе человеческом Христа, Бога нашего.
По 2-м стихословии седален, глас 4.
Подобен: Я
вился еси днесь:
В пощении возсиял еси равноангельном / и верных просветил еси словами и божественными поученьми, и чудес осияньми, / о Серафиме, России украшение. [Дважды].
Слава и ныне, Богородичен, глас тойже:
Во свете Твоем Тя видев, / вопияше Серафим преподобный в пустыне Саровстей: / Радуйся, Чистая Приснодево, Свет рождшая нам Невечерний.
По полиелеи седален, глас 4.
Подобен: Я
вился еси днесь:
Иже в пустыне Саровстей подвизася, / и дарований исполнився небесных, / Серафим да воспоется блаженный: / сей бо, яко Ангел в мiре пожив, / Ангелов стояния в вышних приобщися, / и ныне молит всегда Христа всем даровати прегрешений прощение. [Дважды].
Слава и ныне, Богородичен, глас тойже:
Иже на лоне Отчем седяй, / яко Сын Единородный же и Слово, / во чреве Твоем весь вселися, не изступив, Богоневесто, / от обители Отеческой, / и плоть бысть из чистых Твоих кровей / и от истления к нетленному Животу, / тя поющия вознесе, Владычице.
Степенна, 1-й антифон 4-го гласа: От юности моея:
Прокимен, глас 4: Честна пред Господем / смерть преподобных Его.
Стих: Что воздам Господеви о всех, яже воздаде ми?
Всякое дыхание:
Евангелие от Матфея, зачало 43.
По 50-м псалме стихира, глас 6:
Добродетелей стезю пешешествов, / различных даров Святаго Духа / сокровище многоценное явился еси, / Серафиме Богомудре, / всего бо себя Христу возложил еси, / мiра отвергся, и к вышним обратив души желание, / и яко имый дерзновение, / моли избавитися нам от всякия скорби // и спастися душам нашим.
Канон, глас 8, егоже краегранесие: Серафима пою Богоноснаго.
Творение Герасимово.
Песнь 1
Ирмос: Колесницегонителя фараона погрузи / чудотворяй иногда / Моисейский жезл, крестообразно поразив / и разделив море, / Израиля же беглеца, пешеходца, спасе, // песнь Богови воспевающа.
Cобеседник сый на Небесех Божественных Ангел, преблаженне Серафиме, непрестанно моли о всех на земли совершающих память твою.
На рамо взем Крест Христов вседушно от юности, Серафиме, Ему теплою мыслию постнически последовал еси, преподобне.
Текущих держание призрев, Христу усвоился еси браньми духовными, и сосуд света небеснаго, очистив ум, отче, был еси.
Богородичен: Пощением сияя боголепным, видети возледующе сподобился еси, Серафиме, Едину Деву Богородицу, и от Нея Божественной благодати приблизился еси.
Песнь 3
Ирмос: Небеснаго круга Верхотворче, Господи, / и Церкве Зиждителю, / Ты мене утверди в любви Твоей, / желаний краю, верных утверждение, / Едине Человеколюбче.
Просвещаемь, отче, Божественными осиянии, яже чистым сердцем яве предглаголал еси сущая, и яко настоящее дальнее предзрел еси, преподобне, Святым Духом.
В пустыню вселився Саровскою, преподобне, Ангел земный явился еси болезньми воздержания, и преславное достояние богатых дарований всяческим был еси, святе.
Направляемь, отче, благодатию Божией, вся направляеши Божиим словом к лучшим и разум монахов исправляеши, Серафиме блаженне, к совершенству.
Богородичен: Мати Дево Отроковице, благочестивых утверждение, Серафима, раба Твоего, Божественных озарений сподобльшася, сего теплыми молитвами от тьмы мя свободи всякия злобы.
Седален, глас 4:
Благодатию Духа обогатев обильно, ум очистил еси воздержании многими, и светильник явился еси Божествен. Темже яве предглаголеши будущих знание, обычаи душ устрояя, и к Богу направляя верою приступающих ти, Серафиме блаженне.
