Уставщик (ustavschik) wrote,
Уставщик
ustavschik

Category:

Служба священномученику Арсению (Мацеевичу)

Служба святому Арсению составлена инокиней Смарагдой (Зыковой), насельницей Толгского монастыря Ярославской епархии.

Служба священномученику Арсению (Мацеевичу),
митрополиту Ростовскому и Ярославскому.
На велицей вечерни
Б
лажен муж: 1-й антифон.
На Г
осподи воззвах: стихиры, глас 8.
Подобен: О,
преславнаго чудесе:
Красуйся и ликуй, Русская Церковь Православная, / освящайся славою чад твоих, / се ныне торжествуем память всехвальнаго архиерея Божия, / пастыря добраго, священномученика Арсения блаженаго, / за чистоту догматов церковных живот свой положившаго, / истиннаго поборника // веры православныя.
Веселися, земле Ростовская, / и радуйтеся вси вернии людие, / яко новое солнце духовное возсия нам на мысленней тверди небесней / озаряет вся концы вселенныя, / темже молим тя, святителю Христов Арсение достохвальне / славы вечныя сопричастниче, // моли Бога о спасении душ наших.
Приидите празднолюбцы благословеннии, / торжествуйте память достоблаженнаго святителя / с волчцы хищными, расхищающими двор церковный / крепкую брань мужественно сотворшаго, / темже и страдания претерпел еси / и венец победный от Господа со славою приял еси, / сего ради молим тя, / священномучениче Арсение, // помяни и нас пред Господем.
Слава, глас тойже:
Ныне наста день светлаго торжества церковнаго, / ангели небеснии ликовствуют, / святых же лики вкупе приемлют / и любезно лобызают сотаинника чуднаго славы Божия, / Арсения всехвальнаго, / и мы на земли почитая святую память твою, / истинный архиерее Божий, // песненными похвалами тя ублажаем.
И ныне, догматик: Кто Тебе не ублажит:
Вход, прокимен дне, чтения три святительская:
Притчей чтение: П
амять праведнаго:
Притчей чтение: Уста праведнаго:
Премудрости Соломоновы чтение: Праведник аще постигнет:
На литии стихиры, глас 4.
Подобен: Д
ал еси знамение:
Мысленныя очи к Богу вперив, / о славе Дома Божия, еже есть Церковь Христова, / велию ревность имел еси / в благочестии и вере паству утверждая, / догматы церковныя нерушимо хранил еси, / с псалмопевцем воспевая: // «Дому Твоему подобает святыня, Господи, в долготу дний».
Мудрования плоти отложив, / мир же с его соблазнами отвергнув, / истинную веру православную крепко возлюбил еси, / житие иноческое волею избрал еси, / полагая во Господе спасение твое, / богомудре отче Арсение, зашитниче иноческих обителей // и молитвенниче за нас ко Господу.
Глаголы Живота вечнаго пастве возвещая, / истинным рачителем о умножении стада Христова показался еси, / в благочестии и чистоте соблюдал еси овец церковных / и ныне упасай нас, отче Арсение, // чтущих святую память твою.
Слава, глас 8.
Подобен: О,
преславнаго:
О, священная главо, всехвальне святителю Арсение, / святую твою память празднуя, / вспоминаем страдания, борения и труды твоя, / како ты мирския похоти отринув, / в благочестии и правоверии пожил еси, / Слово Божие в стране сибирстей нача сеяти, / последи же и землю ростовскую обильно уплодоносил еси, / еще же и раскольники в лоно Церкви Православныя возвратил еси, / и ныне стадо Христово в единстве соблюди // и моли о спасении душ наших
И ныне, Богородичен, глас тойже:
Славу Свою огнезрачною иконою / Ростовскому святителю некогда явила еси, / превысшая всякия славы Мати Божия, / Христа во чреве неопально носившая, / молим Тя, Пречистая Владычице: // попали терние грехов и прегрешений наших, яко Милосерда.
На стиховне стихиры, глас 5.
