Уставщик (ustavschik) wrote,
Уставщик
ustavschik

Category:

Молитва преподобному Максиму Греку

Текст молитвы преподобному Максиму Греку утверждён к общецерковному богослужебному употреблению решением Священного Синода от 17 июня 2021 года (журнал № 34).

Моли́тва преподо́бному Макси́му Гре́ку
Творе́ние Макси́ма пресви́тера
О, прему́дрости сокро́вищнице, вся́каго ве́дения и разуме́ния испо́лненная, Ду́ха Свята́го неумо́лчный орга́не, трубо́ Боже́ственная, возвеща́ющая нам веле́ния Зако́на Бо́жия, о́тче пресла́вне Макси́ме! Се ны́не мы припа́даем ти, о́тче блаже́нне, и вопие́м усе́рдно: просвети́ омраче́нныя умы́ на́ша, неве́дущия веле́ний Бо́жиих, и напра́ви ду́ши на́ша во е́же де́лати за́поведи Госпо́дни приле́жно и в словесе́х Бо́жиих поуча́тися день и нощь. Огради́ уста́ на́ша от глаго́лов су́етных, рече́ний лука́вых и многоглаго́лания суетного, и́мже мы прилепи́хомся па́че не́же словесе́м оправда́ний Бо́жиих и возлюби́хом их превы́ше звяца́ния псалти́ри и гу́слей Дави́довых. Укрепи́ язы́ки на́ша, во е́же источа́ти им глаго́лы спасе́ния, пе́сни моли́твенныя и словеса́ псало́мская, и́миже подоба́ет Го́спода воспева́ти и превозноси́ти Его́ до́ндеже есмы́. Ты, о́тче преподо́бне, и в те́мности узи́лища, му́чимь непра́ведно от приста́вник неми́лостивых, во све́те повеле́ний Госпо́дних пребыва́ше и светлостьми́ Его́ исполня́ше ум свой и помышле́ние свое́. Мы же, лени́вии и нетерпели́вии, свет со́лнечный на всяк день зря́ще и глаго́лы Свята́го Писа́ния во ушесе́х свои́х иму́ще, ни о внима́нии глаго́лам ева́нгельским, ниже́ о науче́нии в наставле́ниих оте́ческих попече́ния возыме́хом. При́зри на ны, а́лчущия пи́щи духо́вныя, оба́че не приступа́ющия к трапе́зе Прему́дрости Бо́жия; даждь нам растворе́нное в ча́ше Ея́ вино́ и хлеб, сходя́й от рук Бо́жиих с Небесе́, да и мы испо́лнимся ве́дения за́поведей Госпо́дних и разуме́ния, что́ есть пра́во сле́довати стопа́м Бо́жиим; испроси́ нам благослове́ние Госпо́дне, науча́ющее оправда́нием Его́, и приведи́ ны с собо́ю пред Лице́ Бо́жие, Ему́же ты предстоя́л еси́ при́сно, я́коже и пре́жде просия́вшии святи́и му́жи и жены́, да тобо́ю вразумле́ннии и наста́вленнии, пути́ своя́ испра́вивше, удосто́имся вни́ти в безконе́чную све́тлость Небе́снаго Ца́рствия, иде́же ку́пно с ли́ки святы́х и со́нмы Безпло́тных сподо́бимся при́сно воспева́ти Отца́, Сы́на и Пресвята́го Уте́шителя Ду́ха, Тро́ицу Единосу́щную и Неразде́льную, во ве́ки веко́в. Ами́нь.
Tags: Минея Дополнительная, богослужебные тексты, июнь, молитва, моё творчество, святые Максимы, январь
Subscribe

  • 22 мая (4 июня) — память…

    …прав. Мелхиседека первосвященника, Царя Салимского († ок. 2000 до Р. Х.), святых 150-ти Отцев II Вселенского Собора (381), преп. Калии девы, свщисп.…

  • 18 (31) мая — память…

    …мучч. Ираклия, Дионисия и Христины девы, Афинских, Петра Лампсакийского, Андрея и Павла Месопотамских, Венедима и Павлина Вифинских († ок. 249 –…

  • 16 (29) мая — память…

    …блаж. отроковицы Музы (V), преп. Вараса Константинопольского (VI), свщмч. Феодора (Несторовича), еп. Вершечского (†1594), препп. Силы (†1783),…

  • Post a new comment

    Error

    Anonymous comments are disabled in this journal

    default userpic

    Your IP address will be recorded 

  • 2 comments