Слава и ныне, Богородичен:
Свет рождши жизни во плоти, Христа, просвещающа чистыя души, Дево Всепетая, явилася еси богоносному Серафиму, сияющи, Владычице Богородице, в свете неизреченном, темже и мене озари светом Твоим, Всенепорочная.
Песнь 4
Ирмос: Услышах, Господи, / смотрения Твоего таинство, / разумех дела Твоя / и прославих Твое Божество.
Монахов образ явился еси в России, жития светлостию преподобных борения, Серафиме, древле подражав.
В пощениях и слезах, и в молитвах с усердием очистив сердце твое, света был еси небеснаго, отче, селение.
Просветив души очеса своея подвиги Божественнаго пощения, прозирати яве будущая, Серафиме Богомудре, сподобился еси.
Богородичен: Пресвятая Всенепорочная, Божие Слово Рождшая, безместных мя свободи помышлений и нравов Твоею благодатию.
Песнь 5
Ирмос: Просвети нас повелении Твоими, Господи, / и мышцею Твоею высокою // Твой мир подаждь нам, Человеколюбче.
Яко новоявленное, отче, солнце возсиял еси в России в последняя времена, добродетелей всем испущая сияние.
К Богу непрестанными и спротяженными восхождении, Богоносе, в молитвах к невещественному Богозрению возведен был еси.
Весь Богозарный зраком сый, блаженне, твое внутрь показовал еси души потаенное, Серафиме, Божественное сияние.
Богородичен: Умертви, Чистая, плоти моея мудрования рождши Вечный Живот, и к стези Живота мя направи.
Песнь 6
Ирмос: Молитву пролию ко Господу / и Тому возвещу печали моя, / яко зол душа моя исполнися, / и живот мой аду приближися, / и молюся, яко Иона: // от тли, Боже, возведи мя.
Чудес дарование имея, Серафиме, Божественным подаянием, ихже в горьких немощех исцели, и лукавства отгоняеши прелести, и подаеши всем скорую воистинну, Богоносе, помощь.
Явился еси в последняя дни великий, отче, в пощении преподобнем, и дарований великих от Бога сподобился еси, и всю исполнил еси, о Серафиме чудотворче, Россию чудес, чтущую тя.
Житие твое равноангельное, отче, чудное, воистинну явися, темже всем: простцем и царем, и князем говеин явился еси, всех Владыка бо Христос, Серафиме, всюду тя прослави.
Богородичен: Явльшися Небес ширши Невместимаго во всей твари, во чреве Твоем вместила еси, Отроковице, и с плотию Сего родила еси. Утеснения мя, Чистая страстей ради различных свободи.
Кондак, глас 4:
В Сарове, яко Ангел, пожив, Серафиме блаженне, / явился еси приятелище избранное дарований Духа, // словом богатно показуя лучшая.
Икос:
Всю любовь души от отрочества, Богоблаженне, возложив ко Христу, желаний краю, и Того Крест на раменах носив, стопами Его неуклонно шествовал еси, мiр и себе самаго отвергся, отче, и в пустыню Саровскую вселився, крайним пощением вшел еси в стадию даров и благодатей Утешителя, сосуд честный и орган Богодохновенный показался еси, и Чистыя Богородицы угодник быв, чудесы просиял еси, и множайшия ко спасению направил еси словом богатно показуя лучшая.
Песнь 7
Ирмос: От Иудеи дошедше отроцы, / в Вавилоне иногда, / верою Троическою пламень пещный попраша, поюще: // отцев Боже, благословен еси.
Притекающии верою честным мощем твоим, Серафиме преподобне, приемлют здравие и всякое исцеление вкупе и благолепие, славословяще Христа, тя почтиша.
Глаголом твоим боговдохновенным притекающии, отче, в борении твоем Божественная учахуся, и на путь правый направляхуся, взывающе: Отец наших, Боже, благословен еси.
Весь сый соединяяся Свету невещественному, Серафиме преподобне, возвестил еси учением ко Спасу твое, Богоносе, отшествие, и со славою многою возшел еси к вышним.