Подобен: Р
адуйся:
Радуйся, светоносный уме, / Премудростию Божиею озаренный, / благодатию Святаго Духа преисполненный, / радуйся, богоглаголивая трубо Господня, / ко благочестию вся призывающая, / о Страшнем Суде Божием и о мучениях грешников немолчно возвещающая, / отче святителю Арсение, / даруй нам зрение грехов наших // и моли о спасении душ наших.
Стих: Честна пред Господем / смерть преподобных Его.
Радуйся, зареносный сосуде Духа Святаго, / всю вселенную ведением Истины просвещающий, / живоносным Светом Любви Христовой сердца наша озаряющий, / благоухания духовнаго вся исполняющий и мрак душевный разгоняющий, / отче блаженне Арсение, // просвети нас светом Истины.
Стих: Праведник яко финикс процветет, / яко кедр иже в Ливане умножится.
Радуйся, земле Русская, / яже возрасти ветвь винограда Христова, / рачительно с любовию привитую к Лозе Истинной, / плоды многая добродетелей принесшую / и в Вертоград Небесный со славою приятую, / и райския сады святых Божиих собою пополнившую, // священномученика Арсения в песнех прославим.
Слава, глас и подобен тойже:
Радуйся маслино плодовитая, / священномучениче Арсение, / яко чада твоя духовная / яко Новосаждения масличная в странах дому Церкви Небесныя / с лики святых достойно веселятся, / прославляюще Бога, // дивнаго во Святых Своих.
И ныне, Богородичен воскресен.
Аще ли не празднуеши, Богородичен, глас 6:
Озарися вся вселенная рождеством Твоим / и прославися имя Твое, Богородительнице, / дивяся и ужасаяся чудному таинству смотрения Божия, / молим Тя, Пречистая Владычице, / вознеси теплыя молитвы к Рождшемуся из Тебе Христу Богу нашему, / да пощадит нас в день Судный // и дарует велию милость.
Тропарь, глас 2:
Православия столпе несокрушимый, / Церкви Христовой защитниче непобедимый, / Слова Божия цевница сладкозвучная, / земли Ростовския славо и украшение, / за Истину даже до смерти гонение лютое / от новой Евдоксии царствующей / подобно Златоустому Иоанну смиренно претерпел еси, / и за сие мзду небесную многую / по Слову Божию приял еси / святителю Арсение достоблженне, // моли Христа Бога спастися душам нашим.
НА УТРЕНИ
По 1-м стихословии седален, глас 4:
Проповедав Слово Божие со тщанием, многая овцы словесныя ко Христу привел еси, отче блаженне, образом жития твоего чада церковныя в твердости исповедания веры православныя укрепил еси. И ныне святителю Арсение прехвальне, даруй нам силы духовныя во исповедании имени Христова.
Слава, и ныне, Богородичен:
Оружие скорбное душу Твою пройде, и страдание лютое уязви сердце Твое, Богородице, егда стояла еси при Кресте Господнем, обаче велию радость обрела еси в славном Воскресении Христове и паки славу непреходящую, в Горних селениих от Господа возвеличенная, прияла еси, ликов ангельских непрестанное пение
По 2-м стихословии седален, глас 6:
Мужественное сердце твое благодати обильно исполнися, светом божественным светло озарися, святителю Арсение, егда яко пророк Илия громогласный, о славе Божией возревнова, словом огненным устремися на нечестивыя богоборцы, обличил еси сильных мира сего, разоряющих Церковь Христову.
Слава и ныне, Богородичен:
Покрываеши всю Землю Русскую покровом молитв и милости твоея, Преблагословенная Заступница рода нашего, покрый нас от гнева Божия в страшный день Суда, заступи и помилуй нас, Дево Всепетая.
По полиелеи седален, глас 6:
Слово Божие сеяше обильно, паству, яко пшеницу добрую, юже имут собрати ангели грознии в житницы небесныя, неленоство приуготовлял еси, богомудре святителю Арсение, последи же и сам, яко добротная пшеница тяжкими страдании измелен был еси, уготовася в чистый хлеб Божий.
Слава и ныне, Богородичен:
Греховными узами связаны, и цепями страстей злосмрадных окованы, в смех и поругание демоном бываеми, к тебе, Пречистой, в скорби вопием: спасай нас от тех молитвами Твоими, велия Заступница наша.
По 50-м псалме стихира, глас 6:
«Боже, в помощь мою вонми, Господи, помощи ми потщися», / — сердцем и усты тако с верою взывал еси, отче Арсение многострадальне, / егда, яко аспид змиин, / в лютости Иезавели сродная самодержица русская, / взыскаше души твоея, / лиши тя сана архиерескаго, монашескаго чина и имени во Святом Крещении нареченнаго, / за сии страдания возвеличи тя Господь / и дарова тебе имя паче всякаго имени // и венец нетленный в Царстве Славы Своея.
Канон, глас 8, его же краегранесие:
У
крепишася враги мои, изгонящии мя неправедно.
Песнь 1
Ирмос: Воду прошед, яко сушу, и египетскаго зла избежав, израильтянин вопияше: Избавителю и Богу нашему поим.
Припев: Святый священномучениче Арсение, моли Бога о нас.
Утренневаше дух твой к Богу Живому, святителю Арсение, егда вся красная мира отринув и мир зело преобидев, житие иноческое взыскал еси, и яко елень на источник, к живой воде Слова Божия устремился еси.
Корабль души твоея, отче блаженне, великое море скорбей прошед и остася цел и невредим, яко управляем искусно кормилом Заповедей Божиих, темже безбедно достиже пристани Христовой вечнаго упокоения,
Раскольники многия в бурном море ереси погибающия во пристанище благоотишное управил еси, благодатию Слова Божия их вразумляя, в лоно Матери Церкви Православныя возвратил еси, и ныне не остави нас, с верою молящихся тебе, отче Арсение.
Его же трепещут и трясутся херувимы и воспевают ангельския воинства проповеда многочисленней пастве своей Единаго Бога в Триех Лицех чтимаго Отца, и Сына, и Святаго Духа нераздельне и неслиянне.
Богородичен: Превысшая херувимов и серафимов явися чистотою Богородице Дево, совокупившая небо и землю Рождеством своим, совокупи и нас Сыну твоему Христу Богу нашему во святем Таинстве причастия.
Песнь 3
Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний краю, верных утверждение, едине Человеколюбце,
Избави мя от клеветы человеческия и сохраню заповеди Твоя, сердцем горце вопиял еси, отче Арсение, егда приближишася гонящии тя беззаконием и помышляющии на тя злая.
Шествовал еси от силы в силу, егда Господь избра тя на служение Церкви Своей, облече тя во святительский омофор, святителю Арсение, дарова ти паству Тобольскую.
Архипастырское слово твое быша со властию, овцы Христовы увещевал еси, крепко Матерь Церковь защищая от нечестивых и злонамеренных чад ея.
Сила Духа Божия, живущая в храме сердца твоего, побуди тя на подвиги и труды твоя, ими же трудился еси до положения живота своего за овцы словесныя.
Ястие и питие твое быша слезы покаянныя и сокрушение сердечное и молитва о чадех твоих, еще же и милосердие к неимущим и обездоленным, темже сторицею воздаяние приял еси в райских селениих наслаждаяся, отче премилостиве.
Богородичен: Врата райския отверзошася Рождеством твоим, Вратарнице Небесная, Дево Марие, и грешницы внидоша ими, моли Сына своего Христа Бога нашего, да отверзет и нам сии врата небесныя и внидем вонь.
Седален, глас 4:
Ростовская земле, веселися и славься, яко на престоле твоем явися святитель Христов верный, противоборец всякому нечестию, защитник крепкий веры православныя, апостолов Христовых проповедник велегласный, обидимых утешитель, алчущих питатель, ему же вопием: отче Арсение милостиве, моли Бога о душах наших.
Слава, и ныне, Богородичен:
Агница неискусобрачная, дев похвало и матерей славо, девство и рождество сочетавшая, чудо Вифлеемскаго рождества всему миру явившая Мати Божия моли Сына своего Христа Бога нашего даровати нам мир и велию милость.