Богородичен: Законодавца Рождшая не естеством законным, Дево Пречистая, от закона злобы свободи мя скоро теплым предстательством Твоим, и управи мой ум законом покаяния.
Песнь 8
Ирмос: Царя Небеснаго, / Егоже поют вои ангельстии, // хвалите и превозносите во вся веки.
Во всю землю добродетелей твоих вещание изыде, и вся Церковь Православная чтит тя, Богоносе.
Из России вселенней испущаеши, отче преподобне, в Духе Святом, твоего жительства лучи таинственныя.
К Риму Божественному пощения путь скончал еси, и ко обителем преставился еси небесным с веселием, отче.
Богородичен: Чистая Дево, нечистое мое сердце очисти от мыслей безместных, и покаяния светом просвети.
Песнь 9
Ирмос: Воистинну Богородицу / Тя исповедуем, / спасеннии Тобою, Дево Чистая, // с безплотными лики Тя величающе.
Рака твоя святая одождением Божественным точит всем приступающим, всеблаженне, воды исцелений.
Узрев Богородицу, веселия исполнился еси, ныне же сияние Ея зря, о нас моли, Серафиме, всегда.
Не престай, Богоносе, Христу молитися о нас, Серафиме, чтущих тя и совершающих любовию Божественную память твою.
Новый в преподобных, Серафиме всеблаженне, обветшавшаго мя страстьми обнови, и настоящую песнь мою, яко дар приими.
Богородичен: Воспоем, Богородице, Твое светозарение, и от души возопиим Ти, Всечистая: от омрачения страстей нас избави.
Светилен:
Серафиме Божественный, иже в преподобных чудный и подаваяй обильную благодать, блажащия его, песньми, да почтим боговдохновенными, яко ко Христу нашему молитвенник.
Богородичен:
Богородице Отроковице, Ангелов Царица, и человеков спасение, умоли нам очищение и прегрешений разрешение, благоговейно Тя поющим.
На хвалитех стихиры, глас 1.
Подобен: Н
ебесных чинов:
Во плоти житию твоему удивишася Ангелов полки, / и человеков лики, / яко бесплотен бо, отче, на земли, воистинну пожив, / дарований богатых от Бога, Серафиме, // светло сподобился еси.
От юности, отче, Христа возлюбил еси, / и в Саров вселився, / равноангельное житие пощеньми, бденьми и молитвами, / Божественным желанием совершил еси, / и достойно наград на Небесех, Серафиме, // светло получил еси.
Еще в телеси сый, Серафиме преподобне, / видел еси возследующе Чистую Богородицу, / ныне же на Небесех взирая на Ея неизреченное осияние, / не престай моля Сию присно // о всех почитающих тя.
От Бога дарований сосуд честный, / постников славу, России похваление, / всех православных доброту, / Серафима Богоприятнаго, / да восхвалим песньми священными, // яко Христова Божьего угодника.
Слава, глас 5:
Воздержания светом страстей мглу разрушив, / яко звезда новосветлая, / возсиял еси на Цековней тверди, / яко сын бо света Христу последовал еси, / умертвив плотское мудрование, / и по подобию Божию воображся, / всем говеин явился еси, / и бессловесных зверей естество словом покорил еси. / Христос бо тя прослави, / прославивыйся житием твоим, / Егоже моли, Серафиме Богоносе, // помиловатися душам нашим.
И ныне, Богородичен, глас тойже:
Блажим Тя, Богородице Дево, / и славим Тя, вернии, по долгу, / град непоколебимый, стену необоримую, / твердую Предстательницу // и прибежище душ наших.
Tags: Минея Дополнительная, богослужебные тексты, июль, переводы, служба, январь
Subscribe

  • Post a new comment

    Error

    Anonymous comments are disabled in this journal

    default userpic

    Your IP address will be recorded 

  • 1 comment