Песнь 4
Ирмос: Услышах, Господи, смотрения Твоего таинство, разумех дела Твоя, и прославих Твое Божество,
Зряху тя молитвенника тепла и предстателя пред Богом, Безкровную Жертву с благоговением приносящаго, ублажаху тя вси монаси и мирстии, отче святителю блаженне, тако и мы ныне вопием: умоли Христа Бога, Ему же в житии доброчестне послужил еси, даровати нам молитву Именем Его святым и покаяние сердечное
Имея власть вязати и решити, еще сый на земле живущ, наипаче же ныне у Престола Божия стоящ, разреши вериги грехов и прегрешений наших иссуши страсти телесныя и душевныя и даруй нам силы духовныя братися с врагом невидимым.
Мысленным волком звероуловлен аз грешный, к тебе взываю в скорби сердца моего, отче святителю Арсение, подаждь ми чистоту помышлений и рачение в исполнении Заповедей Христовых.
Богородичен: Освященная Духа Святаго нашествием Пресвятая Дево, соделалася еси Купиной Неопалимою, Юже виде Моисей горящу и несгараему, сему зело дивяся, попали Всеблагая Мати Божия тернии грехов моих.
Песнь 5
Ирмос: Просвети нас повелении Твоими, Тосподи, и мышцею Твоею высокою, Твой мир подаждь нам, Человеколюбче.
Имея мудрость духовную, вся силы души твоея устремлял еси к Богу, непрестанно Имя Иисусово в сердце храня, яко мечем огненным страсти посекал еси, тако посецы и наша злая помышления.
Искуси тя Господь, и не обретеся в тебе неправда, яко благодать Святаго Духа в очищенном доме сердца твоего вселися и дано ти зрети грядущая, яко настоящая, еще в веце сем, ныне же ведая наши немощи, помози нам предстательством твоим, отче Арсение.
Зриши ныне вся небесная и благая, яже в уповании и надежде еще сый на земли взыскал еси, отче Арсение блаженне, достойное по Слову Божию приемлеши.
Богородичен: Горо Несекомая, от тебе бо рождеством отсечеся Камень нерукосечный Христос Бог наш, и наполни всю вселенную учением о Царствии Небеснем, не лиши сего и нас грешных, Мати Божия, уповающих на помощь твою.
Песнь 6
Ирмос: Молитву пролию ко Господу и Тому возвещу печали моя, яко зол душа моя исполнися и живот мой аду приближися, и молюся яко Иона от тли, Боже возведи мя.
Ополчишася на тя сильныя мира сего восхотев земли церковныя изъяти и имение церковное расхитити, овогда соделася прискорбна душа твоя даже до смерти, тако сетовал еси: «Горе убо нам, бедным архиереем, яко не от поган, но от своих мнящих быти овец православных, толикое мучительство претерпеваем».
Ничтоже успе разъяренная царица егда отъяше от тебе сан архиерея, паки и монашеский чин и нареченное имя и паки осуди та на изгнание из отечества, темже ныне ангелом хранителем земли Ростовския явися и теплым молитвенником за землю Русскую, из нея же изгнан бе злобою.
Яко Иона во чреве китове бысть три дни понеже проповедию спасе Ниневию, тако и Христос три дни сокрыся в сердцы земли пред славным Воскресением своим, тако и тя сокрыша гроб каменный узилища твоего, из него же в вечную жизнь прешел еси и обители небесныя наследова.
Богородичен: Щит и упование, Стено нерушимая и Прибежище всех грешных, Мати Божия, сохраняй нас от враг борющих нас силящихся низринута нас в пропасть адову.
Кондак, глас 6:
Море свирепое страданий тяжких / за Церковь Христову Силою Божиею преплыл еси, / и ко пристанищу Небесному безбедно достигл еси, / сердцем вопия Богови: / «Благо есть, яко смирил мя еси», / ныне же в Царстве смиренных и кротких пребывая, / многострадальне отче Арсение, / моли, да ничтоже нас разлучит от Любви Христовы.
Икос
Апостольких преданий ревнителю, Слова Божия проповедниче нелестный, архипастырю предобрый, отче Арсение, услыши от нас грешных похвалу сию: радуйся, лучезарный свете от Невечерняго Света Христова воссиявый, радуйся, трубо Господня громогласная, Слово Божие возвещающая, радуйся, архиерее богомудрый, прещением святительским нечестивыя вразумляющий, радуйся, священномучениче преславный, апостолов похвало и мучеников величание.
Песнь 7
Ирмос: От Иудеи дошедше отроцы в Вавилоне иногда, верою троическою пламень пещный попраша, поюще: отцев Боже, благословен еси.
Имущии образ благочестия, силы же его отвергшиися, воссташа на тя неправедно, озлоби тя и изгна во страну чуждую, ты же, отче блаженне, в горниле страданий, яко злато очищенный, возсиял еси небесным светом, озаряя нас Светом Истины, поющих Богу: Благословен еси Боже, отец наших.
Источник жизни Христос преобрази тело смирения твоего, содела сообразно телу славы Своея и дарова ти житие вечное на небесех, идеже и Сам пребывает во веки, мы же, взирая на непреходящую славу твою, молим тя, отче святителю Арсение, испроси нам добродетельнаго жития, с умилением взывающим Богу: благословен еси, Боже отец наших.
Мнози скорби праведным, сказует божественный псалмопевец, и от всех их избавит я Господь, тако воспевал еси отче Арсение, разумея во Истине сие Слово Божие, иногда во узах поя Богу: благословен еси Боже, отец наших.
Богородичен: Явившая миру Солнце Незаходимое, просветившее всю вселенную светом Истины Христа Бога нашего, Его же моли, Богородице Дево, да озарит и наша сердца светом благодати Своея и просветит очи мысленныя рабов Своих.
Песнь 8
Ирмос: Царя Небеснаго, Его же поют вои ангельстии, хвалите и превозносите во вся веки.
Ничтоже возмогша разлучити тя от Любви Христовы: ни скорбь, ни теснота, ни угрозы и прещения властителей, ни изгнание, ни узы темничныя, ни самая смерть, вводящая тя в живот вечный, идеже ныне в небесней славе пребывая поеши Богу: благословен еси, Боже, во веки.
Егда, отче Арсение праведне, воссташа на тя силы адстии, научиша злочестивыя людие гнати тя и озлобляти всяко, тогда же колокольный звон ростовских церквей торжествова победу над силами тьмы, благовестием показуя людем святость жития невиннаго изгнанника, поющаго Богу: благословен еси, Боже, во веки.
Попусти Бог дому Церкви Своея озлобленной быти от нечестивых чад ея, яже расхищаху имущество церковное, упраздняху монастыри российстии, в плач велий повергаху боголюбивыя иноцы, на защиту оных ты мужественно возвысил глас свой, вкупе с ними вопия Богови: благословен еси, Боже, во веки.
Богородичен: Агнице Неискусобрачная, гнев Божий от глав наших отводящая, Агнца, вземлющаго грехи мира нетленно рождши, даровала еси нам спасение и жизнь вечную, Мата Божия, и ныне не престай молитися о нас грешных.
Песнь 9
Ирмос: Воистину Богородицу тя исповедуем, спасеннии Тобою, Дево Чистая, с безплотными лики Тя величающе.
Великия славы ангельския, отче Арсение всехвальне, сподобился еси в небесных селениих, идеже лики святых прославляют подвиг души твоея, како ты, о красоте Церкви Христовой ревнуя, душу свою полагал еси и не убоялся еси пострадати за славу Дому Божия даже до смерти.
Егда жители ростовстии зряху тя, отче боголюбиве Арсение, устрояюща церковь во имя святителя Николая, радостию велиею возрадовашася, за сие благочестивое деяние ублажаху тя, темже молим тя, святителю Арсение, вкупе со святителем Николаем и всеми святыми, моли Бога о нас грешных.
Даровася ти, архиерее Божий, не точию имя Христово проповедати, обаче и страдати по Нем, в гробе же каменнем, подобно Христу, вселитися, идеже вообразися в тебе Христос и воскреси тя Воскресением Своим.
Ныне приемлеши мзду небесную, юже уготова Христос любящим Его. тамо вкупе с лики святых славиши Бога, яко иногда в зерцалех гаданий, ныне же явно зриши Лик Пресвятыя Троицы, Юже умоляй о спасении душ наших.
Богородичен: Одигитрия нашего спасения явилася еси, Нечаянная радость, покаяния и утешение в скорби, Скоропослушница во исполнении прошений наших, Взбранная Воеводо и Покров Всемощный, Мати Божия, исполни каждому по прошению их и даруй нам оставление грехов и прегрешений наших.
Светилен
Вси хотящии благочестно жити о Христе Иисусе, гоними будут, сие слово божественнаго Павла на тебе точию исполнися, егда чрез тернии страданий узрел еси Свет славы Христовой и венец терновый, еже на главе Его превратися в венец победный, Им же венча тя, святителю добропобедне Арсение, Христос Бог наш и дарова ти вечное блаженство райское, посему молим тя, да возсияет и в наших сердцах Свет Христов.
Слава, и ныне, Богородичен:
Пресвятая Богородице Дево, егда найдет на нас гнев Божий, и солнце сокрыет лучи своя, луна не даст света своего, и звезды с небес спадут, тогда воспомяни глас молитв наших к Тебе и слез пролиянных не премолчи, паки и Сама пролей слезы теплыя о спасении душ наших, да вкупе со святителем Арсением и со всеми святыми прославим Тя во веки
На хвалитех стихиры, глас 5:
Радуйся, земле Ростовская, / благословенна ты, яко обрела еси новаго молитвенника пречудна, / ангела земнаго и человека небеснаго, / вернаго друга Христова архиерея Божия, / еже от многия скорби чрез огнь и воду мучений и гонений лютых / прешел еси от смерти к Животу вечному, / наследова блаженства райския, / идеже в сонме новомученик Российских, / отче Арсение прехвальне, // моли о спасении душ наших.
Доме крепкий добродетелей многих, / преславное жилище Духа Святаго, / апостолом Христовым единонравне, / святителем славо и удобрение, / мученическому лику сопричастниче, / святителю Арсение достоблаженне, // моли о еже даровати нам велию милость.
Рая Небеснаго жителю преславный, / тайнозрителю Божественныя славы, / благоуханная цевнице Пресвятаго Духа, / гусли сладкозвучныя Божественнаго гласа, / пресветлый светильник, в молитве у Престола Божия присно горящий, / святителю отче Арсение, / испроси нам у Христа Бога нашего молитву покаянную, / твердость в исполнении Заповедей Христовых, // да дарует нам прежде конца покаяние.
Слава, глас 6:
Приидите, празднолюбцы благочестивии, / вкупе прославим новаго чудотворца и молитвенника за землю Русскую, / вернаго служителя Христова, / свет от источника Света приявшаго, / яко новая звезда на духовнем небе церкви Православныя возсиявшаго, / священномученика Арсения прехвальнаго, // молящагося о спасении душ наших.
И ныне, Богородичен, глас тойже:
Невещественный Свет Духа Святаго / осени девственную утробу Твою, / Всепречистая Дево, заченши бо Единаго от Троицы Сына Божия, / Его же неопально родила еси на спасение миру / отныне ублажают тя вси роди, яко Богородительницу / Христа Бога рождшую / Ему же молися да помилует нас в оный Судный день // и поставит одесную Себе, яко Многомилостив.
Молитва
О великий угодниче Христов, многострадальне святителю Арсение! Умилосердися убо о мне грешнем, услыши слезное мое моление. Не возгнушайся скверных моих язв греховных. Приими недостойное мое хваление, от всего сердца тебе возносимое. И милостив сотворися на мои прошения к тебе, многомощному заступнику моему пред Господем. Умоли Всеблагаго Бога моего даровати дух сокрушения о гресех моих, дух смирения, кротости и незлобия, еще же вся заповеди Его неленостно исполняти, к ближнему любовь и милосердие выну являти. Наипаче же имя Его Сладчайшее в сердце и уме содержати и устами безбоязненно исповедати. Да дарует молитвами твоими Христос Бог наш всем призывающим имя Его святое вся потребная ко спасению, дабы во всякое время и на всяцем месте с любовию славилось имя Всесвятыя Троицы, Отца и Сына и Святаго Духа, во веки веков. Аминь.
Tags: Минея Дополнительная, богослужебные тексты, сканированное
Subscribe

  • Post a new comment

    Error

    Anonymous comments are disabled in this journal

    default userpic

    Your IP address will be recorded 

  • 0 comments